ئەڤرۆ:
پشت بەستن ب قانوونا سالا ٢٠١٣ مادێ ١٩ ژ بودجا گشتی یا حوکمەتا ھەرێما کوردستانێ، وەزارەتا دارایی دێ ل شوونا ھەر فەرمانبەرەکێ بھێتە خانەنشینکرن دێ فەرمانبەرەکێ گرێبەست ل شوونا وی دامەزرینیت و ل دووڤ ھندەک بەلگەنامێن وەزارەتا دارایی یێن مەھا بووری، ھندەک ژ ڤان حالەتان ژی ھاتینە تومارکرن. ئەندامەکێ پەرلەمانێ کوردستانێ ژی ڤێ بریارێ دووپات دکەت.
پشتی دەربازبوونا ٢٠ سالان ل سەر دامەزراندنا پەرلەمانەکی بۆ کوردستانێ، ھەتا نھا نەشیاینە پرۆژە قانوونەکێ بۆ پاراستنا مافێن فەرمانبەرێن گرێبەست دەربێخن، چونکو نھا پتر ژ ٤٠ ھزار فەرمانبەرێن گرێبەست ل ھەرێما کوردستانێ ھەنە ل دام و دەزگەھێن میری دەوامێ دکەن و نەھاتینە دامەزراندن و ژ ماف و ئمتیازاتێن فەرمانبەریێ و خانەنشینیێ ھاتینە بێبەھرکرن.
فەرمانبەرەکێ ب گرێبەست کو ئەڤە پتر ژ دو سالانە ل رێڤەبەریەکا میری یا دھۆکێ ب گرێبەست ھاتیە دامەزراندن بۆ ئەڤرۆ دیار کر، ئەڤە دو سالە ل وێ رێڤەبەریێ ب گرێبەست دەوامێ دکەم و نەھاتیمە دامەزراندن، ھەر سال خۆشخۆشکان بۆ من دبێژن کو دێ من دامەزرینن و سال دبوورن و چو تشت د دیارنینن و گۆت: ھەر دەرمالەیەک بۆ فەرمانبەران بھێتە دان بۆ من نینە، یا ژ ڤێ نەخۆشتر ژی ئەڤە دو سال ژ ژیێ من چوون و خزمەتا خانەنشینیێ بۆ من ناھێتە ھژمارتن.
ڤی فەرمانبەری ئەو یەک ژی نە ڤەشارت کو د گرێبەستا وی دا ھاتیە، ھەر دەمێ رێڤەبەریێ چو کا ب شیانێن وی نەمان یان ژی چو کار ب وی نەبن، رێڤەبەری مافێ ھەی ئێکسەر وی ژ کاری لابدەن بێکو چو خزمەت بۆ بھێتە ھژمارتن یان ژی بۆ رێڤەبەریەکا دی بھێتە ڤەگوھاستن.
فەرمانبەر ھەژار بەدەل بۆ ئەڤرۆ دیار کر کو بەری دو سالان ئەو ل رێڤەبەریەکا میری وەکو گرێبەست ھاتبوو دامەزراندن، پشتی بوورینا دو سالان و نەھاتیە دامەزراندن، رۆژەکێ نڤیسکارا لادانا وی ھاتە کرن و رێڤەبەری تێدا دیارکربوو کو گرێبەستا وی ناھێتە نووکرن و نەشێن مۆچەیێ وی بدەن و گۆت: خووشکا من ژی ھەمان تشت ب سەری ھات، پشتی سالەکێ دەوام ل رێڤەبەریەکا میری کری گرێبەستا وێ ل سەرێ سالێ نەھاتە نووکرن و ژ کاری ھاتە لادان و چو ئمتیازات و خانەنشینی ژی بۆ نەھاتنە تومارکرن، ھەروەکو د وێ سالێ دا خووشکا وی کەرەفس ل بازاری دفروت.
بەری نھا فەرمانبەرێن گرێبەست دشیان مافێ کرێکارەکی وەربگرن و خزمەت بۆ وان دھاتە تومارکرن، بەلێ ل سالا ١٩٨٧ ب بریارەکا رژێما بەعس یا ھژمارە ١٥٠ کو ژ ئەنجوومەنێ وەزیرێن عیراقێ دەرچوو بوو، ناڤ و نیشانێن فەرمانبەرێ گرێبەست ھاتبوو گوھارتن و ناڤێ وان کربوو کرێکار، د ھەمان سال ژی دا پەرلەمانێ عیراقێ ل گورەی قانوونا ھژمارە ٥٢ کو یا تایبەت بوو ب رێکخستنا کارێ سەندیکایێن کرێکاران ل کەرتێ تایبەت، ھەموو چالاکیێن سەندیکا کرێکاران ل کەرتێ حکوومی دا قەدەغەکرن و ھەتا نھا ئەڤ قانوونە ل عیراقێ و کوردستانێ دھێتە بجھئینان و فەرمانبەرێن گرێبەست بێ ماف ماینە. ھەروەسا ل سالا ٢٠١٢ێ پەرلەمانێ کوردستانێ قانوونا خانەنشینیێ و دەستەبەریا جڤاکی یا کرێکاران ھەموارکرن و مافێن کرێکاری بۆ خانەنشینیێ تێدا ھاتنە تومارکرن، بەلێ وێ قانوونێ چو ئاماژە ب فەرمانبەرێن گرێبەست نەدایە.
