ئەڤرۆ:
بڕیارە ئەڤرۆ جارەکادی لیژنا پەرلەمانی ل دۆر پێکئینانا لیژنەیەکا ٢١ کەسی بۆ پرسا پڕۆژە قانوونا دستوورێ ھەرێما کوردستانێ کۆمبوونەکێ ئەنجام بدەت و پەیڤدارێ فڕاکسیۆنا پارتی دیموکراتی کوردستان ژی ئاماژە ب وێ چەندێ دکەت کو پێدڤیە نوونەرێن پارتێن سیاسی یێن دەرڤەی پەرلەمانی ژی نوونەر د لیژنا دستووری دا ھەبن، بەلێ د ھەمبەردا پەرلەمانتارەکێ ئێکەتیێ دبێژیت، پێدڤی ناکەت نوونەرێن پارتێن سیاسی ب ڤی شێوەی پشکداربن و ئەو پارتێن کورسیێن پەرلەمانی ھەین، نوونەرێن ھەموو خەلکێ ھەرێما کوردستانێ نە.
مەحەمەد عەلی یاسین، پەیڤدارێ فڕاکسیۆنا پارتی دیموکراتی کوردستان ل پەرلەمانێ کوردستانێ بۆ رۆژناما ئەڤرۆ گۆت” پێدڤیە ھەموو پێکھات و پارتێن سیاسی یێن کوردستانێ نوونەر د وێ لیژنێ دا ھەبن ئەوا کۆ بڕیارە ل دۆر پڕۆژە قانوونا دستوورێ ھەرێما کوردستانێ بھێتە پێکئینان، لەوما ئەم وەک فڕاکسیۆنا پارتی دخوازین نوونەرێن ھەموو پێکھات و پارتێن سیاسی پشکداری ئەڤێ لیژنێ ببن، چونکی دستوور بۆ ھەموو لایەکی یە، ھندەک پارتێن سیاسی نوونەر ل پەرلەمانی نینە، بەلێ دستوور بۆ وان لایەنایە ژی یێن نوکە ئەندام ل پەرلەمانێ کورستانێ نینن ، لێ دبیت ل ھەلبژارتنێن داھاتی وان ژی ئەندام ل پەرلەمانی ھەبن، ئەم دخوازین ھەر فڕاکسیۆنەکێ ل دووڤ قەبارێ خوە نوونەر ھەبن د ڤێ لیژنا دستووری دا، ھێشتا ژی ئێکلا نەبوویە دێ کیش لایەنی چەند ئەندام ھەبن، لەوما دخوازین ب ڤی شێوێ من ئاماژە بۆ کری ئەندام بھێنە دانان”.
ژلایێ خوەڤە سالح فەقێ، ئەندامێ فڕاکسیۆنا ئێکەتی نیشتیمانی کوردستان بۆ رۆژناما ئەڤرۆ دیارکر، ئەو لیژنا بڕیارە بھێتە پێکئینان ژ ئەندامێن پەرلەمانی و کەسێن بسپۆرێن دەرڤەی پەرلەمانیە، ب دیتنا من پێدڤی بوو پەرلەمانێ کوردستانێ ھێشتا پێداچوون ل سەر ڤێ پرسێ کربا و ھەر ل دەستپێکێ بۆچوونا من ئەو بوو کو ئەندامێن لیژنێ کێمن، چونکی ھەکە مە بڤێت ھەموو لایەک و پێکھاتەیێن جۆدا پشکداریێ د دستووری دا بکەن، فەرە نوونەرێن ھەموو پێکھاتان تێدا ئەندام بانە، نوکە بۆ زانین ھژمارا ئەندامان یێ کێمە و ب کێمی پێدڤی بوو ھژمارا ئەندامێن لیژنێ گەھشتبا ٢٧ ئەندامان، چونکی پشکداریکرنا ھەموو لایەنان پێدڤی ب ھژماران پتر ھەیە و بۆ نموونە نوونەرێن پێکھاتێن ئایینی و دەڤەرێن کوردستانی یێن دەرڤەی ئیدارەیا حوکمەتا ھەرێما کوردستانێ و نوونەرێن جڤاکێ مەدەنی و ژنان و چەندێن دی ژی، ھەکە ئەڤ ھەموو نوونەرە ژی ھەبن، بێگومان ئەڤە دچوارچۆڤێ لیژنەیەکا ٢١ کەسی دا جھێ وان ھەموویان نابیت و پێدڤی ب زێدەکرنا ئەندامان ھەیە بۆ لیژنا دستووری”.
سالحی گۆت ژی” دەربارەی بۆچوونا پارتی ژی بۆ پشکداری پێکرنا نوونەرێن حزبێن سیاسی، ئەڤە د جھێ خوەدا نینە، چونکی فڕاکسیۆنێن دناڤ پەرلەمانی دا نوونەرێن ھەموو خەلکێ کوردستانێ نە و پێدڤی ب نوونەرێن ھەموو پارتێن سیاسی یێن دەرڤەی پەرلەمانی نینە، ھیڤدارم د کۆمبوونا ئەڤرۆ یا ل دۆر لیژنا دستووری دھێتەکرن بگەھینە ئەنجامەکی و سازدان بھێتەکرن بۆ پێکئینانا لیژنێ، ژبەرکو ئەندامێن لیژنێ ھاتینە بەلاڤکرن بەری نوکە و ھەر ئێک ژ فڕاکسیۆنێن پەرلەمانی یێن پتر ژ نوونەرەکی ھەی ژ مافێ خوە خوەشببن و بەھرا ھەموو پێکھاتان تێدا بکەت”.

