ئه‌ڤرۆ نیوز:
بهایێ به‌رمیلا نه‌فتا برنت ل بازارێن جیهانى گه‌هشته 57 دولاران و ئه‌ڤه جارا ئێكێ یه د ماوێ 4 حه‌فتیێن بوورى دا، بهایێ نه‌فتێ ڤى بهایى تومار بكه‌ت و ب ڤێ چه‌ندێ د ماوێ حه‌فتیه‌كێ دا بهایێ نه‌فتێ زێده‌تر ژ 10 دولاران بنلد بوویه.
رویته‌رز به‌لاڤكریه كو نزمببوونا خه‌رجى و تێچوویێن كومپانیا بى بى یا به‌ریتانى ئێك ژ ئه‌گه‌رێن بلندبوونا بهایێ نه‌فتێ یه، دیسا ئه‌گه‌ره‌كێ دى 9 سه‌ندیكایێن كرێكاران یێن تایبه‌ت ب وه‌به‌رهێنانێ نه‌فتێ ده‌ست ب خوه‌نیشادانان كرینه.
ئه‌ڤرۆ نيوز:
جێگرێ سه‌رۆك كۆمارێ عيراقێ و سه‌رۆك وه‌زيرێ به‌رێ، نورى مالكى ئه‌ڤرۆ د داخۆيانيه‌كا رۆژنامه‌ڤانى دا راگه‌هاند كو ئه‌و ژ بوو وێ چه‌ندێ كار ناكه‌ت پۆستێ خوه ڤه‌گه‌رينيت، ب تنێ هه‌كه ل ده‌مێ هه‌لبژارتنێن شه‌رعى نه‌بيت.
نورى مالكى گۆت: “من چو نيه‌ت نينن ڤه‌گه‌رمه سه‌رۆكاتيا حوكمه‌تێ، ب تنێ هه‌كه جه‌ماوه‌ر وێ ب خوازيت”، گۆتژى: “هه‌كه خه‌لكێ عيراقێ ئه‌ز هه‌لبژارتم، ئه‌ز ره‌ت ناكه‌م”.
ئاماژه ب وێ چه‌ندێ ژى كر كو وى نه‌دڤيا سه‌رۆكاتيا حوكمه‌تا عيراقێ بكه‌ت، به‌لێ ل سه‌ر وى هاتبوو سه‌پاندن و گۆت: “هه‌كه وه‌كو تاك ب بێژنه من، تو كار دكه‌يى دا ببيه سه‌رۆك وه‌زير، نه‌خێر ئه‌ز كار ژ بوو وێ چه‌ندێ ناكه‌م”.
ئه‌ڤرۆ نيوز:
ده‌سته‌پا گشتيا ده‌سپاكيا هه‌رێما كوردستانێ د نڤيساره‌كێ دا كو ئاراسته‌يى هه‌موو دامه‌زراوێن هه‌رێما كوردستانێ كريه داخوازا پێزانينان ل سه‌ر حاله‌تێ پاداشتنا فه‌رمانبه‌ران ل ژێر ناڤێ “رێز و سۆپاس- پێشخستنا (قدم) – بلندكرن”ێ دكه‌ت.
نڤيسارا ده‌سته‌يا ده‌ستپاكيا هه‌رێمێ ئاشكه‌را دكه‌ت كو ئه‌و پێزانين پێدڤيه د ناڤبه‌را 2015.2.1 هه‌تا كو 2015.12.31 دا ئه‌و پاداشت ب فه‌رمانبه‌ران دابن.
ناڤه‌رۆكا نڤيسارێ كو بۆ ئه‌ڤرۆ نيوز ره‌وانه كريه ب ڤى ره‌نگى يه:
ئه‌ڤرۆ نيوز:
ل دارفۆر، دو فرۆكه‌ڤانێن رۆسى هاتنه ره‌ڤاندن و بالوێزخانا وى وه‌لاتى سه‌ره‌رايى پشتراستكرنێ راگه‌هاند كو ئه‌و دێ هه‌موو بزاڤا كه‌ن بۆ ئازادكرنا ڤان هه‌ردو فرۆكه‌ڤانان.
ده‌زگه‌هێن راگه‌هاندنێ يێن رۆسى راگه‌هاند كو ئه‌ڤان هه‌ردو فرۆكه‌ڤانان ل گه‌ل كۆمپانيا يوتير يا رۆسى كار دكر و بۆ هه‌ڤپه‌سته‌كێ ل گه‌ل هنارتيێ هه‌ڤپشكێ ئێكه‌تيا ئه‌فريقى و نه‌ته‌وێن ئێكگرتى بۆ پاراستنا ئاشتيێ ل دارفۆر “يۆناميد” ل دارفور بوون.
