ئه‌ڤرۆ نیوز:
ده‌یڤید كامیرون سه‌رۆك وه‌زیرێن به‌ریتانیا نامه‌كێ بۆ 1000 مزگه‌فتێن وه‌لاتێ خوه دهنێریت و داخوازێ ژێ دكه‌ت نه‌هێلن ل ناڤ مزگه‌فتان هاریكاریا توندره‌وان بهێته كرن و مزگه‌فت بۆ كارێ تێكدانێ بهێته بكارئینان.
سه‌رۆك وه‌زیرێن به‌ریتانیا داخواز كریه كو نه‌هێلن بگه‌هیته وێ چه‌ندێ كو وه‌ك روودانێن هه‌ڤشێوێ پاریس، ل به‌ریتانیا ژى دروست ببن و پێدڤیه سروشتێ ئاینێ ئیسلامێ بهێته نیشادان و ل گه‌ل ئێك د راستگو بن.
ئه‌ڤرۆ نیوز،زنار توڤى:
ئاخفتنكه‌رێ وه‌زاره‌تا په‌روه‌ردێ ل حكومه‌تا هه‌رێما كوردستانێ ئه‌ڤرۆ رێكه‌فتى 20/1/2015 بو ده‌زگه‌هێن راگه‌هاندنێ دیاركر كو وه‌زاره‌تا په‌روه‌ردێ دێ 1070 ماموستا یێندى ب گرێبه‌ست ئه‌ڤ ساله دامه‌زرینیت.
فاتح مه‌وله‌وى زاده ئاخفتنكه‌رێ وه‌زاره‌تا په‌روه‌ردێ یا حكومه‌تا هه‌رێمێ ئه‌وژى گوت:ژبه‌ركو گه‌له‌ك قوتابخانان پێدڤى ب ماموستایان هه‌یه و ژ پێخه‌مه‌ت پركرنا وان ڤالاتیان،وه‌زاره‌تا په‌روه‌ردێ دێ ڤێ رێژا دامه‌زراندنێ ب گرێ به‌ست دامه‌زرینیت .
مه‌وله‌وى دیاركر كو ڤێ جارێ دێ ده‌رچوویێن كولیژێن ئاداب و زانست و كولیژا ئابوورى و كولیژا هونه‌رێن جوان و پشكێن شه‌ریعێ هێنه دامه‌زراندن و و ره‌نگه حه‌فتیا بهێت فورم بهێته به‌لاڤكرن.
ئه‌ڤرۆ نیوز، قائید میرو
ئه‌ڤرۆ ئێڤارى ل باژێرێ كوبانێ، پێشمه‌رگێ هێزا ئێك یا پشته‌ڤانى، ب ناڤێ زێره‌ڤان مزیرى كو خه‌لكێ باژێرێ سورانه ب ده‌ستێ تیرورستێن داعش شه‌هید بوو.
بۆ پشته‌ڤانیكرنا شه‌رڤانێن یه‌كێنه‌یا پاراستنا گه‌ل YPG د شه‌رێ دژى داعش دا، په‌رله‌مانێ كوردستانێ بڕیاردابوو كو 150 پێشمه‌رگێن كوردستانێ بچنه باژێرێ كوبانێ یا رۆژئاڤایێ كوردستانێ و پشتى پێشمه‌رگێ كوردستانێ چوویه كوبانێ، هه‌ڤسه‌نگیا شه‌رى هاته گوهۆرین و پرانیا گه‌ره‌كێن د ده‌ست داعش دا ل كوبانێ ژێ هاتنه ستاندن و ل نێزیك دێ مزگینیا ئێكجارى یا رزگاركرنا كوبانێ هێته راگه‌هاندن.
ئه‌ڤرۆ نیوز:
ژێده‌ره‌كێ ژ حكومه‌تا عیراقێ ئاشكرا كر كو به‌رپرسه‌كێ بلندێ ئه‌مریكا ب حه‌یده‌ر عه‌بادى سه‌رۆك وه‌زیرێن عیراقێ گوتیه كو خوه نێزیكى رووسیا نه‌كه‌ت، به‌رۆڤاژى ئه‌مریكا هه‌ڤكاریێن سه‌ربازى پێشكێشى عیراقێ ناكه‌ت.
شانده‌كێ رووسى كو پێكهاتیه ژ هنارتیێ تایبه‌تێ سه‌رۆكێ رووسیا بۆ كاروبارێن رۆژهه‌لاتان ناڤه‌راست و جێگرێ وه‌زیرێ ده‌رڤه‌یێ یێ رووسیا نوكه ل عیراقێ و هه‌رێما كوردستانێ و ل گه‌ل عه‌بادى كومببوون و عه‌بادى سوپاسیا رووسیا كربوو كو بۆ وان هاریكاریێن دده‌ته عیراقێ.
