ئه‌ڤرۆ نيوز، نيوار محه‌مه‌د سه‌ليم:

ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ بۆ ئه‌ڤرۆ نيوز راگه‌هاند كو ئه‌وان وه‌كو فراكسيۆنا زه‌ر ياداشته‌ك دايه‌ په‌رله‌مانێ كوردستانێ دا كو نڤيسينگه‌هه‌كا تايبه‌ت يا په‌رله‌مانێ كوردستانێ ل شنگال ڤه‌كه‌ن.

محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ گۆت: “ژ به‌ر گرنگيا شنگال و خه‌مخۆريا پارتى ديموكراتى كوردستان بۆ وێ ده‌ڤه‌رێ و ژ ده‌رڤه‌يى ئيدارا هه‌رێما كوردستانێ يه‌، فراكسيۆنا زه‌ر ل په‌رله‌مانى ياداشته‌ك دايه‌ په‌رله‌مانێ كوردستانێ كو تێدا داخواز كريه‌ ئۆفيسه‌كا نڤيسينگه‌هه‌كا په‌رله‌مانى ل شنگال بهێته‌ ڤه‌كرن”.

به‌رى نوكه‌ نڤيسينگه‌هه‌كا ژ ڤى ره‌نگى ل كه‌ركووك هاتيه‌ ڤه‌كرن، به‌لێ كه‌سانێن شاره‌زا دبينن كو ژ به‌ر هه‌ڤركيێن سياسى نه‌شيايه‌ كاره‌كێ باش ئه‌نجام بده‌ت.

به‌رى نوكه‌، محه‌مه‌د عه‌لى ياسين وه‌كو ئه‌ندامه‌كێ په‌رله‌مانى ل سه‌ر فراكسيۆنا زه‌ر ل په‌رله‌مانێ كوردستانێ پرۆژه‌ك دابوو ده‌ست په‌رله‌مانى بۆ دانانا ئه‌ندامێن چاڤدێر بۆ وان ده‌ڤه‌ران، ب گۆره‌يى وى پرۆژه‌يى ئه‌ندام ژ ده‌ڤه‌رێن ده‌رڤه‌يى ئيدارا هه‌رێمێ دێ هێنه‌ دانان و ل په‌رله‌مانێ كوردستانێ ژبلى مافێ بڕيار دانێ دێ هه‌موو مافێن ئه‌ندامێن په‌رله‌مانێ ئاسايى هه‌بن.

ل دۆر هه‌ڤبه‌ركيا ڤى ئه‌ندامى ل گه‌ل نڤيسينگه‌ها په‌رله‌مانى، ئاخفتنكه‌رێ ب ناڤێ فراكسيۆنا زه‌ر گۆت: “هه‌كه‌ ئه‌و بوو قانوون و كه‌فته‌ كارى، دێ گه‌له‌ك باشتر بيت و ده‌سته‌لاتێن وى زێده‌تر بن، به‌لێ نوكه‌ بۆ ڤێ قووناغێ دێ گه‌له‌ك خزمه‌تا ده‌ڤه‌رێ كه‌ت”.

ئەڤرۆ:

نوونەرێ کوردێن شەبەک ل جڤاتا پارێزگەھا نەینەوا بۆ ئەڤرۆ دیار کر داخواز ژ حوکمەتا عیراقێ کریە بزاڤان بۆ ئاشکراکرنا چارەنڤیسێ کوردێن شەبەک بکەت، کو ژ ئالیێ چەکدارێن داعش ڤە ھاتینە رەڤاندن و ھەتا نوکە چارەنڤیسێ وان نەیێ دیارە.

غەزوان حامد داودی ئەندامێ جڤاتا پارێزگەھا نەینەوا دیار کر کو 62 گوندێن کوردێن شەبەک کەفتینە د دەستێن تیرۆرستێن داعش دا و پڕانیا مال و مولکێن وان ھاتینە تالانکرن و گەلەک ھاتینە کوشتن و بێ سەروشوونکرن و گۆت “نوکە چارەنڤیسێ زێدەتر ژ 160 کوردێن شەبەک نەیێ دیارە، ھندەک دبێژن ماینە ل عیراقێ و ھندەک دبێژن تیرۆرستان ھەموو بۆ وەلاتی سووریا ڤەگوھاستینە”.

ئەندامێ جڤاتا پارێزگەھا نەینەوا گۆت ژی “ئەم داخوازێ ژ حوکمەتا عیراقێ دکەین ب جدی کار بکەت بۆ دیارکرنا چارەنڤیسێ ڤان کەسێن ل سەر دەستێن تیرۆرستان ھاتینە رەڤاندن و داخوازێ دکەین کوردێن شەبەک ب فەرمی بھێنە سەر ب ھەرێما کوردستانێ ڤە”.