ئه‌ڤرۆ نیوز:
تانه‌ر یڵدز وه‌زیرێ وزا توركیا راگه‌هاند نوكه ئاستێ هنارتنا نه‌فتا هه‌رێمێ گه‌هشتیه 650 هزار به‌رمیلان د رۆژه‌كێ دا و ئامانجا وان ئه‌وه ڤێ رێژێ بگه‌هیننه 1 ملیون به‌رمیلان.
ئاشكرا كر ژى كو نوكه ب رێیا دو بوریێن نه‌فتێ 40 و 46 ئینجى ل رێیا هه‌رێما كوردستانێ نه‌فت دهێته هنارتن و داهاتێ ڤێ نه‌فتێ یێ هه‌موو عیراقێ یه و د وى چوارچوڤه‌ى دا، توركیا هه‌رده‌م رێزێ ل ئێكه‌تیا عیراقێ دگریت.
ئه‌ڤرۆ نیوز:
ئه‌سیل نوجێفی، پارێزگارێ نه‌ینه‌وا د كۆنگره‌كێ رۆژنامه‌ڤانى دا راگه‌هاند ئه‌مریكا سوزا داى هه‌ڤكاریا پێشمه‌رگه و سوننان بكه‌ت و پشتى رزگاربوونا نه‌ینه‌وا ژى وه‌لاتیێن وێ پارێزگه‌هێ دشێن راپرسیێ ل سه‌ر هه‌رێمه‌كا سه‌ربه‌خو بكه‌ت.
ئه‌سیل نوجێفی، ده‌رئه‌نجامێن سه‌ره‌دانا خوه بۆ ئه‌مریكا و كومبوونێن ل گه‌ل به‌رپرسێن وى وه‌لاتى د وى كونگرێ رۆژنامه‌ڤانى دا به‌رچاڤ كرن و گۆت: د كومبوونێن ل گه‌ل به‌رپرسێن ئه‌مریكا ب روونى ب وى هاتیه گوتن كو دێ هه‌ڤكاریا پارێزگه‌ها نه‌ینه‌وا و پارێزگه‌هێن سوننان و هێزا پێشمه‌رگه‌ى هێته كرن، به‌لێ ب هه‌ماهه‌نگى ل گه‌ل حكومه‌تا ناوه‌ندى، به‌لێ گرنگى دایه مه كو ئه‌و هاریكارى بگه‌هنه ده‌ستێ مه.
ئه‌ڤرو نیوز ،بارزان مزوورى
راید فیراس یاسین ، به‌رپرسێ به‌شێ راگه‌هاندنا رێڤه‌به‌ریا به‌رڤانیا باژیرێ ئاكرێ بو مالپه‌رێ ئه‌ڤرو نیوز ئاشكرا كر كو ئه‌ڤرو ده‌مژمێر 12:14 خوله‌ك 17/5/2015 ئه‌م هاتینه ئاگه‌هدار كرن كو رویدانه‌كا ئاگر تێپه‌ربونێ ل تاخێ قاچاغ ل نێزیك سه‌نته‌رێ ئاكرێ يىَ په‌یدابووى و تیمێن ئاگر ڤه‌مراندنێ گه‌هشتنه جهێ رویدانێ و د ماوه‌یه‌كێ كێم دا ئاگر هاته كونترول كرن .
ناڤبرى دیار كر كو ئاگر ژ ئه‌گه‌ره‌كێ نه‌دیار ڤه به‌ربویه پرێزێن گه‌نمى و 10 دونه‌م دهێنه سوتن و بكوژمێ 2 ملیون دینارا زیان ب خودانێ عه‌ردى دكه‌ڤیت .
