ئه‌ڤرۆ نیوز: ڤه‌ده‌ر ره‌شاڤایی:
د كونگره‌كێ تایبه‌ت دا ئه‌ڤرۆ ل واشنتۆن كو ژ ئالێ جڤاتا ئه‌تله‌سی و په‌یمانگه‌ها ئاشتیێ ل ئه‌مریكا هاتبوو ئاماده‌كرن، مه‌سعود بارزانی سه‌رۆكێ هه‌رێما كوردستانێ گۆتاره‌ك پێشكێشكر و به‌رسڤا چه‌ندین پرسیاران دا، ئه‌ڤا ل خارێ گرنگرترین خالن كو هاتیه به‌حسكرن.
سه‌رۆك بارزانی ب روونی گۆت كو: ئه‌م نزانین كا ساله‌كا دی سه‌ربخوه‌یا كوردستانێ بینین یان ده‌مه‌كێ دی دا لێ هه‌لبه‌ت دێ ئه‌و رۆژ هێت و د رێدایه.
بارزانی: ئێكگرتنا ئیراقێ بنه‌چاری ناهێته كرن لدووڤ ره‌وشا دیموكراسیا ئیراقێ و هه‌لبژارتنا خه‌لكێ وێ دمینیت كا باوه‌ری ب ڤێ ئێكگرتنێ هه‌یه یان نه.
هه‌روه‌سا گۆت ژی : شه‌رێ داعش رێفراندوم پاشخست لێ دێ هه‌ر هێته كرن و پێنگاڤا ئێكێ هاتیه هاڤێتن ب دامه‌زراندنا لژنا رێفراندومێ ل هه‌رێمێ و دڤێت ئه‌و هه‌لبژارتن ب كوردستانیان بهێته دان كو ب ئاشتیانه بریارا پاشه‌رۆژا خوه بده‌ن.
بارزانی خویاكر كو: ئه‌م ل ئه‌مریكاینه بۆ سۆپاسیكرنا وی وه‌لاتی لسه‌ر پشته‌ڤانییا وان بۆ هه‌رێما كوردستانێ، كۆمبوونا مه ل كۆچكا سپی یا سه‌ركه‌فتی بوویه و ته‌كه‌زا مه لسه‌ر شه‌رێ داعشه چونكی ئه‌و پرسه‌كا گرنگه لێ مژارێن دی نه‌هاتنه ژبیر كرن.
بارزانی دیاركر كو پشتی دوهی دو ده‌مژمێرێن كومبوونا دگه‌ل ئۆباما و جێگرێ وی، ئه‌ڤرۆ سپێدێ جاره‌كا دی دگه‌ل جێگرێ سه‌رۆكێ ئه‌مریكا جو بایدن كۆمبوویه ڤه.
كوردستان رۆله‌كێ سه‌ره‌كی دبینیت د هاریكاریكرنا وان كه‌سێن كه‌فتیه به‌ر قه‌یرانێن ئیراقێ .
یا مه ل كوردستانێ شیای بكه‌ین و ئیراق نه‌شیایه بكه‌ت ئه‌وه كو مه لێبورین و پێكڤه ژیان نیشان دایه و خوه ژ تولڤه‌كرنێ ڤه مژوول نه‌كریه.
ده‌رباره‌ی پرسیاره‌كێ لسه‌ر ده‌مێ سه‌رۆكاتیا هه‌رێمێ، بارزانی به‌رسڤ دا كو ل سالا 1991 ئێكێ وی گۆت بوو قانوونیه‌تا شۆره‌شێ هاته گوهرین دڤێت قانوونیا ده‌ستووری جهێ وێ بگریت، له‌ورا نها ژی دڤێت ده‌ستورێ هه‌رێمێ ڤێ یه‌كێ ئێكلا بكه‌ت ل دووڤ دا هه‌ر كه‌سێ بیته سه‌رۆكێ هه‌رێمێ دێ هاریكار بین بو سه‌ركه‌فتنا پرۆسێ.
