ئەڤرۆ:
رۆژنامەکا بریتانیا د راپۆرتەکا خوە دا ئاماژە ب ڤێ یەکێ دکەت کو تورکیا ل ژێر سەرۆکاتیا رەجەب تەیب ئەردۆگانی ب تەمامی خوە ژ ئورۆپا دوور کریە و نھا چو پەیوەندیێن وەسا د ناڤبەرا تورکیا و وەلاتێن رۆژئاڤا دا نەماینە و نھا وەلاتێن یێ بزاڤێ دکەن کو ھەموو ھەڤپەیمانیێن خوە ل گەل تورکیا ب دووماھی بھینن و کورد وەک ھێزەکا نوو یا دەڤەرێ بووینە جھێ سەرەنجا رۆژئاڤا و دشێن وەک ھەڤپەیمانەکا نوو بۆ رۆژئاڤا جھێ تورکیا بگریت.
رۆژناما فاینانشل تایمز یا بریتانیا دوھی راپۆرتەک سەبارەت ب سیاسەتا تورکیا و بزاڤێن ئەردۆگانی بۆ ئاڤاکرنا تورکیایەک نوو بەلاڤ کر و د راپۆرتێ دا ھاتیە دیار کرن کو تورکیا نھا بەر ب وەلاتەکێ ئیسلامی ڤە دچیت و ئەڤە ژی بۆ پرانیا وەلاتێن رۆژئاڤا بوویە جھێ مەترسیێ و ئێدی وەلاتێن رۆژئاڤا دبینن کو ئەو تورکیا جاران نەمایە کو ئەو بشێن پشتا خوە پێ گەرم بکەن و نھا بەرژەوەندیێن وەلاتێن رۆژئاڤا وەسا دخوازیت کو ئەو پێداچوونەکا باش د پەیوەندیێن خوە ل گەل تورکیا بکەن و ھندەک وەلاتێن ئورۆپی یێ بزاڤێ دکەن ھەڤپەیمانیا خوە ل گەل تورکیا ب دووماھی بینن و ئەو ل ھەڤپەیمانیێن نوو ل دەڤەرێ دگەرن و کورد نھا بووینە جھێ سەرنجا وەلاتێن رۆژئاڤا.
د بەردەوامیا راپۆرتێ دا ئەو یەک ژی ھاتیە دیار کرن کو پرانیا وەلاتێن ئورۆپا وەسا دبینن کو ئەردۆگان وەک دکتاتورەکێ بزاڤێ دکەت و مەترسیا وێ یەکێ ژی ھەیە کو ئەردۆگان ب ڤی رەنگی ل گەل ھندەک وەلاتێن دی یێن دەڤەرا رۆژھەلاتا ناڤین بشێت ھەڤپەیمانیەکێ ل دژی رۆژئاڤایی دروست بکەت و ئەو یەک دێ مەترسیێن نوو بۆ رۆژئاڤا دروست کەت و ژ بەر ڤێ یەکێ ژی بەری نھا ھندەک وەلاتێن ئورۆپا داخواز ژ ئەمریکا کرینە کو چەکێن گران ئێدی نەدەنە تورکیا دا ئەزموونێن سالێن بۆری یێن ل عیراق و سووریێ روو دایی جارەکا دی دوبارە نەبیت و تورکیا نەبیتە مەترسیەکا نوو بۆ وان ل وێ دەڤەرێ.
د پشکەکا دی یا راپۆرتا رۆژناما فاینانشل تایمز دا ھاتیە شەرێ ل دژی داعشێ خالەکا گرنگ بوو بۆ وەلاتێن رۆژئاڤا، چونکو د دەمەکێ دا کو داعش ب رەنگەکێ ئاشکرا شەرێ ھەموو مرۆڤاتیێ دکەت و ب رەنگەکێ درندانە خەلکێ بێ تاوان دکوژیت تورکیا ب جھێ کو ھاریکاریا وەلاتێن ھەڤپەیمانیێن دژی داعشێ بکەت د گەلەک بیاڤان دا ھاریکاریا وان دکەت و ب بەلگە ژی گەلەک جاران ئەو یەک ھاتیە سەلماندن و ژ بەر ڤێ یەکێ ژی باوەریا وەلاتێن رۆژئاڤا ب تورکیا نەمایە و کورد وەک ھێزەکا نوو ل دەڤەرێ کو د شەرێ ل دژی داعشێ دا رۆلەکا سەرەکی گێراینە نھا بووینە جھێ سەرنجا وەلاتێن رۆژئاڤا و گەلەک وەلاتێن ئورۆپی ب تایبەتی ژی فرەنسا و ئەلمانیا دخوازن کورد جھێ تورکیا بگرن، چونکو کورد نھا باشتر ژ ھەر ھێزەکا دی بەرەڤانیێ ژ بەرژەوەندیێن رۆژئاڤا دکەن، یا راست نھا بەرژەوەندیێن کوردان و وەلاتێن رۆژئاڤا گەلەک نێزیک ھەڤدو بووینە و ئەڤە ژی بۆ کوردان دشێت ببیتە دەستپێکا قۆناغەکا نوو.
د دووماھیێ راپۆرتێ دا ھاتیە دیار کرن کو ھەرێما کوردستانێ بەر ب دەولەتەکا سەربخوە ڤە دچیت و ئەو پێدڤی ب چەکێن گرانن دا ھەم بشێن شەرێ داعشێ بکەن و ھەم ژی وەلاتێ خوە ب پارێزن و ھەکە ئەمریکا و وەلاتێن ئورۆپا وێ یەکێ بۆ کوردان بکەن کورد دێ ببنە ھەڤپەیمانەک گەلەک باش و چو دەمەکێ ژی نابنە مەترسی بۆ رۆژئاڤا.

