ئەڤرۆ نیۆز، سالار دۆسکی:
ئەندامەکێ لژنا سامانێن سرۆشتی و دارایی و ئابووری ل پەرلەمانێ کوردستانێ بۆ مالپەرێ ئەڤرۆ نیۆز ئاشکراکر کو چ جاران وەک ڤی دەمی ل گەل بەغدا دبێ موونەت نین و ھەر دەمێ بەغدا پابەند نەبیت ب رێکەفتنێ ل گور قانوونا ئەڤ سالە دێ سەردەریێ ل گەل کەین.
یەرونت نیسان، زێدەتر ب مالپەرێ ئەڤرۆ نیۆز گۆت: ھەکە ل دووڤ رێکەفتنا مە و بەغدا بەرامبەرپەترۆلا ب رێکا سومو دچیت بەغدا پارە ھنارت دێ پابەند بیت، لێ ھەیڤا نیسانێ مە پتر ژ ٥٥٠ بەرمیلان رۆژێ ھنارتینە و بەرامبەر نیڤا وی پارەیی نەھاتیە، ئەم پشتەڤانیا ھەلویستێ سەرۆکێ حوکمەتا ھەرێما کوردستانێ دکەین، یان بەغدا دێ پابەندبیت یان دێ راستەوخۆ پەترۆلێ فرۆشین.
نیسانی ھێشتا گۆت: دێ گازا کەرکووکێ فروشین و دێ کارێ برێڤەبرنێ ل پارێزگەھێ کەین و داھاتێ پەترۆلا وان ھەر دێ بۆ زڤریت، ھەر چ کێشە نابن چونکە بۆدجا ٢٠١٥ مادا (١٠) برگا سێ دیارکریە ھەر لایەنەکێ پێگرنەبیت لایەنێ بەرامبەر نەیێ بەرھەڤ بڤێ قانوونێ.
ھەمان ئەندام پەرلەمان گۆت: خوشحالین کو کومپانی ھەنە پەترۆلێ بکرن و دیسان ھێشتا گاز نەفرۆتی پارا رادەستی ھەرێمێ بکەن، ب مەرەجەکی خوە ل گەل بەغدا ئێک لابکەین، ئەڤە بەر ب سەربەخۆیا ئابووری یە.
ئەڤرۆ نیۆز، قائید میرۆ:
ھژمارەکا ئاوارەیێن پارێزگەھا رومادی گەھشتینە ھەرێما کوردستانێ و سەرۆکێ فڕاکسیۆنا گۆڕان ل جڤاتا پارێزگەھا ھەولێرێ ئاماژە ب وێ چەندێ دکەت، پێدڤیە ئاوارە د ناڤا کەمپادا بھێنە ئاکنجیکرن نەک د ناڤا باژێڕان دا ببنە بارگرانی بۆسەر خەلکێ ھەرێمێ.
عەبدولڕەحمان موھەندیس، سەرۆکێ فڕاکسیۆنا گۆڕان ل جڤاتا پارێزگەھا ھەولێرێ بۆ ئەڤرۆ نیۆز دیارکر كو حوکمەتا ھەرێما کوردستانێ ھەر ل دەستپێکێ چو بەرنامە نەبووینە بۆ ھاتنا ئاوارەیان، پێدڤی يه کەمپێن تایبەت بۆ ئاوارەیێن عەرەب بھێنە ڤەکرن، چونکە پەرت و بەلاڤبوونا وان زۆر مەترسی ھەنە ھەر لایێ ئەمنی ھەتا گرانبوونا بازاڕی بەرچاڤیا وەلاتێن بیانی عێراقێ ژی باشتربوو و گۆت: “ھاتنا ڤێ ھژمارا زۆرا ئاوارەیان بووینە بارەکێ گرانى بۆ خەلکێ مە، چونکە بووینە ئەگەرێ گرانبوونا کریا خانیان و بازاڕی و ل سەر كيستێ خەلکێ مە دژین”.
عەبدولڕەحمانی گۆتژی: “ئەڤان ئاوارەیێن عەرەب ب تایبەتی ئەگەر بەحسێ یێن رومادی بكەین کو ھژمارەک ھاتینە ھەولێرێ و بڕیارە ھێشتا بگەھن، ئەڤانە ل پارێزگەھێن خوە بودجە ھەیە و نوکە دکەڤنە سەر کوردستانێ بەلێ بێ بودجە دھێن، چەندین جارا مە پێشنیارا ڤەکرنا کەمپا کریە و نوکە پارێزگەهـ یا مژۆلە ب ڤەکرنا کەمپا بۆ ئاوارەیێن ئەنبار و یێن بەری نوکە ژی”.
