ئه‌ڤرۆ نيوز:

فه‌رمانده‌كێ پێشمه‌رگه‌يى ل كۆبانێ راگه‌هاند كو چه‌كدارێن داعش يێ بێ شه‌ركرن گۆندێن ده‌وروبه‌رێ كۆبانێ چول دكه‌ن و هه‌تا نوكه‌ 40 گۆند ل ده‌وروبه‌رێن كۆبانێ كه‌فتينه‌ ده‌ست هێزێن پێشمه‌رگه‌يى و شه‌رڤانان.

نه‌قيب ره‌مه‌زان ستۆنى، فه‌رماندێ پێشمه‌رگه‌يى ل كۆبانێ بۆ باسنيوز راگه‌هاند كو پێشمه‌رگه‌يى و شه‌رڤانان پێشڤه‌چوونێن باش يێن كرين ژ بوو پاقژكرنا هه‌موو سنورێ باژێرێ كۆبانێ ژ داعش و نوكه‌ چه‌كدارێن داعش شيانێن به‌ره‌ڤانيێ نينه‌ و بێى كو شه‌رى بكه‌ن، دێ ده‌ڤه‌رێ چول دكه‌ن.

ره‌مه‌زان ئاشكه‌را ژى كر كو پێزانينێن ته‌مام ب ده‌ست كه‌فتينه‌ كو هه‌موو ئه‌و گۆندێن سه‌ر ب باژێرێ كۆبانێ ژ لايێ چه‌كدارێن داعش ڤه‌ هاتينه‌ چول كرن و گۆت: “هه‌تا هه‌موو سنورێن كۆبانێ نه‌هێنه‌ پاقژكرن، ژيان تێدا ئاسايى نابيت و ئه‌و دێ د به‌رده‌وام بن ل سه‌ر پاراستنا ده‌ڤه‌رێ”.

ئه‌ڤى فه‌رماندێ پێشمه‌رگه‌يى ئاماژه‌ ب وێ چه‌ندێ ژى كر كو نوكه‌ شياينه‌ پشكه‌كا مه‌زن ژ ئه‌وان گۆندێن داعش مينرێژ كرين، پاقژ بكه‌ن و باژێرێ كۆبانێ ژى چو مين و ته‌قه‌مه‌نى تێدا نه‌ماينه‌.

