ئەڤرۆ نیوز:

د راپۆرتەکێ دا بۆ رۆژناما ئەڤرۆ کو ھۆشەنگ تاجر بەرھەڤکریە ھاتیە: ژ بەر شەرێ ل کۆبانێ کو ب سەدان گۆند ھاتینە چۆل کرن نھا عەرەبێن کۆبانێ و ئالیگرێن داعشێ دەست ب تالانکرن و سۆتنا وان گۆندان کرینە و ئارمانجا وان ژی ئەڤە دا کو ئاکنجیێن کورد جارەکا دی ل وان گۆندان بنەجە نەبن و چاڤدێرەک سیاسی ژی ڤێ یەکێ وەک مەترسیەکا مەزن بۆ پاشەرۆژا رۆژئاڤایێ کوردستانێ ل قەلەم ددەت.

یوسف حسێن چاڤدێرێ سیاسی یێ رۆژئاڤایێ کوردستانێ ل سەر تۆڕا فەیسبووکێ دیار کر کو ل کۆبانێ عەرەبان دەست ب تالانکرنا و سۆتنا گۆندێن کوردان کرینە و ب دەھان گۆند وێران بووینە و ئێدی کێر ژیانێ ناھێن و ھەروەسا گەلەک گۆندێن دی ژی ھاتینە تالانکرن و ئەڤە ژی سیاسەتا داعشێ یە کو دڤێت دەڤەرێن کوردی ھەموو بھێنە چۆل کرن دا کو عەرەب ل جھێن وان بھێنە ئاکنجی کرن و گۆت: “ب ھزاران وەلاتیێن کورد ل کۆبانێ و گوندێ دەڤروبەر ئاوارەی تورکیا و دەڤەرێن دی بووینە و نھا ئەو نەشێن ڤەگەرنە جھێن خوە، چونکو جھێن وان وێران بووینە و ھاتینە سۆتن و عەرەب ل جھێن وان ئاکنجی بووینە و ئەڤە ژی دێ مەترسیەکا خوە یا مەزن بۆ پاشەرۆژا رۆژئاڤایێ کوردستانێ ھەبیت.

محەمەد ئەمین ئۆزبیلەن نڤیسەرێ کورد ژی رەخنە ل سیاسەتا پارتیا ئێکەتیا دیموکراتیک ل رۆژئاڤایێ کوردستانێ گرت کو ھەتا نھا نەھێلاینە پارتێن دی پشکداریێ د رێڤەبەریا رۆژئاڤایێ کوردستانێ بکەن و وێ سیاسەتێ ژی وەسا کر کو داعش بشێت د دەمەکێ کورت دا گەلەک گۆندێن کۆبانێ داگیر بکەت و نھا ژی عەرەب بەردەوامیێ ددەنە سیاسەتا داعشێ و ئارمانجا وان یا سەرەکی ژی ژناڤبرنا ئیرادا خەلکێ کوردە ل رۆژئاڤایێ کوردستانێ و گۆت: “ھەر چەندە رێککەڤتنا دھۆکێ بۆ رۆژئاڤایێ کوردستانێ گەلەک گرنگە، لێ ھەتا نھا ژی د پراکتیکێ دا یا پێدڤی نەھاتیە کرن و رەوشەکا گەلەک مەترسیدار ل رۆژئاڤایێ کوردستانێ ھەیە و پێنگاڤێن بلەز بۆ بەرەڤانیا خەلکێ مە ناھێنە ئاڤێتن و ھەر دو جڤاتێن کوردی ژی گەلەک گیرو ماینە و ژ بەر ڤێ یەکێ ژی نھا داعش ل گەل عەرەبێن ل کۆبانێ بەردەوامیا ددەنە سیاسەتا رژێما سووریێ و ئارمانجا وان ژی نەھێلانا کوردانە ل کۆبانێ و دەڤەرێن دی یێن رۆژئاڤایێ کوردستانێ”.

ل ئالیێ دی راگەھاندنا یەپەگێ د داخۆیانیەکێ دا راگەھاند کو نھا پرانیا دەڤەرێن ستراتیژی و گرنگ یێن کۆبانێ د دەستێ مە دانە و دێ د دەمەکێ کورت دا ھەموو کۆبانێ ئازاد بکەین و یێن کو ھاریکاریا داعشێ کرینە ژی دێ ھێنە سزا دان و چو کەسەک نەشێت گۆندێن کۆبانێ داگیر بکەت و مە دڤێت کۆبانێ ببیتە جھێ پێکڤەژیانا ھەموو خەلکێ وێ کو ب سالانە پێکڤە دژین و داعش نەشێت پێکڤەژیانا خەلکێ تێک بدەت.

ل ئالیێ دی پرانیا دەزگەھێن راگەھاندنێ دیار دکەن کو ھەکە کۆبانێ بھێتە ئازاد کرن ژی ھەتا دەمەکێ درێژ ب کێر ژیانێ ناھێت، چونکو پرانیا تاخێن وێ وێران بووینە و ژ بەر شەری ژێرخانا باژێری تێک چوویە و دەمەک درێژ دڤێت دا کو خزمەتگوزاری بۆ باژاری بچن و خەلک بشێن وەک بەرێ دەست ب ژیانا خوە یا ئاسایی بکەن.