ئه‌ڤرۆ:

سەرۆکێ زانکۆیا دھۆکێ بۆ ئەڤرۆ دیار کر ژبەر وێ رێژەیا زۆرا قوتابیێن دەڤەرا ئامێدیێ ل کۆلیژێن باژێرێ دھۆکێ دھێنە وەرگرتن، ب ژڤانین کۆلیژەکێ ل ئامێدیێ ڤەکەن وەک کۆلیژا پەروەردا بنەرەت.
پرۆفیسور د. موسلح دھۆکی سەرۆکێ زانکۆیا دھۆکێ دیار کر کو چەند ژ کەسایەتیێن وێ دەڤەرێ دگەل پەرلەمانتارێن دەڤەرا ئامێدیێ داخوازیەک گەھاندبوو سەرۆکاتیا زانکۆیێ کو پشکەکا زانستی یا پەروەردا بنەرەت ل ئامێدیێ بھێتە ڤەکرن و گۆت “مە ئەو پێشینیاز گوھارت کو ئەم بشێن نەب تنێ پشکەک بھێتە ڤەکرن، بکەینە کۆلیژە، چونکی دەڤەرا ئامێدیێ ژ ھەموو لایەکی ڤە چ جوداھی و کێماسی نینن ژ قەزایێن زاخۆ و ئاکرێ، لەورا مە فەر دیت ژبۆ ڤێ چەندێ ئەم داخوازیەکێ بگەھینینە ئەنجومەنێ وەزارەتا خواندنا بلند”.
سەرۆکێ زانکۆیا دھۆکێ دیار کر ژی ئەو کۆلیژا دھێتە ڤەکرن ل دەڤەرا ئامێدیێ دێ یا تایبەت بیت ب وارێن زمانی مینا زمانێ (کوردی و عەرەبی و ئینگلیزی و جڤاکی و .. ھتد و گۆت “د ڤێ کۆلیژێ دا دەواما سپێدەھیان دێ بۆ وان قوتابیان بیت ئەوێن ژ ئامادەیی ب دووماھی دھێن و دێ لێ ھێنە وەرگرتن و دەواما ئێڤاریان دێ بەھرا وان مامۆستایان بیت ئەوێن باوەرناما بنەرەت ھەی و مافێ وێ چەندێ دێ بۆ ھێتە دان باوەرناما بەکالۆریۆسێ ب دەستڤە بینن”.
د. موسلح دھۆکی گۆت ژی “بۆ ئەنجامدانا ڤی کاری ئەم وەک سەرۆکاتیا زانکۆیا دھۆکێ ب ھەمی شیانێن خوەڤە ئامادەینە کار بکەین ژ بۆ ڤەکرنا کۆلیژەکا ب ڤی شێوەی بۆ دەڤەرا ئامێدیێ و قایمقامێ ئامێدیێ ژی ھەر ژ بۆ ڤی کاری سۆز دایە بۆ دابینکرنا ئاڤاھی یێ ھاریکار بیت”.