ئەڤرۆ، لەزگین
فەرماندێ پێشمەرگێن ئیزدێ ل شنگالێ بۆ ئەڤرۆ دیارکر کو ھندەک پەرلەمانتارێن عیراقێ بەری چەند رۆژان ل جڤاتا نوونەرێن عیراقێ ھێرشێ دکەنە سەر مە کو دبنیاتدا وان کەسان پەیوەندی ل گەل داعش ھەنە و ژلایەکی ڤە داعشێ پالدەن ھێرشێ بکەتە سەر مە و ژ لایەکێ دی دا خوە ب ھەڤالێن حوکمەتی دئینە دەر و دێ ل دادگەھا لاھای سکالایێ ل سەر وان تۆمارکەین.
قاسم شەشۆ بۆ ئەڤرۆ “ھندەک ئەندامێن پەرلەمانێ عیراقێ د کارەساتا شنگالێ دا خوە بێدەنگ کربوو و چو ھەلویست نەوەرگرتبوو نوکە ل پەرلەمانێ عیراقێ دژی مە وپێشمەرگەی ھەلویستان وەردگرن و ب بەلگە دێ بیژم ئەندامەکی ژوان دەمێ ھەلبژارتنێن پەرلەمانێ عیراقێ ٥٠ ملیۆن دۆلار ژ نوری مالکی وەرگرتن و ل لوبنانێ خانیەکێ ب خوە پێ ئاڤاکری و کۆر مامێ وی ژێ مقدم بوو نوکە ل مووسل بوویە ئەمیرەکێ داعش ودادوەرێ شەرعیێ تیرۆرستان ل مووسل، بۆچێ چ ھەلویستی بەرامبەر وەرناگریت؟”.
قاسم شەشۆی گوت ژی”دێ ل دادگەھا لاھای سکالایێ ل سەر وان ھەموو کەسان تۆمارکەین یێن ل پەرلەمانێ عیراقێ ھێرشان دکەنە سەر مە وبەرگریێ ژ تیرۆرستان دکەن چونکو د ەمەکی دا ھزارەھا کچ وژنێن ئێزدی ل سەر دەستێن داعشَ ھاتنە رەڤاندن و بارزگانی ل مووسل پێ ھاتە کرن، لێ ئەڤ کەسێن نوکە ل پەرلەمانی دژی مە کاردکەن د بێدەنگ بوون.
زێدەتر گوت” ئەو ئەندامێن پەرلەمانی یێن کو دژی مە کاردکەن ب شەڤێ ھەڤالێن داعشن و ب رۆژی ژی خوە ژێ دوور دکەن وھەکە وان دەست دگەل تیرۆرستاندا نەبیت، بۆچی ھێرشێ دکەنە سەر مە و ل دەمێ روودانا شنگالێ چێبووی چو ھەلویست نەوەرگرتن؟، یا ئاشکرایە کو ئەڤ کەسێن نوکە ھەلویستی ھەڤدژ دژی مە وپێشمەرگەی وەردگرن، وان دەست یێ ل گەل تیرۆرستان ھەی و ھەر دەمێ شنگال ب تەمامێ رزگاربیت ب ھەموو شیوەیان دێ ب شەڤ ورۆژ کار کەین بۆ ھندی ھەموو کەسێن دەستێ ل گەل تیرۆرستان ھەی ب دژواری ل دادگەھێن نێڤدەولەتی بھێنە سزادان.
شەشۆی ئاشکرا کرکو ب چو شیوەکێ ئەم رازی نابین بێ رازیبوونا سەرۆک بارزانی و حوکمەتا ھەرێما کوردستانێ، حوکمەتا عیراقی مایتێکرنێ د شنگالێ دا بکەت و ھەکە نوکە سەرۆک بارزانی فەرمانێ بدەت، د دەمێ ٤٨ دەمژمێراندا شنگال ب تەمامێ دێ ھێتە کونترۆلکرن وبلا لەشکەرێ عیراقێ بھێت مووسلێ و دەڤەرێن دی یێن عیراقێ ژ تیرۆرستان رزگاربکەت.