ئه‌ڤرۆ نيوز:
قه‌يس خه‌زعه‌لى، فه‌رماندێ بلندێ ميليشياتێن “عصائب اهل الحق” راگه‌هاند: مافێ گه‌لايه بڕيارێ ل چاره‌نڤيسێ خوه بده‌ن، كوردێن عيراقێ ژى مافێ بڕيار دانێ ل سه‌ر سه‌ربه‌خۆيا خوه يا هه‌يى، ئه‌و بڕيار ژى بۆ گه‌لێ كورد ب خوه د ڤه‌گه‌ريت، ئاماژه ب وێ چه‌ندێ ژى كريه كو رێكه‌فتناما سايكس بيكۆ كوردستان ب سه‌ر چار وه‌لاتان دا دابه‌شكريه و ئاشكه‌را ژى كريه كو چو كورده‌ك خوه وه‌كو عيراقى نابينيت.
خه‌زعه‌لى د ديداره‌كا تله‌ڤزيۆنى دا ل گه‌ل هنده‌ك كه‌نالان دا گۆت: “جۆگرافيا و مێژوو و زمان و شارستانيه‌ت پشته‌ڤانيێ ل وێ چه‌ندێ دكه‌ن كو كورد د جودا بن ژ هه‌موو عيراقيێن دى ژ رويێ نه‌ته‌وه و زمان و جلكێن خوه”.
گۆتژى: “ماوێ رێكه‌فتناما سايكس بيكۆ ب دووماهى هاتيه و نوكه مافێ وان وه‌لاتايه يێ ب گۆره‌يى رێكه‌فتناما سايكس بيكۆ هاتينه پارچه‌كرن و پێكڤه كرن بڕيارێ ل سه‌ر چاره‌نڤيسێ خوه بده‌ن”.
ئه‌ڤرۆ نيوز:
بڕياره سوبه‌هى سه‌رۆكێ هه‌رێما كوردستانێ ل گه‌ل پارت و لايه‌نێنس ياسى يێن كوردستانى كۆم بيت و هوورده‌كاريێن سه‌ره‌دانا خوه بۆ ئه‌مريكا و هنگاريا و چيك به‌حس بكه‌ت.
سه‌رۆكێ ديوانا سه‌رۆكاتيا هه‌رێما كوردستانێ فوئاد حسێن راگه‌هاند بوو كو سه‌رۆكێ هه‌رێما كوردستانێ مه‌سعود بارزانى دێ سه‌ره‌دانا خوه يا ڤێ دووماهيێ يا ديبلۆماسى بۆ هێزێن سياسى يێن كوردستانى به‌حس كه‌ت.
فوئاد حسێن گۆت: “سه‌رۆكێ هه‌رێمێ د سه‌ره‌دانا خوه دا چه‌ندين دانوستاندێن ئه‌رێنێ كرينه و به‌حس ل هاريكاريێن له‌شكرى بۆ هێزێن پێشمه‌رگه‌يى كريه و ل دۆر پاشه‌رۆژا هه‌رێما كوردستانێ و ده‌ڤه‌رێ ژى گه‌له‌ك گه‌نگه‌شه كريه و ل به‌رامبه‌ر وێ ئه‌وان وه‌لاتان پشته‌ڤانيا خوه بۆ خه‌لكێ كوردستانێ ده‌ربڕيه.
ل دۆر پشته‌ڤانيا وه‌لاتێن جيهانێ بۆ مافێن كوردا و چاره‌نڤيسێ وان، سه‌رۆكێ ديوانا سه‌رۆكاتيا هه‌رێما كوردستانێ بۆ “الشرق الاوسط” گۆت: “چو كه‌س دژى مافێ چاره‌نڤيسێ كوردان نينه”.
فوئاد حسێن ئاماژه ب وێ چه‌ندێ ژى كر كو سه‌رۆكێ هه‌رێما كوردستانێ دێ ئه‌نجامێن سه‌ره‌دانا خوه بۆ لايه‌ن و هێزێن سياسى يێن كوردستانى به‌حس كه‌ت.
