ئەڤرۆ نیۆز، سالار دۆسکی:
ئەندامەکێ جڤاتا نوونه‌رێن عیراقێ بۆ مالپەرێ ئەڤرۆ نیۆز دیارکر کو گڤاشتن یێ دھێنەکرن کو قانوونا دادگەھا ئتيحادی بھێتە پەژراندن و کوردان تێبینی ل سەر ھەنە.
حاکم سەرحان سلێڤانەی ئەو چەندە ژی گۆت: “ب ھەموو رەنگان قەبوول ناکەین چونکو ئەڤە تشتەکێ نەيێ دستووری یە و ناھێتە قەبوولکرن و ئەڤە دژی دەستوری یە”.
ھەڤدەم حاکم سەرحان سلێڤانەی ئاشکرا کر کو دادگەھا ئتيحادی ژ ١٣ کەسان پێک دھێن و کوردان دێ رۆلەکێ سەرەکی ھەبیت چونکو وەکو نەتەوەیێ دوویێ پشتی عەرەبان دھێتە ھەژمارتن”.
ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ په‌يامه‌ك ل دۆر هێرشا په‌كه‌كێ بۆ سه‌ر حزبا ديموكرات به‌لاڤ كر و تێدا گه‌له‌ك ب دژوارى هێرش كره سه‌ر وێ ئالۆزيا دروست بووى، ئاماژێ ب وێ چه‌ندێ ژى دكه‌ت كو كه‌س د شه‌رێ خوكوژيێ دا سه‌رناكه‌ڤيت و پێدڤيه بهێته ته‌حريم كرن.
سه‌رۆكێ هه‌رێما كوردستانێ د په‌ياما خوه دا دبێژيت: “گه‌له‌ك ب دژوارى ئيدانا وێ ئالۆزيێ دكه‌م ئه‌وا ل رۆژا 24ى گۆلانا 2015ێ د ناڤبه‌را پارتيا كرێكارێن كوردستانێ و حزبا ديموكراتا كوردستانا ئيرانێ دا ل ده‌ڤه‌رێن سنورى يێن هه‌رێما كوردستانێ و ئيرانێ دا روودايى. داخوازێ ژى هه‌ردو ا دكه‌ت بشێنه خوه و كێشێ خرابتر لێ نه‌كه‌ن و نه‌بنه ئه‌گه‌رێ پێشڤه‌چوونا ئالۆزيان و ب رێيا دانوستاندن و لێكتێگه‌هشتنێ بگه‌هنه چاره‌سه‌ريان.
مه‌سعود بارزانى دايه زانين ژى كو شه‌رێ خوگۆژى زيانێ دگه‌هينيته هه‌موو لايه‌كى و كه‌س ژى د ڤى شه‌رى دا يێ سه‌ركه‌فتى نابيت، دده‌ته زانين ژى كو ل سه‌ر ئاستێ حزبى و نه‌ته‌وى ژى چو به‌رژه‌وه‌نديه‌ك تێدا نينه. دبێژيت ژى: “پێشتر ژى مه راگه‌هانديه كو پێدڤيه ب هه‌موو ره‌نگه‌كى شه‌رێ براكوژيێ بهێته ته‌حريم كرن و نوكه ب هه‌مان ره‌نگ دووباره دكه‌م و نابيت شه‌رێ خوكوژيێ هه‌بيت و خوينا كوردان ب ده‌ستێ وان بهێته رێتن، پێدڤيه لايه‌ن ل ئاستێ به‌رپرساتيا نشتيمانى بن. هه‌ر ره‌نگه‌كێ شه‌ر و پێكدادانێ د ناڤبه‌را لايه‌نێن كوردى دا، دێ زيانێ ب پێگه‌هـ و ناڤوده‌نگێن گه‌له‌كێ كوردستانێ گه‌هينيت و دێ هيڤيێن خه‌لكێ كوردستانێ تێك ده‌ت.
سه‌رۆكێ هه‌رێما كوردستانێ د به‌رده‌واميا ناما خوه دا دبێژيت: “بۆ هه‌موو لايان رادگه‌هينين كو رێ ناده‌ين، گۆره‌پانا سياسى ببيته جهێ ژێكڤاڤارتنا حساباتێن سياسى و لايه‌نان ل گه‌ل ئێكدو. پێدڤيه حوكمه‌تا هه‌رێما كوردستانێ بزاڤێن خوه بێخيته كار بۆ كۆنترۆلكرنا ڤێ ره‌وشێ و رێگرتنێ ل پێشڤه‌چوونا ڤێ ئالۆزيێ د ناڤبه‌را هه‌ردو لايان دا.