مه پێدڤی ب حه‌شدا شه‌عبی ل كوردستانێ نینه و دڤیت هێزێن وان لبن ده‌ستێ سه‌رۆك وه‌زیرێن ئیراقێ بهێنه رێكخستن. هه‌یا نها مه 17 سه‌دێ ژ بۆدجا هه‌رێمێ ژ به‌غدا نه‌وه‌رگرتیه.
مه په‌یوه‌ندیێن باش دگه‌ل عه‌شیره‌تێن عه‌ره‌بێن سونه هه‌نه لێ ئه‌وێن هاریكاریا داعش كرین دێ هه‌مان چاره‌نڤیسێ تیرۆرستان هه‌بیت.
ده‌رباره‌ی وێ یه‌كێ چ بزاڤ بۆ ئازادكرنا كچ و ژنێن كوردێن ئێزدی هاتینه كرن یێن كو دده‌ستێ داعش دا، بارزانی گۆت كو پتر ژ هزار ژێ هاتینه رزگاركرن و ل هه‌رێمێ هاریكاریان وان نها دهێته كرن، لێ نێزیكی 4 هزاران هێشتا دده‌ستێن داعش دانه هه‌ر چه‌نده هه‌ژمارا درست ناهێته زانین،
بارزانی خوه‌یا كر كو چ كچ و ژنێن ئێزدی نه دكه‌ڤتنه ده‌ستێن داعش دا هه‌كه‌ر نه ژبه‌ر خیانه‌تا هنده‌ك ژ عه‌شیره‌تێن عه‌ره‌ب با، چه‌نكی سۆز دابوویێ وان بپارێزن لێ ده‌مێگه‌هشتنا داعش ب ئاخڤتنا خوه نه‌كر به‌لكو به‌ره‌ڤاژی.
ئه‌م هاریكارین بۆ كوردان ل هه‌ر جهێ هه‌بن، مه ئه‌ڤ یه‌ك ل كۆبانێ نیشان دا.
بارزانی ئه‌و یه‌ك ژی راگه‌هاند كو ئۆباما پێگیریا خوه نیشان دایه كو پێشمه‌رگه چه‌كی وه‌رگریت بۆ به‌رهنگاربوونا داعش و ئه‌ڤ یه‌كه ژی بۆ كوردستانێ یا گرنگه ، رێیا وه‌رگرتنێ نه یا گرنگه ماده‌م بگه‌هیته مه.
نووترين نووچه
- دڤێت بەغدا سیاسەتا نەهنارتنا مووچەیێ خەلكێ كوردستانێ ب دووماهی بینیت
- هەتا دووماهی خولەك مە باوەری هەیە کو بشێین بگەهینە رێككەفتنێ ل گەل بەغدایێ
- بۆ چارەسەركرنا كێشەیێن هەولێرێ و بەغدایێ دڤێت قانوونا پەترۆل و غازێ بهێتە دەركرن
- ئایدن مەعرووف: حوكمەتا ئیراقێ د چارەسەركرنا كێشەیاندا یا رژد نینە
- بابەكر زێباری: ل دووماهییا ئەڤسالە هەرێما كوردستانێ دێ ئێك هێزا پێشمەرگەی هەبیت
- دڤێت كێشەیێن هەولێرێ و بەغدا ل سەر بنەمایێ دستووری بهێنە چارەسەركرن
- خەلكێ ژێهاتی و بسپۆر د ناڤ لیستا بەربژارێن پارتی دا هەنە
- هندەك ئالیێن ئێراقێ كێشەیان بۆ رێككەفتنێ ل گەل كوردستانێ دروست دكەن
- مەسرور بارزانی پشكداری د بەهییا عەبدوللا عەزیز مەلا هەمزە مێرگەسۆری دا كر
- سەرۆك بارزانی و بالیۆزێ فرەنسا كێشەیێن د ناڤبەرا هەولێرێ و بەغدایێ دا گەنگەشەكرن
سه‌ره‌كى نووترين نووچه
ئه‌لمانيا 70 ته‌نێن پێدڤيێن له‌شكرى بێى عيراقێ بۆ هه‌رێمێ ره‌وانه كرينه
ئه‌ڤرۆ نيوز:
سه‌رۆكێ فراكسيۆنا “تجمع كفائات” ل جڤاتا نوونه‌رێن عيراقێ دبێژيت: “حوكمه‌تا ئه‌لمانيا بێى ئاگه‌هداريا به‌غدا ب بهايێ 70 ته‌نان پێدڤيێن له‌شكرى داينه هه‌رێما كوردستانێ”.
