ئه‌ڤرۆ نيوز:
گه‌له‌ك جاران كێشا هاتنه‌خوارا شه‌حنا ئايفۆنێ بۆ مرۆڤى په‌يدا دبيت و چ پێ نه‌ڤێت ئه‌ڤه ژى مرۆڤى بێزار دكه‌ت، ب تايبه‌ت هه‌كه پشتى ده‌مه‌كێ كێم بيت ژ پركرنێ.
چاره‌كرنا وێ كێشێ ژى دێ ب گۆهۆڕينا پاتريه‌كا دى بيت چو ل سه‌ر ئه‌نترنێتێ بكرى يان ژى ل بازارى، بۆ ڤێ مه‌ره‌مێ ژى د ڤان وێنان دا دێ بۆ ته ديار بيت دێ چاوان پاتريا ئايفۆنێ گوڕى و ل مال ڤى كارى په‌نجام ده‌يى، بێى كو ببه‌يه بازارى و پاره‌كى لێ ب مه‌زێخى.
ئه‌ڤرۆ نيوز:
دوهى 28\12\2014 مالپه‌رێ سام موبايل وێنه‌كێ نوو يێ مۆبايله‌كا گالاكسى به‌لاڤكر كو هێشتا پشت راست نه‌بووينه ژ ناڤێ وێ، به‌لێ هنده‌ك پێزانينێن كێم ل سه‌ر ڤێ مۆبايلێ هاتينه به‌لاڤكرن.
دهێته پێشبينيكرن ئڤ مۆبايلا نوو ب كوالتيا 1920 ب 1080 پێكسل فۆل ئێچ دى بيت و چاره‌سه‌رێ 2.5 مێگاهێرتز ئه‌وێ هێشتا جۆرێ وى نه‌هاتيه ده‌ستنيشانكرن كو دهێته پێشبينيكرن يان كوالكۆم بيت يان ژى چاره‌سه‌رێ سامسۆنگێ ئێكسينۆنز.
سامسۆنگ دبيت ل سالا نوو 2015 هنده‌ك تله‌فۆنێن ژير ب قه‌بارێن و ره‌نگێن جودا يێن ل به‌ر ده‌ست به‌رده‌ته د بازارى دا كو دێ ژ گرنگترين ئه‌وان تله‌فۆنان، گالاكسى ئێس 6 بيت.
ئه‌ڤرۆ نيوز:
رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمانێ دهۆكێ دێ ساهى بيت.
پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ كارتێكرنافشارێن نزمێن ده‌ريا سپى يا ناڤه‌راست و ده‌ريا سۆر بۆ سه‌ر هه‌رێما كوردستانێ ئه‌و پێشبينى دكه‌ن كو سوبه‌هى رۆژا سێ شه‌مبى رێكه‌فتى 30\12\2014 ئه‌سمانێ دهۆكێ دێ بيته ساهى.
رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه كو پلا گه‌رماتيێ ژى دێ يا نێزيكى رۆژێن به‌رى نوكه بيت ب ره‌نگه‌كى د ناڤبه‌را 5 بۆ 13 پلان دا.
ل دۆر پێشبينيا رێژا هه‌وايى و مه‌ودايێ ديتنێ ژى دايه زانين كو دێ ئاراسته‌يێ وى دێ باكورێ رۆژئاڤا بيت ب ره‌نگه‌كى دێ يێ ناڤه‌ندى بيت د ناڤبه‌را پێنج بۆ 20 كليۆمه‌تر د ده‌مژمێره‌كێ و ماوێ ديتنێ ژى دێ 9 هه‌تا 10 كيلۆمه‌تران بيت.
ئەڤرۆ:
ھەموو سالان ھونەرمەندێن کوردستانێ و ب ھەلکەفتا ھاتنا سالا نوو ئاھەنگێن خوەشیێ و تەناھی و ئارامیێ بۆ خەلکێ کوردستانێ دگێرن، لێ ئەڤ سالە جودایە ژ سالێن بۆری، بەرپەرێ ھونەری چەندین بۆچوونێن ھونەرمەندان وەرگرتینە.