ئەڤرۆ نیۆز، قائید میرۆ:
شەڤا بۆری تیرۆرستێن داعش ل ناحیا گوێڕ ھێرش کرە سەر ھێزێن پێشمەرگەیێن کوردستانێ، بەلێ ھێرشا داعش ژ لایێ پێشمەرگەی ڤه ھاتە شکاندن و پاشڤەبرن.
موقەدەم حسێن عەبدولا، فەرماندێ پێشمەرگەی ل میحوەرێ گوێڕ بۆ ئەڤرۆ نیۆز گۆت: “دەمژمێر 1:00ى شەڤا بۆری تیرۆرستێن داعش ل گوندێ تەلەڕیم یێ میحوەرێ گوێڕ ھێرشکرە سەر ھێزێن پێشمەرگەیێن کوردستانێ، بەلێ پێشمەرگە شیا ھێرشا داعش بشکێنیت و پاشڤەببەت”.
موقەدەم حسێن گۆتژی: “د ڤی شەڕی دا چەکێ گران و سفک ھاتە بکار ئینان، بەلێ ھێشتا دیار نینە زیانێن دوژمنی چبووینە، ژ بەر کو سەنگەر نێزیکی ئێکن پێشمەرگە نەشێت پشکنینێ بۆ کوشتی و زیانێن داعش بکەت”.
ئه‌ڤرۆ نيوز:
حوكمه‌تا هه‌رێما كوردستانێ ره‌زامه‌ندى ل سه‌ر هاتنا ئاوارێن رومادى بۆ هه‌ولێر بێ مه‌رج “كه‌فيل” ده‌ردبڕيت و وه‌زاره‌تا ڤه‌گوهاستنا عيراقێ ژى بێ به‌رامبه‌ر ئاوارێن وى باژێرى بۆ پايته‌ختێ هه‌رێما كوردستانێ ڤه‌دگوهێزن.
سه‌هيب ئه‌لراوى، پارێزگارێ ئه‌نبار د داخۆيانيه‌كێ دا بۆ سومه‌ريه نيوز ئاشكه‌را كر كو حوكمه‌تا هه‌رێما كوردستانێ ره‌زامه‌ندى ده‌ربڕيه ل سه‌ر وه‌گرتنا ئاوارێن باژێرێ رومادى بێ هه‌بوونا كه‌فيل.
ڤه‌گوهاستنا ئاوارێن باژێرێ رومادى بۆ هه‌رێما كوردستانێ پشتى رێ پێنه‌دانێ دهێت بۆ چوونا ناڤ باژێرێ به‌غدا، كو ماوێ دو حه‌فتيانه ل سه‌ر سنورێ وى باژێرێ ماينه وه‌سان و چه‌ند كه‌شان ژى ژ ئه‌گه‌رێ برسێ گيانێ خوه ژ ده‌ست دايه.
هه‌ڤده‌وم باقر زوبه‌يدى وه‌زيرێ ڤه‌گوهاستن و گه‌هاندنا عيراقێ راگه‌هاند: ڤه‌گوهاستنا هه‌موو ئاوارێن باژێرێ رومادى بۆ هه‌ولێر دێ ل سه‌ر ئه‌ركێ وه‌زاره‌تا وان بيت و پاش و ترۆمبێلێن تايبه‌ت دێ بۆ هێنه ئاماده‌كرن.
ب گۆره‌يى ئه‌و پێزانينێن ل به‌ر ده‌ست، زێده‌ترى حه‌فت هزار و 500 كه‌سێن ئاواره بووين ل سه‌ر سنورێن به‌غدا نه و رێ پێ ناهێته دان بچنه د ناڤ وێ پارێزگه‌هێ دا.
ئه‌ڤرۆ:
وه‌زاره‌تا به‌ره‌ڤانيا عيراقێ ئاشكه‌را دكه‌ت كو د ماوێ چه‌ندێ رۆژێن داهاتى دا، دێ ژماره‌كا چه‌كێ رۆسى د چارچۆڤێ گرێبه‌سته‌كا نوو يا د ناڤبه‌را به‌غدا و موسكۆ دا گه‌هيته عيراقێ.
وه‌زاره‌تا به‌ره‌ڤانيا عيراقێ ئاشكه‌را كر كو د ماوێ چه‌ندێ رۆژێن داهاتى دا دێ ژماره‌كا چه‌كێ رۆسى گه‌هيته عيراقێ و ب گۆره‌يى به‌ياننامه‌كا ئه‌وێ وه‌زاره‌تێ د ناڤ وى چه‌كێ دێ به‌غدا ژ موسكۆ وه‌رگريت 42 چه‌كێن لێزه‌رى و چه‌كێ دژى تانكان و 50 تانكێن دژى مووشه‌كان تێدانه و عيراق وه‌لاتێ ئێكێ يه ل جيهانێ دبيته خودان ڤى چه‌كێ پێشكه‌فتى يێ رۆسى.