هه‌يسه‌م جبۆرى، سه‌رۆكێ فراكسيۆنا “تجمع كفائات” د داخۆيانيه‌كێ دا بۆ سومه‌ريه نيوز راگه‌هاند: “ئه‌لمانيا 70 ته‌نێن چه‌كێ جودا بێ ئاگه‌هداريا ده‌وله‌تا ناڤه‌ندى يا عيراقێ و بێى ئيمزاكرنا دووماهيێ يا كاروانێ له‌شكرى ژ لايێ حه‌يده‌ر عه‌بادى، فه‌رماندێ گشتيێ هێزێن چه‌كدار ل عيراقێ ڤه، راده‌ستى هه‌رێما كوردستانێ كريه”.
ته‌كست دكه‌ت كو ئه‌و كارى ل گه‌ل پرۆژێ په‌سه‌ندكريێ جڤاتا نوونه‌رێن عيراقێ بۆ دژاتيكرن ل گه‌ل ده‌ستێوه‌ردانا وه‌لاتێن بيانى ل گه‌ل كاروبارێن ناڤخۆيێ عيراقێ ئێكگرتيه”.
به‌غدا ئه‌ڤ كۆژمێ پاره‌يى خسته سه‌ر حسابا هه‌رێما كوردستانێ
جڤاتا پارێزگەھا دھۆکێ چەندین بریار و راسپاردە ل سەر کومەلگەھا کواشێ دەرکرن
سەرۆکێ لژنا قانوونی ل جڤاتا پارێزگەھا دھۆکێ ئاشکراکر کو ئەڤرۆ دکومبوونەکا ئاسایی یا جڤاتا پارێزگەھا دھۆکێ دا، چەندین بریار ل سەر کومەلگەھا کواشێ یا پیشەسازی ھاتنەدەرکرن.
دیندار کوچەر، سەرۆکێ لژنا قانوونی ل جڤاتا پارێزگەھا دھۆکێ بۆ مالپەرێ ئەڤرۆ نیۆز گۆت: ئەڤرۆ ٦-٥-٢٠١٥ جڤاتا پارێزگەھا دھۆکێ چەندین بریار دەرکرن ل سەر کومەلگەھا کواشێ ژوان بریاران دڤێت ماوێ شەش ھەیڤان دا رێڤەبەریێن باژێرڤانیان و رێڤەبەریا گەشەپێدانا پیشەسازی، دڤێت زێدەگاڤیان نەھێلن و ئەوێن ھاتینەکرن ب قانوونێ بھێنە رێخستن، دیسان دھەمان ماو دا ئەو عەردێ بۆ کومەلگەھا ناڤبری ھاتیە ژێک جوداکرن ئانکو (ئیفرازکرن) ب گرێبەست ل گەل خودانێن کارگەھان ل گەل رێڤەبەریا باژێرڤانیان بھێنە گرێدان، دیسان کومەلگەھا ناڤبری وەک شارەوانی راستەوخۆ ب باژێرڤانیێن گشتی ل دھۆکێ بھێتەگرێدان بۆ پتر خزمەتکرنا دەڤەرێ.
دیندار کوچەر گۆت ژی: دناڤا کومبوونێ دا چەندین راسپاردە بۆ کارگێریا پارێزگەھا دھۆکێ ھاتنە بلندکرن کو ل کومەلگەھا کواشێ ھەر ئێک ژ بنگەھێن ئاگرڤەمراندنێ و ساخلەمیێ بھێنەدانان بۆ پتر خزمەتکرنا وەلاتیان ل دەڤەرێ، دیسان رێڤەبەریا وبەرھێنانێ ژی، ل گەل رێڤەبەریا پیشەسازی، فەرمانگەھا ژینگەھێ ماوێ دیارکری کاربکەن بۆ نەھێلانا سەرپێچیان، ئەڤ بریارە و راسپارە ل گەل قانوونا ھەر دو فەرمانگەھێن ناڤبری دگونجیت و دەست ھەلاتێن ئەنجوومەنێ پارێزگەھێ دایە.