ئەڤرۆ نيوز:
ئیدارا تەشریعی یا کانتونا جزیرێ رۆژەک بۆ ئەنجامدانا ھەلبژارتنێن باژێرڤانی و جڤاتێن دەڤەران دیار کر کو ل دووڤ ژڤانێ وان دیار کری ھەلبژارتنێن باژێرڤانیان دێ ل ١٣-٣-٢٠١٥ ھێنە ئەنجامدان و ھەروەسا ھەلبژارتنێن جڤاتێن دەڤەران ژی دێ ل ٥-٤-٢٠١٥ ھێنە ئەنجامدان.
ل دۆر ڤی بابەتی سعود مەلا سکرتێرێ پارتی دیموکراتی کوردستان-سووریا بۆ مالپەرێ وەلاتی دیار کر کو بریارا ئەنجامدانا ھەلبژارتنێن باژێرڤانیان یا کو ژلایێ دەستھەلاتدارێن پەیەدێ ڤە ھاتیە دان بریارەکا تاکرەوی یە و دێ بیتە ئەگەرێ وێ چەندێ کو ئالۆزیان بێخیتە د رێیا کارکرنا ھەڤپشک دا.
ل دووڤ گۆتنێن سعود مەلای ئەو بریار دێ بیتە ئەگەر کو لێڤەگەرا سیاسی یا کو پشتی رێککەفتناما دھۆکێ د ناڤبەرا (ENKS و TEV-DEM)ێ دا ھاتیە پێکئینان نەھێتە کاراکرن، ژ بەر کو بریارەکا ب وی رەنگی پێدڤی ب وێ چەندێ یە کو ھەموو ئالی رێککەفتنێ ل سەر بکەن.
د بەردەوامیا ئاخڤتنێن خوە دا سعود مەلای دلتەنگیا خوە بەرامبەر وێ بریارێ دیار کر و گۆت: (کەش و ھەوایێ دەستەسەرکرنان و رەڤاندنا زارۆکان نەیێ ھاریکارە بۆ ئەنجامدانا ھەلبژارتنان).
سکرتێرێ پارتی دیموکراتی کوردستان-سووریا ئەڤ ھەلبژارتنە ب ھەلبژارتنێن سەرۆکاتیا سووریێ شوبھاندن، زێدەتر گۆت: (ھەلبژارتنێن کو دێ ئیدارا زاتی ب ھاریکاریا چەند ھەڤالێن خوە ئەنجام دەت، د شەرعی نینن، ژ بەر کو پێدڤیە لێڤەگەرا سیاسا ب روونێت و دانوستاندنێ ل سەر ڤی بابەتی بکەت و کەش و ھەوایەکێ گونجای بۆ سەرکەفتنا ئەنجامدانا ھەلبژارتنان بھێتە دابینکرن).
سعود مەلای پرسیارا وێ یەکێ کر، کا کی دێ د ھەلبژارتنان دا پشکدار بیت، بێی کو رێککەفتن ل گەل شریکێ خوە د لێڤەگەرا سیاسی دا کر بیت و ل سەر چ بنیات بریارا ئەنجامدانا ھەلبژارتنان ھاتە دان، بێی کو رێککەفتن ل لێڤەگەرا سیاسی ل سەر ھاتبیتە کرن. ھندەک لایەن یێن ھەین حەز ناکەن کو ھەڤپشکی د ناڤبەرا ئالیێن کوردی دا بھێتە کاراکرن و چو ئالیێن دی ژی قەبوول ناکەن.
سعود مەلای دوپاتی ژ وێ چەندێ کر کو گرنگە پێکڤە کار بکەن و داخواز ژ تەڤدەمێ کر کو پێکڤە کار بکەن بۆ سەرئێخستنا رێککەفتناما دھۆکێ و کاراکرنا لێڤەگەرا سیاسی.
ئەڤ بریارا پەیەدێ یا ئەنجامدانا ھەلبژارتنان د دەمەکێ دایە کو پەیڤدارێ یەکینەیێن پاراستنا گەل رێدور خەلیل بۆ ئاژانسا فرات نیوزێ دیار کر کو داعش پشتی ل کۆبانێ شکەستن خواری نھا پرانیا ھێزێن خوە ل گۆندێن رەخ کۆبانێ ڤەدکێشیت و بزاڤێ دکەت کو بەرەیەکێ نوو یێ شەری ل جزیرێ ڤەکەت و ژ بەر ھندێ ژی ئەو وەسا زوو دەست ب ڤەکێشانا ھێزێن خوە ل رەخ کۆبانێ دکەن.
ل ئالیێ دی پرانیا رەوشەنبیرێن کورد داخواز کرن کو بەری داعش ھێزێن خوە ل جزیرێ کۆم بکەت و ھێرشی خەلکێ بکەت بلا PYD رێ بدەت کو پێشمەرگێن رۆژئاڤایێ کوردستانێ و ھەموو ئالیێن دی یێن کوردی بەرھەڤیەکا مەزن بکەن و ھەکە داعشێ خواست دەست ب ھێرشەکێ ل سەر جزیرێ بکەت بلا شکەستنێ بخووت و نابیت کو جزیر و عەفرین و باژارێن دی یێن رۆژئاڤایێ کوردستانێ ژی وەک کۆبانێ وێران ببن، چونکو نھا کۆبانێ کێر ژیانێ ناھێت و ب سەد ھزاران خەلکێ وی باژاری د رەوشەکێ گەلەک خراب دا دژین و نابیت چارەنڤیسێ جزیرێ ژی وەک کۆبانێ لێ بھێت.