ئەڤرۆ:
مەحمود محەمەد ئەندامێ مەکتەبا سیاسی و بەرپرسێ دەزگەھێ رەوشەنبیری و راگەھاندنا پارتی راگەھاند، چو ھەماھەنگی د ناڤبەرا حوکمەتا عیراقێ و حوکمەتا ھەرێما کوردستانێ دا بۆ راوەستانێ دژی داعشێ نینە.
مەحمود محەمەد زێدەتر بۆ رۆژناما (ئێران) گوت” بەری ھاتنا حوکمەتا عیراقێ یا نوکە، سیاسەتمەدارێن عیراقی بزاڤ دکرن ھەرێما کوردستانێ وەکو ھەڤپشکا داعشێ نیشا بدەت و مخابن ھەتا نوکە ئەو جۆرە ھزرکرنە یا ل دەف ھندەک کەسان مای، کو دێ بیتە ئەگەرێ وێ چەندێ د بەرەیێ ھزری دا ژی بچینە شەڕێ داعشێ و نە ب تنێ ل بەرەیێن شەڕی”.
ل دۆر وان کوردێن چووینە دناڤ رێزێن داعشێ دا، بەرپرسێ دەزگەھێ رەوشەنبیری و راگەھاندنا پارتی دبێژیت” پتریا خەلکێ مە موسلمانن و ھندەک ژوان ئەو ھەست یا ل دەف ھەی کو بکەڤن دبن کاریگەریا بانگەشەیا داعشێ، ئەرکێ کەسایەتیێن ئایینی، مامۆستایێن زانکۆیێ و دەزگەھێن راگەھاندنێ دەستێن خوە بکەنە دناڤ یەکدا ژبۆ رۆھنکرنا ڤێ چەندێ، نابیت ئەم ب تنێ ب چەکی بچینە شەڕێ داعشێ، بەلکو پێدڤیە بەرەیێ شەڕێ ھزری ژی ب ھێز بکەین، ئایین ل دەڤ داعشێ ئانکو کوشتن و تالانکرنا خەلکی یە و سەپاندنا ھزرا وانە، د دەمەکی دا ئایین بەرنامێ باشترکرنا ژیانا ئاشتیانەیە”.
گوت ژی” ئەو کارێن داعش ئەنجام ددەت، چو پەیوەندی ب ئیسلامێ و ئایینی ڤە نین، بەلکو داعش دوژمنا ئیسلامێ یە و تنێ ناڤێ ئیسلامێ کرێت دکەن” خۆیاکر “ب رێیا کەسایەتیێن ئایینی بزاڤێ دکەین روویێ راست یێ داعشێ بۆ خەلکی دیار بکەین و ب رێیا کۆمبوون و سمینار و گۆتاران راستیان ئاشکرا بکەین، کریارێن داعشێ بیدعەنە و ژ دەف خوە یێن دروستکرین و پەیوەندی ب سەردەمێ عەرەبێن جاھلیەتێ ڤە یا ھەی، کەنگی پەقاندنا مزگەفتان و جھێن پیرۆز ل دەف ئیسلامی ب رەوا ھاتیە زانین؟ داعش رێزێ ل چ کەسێ ناگرن، نە شیعە، نە سونە، نە مەسیحی و نە ئێزدی”.
ئەڤرۆ:
بەرپرسێ میحوەرێ ناوەران بۆ رۆژناما ئەڤرۆ دیار کر کو ژ لاوازیا لەشکرێ عیراقێ پارێزگەھا ئەنبار و باژێرێن دی یێن ب سەرڤە کەفتینە بن کونترۆلا چەکدارێن تیرۆرستێن داعشێ، نەکو ب ھێزا داعشێ ئەو باژێرە ھاتینە کونترۆلکرن و کەفتینە بن دەستێن وان .
سەربەست تروانشی بەرپرسێ میحوەرێ ناوەران زێدەتر گوت” چەکدارێن تیرۆرستێن داعشێ ھیڤیا پێشڤەچوونێ ل دەڤەرێن کوردستانێ ل سەر دەستێن پێشمەرگەی ژدەستدا و ل ھەموو میحوەرێن پێشمەرگەی ھێرشێ دکەن دھێنە شکاندن د ھێرشێن خوەدا و بۆ داعشێ قەناعەت یا پەیدا بووی و یا پشت راست بووی کو پێشمەرگە دربێن مەزن ل وان ددەت و پێشمەرگە ھێزەکا مەزنە و ژ پێش ھەموو جیھانێ ڤە شەڕێ تیرۆرستان دکەت”.