ھونەرمەند ئسماعیل جمعە دیارکر کوردستان یا دکاودانەکی دا دەربازدبیت بتنێ پێشمەرگەی پێدڤی ب ھونەرمەندان ھەیە پشتەڤانیێ بکەن، گۆت: پشکداری چ ئاھەنگێن سەرێ سالێ نابم و نابینم دروستە ئاھەنگێن خوەشیێ ل سەرێ سالێ بھێنەگێران وەک رێزگرتن بۆ پێشمەرگەی وشەھید و خێزانێن شەھیدێن کوردستانێ، دگەشتا من یا ئەمریکا دا ژی گەلەک ژمن ھاتە خواستن کونسێرتان بگێرم، من نەگێران وەک رێزگرتن بۆ شەھیدێن کوردستانێ.
ئیسماعیل جومعە خواست سالا٢٠١٥ ب بیتە سالا خێر و خوەشیێ بۆ خەلکێ کوردستانێ و ھەموو خاکێ کوردستانێ ژ دەستێن تیرۆرستان بھێتە رزگارکرن و ئالایێ کوردستانێ بھێـتە بلندکرن و دەولەتا کوردی بھێتە راگەھاندن.
ھونەرمەند حاجی زاخۆیی، دیارکر کو رێزگرتن ھەمبەر دایکێن شەھیدێن کوردستانێ و پێشمەرگەی بەرھەڤ نینە ھەر چ ئاھەنگان بگێریت و گۆت: ب ئانەھیا خودێ ئەڤ نەخوەشیە ل سەر مللەتێ مە دەربازبیت و سالا ٢٠١٥ یا خێر و خوەشیێ بییت بۆ مللەتێ کورد، ھەر پشکداریەکا مە ھەبیت بتنێ دێ دگۆتنا سروود و سترانێن پێشمەرگەی دا بیت، من ل بەر نینە پشکداری چ ئاھەنگێن سەرێ سالێ بم
ھونەرمەند بلند ئیبراھیم ماوێ چەندین سالانە ئاھەنگێن سەرێ سالێ دگێریت و ھەر سال ب گێرانا دو ئاھەنگان ، لێ ئەڤ سالە ئاھەنگا ناگێریت، گۆت: رێزگرتن ھەمبەر شەھیدێن کوردستانێ و ژبەر کاودانێن تێدا دبۆرین، ئاھەنگان ناگێرم، ھونەرمەند بلندی ھیڤی بۆ سالا ٢٠١٥ خواستن و گۆت: ھیڤیا من ئەوە پێشمەرگێ کوردستانێ ب سەرکەڤیت، نەخوەشیێن ب سەرێ کوردان دا ھاتین ل ٢٠١٤ دووبارە نەبن، دیسا کارگێریا کوردی ب شێوەکێ گشتی شاشیێن خوە چاک بکەن و دژی گەندەلیا نافخوە راببن و مالا خوە پاقژ بکەن.
سترانبێژ ئیسلام زاخۆیی دیارکر کو رێزگرتن ھەمبەر گیانێ شەھیدێن کوردستانێ و رێزگتن بۆ بنەمالێن شەھیدان چو ئاھەنگان ناگێرم و دیسا چەندین داخازنامێن تایبەت ژی بۆ گێرانا ئاھەنگێن سەرێ سالێ ھاتینە لێ ناگێرم، ئیسلامی خواست کوردستان ئاڤەدان بیت و ب ئاشتی و تەناھی بژیت.
سترانبێژ رێکش سەیرانی، گۆت: پشکدارنابم دچو ئاھەنگان دا و ئاھەنگا سەرێ سالێ من ھەبوویە و مە ھەلوەشاند و بتنێ ھەکە ئاھەنگەک ب پێشمەرگەی ڤە گرێدایی بیت بۆ بلندکرنا مورالا وان بیت دێ پشکداربم، یان ژی بۆ کومکرنا ھاریکاریان بیت بۆ ئاواران، یان زارۆیێن شەھیدان کێشە نینە و خوەشحالین.
رێکشی گۆتژی: بتنێ سترانبێژی دو رۆژ ھەنە کو مفا بۆ وی تێدا بیت، سەرێ سالێ و جەژنا نەورۆزێ و ھەکە سالێ ھەموویێ بەتال بیت دشێت مفایەکێ وەربگریت، لێ مە ئەو مفا نەڤێت.
