ئه‌ڤرۆ نيوز:

ئه‌ڤرۆ رۆژا ئێكشه‌مبى رێكه‌فتى 1\3\2015 ستافێ كۆمسيۆنا بلندا سه‌ربه‌خۆيا هه‌لبژارتنان ل كوردستانێ هاته‌ هه‌لبژارتن و هندرين محه‌مه‌د وه‌كو سه‌رۆكێ وێ كۆمسيۆنێ هاته‌ هه‌لبژارتن.

د كۆنگره‌كێ رۆژنامه‌ڤانى دا، هندرين محه‌مه‌د، سه‌رۆكێ كۆمسيۆنا بلندا سه‌ربه‌خۆيا هه‌لبژارتنان ل هه‌رێما كوردستانێ راگه‌هاند كو ئه‌ڤرۆ ستافێ كۆمسيۆنا بلندا سه‌ربه‌خۆيا هه‌لبژارتنان ل هه‌رێما كوردستانێ ب سه‌رۆكێ كۆمسيۆنێ و جێگر و بڕيارده‌ر ڤه‌ هاته‌ هه‌لبژارتن.

هندرين محه‌مه‌د گۆتژى: “ژ نوكه‌ و پێڤه‌ كۆمسيۆنا هه‌لبژارتنان و راپرسيێ ل هه‌رێما كوردستانێ دێ ده‌ست ب دانانا هه‌يكه‌ل و په‌يره‌ويێ ناڤخۆ يێ كۆمسيۆنێ كه‌ن دا كو بۆ هه‌ر هه‌لبژارتن و راپرسيه‌كا ل هه‌رێما كوردستانێ هه‌بيت ژ لايێ وان ڤه‌ بهێته‌ ئه‌نجام دان.

سه‌رۆكێ كۆمسيۆنێ ژ پارتى ديموكراتى كوردستان و جێگرێ وى ژ ئێكه‌تى نشتيمانى كوردستان و بڕيارده‌ر ژ يه‌كگرتوو ئيسلامى كوردستان و سه‌رۆكێ بازنا هه‌لبژارتنان ژى ژ بزاڤا گۆڕان هاتنه‌ هه‌لبژارتن.

ئەڤرۆ:
پشتی کەسەکی ل سالا 2008 ھەڤژینا خوە کوشتی و کەسەک بریندارکری ژ ئالیێ دادگەھا تاوانێن دھۆکێ ڤە حوکمێ سێدارەدانا غیابی سەر ھاتە سەپاندن، پشتی دووبارە دادگەھا وی ھاتیە کرن شەش ھەیڤان ھاتە حوکم کرن.
ل سالا 2008 کەسەکێ خەلکێ دھۆکێ یێ خێزاندار ھەڤژینا خوە ئاگەھدار دکەت کو ئەو دێ وێ شەڤێ گیرۆ بیت و زوو ناھێتە مال، ھەڤژینا وی ژی ڤێ چەندێ بۆ خوە ب دەلیڤە دبینیت و دەزگرێ خوە یێ د ئینتە مالا زەلامێ خوە دا ژ بۆ ئەنجامدانا کریارێن سكسى، پشتی ھەڤژینا وی کەسی كريارا سكسى ئەنجامدايی ژ نشکەکێ ڤە ئەڤ کەسە قەستا مالا خوە دکەت و دبینت ھەڤژینا وی کریارا سکسی ل گەل ھەڤالەکێ وی دکەت لەورا ب ڤێ شێوەی ئەڤ کەسە کونترولێ ل سەر توڕەبوونا خوە ناکەت قەستا ناف مالێ دکەت و چەکی دئینتە دەرێ و ھەڤژینا خوە ب گولەیان د کوژیت دیسان دەزگرێ وێ ژی ئەوێ کریارا سکسی ل گەل ھەڤژینا وی ئەنجامدا کو دبیتە ھەڤالێ وی ب گرانی بریندار دکەت دووڤدا ئەڤ تومەتبارە بەر ب جھەکێ نەدیار خوە بەرزە دکەت.
پشتی دادگەھا تاوانێن دھۆکێ ب شێوەکێ غیابی دادگەھا ڤی کەسێ تومەتبار ب غیابی دکەت بریار سێدارەدانا وی دەردئێخیت، پشتی بورینا شەش سالان ل سەر ئەنجامدانا ڤێ تاوانێ و بریارا دادگەھێ ئەڤ سالا 2015 ئەڤ کەسێ تومەتبار خوە رادەستی پولیسان دکەت و بریکا پارێزەرێ خوە نەرازیبونێ ل سەر حکمێ سێدارەدانا خوە دکەت و پشتی دادگەھێ دووبارە دادگەھکرنا ڤی تومەتباری ئەنجامدای راستی و ئەگەرێ ڤێ رویدانێ بۆ دادگەھێ دیارکری دادوەرێ دادگەھا تاوانان بریار دا تنێ ئەڤ کەسە بۆ ماوێ شەش ھەیڤان بھێتە زیندانکرن ل دووڤ مادێ 409 یێ قانوونا سزایێن عیراقی یا ھژمارە 111 یا سالا 1969 کو د ڤێ مادێ قانوونی دا ھاتیە ھەرکەسێ ھەڤژینا خوە ژ نشکەکێ ڤە ل گەل کەسەکی بینت و کریارا سکسی ل گەل ئەنجامبدەت و د ھەمان دەم دا ھەڤژینا خوە بکوژیت سزایێ وی زیندانە کو ژ سێ سالان زێدەتر نینە.