ئه‌ڤان هه‌ردو كه‌سێن هاتينه ره‌ڤاندن يۆناميد ئاگه‌هداركريه كو ئه‌ڤ كه‌سێن ئه‌ڤان ره‌ڤاندين، داخوازا تشته‌كى به‌رامبه‌ر بده‌نێ وه‌كو پاره ل به‌رامبه‌ر ئازادكرنا وان.
به‌رى نوكه ژى حوكمه‌تا سودان ئه‌و ئاگه‌هداركرينه كو هه‌كه تشته‌كى ل به‌رامبه‌ر ئازادكرنا وان بده‌ن دێ به‌رده‌ن و ئاماژه ب وێ چه‌ندێ كريه كو ئه‌ڤه نه جارا ئێكێ يه ئه‌ڤ روودانه روو دده‌ت.
ئه‌ڤرۆ نيوز:
جڤاتا وه‌زيران ده‌نگ ل سه‌ر زێره‌ڤانێن نشتيمانى و لێپرسينێ و رێگرتنا به‌عسيا بۆ سه‌ر حوكمى دا.
جڤاتا وه‌زيرێن عيراقێ د روونشتنا خوه يا ئاسايى دا، ئه‌وا ئه‌ڤرۆ ل باره‌گايێ جڤاتا وه‌زيران ب سه‌رۆكاتيا حه‌يده‌ر عه‌بادى گرێدايى هاته گێران و تێدا ده‌نگدان ل سه‌ر سێ ته‌وه‌ران كر كو گرنگترين ته‌وه‌ر بابه‌تێ هێزێن زێره‌ڤانێن نشتيمانى بوون.
كه‌نالێ عيراقيه يێ نيڤ فه‌رمى راگه‌هاند كو ئه‌ڤرۆ جڤاتا وه‌زيران ده‌نگدان ل سه‌ر قانوونا ناڤبرى و يا لێپرسينێ و رێنه‌دان ب حزبا به‌حس و كارێن وێ ل وه‌لاتى كر.
حوكمه‌تا نوكه ب سه‌رپه‌رشتيا مالكى ل سه‌ر بنياتێ ل هه‌ڤهاتنا سياسى د ناڤبه‌را لايه‌نێن سياسى دا هاتيه پێكئينان و ژ گرنگترين كارێن وێ ژى دانانا قانوونا لێبۆرينێ و زێره‌ڤانێن نشتيمانى و لێپرسينێ و رێزكخستيان د ناڤا ده‌وله‌تێ و رێڤه‌به‌ريێن وێ و رێ نه‌دان ب چالاكيێن حزبا به‌عس.
ئه‌ڤرۆ نيوز:
شيره‌تكارێ راگه‌هاندنێ ل په‌رله‌مانێ كوردستانێ راگه‌هاند كو دێ كۆمبوونا دويێ يا نه‌ئاسايا په‌رله‌مانى ل رۆژا پێنجشه‌مبيا بهێت بيت ل رێكه‌فتى 2015.2.5 و دێ ل پارێزگه‌ها هه‌له‌بچه هێته ئه‌نجام دان و بۆ ڤێ مه‌ره‌مێ ژى د گازيكرنه‌كا سه‌رۆكاتيا په‌رله‌مانى دا كو دوهى ده‌رچوويه، داخواز ژ هه‌موو ئه‌ندامێن په‌رله‌مانى كريه ل رێكه‌فتى 2015.2.5 ل هۆلا مونۆمێنتێ پارێزگه‌ها هه‌له‌بچه ئاماده‌بن بۆ پشكداريكرنێ د كۆمبوونێ دا.
ب گۆره‌يى به‌رنامێ كارى كو ل مالپه‌رێ فه‌رمى يێ سه‌رۆكاتيا په‌رله‌مانى به‌لاڤ بوويه، دێ كۆمبوون يا ته‌رخانكرى بيت بۆ دانوستاندنێ ل دۆر پرۆژێ قانوونا ئيدارا پارێزگه‌ها هه‌له‌بچه بيت كو روونشتنا نه‌ئاسايى يا حه‌فتيا بۆرى دا خواندنا ئێكێ بۆ هاتيه كرن.