کۆچەری ئاشکراکر ژی کو دڤێت ل دووڤ قانوونێ وبەرنامەکێ دارێتیێ گونجایی کارگەھێن ئاری ل کومەلگەھا ناڤبری بۆ جھەکێ دیت بھێنە ڤەگۆھاستن.
ناڤبری گۆتژی: دیسان بریارھاتەدان بۆ رێڤەبەریا گشتی یا باژێرڤانیان کو ئێدی نابیت بەرمایک خوە یێن ساخلەکیێ بھێنە تێکەلکرن، دڤێت بھێنە سوتن و دیسان بریار ھاتەدان کو کەرتێ ناڤبری راستەوخۆ بکەڤیتە سەر ب باژێرڤانیا گشتی ڤە.
جھێَ ئاماژەکرنێ یە کو ئەڤ بریارە و راسپاردە ئەڤرۆ ٦-٥-٢٠١٥ ژلایێ ئەنجوومەنێ پارێزگەھا دھۆکێ ڤە ھاتینەدەکرن، پشتی چەندین گازندە گەھشتینە ئەنجوومەنی و لژنێن تایبەت ل سەر کێشان ھاتینە پێکئینان.
پارتى ژ به‌هرا خوه كورسيه‌ك دا ئێزديان
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ په‌رله‌مانێ كوردستانێ دياركر كو پتريا لايه‌نان ل په‌رله‌مانێ كوردستانێ ل گه‌ل وێ چه‌ندێ نه‌بوون، لژنا 21 كه‌سى يا ئاماده‌كرنا دستوورى، چو نوونه‌رێن ئێزدى تێدا پشكدار بن، ژ به‌ر هندێ پارتى بڕيار دا ژ به‌هرا خوه كورسيه‌كێ ب ده‌ته ئێزديان.
شێخ شامۆ، نوونه‌رێ ئێكانه يێ ئێزديان ل په‌رله‌مانێ كوردستانێ بۆ ئه‌ڤرۆ نيوز ته‌كست ل سه‌ر وێ چه‌ندێ كر كو بزاڤه‌ك هه‌بوو ل په‌رله‌مانێ كوردستانێ كو مافێ كێم نه‌ته‌وه و ئايينان لژنا 21 كه‌سى يا دستوورى دا نه‌بيت.
شێخ شامۆيى گۆت: “چو لايه‌نێن سياسى ب ئه‌ركێ خوه رانه‌بوون كو كه‌سه‌كێ ئێزدى بكه‌نه د ناڤا وێ لژنا 21 كه‌سى دا يا بۆ نڤيسينا دستوورى هاتيه به‌رهه‌ڤكرن، له‌ورا پارتى ئه‌ڤ چه‌نده ب ئه‌ركێ خوه زانى و ژ پشكا خوه، كورسيه‌ك دا ئێزديان”.
گۆتژى: “هه‌ر ده‌م پارتى خوه ل ئێزديان كريه خودان و ئێزدى ئه‌مانه‌تێ پارتى و بارزانى نه، له‌ورا ئه‌وان ژى ئه‌ركێ خوه ب جهـ ئينا، پێدڤى بوو هه‌موو لايه‌نێن سياسى وه‌كو پارتى ره‌وشا ئێزديان به‌رچاڤ وه‌رگرت بايه”.