ئه‌ڤرۆ:
ل دەسپێکێ قەبارێ لێڤێن خوە بەرچاڤ وەرگرە، پلێن رەنگێ سوراڤێ یێ تاری وەلێ دکەت لێڤێن تە مەزن دیار بن، لێ پلێن ڤەبوویی پتر یێ گونجایە بۆ وان یێن لێڤێن وان بچیک. دەمێ دانانا میکیاجی رۆل ھەیە د ھەلبژارتنا رەنگێ سوراڤێ ب رۆژێ دڤێت ھند یێ تاری نەبیت، بەلکو ب شەڤێ یێ تاری بیت. رەنگێ پرچا تە و دێمێ تە و چاڤێن تە توخمەکێ سەرەکییە د ھەلبژارتنا رەنگان دا، رەنگێ جلکان باشترە ھەلبژارتنا میکیاجی چەندەکێ نێزیکی رەنگێ جلکان بیت چونکو رەنگێ تاری کارتێکرنەکا نێگەتیڤ دکەتە سەر لێھاتنا تە.
ئەڤرۆ:
ژێدەرەکێ نێزیک ژ کارگێریا یانا زاخۆ تایبەت بۆ رۆژناما ئەڤرۆ دیارکر کو راھێنەرێ تیمێ عەلی ھادی پشتی کوژمەک ژ ھەڤبەستا خوە وەرگرتی داخوازا چەند پارێن دی کریە ب بھانا وێ چەندێ کو کارگێریا یانا کەربەلا داخوازا کوژمەکێ پارا ژێ کریە بەرامبەر دەست بەردانا وی، لێ پشتی پسیار ژ کارگێریا یانا کەربەلا ھاتیە کرن وان رەتکریە کو کوژمەکێ پارا ژ عەلی ھادی وەرگرتبیت یان خواست بیت.
زێدەتر ھەمان ژێدەر ئەو چەندە ژی دیارکر کو راھێنەر عەلی ھادی ھەڤبەستا سێ یاریکەران ئیمزاکریە بێ وەرگرتنا بوچوونا کارگێریا یانێ ئێک ژ وان یاریکەران بەری دو سالان یاریکەرێ یانا غاز شیمال بو و ھەروەسا دو یاریکەرێن دی یێن کەربەلا کو بەری ماوەکی عەلی ھادی پەیوەندی پێ کربو کو بھێنە یانا زاخۆ، لێ پشتی کارگێریێ کوژمەکێ کێم بو دانای و ب مەرجەکی کو ھەر یاریکەرەک بو ماوێ سی سالان ئیمزابکەت ئەف یاریکەرە رازی نەبوون و چوونە کەربەلا لێ نوکە دو یاریکەر ژ وان ئیناینە ڤە.
ھەمان ژێدەر ئەوێ نەڤیای ناڤێ وی بھێتە گوتن دیارکر کو راھێنەرێ یانا زاخۆ سەرەدەریەکا نەجوان ل گەل یاریکەران دکەت و زوربەیا یاریکەران ژ سەرەدەریا وی نە درازی نە و بتنێ ھندەک کەس ل خوە کومکرینە بو مەرەمێن وی کار دکەن و دیارکر کو ھەتا نوکە گەلەک یاریکەر ماینە ھەلاویستی ژبەر وی وەکو خالد مشیر و حاتم عەلی کو ھەردەمێ ناڤبری تیمێ بجە بھێلیت ئەڤ یاریکەرە دێ زڤرنە تیمێ.
