ئه‌ڤرۆ:
رەنگە کوخک بۆ دەمەکێ کورت یان دومدرێژ بیت پەیداببیت، کوخک ل گەل گەلەک نەخۆشیا پەیدادبیت و نیشانا بەرتەگیا کەنالێن ھەناسەدانێ یە، ھەکە بۆ دەمێ پتر ژ دو حەفتیا ڤەکێشا ئەو نیشانەکا نەباشە، بێھن تەنگی و ھەودانا سیھان و نەخوشیێن سەرمایێ و ھەودانا گەوریێ و جگارەکێشان، ھەموو ب نیشانێن کوخکێ دەست پێ دکەن، لەورا پێدڤیە ل دەمێن پێدڤی نەخوش سەرەدانا نوشدارەکێ تایبەتمەند بکەت.
ئەڤرۆ، بەرپەرێ ساخلەمیێ:
د.عەبدولرەحمان ئیسلام، تایبەتمەندێ نەخۆشیێن دلی و ھناڤا بۆ رۆژنامەیا ئەڤرۆ دیارکر کو کوخک دھێتە دابەشکرن بۆ دو پشکا ئەوژی کوخکا کێم ڤەدکێشیت بۆ دەمێ دو ھەتا سێ حەفتیا و پتریا جارا ئەڤ جورێ کوخکێ ل گەل نەخوشیێن سەرمایێ و ئەنفلاوەنزایێ و ھەودانا بەلاعیما و گەوریێ ھەیە و گۆت: ل گەل ب کارئینانا دەرمانان بۆ چارەسەریێ و ھەتا ھندەک جارا بێی ب کارئینانا دەرمانان ژی چارەسەردبیت و پێدڤی ب چوونا نوشداری ناکەت.
ھەروەسا دیارکر کو ھندەک نەخۆشیێن دیتر ژی کو کوخک ئێک ژ نیشانێن وانە وەکو ھەودانا سیھان.
تایبەتمەندێ نەخۆشیێن دلی و ھناڤا دیارکر ژی کو پشکا دوێ ئەو کوخکە یا بۆ دەمێ دو حەفتیا و پتر ڤەدکێشیت و رەنگە بلغەم یان خوین ل گەلدا ھەبیت و گۆت: ل وی دەمی دڤێت نەخوش سەرەدانا نوشدارەکێ تایبەتمەند بکەت، ژبەرکو ھندەک جارا کوخکا درێژ ژ نیشانێن ھندەک نەخوشیێن ب مەترسیە وەکو وەکو ئێشا زراڤ و ھەتا پەنجەشێرا سیھانە.
دەربارەی ئەگەرێن کوخکا دومدرێژ، د.عەبدولرەحمانی دیارکر کو گەلەک ئەگەر ھەنە ژوانژی رەبو و ھەستداری و ئەڤ جورێ کوخکێ دیاردبیت بێی دیاربوونا چ نیشانێن دیتر وەکو خیسێن ژ سینگێ نەخوشی بھێت یان بێھنا وی تەنگ ببیت و ئەڤە پتریا جاران ل گەل رەبوویێ پەیدادبن. ھەروەسا ھندەک ئەگەرێن دی ھەنە کو ژ ئەنجامێ دەرھاڤێتنا پاشمایێن دفنێ بۆ پاشیا گەوریێ پەیدادبن و ئەڤە ژ ئەنجامێ ھەودانا جیۆبێن دفنێ یان ھەستداریا دومدرێژ د دفنێ دا پەیدادبیت. و گۆتژی: ڤەگەریانا دەرھاڤێژێن ھەرسکرنێ ژ مەعیدێ بۆ سوریلانچکێ و ئەڤ ئاریشە ژی دبیتە ئەگەرێ کوخکی، ژبەرکو پەیوەندیەکا دەماران دناڤبەرا وان و کەنالێن ھەناسێ دا ھەیە و ئەڤ جورە پتر ل دەڤ وان کەسان پەیدادبیت یێن سستیەک دناڤبەرا وان کەنالان دا ھەبیت.
دیسا دیارکر ژی کو ھەودانێن کو ژ ئەنجامێ جگارەکێشانێ ژی پەیدادبن دبنە ئەگەرێ کوخکی و ئەڤ جورێ ھەودانا چارەنابن و دڤێت جگارە نەھێنە کێشان و گۆت: ھەلبەت دشیاندایە ھەر جورەکێ کوخکی ل دووڤ دژواری و نیشانێن دگەلدا بھێنە دەستنیشانکرن و چارەکرن.
دیسا دیارکر ژی کو ھندەک جارا ھندەک جورێن دەرمانان ژی دبنە ئەگەرێ کوخکێ و دەرمانێن ژ ھەمیان پتر ژی ڤێ ئاریشێ پەیدادکەن دەرمانێن بلندبوونا فشارا خوینێ نە و ل وی دەمی کوخک سڤک نابیت ھەتا نەخوش ب کارئینانا دەرمانا نەراوەستینیت و گۆت: ھەر نەخوشیەکێ دەرمانێن خوە ھەنە، بەلێ بۆ کوخکی باشترە دەرمانێن کوخک کێمکرنێ ب تنێ نەھێنە دان، بەلکو پێدڤیە چارەسەریا ئەگەرێن کوخکی بھێنە کرن بۆ نموونە ئەو کوخکا ل گل پەرسیڤی پەیدادبیت دڤێت دژە سوتان و دلوپێن دفنێ بۆ نەخوشی بھێنە دان و ل وی دەمی دێ کوخک ژی چارەسەربیت و ئەو کوخکا ل گەل رەبۆیێ پەیدادبیت، ھەکە و ھات و رەبۆ ھاتە چارەسەرکرن ھەلبەت نەخوش ئێدی ناکوخیتەڤە.
دەربارەی پشکنینان ژی دیارکر کو گرنگترین پشکنینێن بۆ سینگی دھێنە کرن پێکھاتینە ژ تیشکا سینگی و پشکنینا کارێن ھەناسێ و گۆت: پێدڤیە ھەر کەسەکێ کوخکەکا دومدرێژ ھەبیت بۆ بھێتە کرن داکو شیانێن سیھان بھێنە زانین و بەرتەنگیا کەنالێن ھەناسێ بھێتە دەستنیشانکرن، ھەکە ئەو پشکنین د سروشتی بوون ل وی دەمی دشیاندایە دەرمانەکێ دەستنیشانکری بۆ نەخۆشی بھێتە دان ل دووڤ وێ دەستنیشانکرنا گشتی یا نیشانێن نەخوش ئازارێن خوە ژێ دبینیت.
نيشاندان