به‌رى چوونا سه‌رۆكێ هه‌رێما كوردستانێ بۆ ئه‌مريكا ژى ل رێكه‌فتى 2ى گۆلانا 2015ێ سه‌رۆكێ هه‌رێما كوردستانێ ل گه‌ل لايه‌نێن سياسى و وه‌لاتيان ل چه‌ند جهێن جودا كۆم ببوو و به‌حس ل ئه‌جنيدايێن سه‌ره‌دانا خوه كربوو.
ئه‌ڤرۆ نيوز:
بڕياره ئه‌ڤرۆ رۆژا ئێكشه‌مبى رێكه‌فتى 17ى گۆلانا 2015ێ بڕياره تيما ته‌پا پێ يا يانا دهۆك دێ ياريا خوه يا ئێكێ د چارچۆڤێ خولا بژاره يا عيراقێ دا ل گه‌ل تيما مينا يا به‌سرايى بكه‌ت، بۆ ڤێ چه‌ندێ ژى سه‌رۆكێ يانا دهۆك كاپتن بژار په‌يامه‌ك يا هه‌يى.
سه‌رۆكێ يانا دهۆك، كاپتن بژار ئيسماعيل، داخوازێ ژ جه‌ماوه‌رێ وه‌رزشى ل پارێزگه‌ها دهۆكێ دكه‌ت كو ئه‌ڤرۆ ده‌مژمێر 4:30 چار و نيڤى ئێڤارى ل ياريگه‌ها دهۆك يا وه‌زرشى ئاماده بن بۆ پشته‌ڤانيا يانا دهۆك.
هه‌ر چه‌نده ب ديتنا چاڤدێران، تيما ته‌پا پێ يا دهۆكێ ل دووڤ ئاستێ پێدڤى نينه و نه‌شێت هه‌ڤركيێ بكه‌ت، ژ به‌ر پشكداريا وێ د دو خولان دا و نێزيكا ياريان ل هه‌ڤدو، به‌لێ شانازيێ ژى ب هه‌بوونا وێ رێژا بلندا ياريكه‌رێن كورد ل گه‌ل تيمێ دكه‌ن.
ئه‌ڤرۆ نيوز:
سكرتێرێ جڤاتا وه‌زيرێن حوكمه‌تا هه‌رێما كوردستانێ راگه‌هاند، د كۆمبوونا داهاتى يا جڤاتا وه‌زيرێن عيراقێ، به‌حس ل كێشێن هه‌ولێر و به‌غدا دێ هێته كرن. ئاماژێ ب وێ چه‌ندێ ژى دكه‌ت هه‌كه بڕياره‌ك د به‌رژه‌وه‌نديا هه‌رێما كوردستانێ دا ده‌رنه‌كر، دێ شانده‌كێ هه‌رێمێ چيته به‌غدا.
د. ئامانج ره‌حيم، سكرتێرێ جڤاتا وه‌زيران ل هه‌رێما كوردستانێ بۆ تۆڕا ميديايى يا رووداو راگه‌هاند: بڕياره د كۆمبوونا داهاتى يا جڤاتا وه‌زيرێن عيراقێ دا، كو دێ رۆژا سێشه‌مبى رێكه‌فتى 19ى نيسانا 2015ێ هێته ئه‌نجام دان، هشيار زێبارى، وه‌زيرێ دارايى يێ عيراقێ ژى دێ به‌حس ل كێشێن ناڤبه‌را هه‌رێم و به‌غدا بكه‌ت و ببيته برگه‌كا كۆمبوونێ.
ل دووڤ گۆتنا مانج ره‌حيم، د سه‌ره‌دانا عادل عه‌بدولمه‌هدى دا، وه‌زيرێ په‌ترۆلا عيراقێ بۆ هه‌ولێرێ، نێچيرڤان بارزانى سه‌رۆكێ حوكمه‌تا هه‌رێما كوردستانێ به‌حس ل دلته‌نگيا هه‌ولێرێ كريه به‌رامبه‌ر به‌غدا و گۆت: “وه‌زيرێ په‌ترۆلێ ژى دان ب وێ چه‌ندێ كريه كو د هه‌يڤا نيسانێ دا، ل دووڤ ئاستێ پێدڤى په‌ترۆلا هه‌رێمێ هاتيه ره‌وانه‌كرن”.