ئه‌ڤرۆ نیوز:

عه‌لى حه‌مه‌ سالح، ئه‌ندامێ په‌رله‌مانێ كوردستانێ ل فراكسیونا گۆران د نڤیساره‌كێ دا بۆ وه‌زیرێ خواندنا بلند داخوازا دووڤچوونێ دكه‌ت : كو د ماوێ چه‌ند سالێن بوورى و هه‌تا نوكه‌ نێزیكى 25 ملیون دولار بۆ كه‌مپا زانكۆیا سه‌لاحه‌دین هاتینه‌ ته‌رخانكرن و هه‌تا نوكه‌ چ دیار نینه‌.

ئه‌ڤرۆ نيوز، ناجی به‌ده‌ل:

ل گوری ژێده‌رێن ب ده‌ست ئه‌ڤرۆ نیوز كه‌فتین د. ئازاد سه‌عدون سه‌رۆكێ زانكۆیا نه‌ورۆز ل باژێرێ دهۆكێ ده‌ست ژ كاركێشانا خوه‌ پێشكێشكریه‌ و د. ئاماد محه‌مه‌د سالح ل شوونا وی هاتیه‌ ده‌ست نیشانكرن.

ئه‌ڤرۆ نيوز په‌يوه‌ندى ب د. ئاماد محه‌مه‌د سالح سه‌رۆكێ نوو يێ زانكۆيا نه‌ورۆز كر، به‌لێ يێ به‌رهه‌ڤ نه‌بوو به‌رسڤا پرسیارێن مه‌ بده‌ت و گۆت: “هێش یا مایی بلا ب دووماهى بهێت پاش دێ يێ به‌رهه‌ڤم داخویانیێ بده‌م”.

د به‌رامبه‌ر دا د. ئازاد ئه‌حمه‌د سه‌عدون سه‌رۆكێ به‌رێ یێ زانكویا نه‌ورۆز بۆ ئه‌ڤرۆ نیوز گۆت: “تشته‌كێ نورماله‌ گوهۆڕینا سه‌رۆكێ زانكویێ و رێ و ئاوایێن قانوونى هاتینه‌ برێڤه‌برن و بۆ وه‌زاره‌تێ هاتیه‌ ره‌وانه‌كرن و هه‌ر ژ ئه‌ڤرۆ كارێ من وه‌كو سه‌رۆكێ زانكویێب دووماهى هاتيه‌”.

د. ئازادی ئه‌و چه‌نده‌ ژی گۆت: “ده‌ست نیشانكرنا كه‌سه‌كی بۆ سه‌رۆكێ زانكویێ ڤه‌دگه‌ریت بۆ يه‌كا ئیداریا زانكۆیێ و ئه‌و سه‌رپشكن ل گوری رێنمایان كه‌سه‌كی ده‌ست نیشان بكه‌ن.

ئه‌ڤرۆ نيوز:

دوشه‌مبيا داهاتى سه‌رۆكاتيا حوكمه‌تا هه‌رێما كوردستانێ و سه‌رۆكاتيا په‌رله‌مانێ كوردستانێ دێ كۆم بن و چه‌ند پرسێن گرنگ يێن ناڤخوه‌يا هه‌رێمێ گه‌نگه‌شه‌ كه‌ن.

فه‌خره‌دين قادر، سكرتێرێ په‌رله‌مانێ كوردستانێ بۆ تۆرا ده‌نگوباسێن كوردستانێ راگه‌هاند: بڕياره‌ رۆژا دوشه‌مبيا داهاتى، سه‌رۆكاتيا په‌رله‌مانێ كوردستانێ و سه‌رۆكاتيا حوكمه‌تا هه‌رێما كوردستانێ كۆم ببن و د كۆمبوونێ دا دێ چه‌ند پرسێن ناڤخوه‌يا هه‌رێمێ گه‌نگه‌شه‌ كه‌ن.

سكرتێرێ په‌رله‌مانێ كوردستانێ ئاماژه‌ ب وێ چه‌ندێ ژى كريه‌ كو نوكه‌ ل هه‌رێما كوردستانێ ئۆپۆزسيۆن نينه‌ و پێدڤيه‌ په‌رله‌مان وى رۆلى ببينيت و د كۆمبوونێ دا ل گه‌ل سه‌رۆكاتيا حوكمه‌تێ هه‌ماهه‌نگى د ناڤبه‌را رۆلێ چاڤدێريا په‌رله‌مانى و كاودانێن سياسى و پرسێن دستوورى و سيسته‌مێ حوكمرانيا هه‌رێمێ و چه‌ند پرسێن دى يێن ئه‌ڤرۆيا كوردستانێ گه‌نگه‌شه‌ بكه‌ن.