نوونه‌رێ ئێزديان ل په‌رله‌مانێ كوردستانێ كو سه‌ر ب فراكسيۆنا زه‌ره نه‌ره‌حه‌تيا خوه ل هه‌مبه‌ر هنده‌ك لايه‌نێن سياسى دا دياركرن و گۆت: “ل ده‌مێ پێدڤى ب ئێزديان هه‌يى، كيانێن سه‌ربه‌خۆ و هێزێن تايبه‌ت و حه‌شه‌د شه‌عبى و كانتۆن لێ دروست دكه‌ن، به‌لێ ده‌ما دبيته بابه‌تێن چاره‌نڤيس ساز يێن ئێزديان پشتا خوه دده‌نێ، ئه‌ڤه نمۆنه‌كا باش بوو بۆ مه ئێزديان كا كى ل مه خودان ده‌ردكه‌ڤيت”.
ل سالا 2009ێ ژى ل ده‌مێ نڤيسينا ره‌شنڤيسا دستوورێ هه‌رێما كوردستانێ پير خدر كو ل وى ده‌مى ئه‌ندامێ په‌رله‌مانێ بوو ئه‌ندامێ لژنێ بوو.
وەلاتی و بازرگان دشێن دۆلاری ب بھایێ بەرێ بکڕن
ئه‌ڤرۆ:
ئەندامەکا لیژنا دارایی و ئابوریا عێراقێ ئیماژە بڤێ چەندێ کر، پارێزگەرێ بانکا ناڤەندیا عێراقێ ھاتیە گازیکرن بۆ پەرلەمانی و بۆمە گرانبوونا بھایێ دۆلاری رۆھنکریە، کو ئەگەر بۆ ڤێ چەندێ ڤەدگەڕیت، بانکا ناڤەندی لسەر بڕیارا حوکمەتێ ٨%ێ باج و گومرک ئێخستیە سەر بھایێ ئەڤی دۆلارێ دفرۆشنە بازرگانان، ھەروەسا تەکەزکریە، بھایێ دۆلاری ژڤی بھایێ نوکەی پتر بلند نابیت.
نەجیبە نەجیب، ئەنداما لیژنا دارایی و ئابوریا پەرلەمانێ عێراقێ بۆ رۆژناما ئەڤرۆ گۆت” بەری نوکە من داخوازکربوو، پارێزگەرێ بەنکا ناڤەندیا عێراقێ بھێتە لیژنا دارایی و وەبەرھینانا جڤاتا نوونەران، چونکە بەنکا ناڤەندی بەرپرسە ل سیاسەتا دراڤی و پارێزگەرێ بەنکا ناڤەندی سەرەدانا لیژنێ کر، ل دۆر پرسا بلندبوونا بھایێ دۆلارێ ئەمریکی ھەمبەر دینارێ عێراقی، نافبری تەکەزی لسەر ڤێ چەندێ کر، بھایێ دۆلاری ب چو شێوەیەکی بلند نەبوویە و وەکی بەرێ یە، ھەتا ئەوچەند پشتڕاستکر پیچەک نزمبوویە بھایێ دۆلاری، بەلێ ئەڤا نوکە لبازاڕی دۆلار بلندبووی، بۆ ڤێ ئێکێ ڤەدگەڕیت، بانکا ناڤەندیا عێراقێ لسەر داخوازا حوکمەتێ، باج و گومرگ ئێخستیە سەر ئەف دۆلارێ ب بازرگانا دھێتە فرۆتن، بۆ نموونە بازرگانەک دێ ئاسنی کڕیت و پێدڤی ب گوژمەکێ زۆرێ دۆلاری ھەیە، دەمێ دچیتە بانکا ناڤەندی بۆ کڕینا دۆلاری بانک دێ ھەر ب بھایێ بەرێ دۆلاری فرۆشیتێ کو ئێک دۆلار بەرامبەر ١٢٠٠ دینارانە، بەلێ ژلایەکێ دیڤە دێ باج و گومرکێ ھاڤێتەسەر”.