ئەڤرو نیوز،بارزان مزووری:
به‌رپرسێ هێزا ئاگرى ل ميحوه‌رێ ناوه‌ران راگه‌هاند كو ئه‌ڤرۆ فرۆكێن هه‌ڤپه‌يمانان و پێشمه‌رگێ كوردستانێ بۆردومانا چه‌كدارێن داعش كر و 15 چه‌كدارێن وێ كوشتن.
لوقمان شه‌رفانى به‌رپرسێ هێزا ئاگرى ل ميحوه‌رێ ناوه‌ران بۆ ئه‌ڤرۆ نيوز گۆت: “نيڤرۆيا ئەڤرۆ رۆژا چارشه‌مبى رێكه‌فتى 27ى گۆلانا 2015ێ فروکەیێن ھەڤپەیمانان ب ھەڤکاری د گەل ھێزێن پێشمەرگەی دو ترۆمبێلێن له‌شكرى يێن داعش د ناڤبه‌را گۆندێن فازليه و قامچى دا بوردومان كرن و د ئه‌نجام دا 15 كه‌س هاتنه كوشتن و دو ترۆمبێل ژى ژ ناڤبرن”.
دا زانين كو داعش ب مه‌ره‌ما ڤه‌شارتنا چه‌كى ل وان ده‌ڤه‌ران بوو و ب هيڤى چه‌كه‌كێ مه‌زن يێ ژ مووسل ئينايى ل وێ ده‌ڤه‌رێ ڤه‌شێرن.
ئەڤرۆ نیۆز، قائید میرۆ:
ل دەڤەرەکا مووسل ئەڤرۆ فڕۆکەیێن ھەڤپەیمانان کاروانەکێ ترۆمبێلێن داعش کرە ئارمانج و بەرپرسەکێ کورد ژی دبێژیت، والیێ مووسل د ناڤا ئەڤی کاروانی دا بوویە و گومان ھەیە ئەو ژی ھاتبیتە کوشتن.
غەیاس سورچی، پەیڤدارێ مەلبەندێ ئێکەتیێ ل نەینەوا بۆ ئەڤرۆ نیۆز گۆت: “سپێدەھیا ئەڤرۆ رۆژا چارشه‌مبى رێكه‌فتى 27ى گۆلانا 2015ێ فڕۆکەیێن ھەڤپەیمانان ل دەڤەرا بادۆش کاروانەکێ ترۆمبێلێن چەکدارێن داعش کریە ئارمانج و د ئەنجام دا زیانێن زۆر مەزن گەھاندینە تیرۆرستێن داعش”.
غەیاسی گۆتژی: “ب گورەی زانیاریێن گەھشتینە مە فڕۆکەیان 16 ترۆمبێلێن تژی چەکدارێن داعش کرینە ئارمانج و ھژمارەک ژ وان ب چەکدار ڤە ھاتینە سوتن و ھژمارەک ژی رزگار بووینە، بەلێ گومان ھەیە والیێ مووسل ژی د ناڤا کوشتیان دا بیت، چونکو د ناڤا ئێک ژ وان ترۆمبێلان دا بوویە و نوکە ئەم یێ زانیاریان کۆم دکەین بۆ پشتڕاستبوونا کوشتنا والیێ مووسل”.
ئه‌ڤرۆ نيوز:
ئه‌يوب ره‌مه‌زان رێڤه‌به‌رێ گشتيێ ره‌وشه‌نبيرى و هۆنه‌رى بۆ راديۆيا دهۆك به‌حس ل چالاكيێن ئه‌ڤرۆ ئێڤارى يێن كه‌رنه‌ڤالێ رۆژا پارێزگه‌هبوونا دهۆكێ دكه‌ت.
هه‌ر ئه‌ڤرۆ دانێ سپێدێ ل پانۆراما ئازادى ل دهۆكێ چه‌ندين سمينار ل سه‌ر پارێزگه‌ها دهۆكێ ل دۆر ده‌مێن به‌رى پارێزگه‌هبوونا وێ و پشتى پارێزگه‌هبوونا وێ هاتنه پێشكێشكرن و چاوانيا وێ وه‌كو پره‌ك د ناڤبه‌را پارچێن دى يێن كوردستانێ دا ب تايبه‌ت باكوورێ كوردستانێ.