ديسا دێ خواندنا ئێكێ بۆ پرۆژێ قانوونا هه‌لبژارتنا قايمقام و رێڤه‌به‌رێن ناحيان ل هه‌رێما كوردستانا عيراقێ بيت.
د ڤێ ده‌ربارێ دا، محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ بۆ ئه‌ڤرۆ نيوز گۆت: “بڕياره رۆژا پێنجشه‌مبى ل هۆلا مونۆمێنتا ل ده‌مژمێر 11ى سپێدێ په‌رله‌مانێ كوردستانێ ل هه‌له‌بچه كۆمبوونا خوه يا نه‌ئاسايى يا دويێ ل ڤى وه‌رزى بگێريت”.
زێده‌تر گۆت: “دێ دانوستاندن ل سه‌ر پرۆژێ قانوونا ئيدارا پارێزگه‌ها هه‌له‌بچه هێته كرن كو پێشبينى دكه‌ين بهێته په‌سه‌ندكرن، ژ به‌ر كو لايه‌نێن سياسى چو تێبينيێن مه‌زن ل سه‌ر نينن”.
ئاماژه ب وێ چه‌ندێ ژى كر كو ب گۆره‌يى به‌رنامێ كارى دێ خواندنا ئێكێ بۆ پرۆژێ قانوونا هه‌لبژارتنا قايمقام رێڤه‌به‌رێن ناحيا بيت كو ب گۆره‌يى ڤى پرۆژه‌يى دێ رێڤه‌به‌رێن ناحيا و قايمقام ژ لايێ سه‌رۆكێ جڤاتا پارێزگه‌هان ڤه هێنه هه‌لبژاتن.
تارق جه‌هه‌وه‌ر، شيره‌تكارێ راگه‌هاندنێ ل په‌رله‌مانێ كوردستانێ ئاماژه ب ڤه‌گوهاستنا روونشتنێن په‌رله‌مانى كر و گۆت: “د ده‌مێ پێدڤى دا، دشيان دايه په‌رله‌مان روونشتنێن خوه ببه‌ته ژ ده‌رڤه‌يى هۆلا په‌رله‌مانى و پێشتر حه‌فت جاران ئه‌ڤ كاره كريه”.
ئه‌ڤرۆ نيوز:
پارێزەرەکێ دادگەھا دھۆکێ راگەھاند، گەلەک کەس بۆ ھندەک کاودانێن ژ نشکەکێڤە ب سەرێ وان دھێن نەچار دبن ھندەک شاشیێن قانوونی بکەن، بۆ نموونە کچەکێ دایکا وێ یا مری، دێ رابن ل سەر ناڤێ ژنبابێ تومارکەن و دبیتە ئاریشە. ب ڤێ چەندێ ئەڤ کچە دێ بیتە میراتگرا ژنبابێ و وێ ھاژێ نە؟!. ئەڤە ژی دەرئەنجامێن خراب ل دووڤ دا دھێن، چونکو ژ لایێ شەرعی ڤە یا حەرامە و ژ لایێ قانوونی ڤە ژی شاشی یە، و سزایێ وێ دگەھیتە زیندانکرنا سەر پێنج سالان دا.
پارێزەر ئالان عەبدولغەفار بۆ ئەڤرۆ دیارکر کو گەلەک کەس بو ھندەک کاودانێن ژ نشکەکێڤە ب سەرێ وان دھێن نەچار دبن ھندەک شاشیێن قانوونی بکەن و گۆت: بۆ نموونە کچەکێ دایکا وێ یا مری دێ رابن ل سەر ناڤێ ژنبابێ تومارکەن و دبیتە ئاریشە ب ڤێ چەندێ ئەڤ کچە دێ بیتە میراتگرا ژنبابێ وێ ھاژێ نە، ھەروەسا کورەکێ دیتر بابێ وی شەھید بوویە و دایک و بابا گرێبەستا ھەڤژینیێ یا فەرمی نەبوویە و دیسا ھەڤژینا دویێ بوویە و دایکا وی رابوویە بو خوە شووکریە و کور ھێلایە ب تنێ، برایێ وی یێ ژنبابێ کریە کورێ خوە دا بشێت بچیتە قوتابخانێ، ماوەکێ درێژ ب ڤێ کێشێ ڤە چوویە ھەتا دانایە سەر ناڤێ دایک و بابێن وی، برایێ وی قەنجیەک لێ کریە داکو بشێت بو خوە بچیتە قوتابخانێ لێ بو وی بوویە خرابی، ژ ترسا رووتینا بەردەوام کەفتیە ڤێ شاشیێ ئەڤانە ژی دەرئەنجامێن خراب دووڤ دا دھێن چونکو ژلایێ شەرعیڤە یا حەرامە و ژلایێ قانوونێڤە ژی شاشیە، ناڤھاتی گۆتژی ئەگەرێ ڤێ ب خوە ژی جڤاکە بۆ نموونە دایکا زارۆیی خەلکا زومارە دێ بێژن مە نەڤێت نفشێ وێ ژی بھێتە دناڤ مەدا باشە ھەوە بوچی ئینا؟! بو ئەڤان حالەتان ھەموویا قانوونێ سزا دانایە سەر بۆ نموونە خێزانەکێ کچا وان مر و خودێ کچەکا دیتر بدەتێ رابن ناسناما وێ بدە ڤێ کچێ قانوون قەبیل ناکەت و سزا بو دانایە، دیسا وەلاتیەک رابیت زارۆیەکێ برایێ خوە ل سەر ناڤێ خوە تومار بکەت کو وی زارۆ نینن ئەڤە ژی نابیت.