ژلایەکێ دووڤە پشتەڤانەکێ گەلەکێ نێزیکی تیما زاخۆ کو نەڤیا ناڤێ وی بھێتە ئاشکرا کرن گوت: ھەر یاریکەرەکێ کارگێری بو عەلی ھادی ئامادە دکەت ناڤبری قەبول ناکەت ھەڤبەستا وی ئیمزا بکەت، لێ ئەو دێ چیت ھندەک یاریکەرێن دی ئینیت کو ئاستێ وان گەلەکێ خرابە و ناھێنە بەرامبەر نیڤا ئاستێ وان یاریکەرێن کارگێری بو ئامادە دکەت لەورا ژی نوزانین ئەگەر چنە ؟
ب تورەیی ڤە ھەمان پشتەڤان گوت: عەلی ھادی مەرەمێن خوە یێن تایبەت ھەنە ل زاخۆ نە کەسەکێ راستە و ب ھیچ شێوەکی قەبوول ناکەین ئەو ل زاخو بمینیت وی دڤێت زاخۆ بکەتە تیمەکا مللی، لێ ئەم قەبوول ناکەین چونکو زاخۆ نە وەک کەربەلایە.
بەرامبەر ڤان گوتنان سکرتێرێ یانا زاخۆ خەلیل ئەحمەد گوت: چو راستی بو گوتنا ئیمزاکرنا سێ یاریکەران بێ وەرگرتنا بوچوونا مە نینە و مە ئاگەە ژێ ھەیە ئەڤ بابەتە ب رازەمەندیا مەکریە.
لدور داخوازکرنا کوژمەکێ پارا ب بھانا یانا کەربەلا ناڤبری گوت: پشتی راھێنەر چویە کەربەلا و ھاتی داخوازا کوژمەکێ دی یێ پارا ژ مەکریە ئەڤجا چو راست بیت یان نە و ئەو نە گرنگە و مافێ راھێنەری یە لەورا ژی سەرۆکێ یانێ ٢٠ ملیونێن دی دانە راھێنەری.
ئەڤرۆ:
رێڤەبەرێ نەخشەدانانا ئاڤەدانی ل پارێزگەھا دھۆکێ بۆ ئەڤرۆ دیار کر، ل سەر ئاستێ پارێزگەھا دھۆکێ لژنەک بۆ دووڤچوونا پرۆژێن دەڤەرا پیشەسازی یا سڤک ل نزارکێ ھاتە پێکئینان کو رێکخستن ل دەڤەرا پیشەسازی بھێتەکرن، گەلەک ژ وان جە د پلانێ دا بۆ مەرەمەکێ ھاتیە دانان، لێ د راستی دا بۆ مەرەما دێ ھاتینە بکارئینان کا مۆلەت بۆ چو مەرەمێ ھاتیە دانان، پێدڤیە پرۆژە ل دووڤ وێ مەرەمێ بھێتە چێکرن و کار یێ دھێتە کرن کو پیشەسازیا مالتایێ و بەروشکێ ژی بھێنە راکرن و ل دەڤەرا نزارکێ و سەرتەنگێ بھێنە دانان.
کوردو ئیسحان رێڤەبەرێ نەخشەدانانا ئاڤەدانی ل پارێزگەھا دھۆکێ دیار کر، پارچێن بەری نوکە ل دەڤەرا پیشەسازی یا سڤک ل نزارکی ھاتینە دانان دێ دووڤچوون ل سەر ھەموویان ھێتە کرن و لژنە دێ دیارکەت کا چەند رووبەر مایە و چەند بوویە پارچە و چو جۆرە پرۆژە ل سەر ھاتیە دانان، یێ سەرپیچی کربیت دێ ھەولدەین وێ سەرپیچیێ نەھێلین ودێ زڤرینن بۆ وێ مەرەما پارچە ئەرد پێ ھاتیە دان و مۆلەت پێ وەرگرتێ و دووبارە دێ پێداچوون و دیراسەت د پیشەسازیا سڤک ل دەڤەرا نزارکێ دا ھێتە کرن، د پلانێ دایە دەڤەرا پیشەسازیا بەروشکێ ببیتە دو بەش، ئێک ل جھێ خوە بمینیت و یا دیتر بھێتە ڤەگوھاستن بۆ دەڤەرا سەرتەنگێ و دولبێ.