ئەڤێ ئەنداما لیژنا دارایی دیارکر، ھەر بازرگانەکێ گوژمەکێ زۆرێ دۆلاری بکڕیت، بانکا ناڤەندی دێ ٥%ێ وەک ئەمانەتا باجێ، ھەروەسا ٣%ێ تاڤێنەسەر وەک گومرک، ئەڤەژی بۆچی وەلێکریە، ھەتا پارە بۆ حوکمەت ڤەگەڕیت و ھەیڤا شوباتا بۆری وەرە ئەف بڕیار حوکمەتێ دەرکریە، ژبەر قەیرانا دارایی و ھەتا نوکە، ل ھەیڤا شوباتێ وەرە ٢٧٣ ملیار دینار بڤێ رێکێ کۆمکرینە، حەسکەم بۆ خەلکی رۆھنکەم، کەسەک دێ چیت دخوازەکێ پێشکەشی بانکێ کەت و داخوازا ئێک ملیۆن دۆلاران کەت، وی دەمی بانک دێ دۆلار ب ١٢٠٠ دەتێ، بەلێ ئاریشە ئەڤە دێ ٨%ێ زیدەھی وەکی ئەمانەتێ باج و گومرکێ لێ وەرگریت”.
نەجیبایێ گۆتژی” بانکا ناڤەندی دەستھەلات داینە بانکا( سی بی ئای) بۆ فرۆتنا دۆلاری ب بھایێ حوکمەتێ، ئەڤێ بانکێ لقێن خوە ل ھەولێر و سلێمانیێ ژی ھەنە و شێن دۆلاری ب بھایێ بانکا ناڤەندی واتە ١٢٠ ھزارا بفرۆشنە وان کەسێن گوژمەکێ کێم دۆلار دڤێت، چونکە باج و گومرگ تنێ بۆ گوژمەکێ دیاریکریە، بۆ نموونە ئەگەر بازرگانەکی سەد ھزار دۆلاری پێدڤی بوون، یان وەلاتیەکی نەخۆش ھەبوو بچیتە دەرڤە، دشێن ب رێیا بانکا سی بی ئای دۆلاری ب بھایێ ١٢٠٠دینارا بۆ ئێک دۆلاری بکڕیت، ئەڤە ئەگەرێ سەرەکیێ گرانبوونا دۆلاریە و پارێزگەرێ بەنکا ناڤەندیا عێراقێ ئەم پشتڕاستکرین، بھایێ دۆلاری بڤی بھایێ نوکە پتر بلند نابیت و ئەگەر باج نەمینیت ئەڤە دێ ڤەگەڕیت بھایێ بەرێ”.
كوردان ژى دێ نوونه‌ر د دادگه‌ها فيدرال دا هه‌بيت
ئەڤرۆ نیۆز، قائید میرۆ:
بڕیارە پڕۆژەیەک ل پەرلەمانێ عێراقێ بھێتە پەسەندکرن، ل دۆر دووبارە دارشتنا ھەیکەلێ دادگەھا فیدڕال ل عێراقێ کوردان ژی دێ نوونەر ھەبیت.
عەرەفات کەرەم، پەرلەنتارێ کورد ل بەغدا بۆ ئەڤرۆ نیۆز گۆت: “بڕیارە پڕۆژەیەک بۆ دووبارە دانانا دادگەھا بلند فیدڕال بھێتە پەرلەمانێ عێراقێ و پشتی دھێتە پەسەندکرن، دادگەھا فیدڕال ب شێوەیێ بەرێ نامینيت وه‌كو دادگەھا ئالیەکی و کەسەکی، بەلکۆ دڤێت یا بێ لایەن بیت”.
کەرەم گۆتژی: “دادگەھا فیدڕال بۆ ئێکلاکرنا ئاریشەیانه و ڤێ جارێ دێ نوونەرێ ھەرێما کوردستانێ ل ڤێ دادگەھێ ھەبیت، چونکو ئەم ب چو شێوەیەکی رازی نینين، دادگەهـ بۆ ھندەک کەس و لایەنان بیت، بەلکۆ کورد و سوننە و شیعە دێ تێدا بن”.