دڤێ دەربارێدا ڤەکولەرێ جڤاکی ماجد حسێن دوپات دکەت و دبێژیت: ب راستی بابەتەکە زۆر کێشە ل سەر ھەنە گەلەک زارۆ وخێزان بووینە قوربانی ڤێ بریارا خەلەت ژبەر کو ھەر ژ دەسپیکا زانینا ڤی کەسی (چ دژیێ زارۆینیێ بیت یان مەزن ببیت) دێ ئارێشە دەسپێکەت ودێ پرسیار کەڤنە دمێشکێ وی کەسیدا … ئەز کیمە؟؟؟؟ و کوڕێ کیمە …؟؟؟؟ و پشتی دیاربوونا پرسیارا بەرسڤ دێ گەلەک یا ب بھا بیت، ھەروەسا پەیوەندیێن وی دگەل وێ خێزانا د گەل دژیت.
زێدەتر گۆت: یا باشتر ئەوە چ کارتێکرن د ڤی بابەتی نەھینەکرن و ئەو زارۆ ھەر سەر ناڤێ دەیک و بابێن وی یێن دروست بن داکو پەیوەندیێن جڤاکی یێن دروست بێنە ئاڤاکرن و ئەو خێزانە یا د بازنێ ئێمناھیێ دا بیت.
جیھان کۆرەمارکی بۆ رۆژناما ئه‌ڤرۆ به‌رهه‌ڤ كريه
ئەڤرۆ نیۆز، قائید میرۆ:
شەڤا بۆری ب ئەگەرێ ئاریشەیەکا جڤاکی دوو عەشیرەتێن باژێڕێ ھەولێرێ بشەر ھاتن و بۆ ئەگەر تێکچوونا رەوشا باژێڕێ، رێڤەبەرێ پۆلیسانژی دبێژیت رەوش ھاتیە کۆنتڕلکرن.
لیوا عەبدولخالق تەلعەت، رێڤەبەرێن پۆلیسێن پارێزگەھا ھەولێرێ دداخویانیەکێ بۆ ئەڤرۆ نیۆز دیارکر” دەمژمێر نەھی شەڤا بۆری ل تاخێ باداوە یێ باژێڕێ ھەولێرێ ب ئەگەرێ ئاریشەیەکا جڤاکی شەڕۆ پێکدادان دنێڤبەرا دو عەشیرەتاندا چێبوو
لیوا عەبدولخالقی گۆتژی” پشتی ھێزێن ئەمنی گەھشتینە جھێ بۆیەرێ، ئەف چەکدارێن تەقەکری ھەموو ھاتنە دەستەسەرکرن و سوپاس بۆ خودێ پشتی تەقەیەکێ زۆر چ کەسان گیانێ خوە ژ دەست نەدا و بریندار نەبووینە.
نافبری خویاژیکر، ئەف شەڕ ب ئەگەرێ ئاریشەیەکا جڤاکی یا دنێڤبەرا دو مالباتا چێبوویە و پشتی ھنگی بۆیە شەڕێ دوو عەشیرەتا.