ئەندازیار کوردو ئیسحان گۆت ژی: دەڤەرا پیشەسازی یا گران ل کواشی نوکە ئەم تێدا کار دکەین بھێتە بەرفرەھکرن و رێکخستن و دەڤەرا پیشەسازیا ئاھێن خوارنێ ژێ دی دھۆک ھێتە دانان ئەو ژی دێ ل دەڤەرا دولبێ بیت ئەم ھەولددەین ل دەڤەرێن پێشەسازی ژێک بھێنە جوداکرن و ل بەرە دەڤەرا پیشەسازی یا سڤک ل دولبێ و ل سەرتەنگێ بھێتە دانان و ل دەڤەرا پیشەسازیا کەرەستێن ئاڤاکرنێ ژی ل زاوا بھێتە دانان و پێشەسازیا مالتایێ ژێ دێ ھێتە راکرن بۆ سەرتەنگێ ھێتە ڤەگوھاستن.
رێڤەبەرێ نەخشەدانانا ئاڤەدانی دیار کر، دەمێ ماستەر پلان دھێتە دانان ھزر د رێژا کەسکاتیێ دا دھێتە کرن و ل دووڤ ماستەر پلانێ پێدڤیە رێژا ٢٠% کەسکاتی بمینیت و گۆت: ل سالە ٢٠١٢ وەرە ھەتا نوکە، رێ نەھاتیە دان چو کەس جھێ کەسکاتیێ بکاربینیت بۆ بەرژوەندیێن خوە و تاکە کەسی، ئانکو ب چو رەنگەکی ئەردێ کەسکاتیی بیت د ماستەر پلانێ دا، ئەم رێ نادەین کەسکاتی بھێتە گوھۆرین بۆ مەرەمێن ئاڤاکرنێ.
ئەندازیار کوردو ئاشکرا کر کو دەمێ ئەم پلانەکێ ددانین تووشی گەلەک ئاستەنگان دبن، چونکو بریارێ ل سەر بەرژوەندیێن خەلکەکی دھێتە دان و د ماستەر پلانێ دا ھزرا پاشەرۆژێ دھێتە کرن جە بمینیت بۆ قوتابخانەیان و نەخۆشخانەیان و ھەموو خزمەتێن دێ ھەمەجۆر بیێ رازەمەندیا خەلکی ئەم پلانێ پەسەند ناکەین، چونکو ھەکە خەلک رازی نەبیت دێ ئاریشە ل پاشەرۆژی پەیدابن د پلانێ دا، لەورا یا گرنگە ئەو خەلکی تێبگەھینن پلان بۆ بەرژوەندیێن وان ھێتە دانان ل پاشەرۆژێ زارۆیێن وان تووشی ئاریشێن کیم خزمەتگوزاریان نابن، ژ بەر کو پلاندانان بۆ پێشکەفتن و خزمەتکرنا باژێری ھێتە دانان، ئەم ل گەل بەرژەوەندکاران تووشی ئاستەنگان دبن.
ناڤبری ئەو ژی خویا کر، د وەختی دا دەڤەر ھەنە بێی پلاندانان یێن ھاتینە ئاڤاکرن، نوکە ئەو دەڤەر بەرفرەە بووینە، ئاریشە ل وان دەڤەران زۆر بووینە، بۆ نموونە ژی ل دەڤەرا بەروشکێ و قەسارا و مالتایێ و شاخکێ و نزارکێ و ئێتیتێ ھەموو ب شێوکێ نە رێکخستی ھاتینە ئاڤاکرن، نوکە بەرفرەە بووینە، ئارشێن پلانسازی گەلەک تێدا ھەنە و پێدڤێ خزمەتگوزاریان ھەنە وەکو قوتابخانە و بنگەھێن ساخلەمیێ پێدڤی بوو دەمێ ھاتینە ئاڤاکرن ھزر ل جھێ قوتابخانان و بنگەھێ تەندروستی و چێکرن و بەرفرەھکرنا جادەیان ھاتباکرن، دانانا نەخشەیی بۆ دەڤەرەکا وەسا ئاڤاکری بێگومان گەلەک ئاستەنگ پەیدادبن، چونکو مولکێ خەلکی دکەڤیتە بەر بارگرانیێ ل سەر رێڤەبەریێن حکوومی دروست دبیت ژ لایێ دابینکرنا بوودجەکا تایبەت بۆ قەرەبووکرنا خەلکی.