ڤه‌گێر سه‌عدولا بۆ ئه‌ڤرۆ نيوز به‌رهه‌ڤكريه‌

ئه‌ڤرۆ نیوز،زنار توڤى:
رێكخراوا تیرورستیا داعش ل ده‌ڤه‌رێن ژێر ده‌سهه‌لاتا وێ ل سنورێ كه‌ركوكێ هێزه‌كا زور كومكریه‌، دگه‌ل هندێ ژى ژماره‌كا زورا ماتورسكلا ئاماده‌ كریه‌ و لبه‌ره‌ بڤێ رێكێ هێرشێ بكه‌نه‌ سه‌ر پێشمه‌رگه‌ى ل كه‌ركوكێ.
عه‌مید كاوه‌ غه‌ریب رێڤه‌به‌رێ بنگه‌هێ پولیسێن قه‌زا داقوق یا بسه‌ر كه‌ركوكێ ڤه‌ بو سایتێ خه‌ندان دیاركریه‌: نوكه‌ چه‌كدارێن داعش وه‌ك به‌رسڤه‌كێ بو وێ شكه‌ستنا مه‌زنا به‌رى چه‌ند روژان لسه‌ر ده‌ستێ هێزێن پێشمه‌رگه‌ى خوارى،هێزه‌كا زور كومكریه‌ بو هێرش كرنا سه‌ر سه‌نگه‌رێن پیشمه‌رگه‌ى،د هه‌مان ده‌مدا چه‌كدارێن داعش كومه‌كا زورا ماتورسكلان ئاماده‌كرینه‌ ل سنورێ كه‌ركوكێ و لبه‌ره‌ وه‌ك ته‌كتیكه‌كا نوو به‌رامبه‌ر هێزێن پێشمه‌رگه‌ى بكار بینن،ژ پێخه‌مه‌ت بڤێ رێكێ بگه‌هنه‌ ئارمانجێن خو.
عه‌مید كاوه‌ى ئه‌وژى دیاركریه‌:چه‌كدارێن داعش دڤێن هێرشێ بكه‌نه‌ سه‌ر گوندێ ئه‌لبومحه‌مه‌د و عه‌ره‌ب كویى و هه‌مى ده‌ڤه‌رێن دیتر،دبه‌رامبه‌ر دا هێزێن پێشمه‌رگه‌ى هه‌مى هه‌ولێن سه‌ربازى ئێخستینه‌ كار و هه‌مى جهێن ستراتیجى كونترول كرینه‌، بو وێ چه‌ندێ كو بشێن ب ساناهى هه‌مى هێرش و په‌لامارێن چه‌كدارێن داعشێ تێكبشكێنن.
ئه‌و چه‌ند ژى دیاركریه‌:كو چه‌كدارێن داعش ل ده‌ڤه‌رێن حه‌ویجه‌ و موسل و ئه‌نبار و وه‌لاتێ سوریا هێزێن خو ئیناینه‌ نێزیكى كه‌ركوكێ و ژبلى ڤێ چه‌ندێ ژماره‌كا هێزێن بیانى ژى ئیناینه‌ ڤێ ده‌ڤه‌رێ.
رێڤه‌به‌رێ بنگه‌هێ پولیسێن داقوق ئاماژه‌ ب وێ چه‌ندێ ژى دا:كو ئه‌وێ نوكه‌ سه‌رپه‌رشتیا هێزێن داعشێ دكه‌ت بو هێرش كرنا سه‌ر ده‌ڤه‌رێن كه‌ركوكێ ناڤێ وى (عومه‌ر چیچانى)یه‌ كو وه‌زیرێ جه‌نگییێ ده‌وله‌تا ئیسلامیه‌،هه‌روه‌سا دیاركریه‌،وه‌ك ته‌كتیكه‌كێ بو هێرش كرنا سه‌ر پێشمه‌رگه‌ى و سه‌ر لێ شێواندنا هێزێن پێشمه‌رگه‌ى و فروكێن جه‌نگى چه‌كدارێن داعش ئالایێ كوردستانێ و جلكێن كوردى بكار دئینن.

ئه‌ڤرۆ نيوز:

سه‌رۆك بارزانى د په‌يامه‌كێ دا سه‌ره‌خوه‌شيا خوه‌ و گه‌لێ كوردستانێ ئاراسته‌ى گه‌لێ ئوردن و خانه‌وادا فرۆكه‌ڤانێ ئوردنی (مەعاز کەساسیبە) دكه‌ت و دبێژيت: خوينا شه‌هيد مه‌عاز و هه‌موو وان شه‌هيدێن قاره‌مان كو د رێيا به‌ره‌ڤانيكرن ژ بها و پێكڤه‌ژيان و ئاسايش و خه‌لك و شه‌رێ دژى دوژمنێن مروڤايه‌تيێ گيانێ خوه‌ كريه‌ فيدا، بهه‌ده‌ر ناچيت و تيرورست دێ باجا ڤان تاوان ده‌ت و سه‌رئه‌نجام دێ ژ ناڤ چن و شكێن.