بازرگانيكرنا ب ئه‌ندامێن له‌شێ مرۆڤى دێ هێته قه‌ده‌غه‌كرن
ئەڤرۆ نیوز، لەزگین جۆقی:
ئەندامێ لیژنا ساخلەمیێ ل پەرلەمانێ کوردستانێ بۆ ئەڤرۆ نیوز دیارکر کو ئەڤرۆ سپێدی چار لژنێن پەرلەمانێ کوردستانی دێ دان و ستاندنی ل سەر پرۆژە قانوونا قەدەغەکرنا فروتنا ئەندامێن لەشێ مرۆڤان کەن و راپۆرتا خوە یا دووماھیی بۆ سەرۆکاتیا پەرلەمانی ئامادە کەن.
د. عەبدولا جاسم رێکانێ ئەندامێ لیژنا ساخلەمیێ ل پەرلەمانێ کوردستانێ گۆتژی: “بەری نەە ھەیڤان پەرلەمانێ کوردستانی خواندنا ئێکێ بۆ پرۆژێ قانوونا قەدەغەکرنا فروتنا ئەندامێن لەشێ مرۆڤان کر کو ئەڤ پرۆژە قانوونە ژ ٣٢ ماددان پێکھاتیە، ب ھەموو رەنگان رێگریێ ل فروتنا ئەندامێن لەشی دکەت کو لیژنا مافێ مرۆڤی و ئەوقافێ و ساخلەمیێ و کاروبارێن قانوونی دێ ئەڤرۆکە دانوستاندنەکا تێر وتەسەل ل سەر پرۆژەیی کەن ب مەرەما چێکرنا راپورتا دووماھیی داکو ل پەرلەمان جارەکا دی بێخیتە د ناڤ بەرنامێ خوە یێ کاری دا و پەسەند بکەت، پشتی پەسەند دبیت دێ بیتە دەستکەفتەکی زۆر گرنگ بۆ ھەرێما کوردستانێ”.
ده‌قێ راگه‌هاندنا كۆچكا سپى ل دۆر كۆمبوونا ئۆباما و بارزانى
ئه‌ڤرۆ نيوز:
دوهى 5ى گۆلانا 2015ێ د چارچۆڤێ سه‌ره‌دانا خوه دا بۆ ئه‌مريكا سه‌رۆكێ هه‌رێما كوردستانێ مه‌سعود بارزانى و شاندنێ ل گه‌ل، كۆمبوونه‌ك ل گه‌ل سه‌رۆك كۆمارێ ئه‌مريكا باراك ئۆباما و جۆ بايدنێ جێگر كر و تێدا چه‌ندين ته‌وه‌رێن گرنگ به‌حسكرن.
ده‌قێ راگه‌هاندنا كۆچكا سپى ل دۆر كۆمبوونا سه‌رۆك كۆمارێ ئه‌مريكا باراك ئۆباما و جۆ بايدن ل گه‌ل سه‌رۆك بارزانى و شاندێ ل گه‌ل دا:
سه‌رۆك ئۆباما پشكدار د كۆمبوونا كوچكا سپى ل گه‌ل بايدنێ جێگر و مه‌سعود بارزانى سه‌رۆكێ هه‌رێما كوردستانا عيراقێ كر. ئه‌وان به‌حسێ كۆمه‌كا بابه‌تان كر، ژ وان ژى هه‌لمه‌تا تێكشكاندنا داعش، ديسا ئه‌و ده‌سپێشخه‌ريێن سياسى يێن ب رێڤه دچن بۆ دووڤچوونا خه‌لكێ عيراقێ و پشته‌ڤانيكرنا وان بۆ هاريكريكرنا زێده‌ترا هه‌موو پێكهاتان.
سه‌رۆك ئۆباما و جێگرێ سه‌رۆكى بايدن، جاره‌كا دى پشته‌ڤانيا ب هێز و به‌رده‌واما وه‌لاتێن ئێكگرتى يێن ئه‌مريكا بۆ هه‌رێما كوردستانا عيراقێ و گه‌له‌ك كورد دوپاتكرن. ديسا ئه‌و پابه‌ندبوونا ئه‌مريكا د چارچۆڤێ رێكه‌فتنا ستراتيژى بۆ عيراقا فيدرالا ديموكراتا ئێكگرتى هه‌ر وه‌كو د دستوورێ عيراقێ دا ئاماژه بۆ پێكرى.