کوردو ئیسحان رێڤەبەرێ نەخشەدانان ئاڤەدانی ل پارێزگەھا دھۆکێ گۆت ژی: نوکە ئەم کار د دانانا ماستەر پلانا کەلەکچی و رۆڤیا و بەردەرەشێ دا دکەن و ھەڤکاریا کۆمپانیەکا لوبنانی و نەخشەیی ل قەزا شێخان و باعەدرێ ژی ھێتە دانان، نوکە کار د قوناغێن دەستپێکێ دایە و بەردەوام پلان بۆ باژێر و قەزا و ناحی و گۆندێن پارێزگەھا دھۆکێ ھێنە دانان و گەلەک جاران دووبارە پێداچوون د پلانێ دا دھێتە کرن ب مەرەما باشتر لێ کرنێ.
ئەڤرۆ:
د ديداره‌كێ دا بۆ رۆژناما ئه‌ڤرۆ كو ئه‌مير ئه‌ترووشى به‌رهه‌ڤكريه تێدا ئاماژه ب وێ چه‌ندێ هاتيه كرن كو نەرازیبوونا ماموستایێن ھەرێما کوردستانێ ل دور وەرگرتنا ئابوونێن ھەیڤانە ژ لایێ ئێکەتیا ماموستایێن کوردستانێ ڤە کو ھەیڤانە سێ ھزار دینار بوون وەکر کو چاڤخشاندنەک د ڤێ بریارێ دا بھێتە کرن و ل دووماھیێ بریار ھاتە لادان و ئابوونێن ھەیڤانە بۆنە ب تنێ ھزار دینار و دو ئابوونێن و سالان پێکڤە ھێنە وەرگرتن. لێ سەرۆکێ ئێکەتیا ماموستایێن کوردستانێ لقێ دھۆک دیار کر کو پشتی ئابوونە بووینە ھزار دینار، ئێدی ھاریکاری بۆ ماموستایان نامینن یان ژی دێ گەلەک کێمتر لێ ھێن.
مەکتەبا تەنفیزیا ئێکەتیا ماموستایێن کوردستانێ د دووماھی کۆمبوونا خوە دا بریار دایە ئابوونێن ھەیڤانە یێن ژ ماموستایان دھێنە وەرگرتن ژ سێ ھزار دینارێن ھەیڤانە ببنە ب تنێ ھزار دینار، بەلێ ل دەستپێکا سالا 2015 دێ ئەڤ بریارە کەڤیتە د وارێ جێبەجێکرنێ دا و دێ ئابوونێن دو سالان پێکڤە ھێنە وەرگرتن کو 24 ھزار دینارن و ل گەل ھندێ ژی دێ ناسنامێن ماموستایان ھێنە نووکرن و ھزار دینار بۆ ڤێ چەندێ ژی ھێنە وەرگرتن، ئانکو د ل مەھا ئێک ژ سالا بھێت دێ ھەر ماموستایەکێ ئەندام د ئێکەتیا ماموستایێن کوردستانێ دا 25 ھزار دیناران وەکو ئابوونە دەتە ئێکەتیا ماموستایێن کوردستانێ و ڤێ چەندێ دەنگێن نەرازیبوونێ یێن ماموستایان ژی بلندکرینە.
بێوار عەلی حەمو ماموستایەکێ دھۆکێ یە دیار کر، ئەڤە پتر ژ دو سالانە ئەو بوویە ئەندامێ ئێکەتیا ماموستایێن کوردستانێ لقێ دھۆک و ھەیڤانە ژی ئابوونێن خوە ددان، بەلێ چو جاران ھاریکاری ژ وان وەرنەگرتینە و گۆت: کەسێ ئەز ئاگەھدارنەکرینە کو بەرامبەر وان ئابوونان وی ماف ھەیە جاران و د ھندەک ھەلکەفتان دا دێ شێت ھاریکاریێ ژ ئێکەتیا ماموستایێن کوردستانێ وەرگریت و گۆت: یا ژ من ڤە دانا ھاریکاریا دادی تێدا نینە، چونکو گەلەک ماموستا ھەنە چو ھەلکەف بۆ چێنابن و نەشێن چو پارا وەربگرن و ب چو رەنگەکی مفادار نابن.