ئەڤرۆ:
رۆژناما تایمز یا بریتانی د راپۆرتەکێ دا دیار دکەت کو لەشکرێ دو وەلاتێن وەک سووریە و عیراق ھەتا نھا ژی نەشیاینە ئاستەنگیان ل ھەمبەر پێشڤەچوونێن داعشێ دروست بکەن و ل سووریە و عیراقێ داعش رۆژ ب رۆژێ ب ھێز دکەڤیت و نھا داعشێ بەرێ خوە دایە پایتەختا ھەر دو وەلاتان، لێ ئەو یەک د دەمەکێ دایە کو داعشێ ب ھەیڤان شەرێ کوردان کر لێ نەشیا ئاخا وان داگیر بکەت و ژ بەر ھندێ ژی ئەو بەرخوەدان و سەرەدەریا کوردان یا گەل خەلکێ بیانی کو نھا ل کوردستانێ نە وەسا کر کو ھەلویستێ وەلاتێن رۆژئاڤا ل ھەمبەر کوردان بھێتە گوھۆرین و نھا پرانیا وەلاتێن رۆژئاڤا پشتەڤانیێ ل ھەرێما کوردستانێ دکەن و ھەکە کورد بریارەکێ بۆ پاشەرۆژا خوە بدەن ژی دێ وەلاتێن رۆژئاڤایی پشتەڤانیێ ل وێ بریارا کوردان بکەن و ئەوە ژی بۆ کوردان سەرکەڤتنەکا گەلەک مەزنە.
د بەردەوامیا راپۆرتێ دا ھاتیە دیار کرن کو نھا نێزیکی دو ملیۆن ئاوارە و پەنابەر ل ھەرێما کوردستانێ دانە و کورد وان دپارێزن، لێ بەغدا بەرھەڤ نەبوو کو دەرگەھێ خوە بۆ ئاوارێن پارێزگەھا ئەنبارێ ڤەکەت و ئەو ھەلویستێ کوردان ژی نیشا ددەت کو براستی وان شیایە ل ھەرێما خوە نموونەکا باش یا پێکڤەژیانێ دروست بکەن و ئەو یەک ژی تشتەکە کو ب سالانە وەلاتێن رۆژئاڤایی کار بۆ دکەن. ژ بەر ھندێ ژی ئەڤرۆکە ئەمریکا و ھندەک وەلاتێن ئوروپی ژی دخوازن کو ھێزێن پێشمەرگەە ب رەنگەکێ راستەوخوە ژ ئالیێ وەلاتێن ھەڤپەیمان ڤە بھێنە چەکدار کرن.
د بەردەوامیا راپۆرتێ دا ھاتیە دیار کرن کو شکەستنا لەشکرێ عیراقێ ل باژارێ رمادی ئەو یەک سەلماند کو لەشکرێ عیراقێ نەشێت شەرێ داعشێ بکەت و ئیرادا خوە نەمایە، نھا ژی بەرپرسێن ئەمریکی دترسن ھەکە چەکێن گران بدەنە لەشکرێ عیراقێ ئەو چەک دێ دیسان بکەڤنە دەستێ داعشێ و دێ ل دژی بەرژەوەندیێن ئەمریکا ھێنە بکارئینان و چەندین بەرپرسێن ئەمریکی داخواز ژ ئۆبامای کرینە کو ب جھێ چەکان ددەتە لەشکرێ عیراقێ بلا بدەتە کوردان چونکو کورد دێ بشێن ب وان چەکان داعشێ ژناڤ ببەن.
د پشکەکا دی یا راپۆرتێ دا بەحسێ ئالۆزیان د ناڤبەرا ھەولێر و بەغدایێ دا ھاتیە کرن و بەحسێ وێ یەکێ ھاتیە کرن کو ئەمریکا ژی باش دزانیت ئێدی باوەریا کوردان ب حوکمەتا ناڤەندی نەمایە و کوردان دڤێت وەک پێنگاڤا یەکێ سەربخوەیا خوە یا ئابووری وەربگرن و بشێن نەفتا خوە بفرۆشن، سالا بۆری ئەمریکا تا رادەیەکێ ئاستەنگی ل ھەمبەر فرۆشتنا نەفتا کوردستانێ دروست کر، لێ پشتی شەرێ داعشێ و سەرکەڤتنێن کو پێشمەرگێن کوردستانێ بدەستڤە ئیناین ھەلویستێ ئەمریکا ژی وەک بەرێ نەمایە و ھەکە کورد و بەغدا نەگەھنە چ رێککەڤتنەکێ ئەمریکا ژی دێ رازی بیت کو کورد بخوە نەفتا خوە بفرۆشن.