ئەڤرۆ:
نورای مەرت نڤیسەر و ڤەکۆلەرا تورکیا بۆ رۆژناما زەمان یا تورکیا دیار کر کو دەمەکە ئەردۆگان بەحسێ سیستەمێ سەرۆکاتیێ ل تورکیا دکەت و دبێژیت ھەکە مە ئەو سیستەم بەری چەند سالان دروست کربا نھا ئاستەنگی ل ھەمبەر تورکیا نەدمان، نیەتا ئەردۆگانی ئاشکرایە، چونکو دی دڤێت سیستەمەکێ وەک یێ شاھی ل تورکیا دروست بکەت دا بشێت ھەموو بریارەکێ بدەت و گۆت: (ھەکە ئەو سیستەمێ کو ئەردۆگانی دخوازیت ل تورکیا ئاڤا ببیت، چو رۆلێ پەرلەمانی نامینن و ھەموو بریار دێ ب دەستێ ئەردۆگانی بیت و ئەو دشێت گەلەک بریارێن پەرلەمانی ژی رەد بکەت و د دەمەکێ وەسا دا تورکیا ب جھێ کو بەر ب وەلاتەکێ دیموکراتیک و پێشکەڤتی وەک وەلاتێن ئورۆپا بچیت دێ پتر بەرێ خوە بدەتە سیستەمێ ھندەک وەلاتێن عەرەبی و ئەڤە ژی دێ کاریگەریا خوە ل ژیانا ھەموو تاکەکێ تورکیا کەت).
نڤیسەر و ڤەکۆلەرا تورکیا ھەروەسا دیار کر کو دڤێت ھەموو پارتێن سیاسی یێن ل پەرلەمانێ تورکیا ب رەنگەکێ ئاشکرا ھەلویستێ خوە ل دژی سیستەمێ سەرۆکاتیێ یێ کو ئەردۆگانی دڤێت ئاڤا بکەت، نیشا بدەن. ئەردۆگان گەلەک جاران بەحسێ سیستەمێ سەرۆکاتیێ ل ئەمریکا دکەت، لێ ئەو سیستەمێ کو ئەردۆگان دەمەکە کار بۆ ئاڤاکرنا وێ دەمێ وەک یێ ئەمریکا نینە، چونکو ل ئەمریکا کۆنگرێس ھەیە و رۆلەکێ سەرەکی دگێریت، لێ ئەردۆگانی دڤێت ب رێیا ئاڤاکرنا سیستەمێ نوو پەرلەمانی بێ رۆل بکەت و ھەموو دەستھەلاتا تورکیا د دەستێ خوە دا کۆم بکەت و ئەڤە ژی تورکیا بەر ب سیستەمەکێ دکتاتۆری دبەت و چو مفایەکێ خوە بۆ جڤاکێ مە نینە.
نورای مەرت د دووماھیا ئاخڤتنا خوە دا ئەو یەک ژی دیار کر کو نھا پرانیا وەلاتێن ئورۆپا ژ بەر بنپێکرنا مافێ مرۆڤی و نەھێلانا ئازادیا راگەھاندنێ تورکیا رەخنە دکەن و ئەڤە ژی نیشا ددەت کا وەلاتێ مە تا چ رادە ژ جیھانا پێشکەڤتی دوور کەڤتیە و ھەکە ئەردۆگان سیستەمێ سەرۆکاتیێ ژی ل تورکیا دروست بکەت ئێدی دڤێت ئەم دیموکراسی و ئازادیا راگەھاندنێ ژ بیر بکەین و نابیت چو کەسەک ڤێ یەکێ قەبوول بکەت.
ئەڤرۆ:
د. سەلوان شنگالی جێگرێ نوونەرێ عیراقێ ل نەتەوێن ئێکگرتی بۆ رۆژناما ئەڤرۆ دیار کر کو پشتی شەڕی داعشێ ل سەر ھەرێما کوردستانێ جھێ کوردان بەرزتر لێھاتیە د ناڤ نەتەوێن ئێکگرتی دا و حوکمەتا ھەرێمێ ناڤودەنگیەکا نێڤدەولەتی یا مەزن بدەستڤەئینایە د بادەکا نەھێلانا تیرۆرێ و ھاریکاریا مرۆڤایەتی دا.
