ئه‌ڤرۆ نیۆز:

شیرتكارێ مه‌كته‌با سیاسى یا پارتى دیموكراتى كوردستان، بۆ مالپه‌رێ ئه‌ڤرۆ نیۆز گۆت: بۆ مێژوویێ دبێژم، جارا ئێكێ ژى دا جه‌نابێ سه‌رۆكى رازینه‌بوویه‌ ب درێژكرنا ماوێ سه‌رۆكاتیێ، لێ پشتى گه‌له‌ك داخازی ژێ هاتیه‌ كرن و بۆ پاراستنا ئێك رێزییا ناڤ مالا كوردى، جه‌نابێ سه‌رۆكى خوه‌ بێده‌نك كر و ئه‌و بریار هێلا بێى كو ئیمزا بكه‌ت، وه‌ك قانوون و رێسا هاته‌ هه‌ژمارتن كو په‌سه‌ندكریه‌.
عارف روشدى هێشتا گۆت: نوكه‌ ب بۆچوونا من پێدڤى یه‌، شێوازه‌كێ قانوونى بهێته‌ ڤه‌دیتن، ژ پێخه‌مه‌ت چاره‌سه‌ركرنا ڤێ ئاریشێ، مانا جه‌نابێ كاك مه‌سعود بارزانى دڤان كاودانان دا وه‌ك سه‌رۆكێ هه‌رێما كوردستانێ دخزمه‌تا گه‌ل و وه‌لاتى دایه‌، چونكو شیانێن مه‌زن یێن هه‌ین و جهێ باوه‌ریا نافخوه‌یێ كوردستانێ و ده‌ردوران و جیهانێ یه‌، له‌ورا یاساناس و په‌رله‌مانێ كوردستانێ، ته‌ڤایا هێزێت سیاسى و كومه‌لایه‌تى داخوازكرینه‌ هاریكاربن دڤێ قوناغێدا.

ئه‌ڤرۆ نیوز:

سه‌رۆكێ حوكمه‌تا هه‌رێما كوردستانێ د نووترین داخویانیا خوه‌دا سه‌باره‌ت ویلایه‌تا مه‌سعود بارزانى راگه‌هاند كو د ڤێ قه‌یرانێ دا، پێدڤیه‌ بارزانى د پۆستێ خوه‌ دا بمینیت.
نێچیرڤان بارزانى سه‌رۆكێ حوكمه‌تا هه‌رێما كوردستانێ د دیداره‌كێ دا ل گه‌ل مالپه‌رێ ئه‌لمونیته‌ر راگه‌هاند: وه‌كو كورده‌ك نه‌ برازا یان وه‌ك زاڤایێ وى، ب هزرا من پێدڤیه‌ سه‌رۆك بارزانى د پۆستێ خوه‌ دا بمینیت.
سه‌باره‌ت وان لایه‌نێن ڤێ پێنگاڤێ ره‌ت دكه‌ت، نێچیرڤان بارزانى گۆت: بێ گومان دێ گه‌له‌ك دانوستاندن و ئاخافتن ل په‌رله‌مان و ده‌زگه‌هێن راگه‌هاندنێ هێته‌ به‌حسكرن، به‌لێ وه‌ختێ دهێته‌ سه‌ر بڕیاردانێ ل سه‌ر وى بابه‌تى، جوداهیان دده‌نه‌ ره‌خه‌كێ و هه‌موو دێ بریاره‌كا دروست ده‌ن سه‌باره‌ت درێژكرنا ویلایه‌تا بارزانى.

سه‌رۆكێ حوكمه‌تێ راگه‌هاند : جهێ داخێ یه‌ مام جه‌لال د ڤێ ره‌وشا نوكه‌دا نه‌شێت هه‌لویست هه‌بیت، ب تنێ سه‌ركرده‌یێ ژ هه‌ژى كوب شێت ولاتێ مه‌ د ڤێ قه‌یرانێ دا رزگار بكه‌ت، مه‌سعود بارزانى یه‌.
سه‌رۆكێ حوكمه‌تێ ئاماژه‌ ب وێ یه‌كێ كر كو سیاسه‌تمه‌دارێن گۆران و ئێكه‌تی و ئیسلامى هه‌موو وێ یه‌كێ دزانن و خه‌لك ژى دزانیت كو بۆ سه‌قامگیریا كوردستانێ پێدڤیه‌ مه‌سعود بارزانى بمینت.
ل ته‌باخا ئه‌ڤ ساله‌، ویلایه‌تا مه‌سعود بارزانى سه‌رۆكێ هه‌رێما كوردستانێ دێ ب دووماهى هێت.