ئەڤرۆ:
ئەڤە ماوەیەکە ھەموو شۆفێرێن پارێزگەھا دھۆکێ گازندا ژ پانزینێ دکەن کو گەلەک یا پیسە و مالا دیلکۆیێن ترۆمبێلان دا رەخەکی و ھەر کەسێ ترومبێلێ ب ھاژووت ژ بەر ترترا دیلکۆی بێزار دبیت. بەرپرسێ کۆنترۆلا جۆری ل رێڤەبەریا بەلاڤکرنا بەرھەمێن سۆتەمەنیان ل پارێزگەھا دھۆکێ ژی راگەھاند کو ھەتا نھا پانزینا بۆ دھۆکێ دھات یا تورکی بوو، بەلێ بۆ دەمەکی ھاتیە راگرتن و ئەڤ پانزینا نھا ژی یا بازرگانیە و گۆت: ئەم دزانین کوالیتیا پانزینا نھا ل بازاری یا پاقژ نینە، بەلێ ھەکە ئەڤ پانزینە ژی ل بازاری نەمینیت دێ قەیرانا پانزینێ پەیدابیت.
کارۆژ دوسکی، شۆفێرەکێ ترۆمبێلێ یە دیار کر کو ئەڤە ماوەیەکە ھندی ئەو پانزینێ دکەتە ترۆمبێلا خوە یا پیسە و نەشێت پێ خوە ل سەر پانزینێ بدەت ژ بەر دەنگێ دیلکۆی و ئەڤە ژی ئاریشەکا مەزنە گشت شۆفێرێن پارێزگەھا دھۆکێ تووشبووینێ و گۆت: من پانزینا گەلەک پانزینخانا ژی تێست کر، بەلێ ھەموو وەکو ئێک دپیسن و مالا ترۆمبێلان دا رەخەکی و پێدڤیە حوکەت چاڤدێریێ ل سەر بکەت.
کارۆژی کو بۆ ماوێ چار دەمژمێران دەمێ خوە ل پیشەسازیا دھۆکێ بۆراند ژ بەر خراببوونا ترۆمبێلی دیار کر کو د سەر ھندێ ترۆمبێلا وی یا مۆدێل ٢٠١٤ یە، بەلێ خوە ل بەر پانزینا پیس نەگرت و ژ نیشکەکێ ڤە ترۆمبێلا وی ژ کارکەفت و پشتی گەھاندیە پیشەسازیێ، ئاشکرا بوو کو فیتپەمپێ وێ ژ کارکەفتیە و گۆت: مخابنە ترۆمبێلەکا مۆدێل نوو تووشی ڤی دەردی بیت.
فیتەر زانا ھەرکی ل پێشەسازیا دھۆکێ بۆ ئەڤرۆ دا زانین، پانزینا پیس گەلەک کارتێکرن ل سەر ترومبێلان ھەیە و رۆژانە نێزیک ٥ ترومبێلان دچنە دوکانا وی کو ژ ئەگەرێ پانزینا پیسن و گۆت: (٩٠% ژ خراب بوونا ترۆمبێلان ئەوێن دھێنە دەڤ مە بۆ چاککرنێ، ژ ئەگەرێ پانزینا پیسە).
دیار کر، پانزینا نوکە گەلەک یا پیسە و خرابتر بوویە ژ جاران و گۆت: د ڤێ ھەیڤێ دا من ٢٥ ماکینێن ژ کارکەفتی یێن ترومبێلێن مودێل نوو چێکرینە، ئەڤ پانزینا نوکە کاریگەریێ دکەت، ژبەر ڤێ پانزینا پیس من ماکینێن ھندەک ترومبێلان د حەفتیەکی دا دو جاران نووژەنکریە.