د دووماھیا راپۆرتا رۆژناما تایمز یا بریتانی ئەو یەک ژی ھاتیە دیار کرن کو ھەکە کورد بشێن د ھەلبژارتنێن پەرلەمانێ تورکیا دا بەندێ ١٠% دەرباز بکەن و پەیوەندیێن خوە ل گەل ھەرێما کوردستانێ باش بکەن ئەو یەک دێ کاریگەریا خوە ل سەر تورکیا ژی کەت و دێ ئەردۆگان ل ھەمبەر کوردان نەرم بیت و دێ بزاڤێ کەت کو پێنگاڤێن باش بۆ چارەکرنا پرسا کوردی ل تورکیا ب ھاڤێژیت، چونکو تورکیا دبینیت کو ئەو دێ بشێت مفایەکا باش ژ نەفت و گازا کوردستانێ وەربگریت و ژ بۆ وێ یەکێ ژی دھێتە خواستن کو دەستان ژ گۆتارا خوە یا توند بەردەت و بزاڤێ بکەت پرسا کوردی ل وەلاتێ خوە چارە بکەت، چونکو ئەردۆگان شیایە تا رادەیەک باش کۆنترۆلا خوە ل سەر ھەموو سازیێن دەولەتێ دروست بکەت و ئەو ھێزا ئەردۆگانی ھەیە کو بشێت پرسا کوردی چارە بکەت و گەلەک وەلاتیێن کورد ل تورکیا ژی دبێژین ھەکە ئەردۆگان پێنگاڤان بۆ چارەکرنا پرسا کوردی نەھاڤێژیت دێ جارەکا دی رەوشا تورکیا ئالۆز بیت.
ئەڤرۆ نیوز،زنار تۆڤی:
ژێدەرێن دەنگوباسێن قەتەرێ وەسا دانە دیارکرن کو سوباهی روژا پێنجشەمبی 28ى گۆلانا 2015ێ خالد عەتیە وەزیرێ دەرڤە یێ قەتەرێ دگەل شاندەکێ بلند یێ وی وەلاتی دێ گەهنە پایتەختێ عێراقێ بەغدا و د رێ و رسمەکی دا د هەمان روژدا بالیوزخانەیا وەلاتێ قەتەرێ دێ ل بەغدا هێتە ڤەکرن و هەروەسا چەندین پوتوکولێن بازرگانی ژی دناڤبەرا هەردو وەلاتان دا دێ هێنە ئەنجام دان.
ئه‌ڤرۆ نيوز:
چه‌ندين كۆمپانيێن وارێ ئاسايشا ئه‌لكترۆنى هوشداريێ د ده‌رباره‌يى ڤايرۆسه‌كێ نوو دا دده‌ن كو كه‌فتيه ناڤ فه‌يسبۆكى.
ب گۆره‌يى راپۆرته‌كا كۆمپانيا Malwarebytes labs ڤايرۆسه‌كێ نوو د ناڤ فه‌يسبۆكى دا به‌لاڤ بوويه و ئه‌و ژى يێ ب مه‌ترسى يه ل سه‌ر بكارئينه‌ران، ڤايرۆس دشێت ئه‌كاونتێن فه‌يسبۆكى ب راوه‌ستينيت و هه‌موو پێزانينێن كه‌سى و په‌يڤا نهێنى و وێنه‌يێن ناڤ ئه‌كاونتێ بكارئينه‌رى بدزيت و ببه‌ته ناڤ ژێده‌رێن خوه و هه‌وه ژێ بێ بار بكه‌ت.
ئه‌ڤ ڤايرۆسه ب ناڤێ Facebook Recovery ده‌ردكه‌ڤيت و هه‌كه ته لينكه‌كێ ژ وى ره‌نگى ديت، نابيت ڤه‌كه‌يى، چونكو ل ده‌مێ ڤه‌كرنێ ڤايرۆس ب ته‌مامى دێ د ناڤ ئه‌كاونتێ ته دا به‌لاڤ بيت.
نيشاندان