ئه‌ڤرۆ نيوز:

سه‌رۆكێ حوكمه‌تا هه‌رێما كوردستانێ راگه‌هاند كو ئه‌و خوازيارێن ئه‌وێ رۆژێ نه‌ ئاواره‌ و په‌نابه‌ر ڤه‌گه‌رنه‌ سه‌ر مال و مولكێن خوه‌، داخواز ژى ژ ئاواران كر كو خوه‌راگر بن بۆ ڤێ قووناغا ده‌مكى هه‌تا ده‌ڤه‌رێن وان ئارام بن.

ئه‌ڤرۆ رۆژا ئێكشه‌مبى 18\1\2015 نێچيرڤان بارزانى سه‌رۆك وه‌زيرێن هه‌رێما كوردستانێ، پێشوازى ل جوجيۆ لينگۆ، بالوێزێ ڤاتيكانێ ل عيراقێ و شانده‌كێ ل گه‌ل دا كر.

بالوێزێ ڤاتيكانێ ته‌كست كر كو ئه‌و گه‌له‌ك ب گرنگى و نێزيك دووڤچوونا كاودانێن هه‌رێما كوردستانێ و عيراقێ دكه‌ن و سۆپاسيێن پاپايێ ڤاتيكانێ بۆ سياسه‌تا ڤه‌كرى و پێشوازيكرنا حوكمه‌تێ بۆ ئاواره‌ و په‌نابه‌ران ب تايبه‌ت ژى پێكهاتێ مه‌سيحى و دابينكرنا ئارامى و سه‌قامگێريا بۆ دابين كرى كر.

ده‌رباره‌يى كاودانێن نوكه‌ و پێدڤيێن ئاواران ئه‌و خزمه‌تێن پێشكێشى ئاواران ژى هاتينه‌ كرن، سۆپاسيا سه‌رۆك وه‌زيرى كرن و هه‌ردولا ته‌كست ل سه‌ر مانا ئاواران ل هه‌رێما كوردستانێ بۆ ڤێ قووناغێ كرن.

نێچيرڤان بارزانى ته‌كست ل سه‌ر سياسه‌ت و هه‌لويستێ حوكمه‌تێ و گرێدانا گه‌لێ وێ ده‌ربڕى و ب تايبه‌ت ژى د ڤێ قووناغا دژوار دا كو رووى ب روويى رێكخراوه‌كا دڕنده‌ و تيرۆرست دبن.

نێچيرڤان بارزانى گۆتژى: “ل هه‌رێما كوردستانێ ناما ئاشتى و پێكڤه‌ژيان و لێبۆرينێ دهنێرين و هيڤى خوازين ئه‌وێ ينه‌ كو ئاواره‌ و په‌نابه‌ر ب ڤه‌گه‌رنه‌ سه‌ر مال و حالێن خوه‌”. داخواز ژى ژ ئاواران كر كو خوه‌راگر بن هه‌تا ئه‌ڤ قووناغا ده‌مكى ب دووماهى دهێت و ب ئارامى ڤه‌گه‌رنه‌ سه‌ر جهێن خوه‌.

ئەڤرۆ نیوز، لەزگین جۆقی:

سەرۆکێ دادگەھا تێھەلچوونا دھۆکێ بۆ ئەڤرۆ نیوز دیارکر کو سالا بۆری ل سەرانسەری پاریزگەھا دھۆکێ ٤٤ ھزار و ٣٧٩ حالەتین جۆرا و جۆر گه‌هشتينه‌ دادگه‌هێ و ژ وان ژی ٤٢ ھزار و١٠٢ حالەت ب دووماھیی ھاتینە، زێدەتر ژ ١٥ ھزار حالەتێن ھەڤژینی ھاتینە تۆمارکرن ب تنی ١١ حالەت ھەبووینە ژنا دویی ئیناینە.

محەمەد ئەمین ھادی سەرۆکێ دادگەھا تێھەلچوونێ ل دھۆکێ گۆتژی: “ل سالا بۆری ١٢٣٤ حالەتێن توندوتیژی ھاتینە تۆمارکرن ژوان ژی ١٤٠٨ حالەت ھاتینە ئێکلایکرن پێنج یێن دیتر ماینە و سالە ٢٠١٤ ل سەرانسەری دھۆکێ ١١٠٣ حالەتین ژێکجودابوونی ھاتینە تۆمارکرن ژ وان ژی ٧١٨ حالەت ژێکجۆدا بووینە یێن دیتر ھەموو ھاتینە چارەکرن نەبووینە جودابوون لێ ئاماژە ب حالەتین کوشتنی و سەرا ناموسی نەھاتە دان.

ئامارا دادگه‌هێ يا سالا بۆرى ب ره‌نگه‌كێ به‌رفره‌هتر ل هژمارا سوبه‌هى يا رۆژناما ئه‌ڤرۆ بخوينن.

ئه‌ڤرۆ نيوز:

سه‌رۆكێ ده‌سته‌يا ده‌ستپاكيا هه‌رێمێ گه‌فان ل وان به‌رپرسان دكه‌ت يێن سامانێن خوه‌ ئاشكه‌را نه‌كه‌ن و رادگه‌هينيت هه‌كه‌ ئه‌و سامانێن خوه‌ ئاشكه‌را نه‌كه‌ن، دێ ناڤێن وان به‌لاڤ كه‌ن.