یوسف عەبدی شوفێرەک بوو کو ترومبێلا وی ژبەر پانزینا پیس ژ کارکەفتی بوو ل پیشەسازیێ گللەیی ژ حوکمەتێ و جھێن شولەژێ ھەبوون و گۆت: ئەڤ پانزینا ل پانزیخانان ھەی ل گەل ترومبێلێن مودێل نوو ناگونجیت، چونکو ئەڤ پانزینە ب فێل و تەشقەلا ئاڤ و گاز و پەترۆلا خام د ناڤ دایە.
سەلیم سەبری، بەرپرسێ کۆنترۆلا جۆری ل رێڤەبەریا بەلاڤکرنا بەرھەمێن سۆتەمەنیان ل پارێزگەھا دھۆکێ تایبەت بۆ ئەڤرۆ دیار کر، بەری نھا ئەو پانزینا بۆ دھۆکێ دھات ژ وەلاتێ تورکیا بوو و گەلەک یا پاقژ بوو، بەلێ ئەڤە ماوێ ١٥ رۆژانە ئەو جۆرێ پانزینێ ھاتیە راگرتن و نھا ئەڤ پانزینا ل بازاری ھەی ژ بلی یا تەکسی و کوستەران یا بازرگانیە و گۆت: ئەم دزانین ئەڤ پانزینە یا پیسە و کوالێتیا وێ وەکو یا تورکی یا باش نینە.
ناڤبری زێدەتر گۆت: ھەکە ئەڤ پانزینا بازرگانی ژی نەھێتە د ناڤ بازاری دا، دھۆک دێ تووشی قەیرانا پانزینێ بیت، چونکو ئەو پانزینا نھا ل بازاری ھەی دھێتە دەڤ مە بۆ پشکنینێ و پاشی دچیتە پانزیناخان بۆ بەلاڤکرن و بکارئینانێ و ئەم دزانین ژی کوالێتیا وێ یا باش نینە، بەلێ ناچاریە و پێدڤیە شۆفێر ژی ھاریکاربن و ترۆمبێلا خوە گەلەک بکارنەئینن ھەتا ئەڤ رەوشە ب دووماھی دھێت.
سەلیم سەبری ئاماژە دا وێ چەندێ کو پانزینا دھۆکێ نھا بازرگانیە و بازرگان ژ دەرڤەی دئینن، بەلێ یا ھەولێرێ پانزینا پارزینگەھا کەلەکێ یە، پانزینا تەکسی و کۆستەران ژی ئەوە یا حوکمەت ژ مەخمورێ دابین دکەت.
ل دور ئەگەرێ نەھاتنا پانزینا تورکی، بەرپرسێ کۆنترۆلا جۆری خویا کر کو پاپۆرا پانزینا تورکی زوو نەگەھشتیە و ل بەرە ل نێزیکترین دەم بگەھیت و ئەڤ ئاریشە چارەسەربیت و گۆت: رەنگە ھەتا دووماھیا ڤێ ھەیڤێ ئاریشا پانزینا پیس یا بەردەوام بیت.
دلشاد شەعبان غەفار، ئەندامێ لیژنا سامانێن سرۆشتی ل پەرلەمانێ کوردستانێ دیار کر کو وان ل بەرە سوباھی رۆژا دوشەمبی کۆمبوونەکێ ل دور خرابیا کوالێتیا پانزینێ ل پەرلەمانی سازبکەن و دێ دووڤچوونێ کەن ھەتا بزانن ژێدەرێ ڤێ پانزینا پیس ژ کیڤەیە و گۆت: ھەکە ئەڤ ئاریشە زوو نەھێتە چارەکرن، ل گەل گەرما ھاڤینێ دێ ھەموو ترۆمبێل ژکارکەڤن.