وەھبی یونس، سەرۆکێ ئێکەتیا ماموستایێن کوردستانێ لقێ دھۆک تایبەت بۆ ئەڤرۆ دیار کر، بەری دو سالان کونفرانسێ ئێکەتیا ماموستایێن کوردستانێ ھاتبوو کرن و پاشی کۆنگرە ژی ھاتیە کرن و تێدا بریار ھاتبوو دان کو ل دەستپێکا سالا 2015 ئابوونێن ماموستایان ببنە ھەیڤانە ھزار دینار و ئابوونێن دو سالان پێکڤە بھێنە وەرگرتن و ناسنامە ژی بھێنە نووکرن و گۆت: نھا ئەم یێ کار د ڤێ بریارێ دا دکەین و دێ کەڤیتە کاری.
ناڤبری دیار کر، وەرگرتنا سێ ھزار دینارێن ھەیڤانە وەکو ئابوونە نەرازیبوونێن مەزن ژ دەڤ ماموستایان دگەھشتنە مە و من باوەرە پشتی بووینە ھزار دینار ئەڤ نەرازیبوونە نامینن و دێ پتر ب دلێ ماموستایان بیت و گۆت: ئەم وەکو لقێن مەزن دھۆک و ھەولێر و سلێمانیێ ل گەل ڤێ بریارێ ینە، بەلێ لقێن بچووک یێن قەزایان نەشێن ب ھزار دیناران کارێ خوە یێ ھەیڤانە ئەنجام بدەن، چونکو ھەیڤانە چو داھات نەبن، کارەکێ ب زەحمەتە بھێتە کرن.
وەھبی یونس، سەرۆکێ ئێکەتیا ماموستایێن کوردستانێ لقێ دھۆک خویا کر، پێشنیازا مە ئەوە کو د شەش ھەیڤێن ئێکێ دا ژ سالا 2015 چو ھاریکاری بۆ ماموستایان ناھێنە کرن، بەلێ پشتی ھینگی رەنگە ھندەک ھاریکاری بھێنە کرن، بەلێ ئەو ھاریکاری ژی دێ د کێم بن و گۆت: ل گۆرەی ناسنامان مە نێزیکی 17 ھزار ئەندامان ھەنە، بەلێ ئەندامێن کارا یێن کو ھەیڤانە ئابوونا ددەن و ب ئێکەتیا مە ڤە د گرێدای، ب تنێ ھەشت ھەتا نەە ھزار ئەندامانە و وەکو دی ژی ھەیڤانە ئەندامێن مە د زێدەبوون و کێمبوونێ دانە.
وەھبی ئاماژە دا وێ چەندێ، ژ وان ئابوونێن د ئەڤ سالە دا ھەیڤانە د گەھشتە بەردەستێ مە، د ئەڤ سالە دا 100 ملیون دینار ژ لایێ مە ڤە ل سەر ماموستایێن دھۆکێ ھاتینە بەلاڤکرن و د گەلەک بیاڤان دا ھاریکاریا ماموستایان ھاتیە کرن، بۆ نموونە بۆ وەغەرکرنێ ملیونەک و 100 ھزار دینار داینە ماموستایان، ھەروەسا ھاریکاری بۆ داوات و شەھیان و بوونا زارۆیان و خانی ئاڤاکرنێ و ھندەک بیاڤێن دی ھاریکاری ھاتینە کرن و گۆت ژی: پشتی ئابوونە دبنە ھزار دینار، مەحالە ئەڤ ھاریکاریا نھا بھێتە کرن و دێ گەلەک کێمتر بیت.
سەرۆکێ ئێکەتیا ماموستایێن کوردستانێ لقێ دھۆک دا زانین، مە چو داھات و بودجە نینن، ب تنێ مە چاڤ ل ئابوونایە بۆ ب رێڤەبرنا کارێ خوە و گۆت: ئەڤە داخوازیا ھەموو ماموستایانە کو ئابوونە ببنە ھزار دینار، بەلێ ب راستی ژی بەرامبەر کێمبوونا ئابوونان ھاریکاری ژی دێ گەلەک کێمتر لێ ھێن.