ناڤبری دیار کر کو سەنگەرێ پێشمەرگەی باشترین چەکێن تانک برن و ھەر چەکەکێ بکەڤیتە دەستێن داعش نەشێت بەرامبەری پێشمەرگەی راوەستیت و ھەر ج جۆرە چەکەک د دەستێن وان دابیت نابیتە ھۆکارێ وێ چەندێ کو دربی ل پێشمەرگەی بدەن ، نوکە پێشمەرگە چاڤدێریا خوە نادەتە سەر فرۆکان، بەلکو پێشمەرگە ب زیرەکیا خوە ھێرشێن داعشێ تێک دشکێنیت.
ل دۆر رەوشا داعشێ ل ناوەران دیار کر کو ھەر پلانەکا چەکدارێن تیرۆرستێن داعشێ ل میحوەرێ ناوەران بەری ئەنجام بدەن، پێشمەرگە ب چەکێ گران پلانێن وان ژناڤ دبەن و ورەیێن داعشێ ل ناوەران یێن لاواز بووین و نەشێن ژ بەر پێشمەرگەی و فرۆکان خوە دیار بکەن.
ئەڤرۆ:
ئەندامەکێ بەرێ یێ پەرلەمانێ عیراقێ ئاشکراکر کو کەفتنا باژێرێ رومادی ددەستێ چەکدارێن داعشێ دا، خالا مەترسیێ یە ل سەر حوکمەتا عیراقێ و لاوازیا وێ دیار دکەت.
سامی ئەترۆشی، ئەندامێ بەرێ یێ پەرلەمانێ عیراقێ بۆ رۆژناما ئەڤرۆ گۆت” کەفتنا رومادی دێ بیتە ئەگەرێ وێ چەندێ باوەریا خەلکی ب ڤێ حوکمەتێ کێم ببیت، شاشیا ھەر مەزن یا حوکمەتا عراقێ ئەوە دەست ب پێکئینانا حەشد شەعبی کری و بھێتە بکارئینان دژی تیرۆرستێن داعش، باشتر بوو حوکمەتا عیراقێ ئەڤ مەزاختیێ ل حەشد شەعبی دکەت بۆ راھێنانێ و مووچەی ، ئەڤ کارە ب لەشکرێ خوە یێ لاواز کربا، چونکی ئەندامێن حەشد شەعبی خەلکەکێ بێ سەربورە و تایبەت شەرێ تیرۆرێ بکەت و ئەو خەلکێ سڤیلێ ل گەل حەشد شەعبی دھێتە کوشتن دێ کارتێکرنا خوە ھەبیت و دێ کێشەکا بەردەوام دناڤا جڤاکێ عیراقی دا دروست کەت و کەرب و کین د ناڤبەرا خەلکێ عیراقێ دا مەزتر لێ ھێت”.
سامی گۆت” حەشد شەعبی ئەو شیان نینن رومادی ئازاد بکەت، ھەکە ل پارێزگەھێن دیالا و سەلاحەدین کارەک کربیت ژی، لێ ھێزێن ئیرانی و ھێزێن ئەسمانیێن نێڤدەولەتی ژی رۆلەکێ مەزن تێدا ھەبوویە”.
خویاکر ژی” دبیت ژلایەکی ڤە کورد مفاداربن کو سەنگا شەری کەفتیە ناڤەراستا عیراقێ و شەھیدێن کوردان کێمتر ژ پێشتر بھێنەدان بەرامبەر داعشێ، لێ دبینم ئەڤە دبەرژوەندیا داعشێ دایە، چونکی ئەو پشتەڤانیا نێڤدەولەتی یا بوو داعشێ دھێت، دێ پتر لێ ھێت تایبەت دەمێ ئەو کەسێن پشتەڤانیا وێ دکەن دبینن کو یا بەر ب پێش دچیت و باژێران داگیر دکەت و یا ب ھێز دکەڤیت، دڤی دەمی دا دێ شاشیێن حەشد شەعبی و شیعان مەزنتر لێ دھێن وتائیڤە گەری دێ مەزنتر لێ ھێت و ھندەک وەلات ڤێ چەندێ ب خوە بکار دھینن و دشێن لایەنێ سونی ب ھێز بێخن و لایەنێ سونی ژی چونکی ھوز و لایەن دلاوازن ژبەر ڤێ یەکێ داعش دێ مفای ژێ کەت”.
نيشاندان