ئەمیر ئەترووشی بۆ رۆژناما ئه‌ڤرۆ به‌رهه‌ڤكريه
ئەڤرۆ:
ئەندامێ پەرلەمانێ عیراقێ ژ لیستا پارتی موحسن سەعدون راگەھاند، ھەکە حوکمەتا عیراقی مەرجێن ئەمریکا بجە نەئینیت ئەوێن د پرۆژێ پرچەککرنا کوردان و سونان دا، وی دەمی ئەمریکا دێ ئێکسەر چەکی بۆ کوردان و سونان ھنێریت، لێ شیرەتکارەکێ وەزارەتا دەرڤە یا عیراقێ دبێژیت دێ بزاڤا ھەلوەشاندنا وێ چەندێ کەین.
موحسن سەعدون بۆ رۆژناما ئەڤرۆ گوت” ل دووڤ وێ بریارا لیژنا ھێزێن چەکدار ل کونگرێسێ ئەمریکی، ئەمریکا دێ ب گۆژمێ ٧١٥ ملیۆن دۆلاران چەکی بۆ عیراقێ ھنێریت ھەکە عیراقێ پێگیری ب ھندەک مەرجان کر ئەوژی پشکداریا کێمەنەتەوان د رێڤەبرنا حوکمەتێ دا و پێکئینانا زێرەڤانێن نیشتمانی و نە پشتەڤانیکرنا میلیشیان، لێ ھەکە پێگیری ب وان مەرجان نەکر، دێ ب رێژەیا ٦٠% ژ وی گوژمی چەکی ئێکسەر دەتە کوردان و سونان”.
لێ ئیحسان عەوادی شیرەتکارێ وەزارەتا دەرڤە یا عیراقێ ئاشکراکر کو وەزارەتا دەرڤە یا عیراقی یا بزاڤێن ھەلوەشاندنا خالا پرچەککرنا ئێکسەر یا پێشمەرگەی وسونان بێ لێزڤرین بۆ حوکمەتا عیراقێ دکەت و گوت” سەرۆکێ ئەمریکی ئۆباما و تیما وی ل داخوازیا مە دگەھن و یێ بزاڤا بجھئینانا وێ دکەن، ژ بەر کو پرۆژێ ئەمریکی ب سێ قۆناغا ڕا دەرباز دبیت، یا ئێکێ لیژنا پرچەککرنێ کو رەشنڤیسا وێ نەیا ئەرێنی بوو ل دۆر عیراقێ و قۆناغا دویێ کونگرێسێ ئەمریکی بوو کو پێشڤەچوونەک پەیدابوو ب رێیا ھەلوەشاندنا خالەکا ناکۆکیێ ئەوژی رەفتارکرن ل گەل کوردان و سونان وەکو دەولەت و یا سیێ ژی جڤاتا پیرێن ئەمریکی یە کو ئەم یێ بزاڤا ھەلوەشاندنا خالا گرێدای پرچەککرنا کوردان و سونانە بێ لێزڤرین بۆ حوکمەتا عیراقێ”.
موحسن سەعدون ئاخڤتنێن عەوادی رەت دکەت و دبێژیت” ھەلوەشاندنا خالا گرێدای رەفتارکرن ل گەل کوردان و سونان وەکو دەولەت ژ لایێ ئەمریکا ب خوە ھاتیە کرن، نەکو ب زاڤێن ئیحسان عەوادی و وەزارەتا دەرڤەیا عیراقێ و حوکمەتا عیراقێ”.
گوت ژی ” ل رۆژا ١٥ ڤێ مەھێ (جون مەکین) پرۆژێ پرچەککرنا کوردان و سونان ب شێوەکێ ئێکسەر پێشکێشی کونگرێسی ئەمریکی کر و بێگومان ئەڤ پرۆژە دێ ھێتە پەسەندکرن کو چەک بێ لێزڤرین بۆ حوکمەتا عیراقێ بۆ کوردان و سونان بھێتە ھنارتن و نە عەوادی و نە حوکمەتا وی نەشێن ب ھەلوەشینن”.
ئەیاد بەرواری بۆ رۆژناما ئه‌ڤرۆ به‌رهه‌ڤ كريه
نيشاندان