د. ئه‌حمه‌د ئه‌نوه‌ر، سه‌رۆكێ ده‌سته‌يا ده‌ستپاكيا هه‌رێما كوردستانێ د هه‌ڤپه‌يڤينه‌كێ دا ل گه‌ل ئاژانسا ئه‌نادۆل يا توركرى راستڤه‌كرنا ڤێ دووماهيێ يا ده‌سته‌يا ده‌ستپاكيا ب باشى ب ناڤ دبه‌ت بۆ ڤه‌كۆلينێن پتر به‌رامبه‌ر به‌رپرسێن گه‌نده‌ل و دبێژيت: “ئه‌ڤ راستڤه‌كرنا په‌رله‌مانى ل 25 و 26\11\2014 ده‌سته‌لاتێن باشتر دده‌ته‌ ده‌ستێ و دێ كارێن وێ ب باشتر ب رێڤه‌چن و 95% يا مه‌ دڤيا ب جهـ هات”.

ل دۆر ژ گرنگترين وان گوهۆڕينێن د قانوونێ دا هاتين ئاشكرا كر كو سزادانا وان به‌رپرسێن سامانێ خوه‌ ئاشكه‌را ناكه‌ن ب كۆژمێ سێ هه‌تا 100 مليۆن ديناران و سزادانا وان فه‌رمانبه‌رێن گشتى يێن پێزانينان نه‌ده‌نه‌ ده‌ستێ و گۆت: “پێدڤى بوو مه‌ ب خوه‌ مافێ دامه‌زراندنا ڤه‌كوله‌رێ دادوه‌رى هه‌بايه‌، نوكه‌ ئه‌و كێشه‌ مه‌ هه‌يه‌”.

د. ئه‌حمه‌د دبێژيتژى: “مه‌ ل به‌ره‌ ئه‌ڤ ساله‌ كار ل سه‌ر رێژا گه‌نده‌ليێ د ناڤ داموده‌زگه‌هێن حكومى دا ديار بكه‌ين، هه‌كه‌ ب چو رێيا هه‌بيت، مه‌يدانى يان راپرسى، مه‌ دڤێت بزانين ئاستێ گه‌نده‌ليێ ل كه‌رتێن جودا يا چاوايه‌”.

د, ئه‌حمه‌د ئه‌نوه‌ر ده‌رباره‌يى ئاشكه‌را كرنا سامانێ به‌رپرسێن هه‌رێما كوردستانێ بۆ ئه‌نادۆل گۆت: “د ناڤه‌راستا هه‌يڤا دو يا سالا بۆرى دا بۆ جارا ئێكێ فورما ئاشكه‌راكرنا سامانێ به‌رپرسێن سێ ده‌سته‌لاتێن هه‌رێمێ هاته‌ پڕكرن و د ڤێ ده‌ربارێ دا هزار و 802 فورمه‌ هاتينه‌ به‌لاڤكرن و هزار 614 فورم هاتينه‌ ڤه‌گه‌راندن كو دبيته‌ 87% ژ رێژا فۆرمان، ده‌زگه‌هێن په‌رله‌مان، ده‌سته‌لاتا دادوه‌رى، ديوانا چاڤدێريا دارايى، ده‌سته‌يا ده‌ڤه‌رێن كوردستانى يێن ده‌رڤه‌يى ئيدارا هه‌رێمێ و ده‌سته‌يا ده‌ستپاكيێ رێژا ڤه‌گه‌راندنا فۆرمان تێدا 100% بوويه‌”.

گۆتژى: “سه‌رۆكێ هه‌رێمێ و جێگرێ وى و سه‌رۆكێ حوكمه‌تێ و جێگرێ وى و سه‌رۆكێ په‌رله‌مانى و جێگر و سكرتێرێ په‌رله‌مانى ژى فۆرمه‌ پڕ كرينه‌ و پێشبينى دكه‌ين هه‌تا هه‌يڤه‌كا دى هه‌موو فۆرمان پڕ بكه‌ن و بۆ مه‌ ب ڤه‌گه‌رينن”.

دا زانين ژى كو وان ل به‌ره‌ بۆ سالا 2015 ژى ل هه‌يڤا سێ هنده‌ك فۆرمێن نوو يێن ئاشكه‌را كرنا سامانى بۆ سالا 2015 ب سه‌ر هه‌رسێ سه‌رۆكاتيێن هه‌رێمێ دا به‌لاڤ بكه‌ين و ڤێ جارێ دبيت يا ئه‌لكترۆنى بيت.

ئاشكه‌را ژى دكه‌ت كو د فۆرمێن ئاشكراكرنا سامانى دا، دووڤچوون ل تۆمارا خانوبه‌ران و تۆمارا كۆمپانيان و تۆمارا ترۆمبێلان و ئه‌ردى دا دهێته‌ كرن و گۆت: “مه‌ د راستڤه‌كرنا قانوونێ دا داخواز كربوو سامان بهێته‌ ئاشكه‌را كرن، به‌لێ په‌رله‌مانى پێ باش نه‌بوو و هه‌ر كه‌سێ سامانێ خوه‌ بۆ ده‌ستێ ئاشكه‌را ژى نه‌كه‌ت دێ هێته‌ سزادان و ناڤێ وى ژى هێته‌ به‌لاڤكرن”.

ل دۆر هه‌بوونا فه‌رمانبه‌رێن بن ديواران ژى ئاماژه‌ ب وێ چه‌ندێ كريه‌ كو ژ به‌ر كو چو ئامارێن دروست ل به‌ر ده‌ستێ وان نينن، نه‌شێن هژمارا فه‌رمانبه‌رێن بن ديواران ئاشكه‌را بكه‌ن.