ل دۆر پرسا گیرۆبوونا نەتەوێن ئێکگرتی د ھەوارھاتنا ئاواران ل ھەرێما کوردستانێ دکتۆر سەلوانی گۆت” رێکخراوەکا جیھانی یە و گەلەک رۆتینێن کاری یێن ھەین و دکەڤیتە ژێر بیرۆقراتیەکا ئالۆز و ب ئاستەنگ ب تایبەت دەربارەی تەرخانکرنا دارایی چونکو نە ب تنێ بادەکا عیراقێ د ناڤ ئەجیندەیێن نەتەوێن ئێکگرتی یێن مرۆڤاتی دابوو ل ٢٠١٤ بەلکو نەخۆشیا ئیبۆلا و بادەکا سووری و شەڕێ ئۆکرانیا. لێ ل گەل ڤێ چەندێ نەتەوێن ئێکگرتی یا خوە لڤاندی”.
دکتۆر سەلوان د بەرسڤا پرسەکێ دا دەرباری ئەرکێ وی بخوە وەکو کوردستانیەک کو خەلکێ شنگالێ یە و پاشی عیراقیەک و نوونەرەک ل جڤاتا نەتەوێن ئێکگرتی، گۆت ” مە چەندین داتا و پێزانین د وارێ نەتەوێن ئیکگرتی دا پێشکیشکرن بۆ دیارکرنا رەوشێ و مەترسیا وآ و داخوازا پشتەڤانیێ ژ جڤاکێ نیڤدەولی، ئەز ب خوە وەکو کەس من دو بەیان ھەبوون ل جڤاتا ئاسایشێ ل دۆر بابەتی گۆتارەک ل ھەمبەر کۆمەلا گشتی یا نەتەوێن ئێکگرتی بۆ بەحسکرنا کاوادانان و داخوازا ھاریکاریێ و شەرمزارکرنا تاوانێن داعشێ، نھا ژی کاردکەین بۆ گرێدانا جڤینەکا تایبەت ل جڤاتا ئاسایشێ ل دۆر دەستدرێژیێن ھاتینە کرن ل سەر ژنێن ئێزدی ل شنگالێ و دێ بزاڤێ کەین ئێک ژ وان ئافرەتێن قورتالبووین ب رەنگەکێ راستە و خوە ل بەرامبەر جڤاکی نیڤدەولەتی مێھڤان بکەین “.
مە ژ ناڤبری پرسی، ئەمریکا و جڤاکێ نێڤدەولەتی فشار ل سەر ھەرێما کوردستانێ دکر کو یا ھاریکار بیت د چارەکرنا چەندین بادەکان دا وەکو بۆدجەی و پەترۆلێ و .. ھتد، ل گەل بەغدا و ئەم ژی رازیبوون و سێ ھەیڤ پتر ب سەرڤەچوون و بەغدا نەھاتە دەنگ؟ ئەرێ بۆچی ھەمان فشارێ نا ئێخنە سەر بەغدا ژی؟ د بەرسڤێ دا گۆت “ئەوان فشار یا خستیە سەر بەغدا ژی و نامەکا رۆھن و ئاشکرا ژی ھەبوو ژ لایێ ئۆبامای ڤە بۆ عەبادی د وێ دیدارا ل نیۆیۆرکێ د ناڤبەرا واندا ھاتیە کرن ، لێ دڤێت ژبیر نەکەین کو ئەمریکا ھەتا نھا وەسا بەرێ خوە ددەتە عیراقێ کو یا ئێکگرتی یە”.
ل دۆر ھنارتنا چەکی کو ب رێژەکا پتر بۆ گرۆپێ (الحشد الشعبی) دھێتە ھنارتن ژ پێشمەرگەی، دبێژیت” ھێرشێن ئەسمانی ل دەڤەرێن پێشمەرگەی پترن ژ دەڤەرێن حەشدا شەعبی ، ل بەرامبەر ژی رەخنەیێن وەکھەڤ ھەنە ژ لایێ وان ژی ڤە کو ئەمریکا ھاریکاریا پێشمەرگەی دکەت و یا وان ناکەت”.
ل دۆر رۆلێ پێشمەرگەی گوت” شیرەتا من بۆ ھێزێن کوردی ئەوە کو بزاڤێ بکەن چو سەرپێچیان ل ھەمبەر قانوونێن مرۆڤایەتی ئەنجام نەدەن ل دەمێ شەڕان و چو تشتێن ھەستیار نەھێنە ئەنجامدان نەمازە ل گەل ھندەک ژ عەشیرەتێن عەرەبی یێن ھاتینە نیاسین ب کێمترین رادە کو نە دژی کوردانە”.
شیرزاد نایف بۆ رۆژناما ئەڤرۆ بەرھەڤ کریە
نيشاندان