ئەڤرۆ:

سەرەرای ھندێ کو ئەڤە پتر ژ سالەکێ یە ھەرێما کوردستانێ تووشی قەیرانەکا دارایی بوویە، بەلێ وەسا دیارە ھندەک خێزانێن ھەرێما کوردستانێ ھێشتا ئەڤ پەرێ قەیرانێ ژ وان نەگرتیە و ھەردەم داخوازا ھندێ دکەن کرێکارێن بیانی د ناڤ مالێن وان دا کاربکەن. وەکو رۆژنامەڤان حەمزە رەزیکی د ئەکاونتەکێ فەیسبوکێ خوە دا دبێژیت: جورجی وەلاتێ خوە بجە دھێلن و ل ھەرێما کوردستانێ کرێکاریێ دکەن دا ولاتێ خوە پێ ئاڤابکەن، ئەم ژی کاردکەین و پارا ددەینە جورجیا دا وەلاتێ خوە پێ پێشبێخن.

ل پارێزگەھا دھۆکێ ھژمارەکا مەزن یا خێزانان ژ بەر باشبوونا بارێ وان یێ ئابووری کرێکارێن ناڤ مالێ بۆ خوە گرتینە و ھەموو کارێن وان یێن ناڤ مالێ دکەن و رۆژانە ل گەل وان رادبن و د روونن. بەلێ تشتێ جھێ حنێرێ ئەوە کو ھاتنا قەیرانا دارایی ژی چو کارتێکرن ل ھندەک خێزانێن ھەرێما کوردستانێ بۆ کرێکرنا کرێکارێن ناڤ مالێ نە کریە. سەرۆک خێزانەکێ پارێزگەھا دھۆکێ کو ماموستایێ زانکۆیا دھۆکە راگەھاند، د ماوەیێ چەند سالێن بووری دا وی گەلەک کرێکارێن ناڤ مالێ ب کرێ گرتینە، بەلێ گەلەک جاران تووشی ئاریشان بوویە ھەتا شیای ئیقامێ بۆ وان ل ھەرێمێ دروست بکەت و پشتی ھینگی پارێن خوە وەرگرتینە و ب فێلبازی چووینەڤە وەلاتێ خوە و گۆت: کرێکارەکا خێزانا مە گەلەک کرە گری و گۆت کورێ من یێ تووشی روودانا ترومبێلێ بووی و ب تنێ دێ ١٠ رۆژان چمە سەرەدانا وی و دێ ڤەگەرم، من ژی رێ دایێ بچیت و ڤەگەریت، بەلێ چوو و نەڤەگەریا. ل گۆرەی ئامارێن وەزارەتا کار و کاروبارێن جڤاکی، ھەتا بەری ھاتنا قەیرانا ئابووری ژی رێژا بێکاریێ ل ھەرێما کوردستانێ ٧% بوو، بەلێ نھا زێدەتر لێ ھاتیە. ھەروەسا ھژمارا وان کرێکارێن بیانی یێن نھا ل ھەرێما کوردستانێ کاردکەن زێدەترە ژ ٢٨ ھزار کرێکاران و ئەڤ ھژمارە ژی سالانە د زێدەبوونێ دایە چونکو خواستا کۆمپانی و خێزانان بۆ کرێکارێن بیانی ھەردەم زێدە دبیت، چونکو ب پارەکێ کێمتر ژ یێن ھەرێمێ کاردکەن و ب تنێ د سالا بووری د حەت ھزار کرێکار ھاتینە د ناڤ ھەرێمێ دا بۆ کارکرنێ. ھەر ل گۆرە رپۆرتەکا وەزارەتا کار و کاروبارێن جڤاکی ئاشکرا بوویە کو خواستا سەرۆک خێزانان ژی بۆ ئینانا کرێکارێن ناڤمالێ ھەیڤانە د زێدەبوونێ دایە و ھەیڤانە نێزیکی ٥٠ سەرۆک خێزانان ڤێ داخوازیێ ژ کۆمپانیێن ئینانا کرێکارێن بیانی دکەن.