سه‌رۆك ئۆباما و جێگرێ سه‌رۆكى بايدن، ستايشا ئازايه‌تيا پێشمه‌رگه‌يى و كوردان كر، ديسا هه‌ڤخه‌ميا خوه ژى بۆ وان قوربانيێن شه‌رێ دژى داعش ل هه‌موو عيراقێ ده‌ربڕى.
سه‌رۆك بارزانى سۆپاسيا سه‌رۆك ئۆباما و جێگرێ سه‌رۆكى بايدن كر بۆ ئه‌وان هاريكاريێن له‌شكرى يێن ئه‌مريكا د رێيا حوكمه‌تا عيراقێ و هێزێن ئه‌منى يێن عيراقێ دا پێشكێشى پێشمه‌رگه‌يى كرن، ديسا بۆ وان هاريكاريێن له‌شكرى يێن ل پشتى كه‌فتنا مووسل بۆ پاراستنا هه‌ولێر و جهێن دى يێن عيراقێ پێشكێش كرين. هه‌ردو لايان ژى رێكه‌فتن ل سه‌ر گرنگى و ب هێزكرنا په‌يوه‌نديێن د ناڤبه‌را به‌غدا و هه‌ولێر، ديسا پابه‌ندبوونا وان ب هاريكاريكرنا مليۆنه‌ها خه‌لكێ ئاواره كو ژ ئه‌گه‌رێ توندوتيژيان مال و حالێن خوه ب جهـ هێلاينه كر.
ئه‌ڤرۆ خاله‌كا دى يا سنورى دێ د ناڤبه‌را هه‌رێم و توركيا دا هێته ڤه‌كرن
ئه‌ڤرۆ:
رێڤەبەرێ ناحیا کانی ماسێ دیار کر، دەرگەھێ گومرکیێ سەرزێری کو دکەڤیتە د ناڤبەرا ھەرێما کوردستانێ و وەلاتێ تورکیا دا ل دەڤەرا بەرواری بالا یا ب سەر پارێزگەھا دھۆکێ ڤە، ئەڤرۆ ٦-٥-٢٠١٥ ب رەنگەکێ فەرمی دێ کەڤیتە کار و خەلک دشێن ب پاسەپۆرت و ڤیزە و ترۆمبێلێن خوە ھاتنوچوونێ لێ بکەن.
سامی ئوشانە گورگیس، رێڤەبەرێ ناحیا کانی ماسێ بۆ رۆژناما ئەڤرۆ خویا کر، دەرازینکا گومرکیا سەرزێری دەمەکێ درێژ بوو حەفتیێ ب تنێ دو رۆژان خەلکی بێ پاسەپۆرت و ترومبێلێن خوە ھاتنوچوون لێ دکرن، لێ پشتی مە چەندین کۆمبوون د گەل لایەنێ تورکیا ئەنجامداین ئەم رێککەفتین کو ئەڤرۆ ب رەنگەکێ فەرمی دێ ڤەبیت و وەکو دەرازینکا گومرکیا ئیبراھیم خەلیل دێ کەڤتە کار و گۆت “د قووناغا ئێکێ دا، حەفتیێ پێنج رۆژان ژ بلی رۆژێن شەمبی و ئێکشەمبان خەلک دشێن ھاتنوچوونێ ل ڤی دەرگەھی بۆ مەبەستێن گەریانێ سەرەدانا وەلاتێ تورکیا بکەن، کو ل دەمژمێر نەھی سپێدێ ھەتا چاری ئێڤاری دێ یێ ڤەکری بیت”.
خویا ژی کر، خەلک دشێن ب ترۆمبێلێن خوە د ڤی دەرگەھی را بچنە ھەموو باژێرێن تورکیا و د قووناغا دویێ دا دێ بۆ مەرەمێن بازرگانی ژی ھێتە ب کارئینان.
نيشاندان
WP Facebook Auto Publish Powered By : XYZScripts.com