ھەولێر، قائید میرۆ:

ژێدەرەکێ وەزارەتا ئەوقاف و کاروبارێن ئاینی ل حوکمەتا ھەرێما کوردستانێ تەکەز کر کو پێنج مەلا ل ھەردو پارێزگەھێن ھەولێر و دھۆکێ ژ لایێ دەزگەھێن ئەمنی ڤە ھاتینە گرتن و ھێشتا پشتڕاست نەبووینە وەکو ئەوقاف ل دۆر بابەتێ داعش ھاتینە گرتن یان ئەگەرێ وان گۆتارا رۆژێن ئەینی بوویە.
مەریوان نەقشبەندی رێڤەبەرێ بەرێ یێ راگەھاندنا وەزارەتا ئەوقاف و کاروبارێن ئاینی بۆ رۆژناما ئەڤرۆ گۆت دەزگەھێن ئەمنی ل ھەرێما کوردستانێ پێنج مامۆستایێن ئاینی ل ھەولێر و دھۆکێ دەستەسەر کرینە، بەلێ ھێشتا ب دروستی ناھێتە زانین کو ئاسایشێ ئەڤ مەلایە ب ئەگەرێ پەیوەندیێن وان دگەل داعش ھاتینە گرتن یان ژی ب ئەگەرێ گۆتارێن وان یێن رۆژێن ئەینی بوویە، بەلێ گرنگ ھاتینە گرتن و گۆمان دھێتە کرن ل دۆر بابەتێ داعشێ بن، بەری نوکە ژی ب فەرمی ب تنێ مەلا شوان چوویە ناڤا داعش و چو مەلایەکێ دی نەچوویە ناڤا رێزێن ڤی گرۆپێ، مەلا شوان ژی ژ لایێ وەزارەتا ئەوقافێ ڤە ھاتیە لادان و فەسل کرن.
مەریوانی گۆت ژی د کابینێن بۆری دا گرتن و لێکۆلین ل گەل مەلایێن ئاینی ب رێیا وەزارەتا ئەوقافێ بوویە و ھەر ئاریشەیەک ھەبایە ئاگەھداریا وەزارەتا ئەوقافێ دھاتە کرن، بەلێ ڤێجارێ دەزگەھێن ئەمنی بێی پرسا وەزارەتێ ئەو پێنج مەلا گرتینە و ئاگەھداریا وەزارەتێ نەکریە، لەوڕا ژی وەزارەت چو زانیاریان ل دۆر وان نزانیت.