ئه‌ڤرۆ نیوز،زنار توڤى:
ژێده‌رێن نووچه‌یان وه‌سا دانه دیاكرن كو ئه‌ڤرۆ چه‌كدارێن حوسى یێن ب ره‌گه‌ز شیعه ل وه‌لاتێ یه‌مه‌نێ شیان ده‌ست ب سه‌ر كوچكا كومارى یا وى وه‌لاتى دا بگرن،پشتى كو ماوێ دو روژان بوویه شه‌ر دناڤبه‌را هێزێن یه‌مه‌نى و چه‌كدارێن حوسى ل سه‌نعا یا پایته‌ختێ وى وه‌لاتى،هه‌روه‌سا ژ ئه‌گه‌رێ وان شه‌ر و پێكدادانان هێزێن حوسى گه‌هشتینه نێزیك مالا سه‌روك كومارێ یه‌مه‌نێ، بارودوخێ وى وه‌لاتى گه‌له‌ك ئالوز بوویه و ئه‌ڤ چه‌نده ژ ئه‌گه‌رێ ململانا مه‌زهه‌بى په‌یدا بوویه دناڤبه‌را شیعه و سنه‌یێن وى وه‌لاتى.
ئه‌ڤرۆ نیوز:
ئه‌ڤرۆ ئێڤارى، عه‌مید تارق ئه‌حمه‌د رێڤه‌به‌رێ پۆلیسێن پارێزگه‌ها دهۆكێ د كۆنگره‌یه‌كێ رۆژنامه‌ڤانى دا به‌حسێ ئه‌گه‌رێن به‌رزه‌بوونا عه‌مید ژارۆ دهۆكى كر كو هه‌یاما سێ رۆژان بوو یێ به‌رزه و گۆت: ئه‌ڤرۆ ژارۆ دهۆكى ل گه‌لیێ باعه‌درێ ل ده‌مژمێر 12 نیڤرۆ،هاتیه دیتن و پشتى دانوستاندن ل گه‌ل هاتیه كرن، دیاربوو كو ژارۆ تووشى ره‌وشه‌كا ده‌روونى ببوو و نوكه ره‌وشا وى یا ئارامه و به‌رى نوكه‌ژى ئه‌ڤ حاله‌ته یێ بؤ چێبووى كو چه‌ند رۆژان ژارۆ بۆ هه‌یاما دو هه‌تا سێ رۆژان یێ به‌رزه‌بووى، به‌لێ ئاگه‌هداریا خێزانا خوه دكر و پۆلیس پێ ئاگه‌هدار نه‌دكرن”.
عه‌مید تارق زێده‌تر گۆت: چ كه‌سه‌كى گه‌ف ل ژارۆ دهۆكى نه‌كرینه و ته‌له‌فونێن وى هه‌موو ل ده‌ف مه‌نه.
نه‌رویج، ئاراس ره‌شاڤایى
ل گۆر ده‌زگه‌هێن راگه‌هاندنێ یێن نه‌رویجى، مه‌لا كرێكار پشتى ل زیندانێ ده‌ردكه‌ڤیت، ناهێته ئازادكرن، به‌لكو دێ ل گزیرته‌كا وى وه‌لاتى ل بن چاڤدێریا پۆلیسێن حكومه‌تا نه‌رویج دابیت.
بڕیاره 25/1/2015 مه‌لار كرێكار ژ زیندانێ بهێته ئازادكرن و بریار ئه‌وبوو پشتى دهێته ئازادكرن، یێ سه‌ربه‌ست بیت، به‌لێ ئه‌ڤرۆ حكومه‌تا نه‌رویج ژ بڕیارا خوه لێڤه‌بوو و د بڕیاره‌كێ دا دیاركریه پشتى دهێته ئازادكرن دێ ل گزیرته‌كا وه‌لاتێ وان ب ناڤێ ( Kyrksæterora ) كو دكه‌ڤیته ناڤه‌راستا نه‌رویج هێته ئاكنجیكرن.
ل گۆر رۆژناما ( dagbladet ) ئه‌ڤرۆ پۆلیسێن نه‌رویج د كۆنگره‌كێ دا دیاركرن كو مه‌لا كرێكار دێ ل گزیرتا ( Kyrksæterora )) مینیت و ب چ ره‌نگا ناهێلن ل وى گزیرتێ ده‌ركه‌ڤیت و دڤێت حه‌فتیێ سێ جارا خوه نیشا پۆلیسان بده‌ت كو ئه‌و یێ ل ڤى گزیرتێ و ئه‌ڤ بڕیاره بۆ ده‌ما ئێك ساله هه‌تا رێكه‌كا دى بۆ دهێته دیتن.
ئه‌ڤرۆ نیوز:
سه‌رۆك بارزانى د چوارچوڤێ پێشوازیكرنا میخاییل بوگدانوڤ هنارتیێ تایبه‌تێ سه‌رۆكێ رووسیا بۆ كاروبارێن رۆژهه‌لاتان ناڤه‌راست و جێگرێ وه‌زیرێ ده‌رڤه‌یێ یێ رووسیا به‌حسێ ره‌وشا نوكه یا كوردستانێ كر و رژى ل سه‌ر وێ یه‌كێ كر ژبه‌ر هندێ تیرورستان هێرش كره سه‌ر كوردستانێ، چونكه كوردستان ئاسته‌نگه‌كا مه‌زن بوو ل هه‌مبه‌ر بجهبوونا پلانا تیرورستان و به‌رفره‌هبوونا وان ل ده‌ڤه‌رێ و دیاركر كو تیرور گه‌فه‌كا جدى یه بۆ سه‌ر هه‌ر لایه‌كێ و گۆت” هه‌ر لایه‌كێ بخوازیت تیرورێ وه‌ك كارته‌كا سیاسى د هه‌ڤركیان دا بكار بینیت، د ئه‌نجام دا دێ زیان گه‌هیته وى ب خوه و دێ ب ڤى ئاگرى سوژیت.