گەنجەکێ 23 سالی مە و خودان کارم ئەڤە سێ سالە ئەز و کچەک حەز ژ ئێک دکەین و گەلەک یا جوان و بدلێ منە کو ئەو ٢١ سالیە و خواندن ھێلایە و چ کارا ناکەت بەلێ ژبەر مەرجێن وێ یێن گران وەکی خواستنا گەلەک زێرا و ھەروەسا کرینا شوقەیەکێ و جودابونا ئێکسەر ژ مالباتا من دلێ مە ژ ئێک مایە و ژبەرکو ئەو دبێژیتە من ھەکە تو ڤان مەرجێن من بجە نەئینی ئەز شوی ب تە ناکەم ئەز ژی نەشێم وێ ژبیر بکەم ئەڤجا ھیڤیدارم ھون چ دبێژن و ئەز چ بکەم؟
گەنجێ ھێژا:
ھزر د ئایندەدا کارەکێ رەوایە و یێ گرنگە و خوە بەرھەڤکرن ژبو رودانێن پاشەروژێ نیشانا دوور دیتنا دروست بو خوە و بو خێزانێ و براستی دڤێت خەم ساری دڤێ چەندێ دا نەبیت و دڤێت ھەردو لا کار بکەن ژبو ڤێ مەرەمێ ژبەرکو ژیان نەیا ئاسانە و دڤێت ھەموو کار بھێتە کرن ژبو دابینکرنا ھەموو پیدڤیێن گرنگ بو ڤی پروژەی، ھەر وەسا ژبو بجە ئینانا کارێن دخالا ئێکێ دا ھاتین دڤێت شیانا بەر چاڤ دانن نەک ھەر ژ دەستپێکێ پروژەی بار گران بکەن و توشی مەترسیا ھەرفاندنێ ببیت، ئەڤجا دڤێت ھەما ھەنگی دناڤبەرا ڤیان و شیانا دا ھەبیت دا ژیانەکا نورمال ببنە سەری ئەڤجا ھەول بدەن ھەموو پێدڤێین گرنگ دابین بکەن ل گورەی شیانا و ئەڤێن دی پاش بێخن بو دەمەکێ دی و ئەڤ چەندە دێ بجە ھێت ئەگەر ڤیانەکا دروست ھەبیت و ھەر وەسا تێگەھشتن و باوەری دناڤبەرا ھەردوان دا ھەبیت ئەڤجا ئەگەر ئەڤ چەندە بنەمایێ پەیوەندیا بیت بێ گومان بەرەف سەرکەفتنا دێ چیت.
ئەڤرۆ:
دەستان رولەکێ مازن د پروسێسا جوانکاریێ دا ھەیە لەورا دڤێت بەردەوام خانم گرنگیێ ب جوانکرنا دەستێن خوە بدەن ب تایبەت ژنێن بەرمالان چونکی دەستێن وان بو دەمەکێ درێژ روبروی کەرەستێن پاقژ کرنێ دبن ئەڤ تێکەلە گەلەکێ گرنگە بو جوان راگرتنا دەستان، تێکەلکرنا پێنج کەچکێن ئاڤا گولا کەچکەکێ مازن ئاڤا لیمونان دگەل کەچکەکێ مازن ئاڤا پرتەقالان و کەچکەکێ مازن خەلا سێڤان دێ کەیە دناڤا شوشەکی و باش تێکڤەدەی و کەیە د ناڤ سەلاجێ دا و روژانە بکار ئینی ئەڤی تێکەلەی چەندین مفا ھەنە وەک سپی کرنا دەستان و پاراستنا وان ژ قورمچینێ و پاراستنا دەستان ژ ھشکاتیێ.
بو گرنگی دانێ ب دەستێن خوە
* دەستێن خوە بەردەوام بشو ب ئاڤا تێنشیر و نەھێلە چ قرێژ بمینیتە بپیستێ دەستێن تەڤە.
* دەستێن خوە ب ھنگڤینی و زەیتا زەیتونان پەرخینە و ب ئاڤێ بتنێ بشو.
* بەردەوام ھندەک زەیتێن سروشتی بو دەستێن خوە بکار بینە.
* ئەگەر تە بڤێت دەستێن تە نەرم و و پاقژ بن زەیتا ئەفەندەر بکار بینە .
نيشاندان