ئایدن مەعروف، ئەندامێ لیژنا دارایی ل پەرلەمانێ کوردستانێ ل دور ڤێ بریارێ خویا کر، ل گۆرەی قانوونا سالا ٢٠١٣ ھەکە فەرمانبەرەک بھێتە خانەنشینکرن، دڤێت فەرمانبەرەکێ گرێیەست ل سەر بنەمایێ باوەرنامێ و خزمەت و شیانان ل شوونا وی بھێتە دامەزراندن و گۆت: دەستھەلاتا جێبەجێکرنێ وەزارەتا دارایی بخوەیە.

ئەڤرۆ:
بسپۆرەکێ پەیوەندیێن نێڤدەولەتی دیارکر کو شەرێ وەلاتێ سعودیێ و ھەڤپەیمانێن وێ دژی حوسیان ل یەمەنێ دێ ستراتیژیەتا شەرێ نوکە ل عیراقێ دھێتەکرن گوھۆریت.
ئازاد عادل مامۆستایێ پشکا پەیوەندیێن نێڤدەولەتی ل زانکۆیا نەورۆز بۆ رۆژناما ئەڤرۆ گۆت”گوھۆرینێن شەری ل عیراقێ دێ گەلەک بن، ژئالیێ ھەڤپەیمانان ڤە ل گەل عیراقێ، شەرێ نوکە ل یەمەنێ ب دروستی بوو شەرێ سوننە و شیعەیان و دێ بیتە ئەگەر کو سوننە رێککەفتنێن نھێنی ل گەل رێکخراوا تیرۆرستی یا داعشێ گرێدەن کو دژی شیعەیان راوستیت”.
ئازادی گۆت ژی” گۆتنێن ئیبراھیم جەعفەری نامەکا دیار و ڤەکری بوو دەمێ گۆتی (ئەم دژی وێ چەندێ نە وەلاتێن عەرەبی ھێرشان بکەنە سەر حوسیان) وەلاتێ دویێ یێ ب سەنگ یێ شیعەیان ل رۆژھەلاتا ناڤین عیراقە و ئەڤە مەترسیە ل سەر وەلاتێن عەرەبی”.
ب دیتنا ڤی بسپۆرێ پەیوەندیێن نێڤدەولەتی” ھەڤپەیمانیا سعودیێ ل گەل وەلاتێن عەرەبی، ستراتیژیەتەکا نوویە و مەیدانا گەرما شەری ژ عیراقێ و سوریێ دەربازبوو بۆ وەلاتێن یەمەنێ و لیبیا و شەرێ گەرم ھاتە ڤەگۆھاستن”.
ئازادی ئاشکراکر ژی کو ئیرانێ و سووریێ دەست د چێکرنا گرۆپێن توندرەو ل دەڤەرێ ھەبوویە و چەندین بەلگە ھاتنە دیارکرن و تایبەت بۆ وەلاتێن عەرەبێن سوننی، ئەڤێ چەندێ کارتێکرن ل سەر ھەبوو، دیسان داگیرکرنا چەندین باژێرێن یەمەنێ ژلایێ حوسیان ڤە کارتێکرنەکا مەزن ل دەڤەرێ و رۆژھەلاتا ناڤین و وەلاتێن کەنداڤی ب تایبەتی کر”.
ل دووڤ بوچونا ئازاد عادلی” شەرێ یەمەنێ کارتێکرن ل سەر خەلکێ عیراقێ یا ھەی وەک ناڤخوە، چونکە وەلاتەکە ٦٠% شیعەنە و د دەستھەلاتدارن و دبینم شەر دێ ب وەکالەت ھێتەکرن و ئیران ب رێیا عیراقێ و بەحرەینێ و شیعەیێن لوبنانێ دێ شەری کەت، دبیت پارەکێ مەزن ب رێیا وان وەلاتان بگەھینتە یەمەنێ، بۆ ھاندان و ھنارتنا میلشیاتێن شیعەیان بۆ دەڤەرێ، ھەکە دبلۆماسیەت گەلەک یا ب ھێز و سەرکەفتی نەبیت، دبیت ل ھەموو دەڤەران ببیتە شەرێ شیعەیان و سوننەیان. ”
خۆیاکر ژی” نە کێمە چەندین وەلاتێن عەرەبی خوە کریە دڤی شەری دا و نامەکا ڤەکری و راستەوخوەیە بۆ شیعەیان و دڤێت دەستێن خوە ژ کاودانێ ناڤخوەیێ وەلاتان بکێشن ب تایبەتی عیراقێ، سووریێ، لوبنانێ، یەمەنێ، بەحرەینێ و گەلەک وەلاتێن دی، دبینم ل نێزیک دێ گوھۆرینێن مەزن ھێنە روودان و ئیران دێ بزاڤان کەت بێ دەنگیێ بپارێزیت، چونکە ئیرانێ نوونەر ل وەلاتێن مایتێکرنێ تێدا دکەت یێن ھەین، ئەڤە دێ بنە بەردەڤکێن ئیرانێ و دبینم ئەڤ چەندە ژی دێ د ناڤبەرا عەرەبان ب خوە دا ناکوکیێ چێکەت “.