جێگرێ وه‌زیرێ ده‌رڤه یێ رووسیا رژى ل سه‌ر پشته‌ڤانیا وه‌لاتى خوه بۆ سه‌رۆك بارزانى و گه‌لێ كوردستانێ ل شه‌رى دژى تیرۆرستان كر.
ئه‌ڤرۆ نيوز، نيوار محه‌مه‌د سه‌ليم:
ژێده‌ره‌كى ژ راگه‌هاندنا فه‌رماندا دهۆك بۆ ئه‌ڤرۆ نيوز دياركر كو ئه‌ڤرۆ عه‌ميد ژارۆ دهۆكى ئه‌ندامێ فه‌رماندا دهۆك ب ساخى هاتيه ديتن و يێ ب سلامه‌ته و رێڤه‌به‌ريا پۆليسان ژى ئه‌ڤ چه‌نده پشت راست كر.
شێرزاد نائيف، ژ راگه‌هاندنا فه‌رماندا دهۆك گۆت: “ل دووڤ ئه‌و پێزانينێن ب ده‌ست مه كه‌فتين، عه‌ميد ژارۆ دهۆكى ئه‌نداما فه‌رماندا دهۆك يێ ب سلامه‌ته و ژ بوو پێرابوونێن قانوونى چوويه رێڤه‌به‌ريا پۆليسێن پارێزگه‌ها دهۆكێ”.
ژ لايه‌كێ دى ڤه نه‌قيبێ مافپه‌روه‌ر، هێمن سلێمان، به‌رپرسێ راگه‌هاندنا رێڤه‌به‌ريا پۆليسێن پارێزگه‌ها دهۆكێ راگه‌هاند كو نوكه عه‌ميد ژارۆ دهۆكى ل رێڤه‌به‌ريا وانه ژ بوو پێرابوونێن قانوونى و گۆت: “يێ ساخ و ب سلامه‌ته”.
عه‌ميد ژارۆ دهۆكى 18\1\2015 هاتبوو بێ سه‌روشوون كرن و ترۆمبێلا وى ل نێزيك پانزينخانا شندوخا هاتبوو ديتن كو چه‌كێ وى و مۆبايله‌كا وى تێدا بوون.
ئه‌ڤرۆ نيوز:
وه‌زيرێ دارايى و ئابوورى ل حوكمه‌تا هه‌رێما كوردستانێ، بڕياره‌كا نوو بۆ نووكرنا گرێبه‌ستێن كارمه‌ندێن گرێبه‌ست بۆ سالا 2015 ئيمزا كر.
ژێده‌ره‌كى ژ نڤيسينگه‌ها وه‌زيرێ دارايى بۆ باسنيۆز راگه‌هاند: “رێباز حه‌ملان، فه‌رمانا نووكرنا گرێبه‌ستنێن كارمه‌ندێن گرێبه‌ست يێن داموده‌زگه‌هێن حوكمه‌تا هه‌رێما كوردستانێ ده‌ركر”.
ئه‌وى ژێده‌رى ئاماژه ب وێ چه‌ندێ ژى كر كو حه‌فتيا بۆرى دا وه‌زيرێ دارايى بڕيارا نووكرنا گرێبه‌ستێن كارمه‌ندان بۆ سالا 2015 ئيمزا كر و جودا هه‌موو ئه‌و فه‌رمانبه‌رێن پێدڤى نه كو گرێبه‌ستێن وان بهێنه نووكرن، ژ لايێ وه‌زاره‌تا دارايى ڤه دێ بۆ وه‌زاره‌تێن وان هێنه ره‌وانه كرن بۆ ئه‌نجامدانا كارێن پێدڤى.
دا زانين ژى كو ئه‌و كارێ وه‌زيرێ دارايى وه‌كو مزگينيه‌كێ يه بۆ وان كه‌سێن گرێبه‌ست يێن مل ب ملێ فه‌رمانبه‌رێن دى خراگر بووين ژ به‌ر نه‌بوونا مووچه‌يى.
ب گۆره‌يى ئامارێن هه‌ين زێده‌ترى 22 هزار كه‌س وه‌كو گرێبه‌ست ل داموده‌زگه‌هێن حوكمه‌تا هه‌رێما كوردستانێ كار دكه‌ن. ب گۆره‌يى نڤيسارا وه‌زاره‌تا دارايى ماوێ گرێبه‌ستێ ساله‌كه و مووچێ وان ژى د ناڤبه‌را 200 هه‌تا 800 هزار ديناران دايه.
نيشاندان