ئه‌ڤرۆ نیوز:
ئه‌ندامه‌كێ لژنا دارایى ل په‌رله‌مانێ عیراقێ ئاشكراكر كو ل سالا بهێت دێ موچێ تورا پاراستنا جڤاكى زێده بیت.
هەیسەم جبوری ئه‌ندامه‌كێ لژنا دارایى ل په‌رله‌مانێ عیراقێ بۆ (سۆمەریە نیوز) ڕاگەهاند: زێده‌كرنا موچێ تورا پاراستنا جڤاكى د قانوونا پاراستنا جڤاكى یا ژماره 11 یا سالا 2014 بڕیار ل سه‌ر هاتیه دان و ل ته‌موزا سالا 2015 دێ كه‌ڤیته بیاڤێ بجهئینانێ.
ئه‌ڤرۆ نیۆز:
سه‌رۆك بارزانى ئه‌ڤرۆ ل هه‌ولێرێ پێشوازیا جون مه‌ككین سیناتورێ كوماریخوازێن ئه‌مریكا كر، د دیداره‌كێ دا سه‌رۆك بارزانى راگه‌هاند كو پێدڤیه ل پال رێكارێن سه‌ربازى، ژ ئالیێ فكرى و هشككرنا ژێده‌رێن دارایى رێگرى ل داعش بهێته كرن.
جون مه‌ككین خوشحالیا خوه ب ده‌ستپێكرنا په‌یوه‌ندیێن د ناڤبه‌را هه‌رێم و به‌غدا نیشادا و گۆت”ئه‌م د ئاگه‌هدارین كو سه‌رۆك بارزانى ب خوه یێ ل به‌روكێن شه‌رى، ژبه‌ر هندێ ئه‌م یێن هاتین دا ژ نێزیك گوهداریا هه‌لوێستێ و بوچوونێن وى بگرین، سه‌باره‌ت هه‌لویستێ سیاسى و سه‌ربازى یێ به‌رۆكێن شه‌رى و پێدڤیێن پێشمه‌رگه‌ى د شه‌رێ دژى داعش دا.
ئه‌ڤرۆنیوز، ره‌زوان رۆژبه‌یانى:
ل رێكه‌فتێ 18/9/2014 گه‌نجه‌كێ گوندێ كه‌ونه‌باك سه‌ر ب قه‌زا به‌رده‌ره‌ش بنافێ جیهاد شه‌هاب نورى ژ مال ده‌ردكه‌ڤیت و دیار نامینت ئه‌ڤرۆ ل رێكه‌فتێ 27/12/2014 ته‌رمێ وى ب كوشتى دهێته دیتن.
عه‌قید زێدان زه‌كه‌ریا رێڤه‌به‌رێ پولیسێن قه‌زا به‌رده‌ره‌ش بۆ ئه‌ڤرۆ نیوزگوت ل رێكه‌فتێ 18/12/2014 وه‌لاتى جیهاد شه‌هاب نورى ژ دایك بووى 1997 ژ مال ده‌ردكه‌ڤیت و دیار نامینیت به‌لێ كه‌س و كارێن وى ل رێكه‌فتێ 20/12/2014 سكالا ل نه‌هێلانا گونه‌هباریان تۆمار دكه‌ن ژبه‌ر هندێ ب فه‌رمى پۆلیس ل رێكه‌فتێ 20/12/2014 وه‌ك رۆژا دیار نه‌مانا وى دهێته هژماركرن و گوت: ئه‌ڤرۆ ل رێكه‌فتێ 27/12/2014ل ده‌م ژمێر (1:30) ژ لایێ ده‌زگه‌هێ ئاسایشێ ڤه هاتینه ئاگه‌هداركرن كو ته‌رمێ گه‌نجه‌كى ل پشت گرێن به‌رده‌ره‌ش هاتیه دیتن مه‌ژى مه‌فره‌زه‌ێن خوه بۆ وى جهى هه‌نارتن دیار بوو كو ته‌رمێ وى گه‌نجى ب ناڤێ جیهاد شه‌هاب نورى یه و یێ هاتیه سه‌ر ژێكرن به‌لێ ب ته‌مامى سه‌رێ وى ژ لاشێ نه‌هاتیه ڤه‌كرن و ئاسه‌وارێن پێنج هه‌تا شه‌ش چه‌قویان ب لاشێ وى ڤه دیاره كو ل سنگێ وى وده‌ستێ وى سه‌ر و حه‌فكا وى كه‌تیه مه‌ژى ته‌رمێ وى ره‌وانه‌ى نۆشداریا داد ل ئاكرێ كر و هه‌تا نوكه ئه‌گه‌رێ كوشتنا وى نه‌هاتیه زانین و ڤه‌كۆلین ژى به‌رده‌وامه.
ئه‌ڤرو نیوز، هه‌یفا دوسكى:
خه‌یرى بوزانى رێڤه‌به‌رێ گشتى یێ كاروبارێن ئێزدیان ل وه‌زاره‌تا ئه‌وقافا حكومه‌تا هه‌رێما كوردستانێ بۆ ئه‌ڤرۆ نیوز گۆت: ژبه‌ر وان پێدڤیێن خێزانێن چیایێ شنگالێ كومه‌كا پێدڤیان ژ ئورۆپان هاتینه و مه ل به‌ره سباهى ره‌وانه‌ى چیایێ شنگالێ بكه‌ین، كو پێدڤی یه ژن و زارویانه و دیسا پێدڤیێن خوارنێ نه چونكى د پێدڤى وان تشتانه.
تێرۆرێ60%كارتێكرن ل سه‌ر كێمكرنا گه‌شت و گوزارێ كریه
ئه‌ڤرۆ نیوز، ناجی به‌ده‌ل:
عوبه‌یدولا داوود ریڤه‌به‌رێ گشتیێ گه‌شت و گوزارێ ل پارێزگه‌ها دهۆكێ بو ئه‌ڤرۆ نیوز راگه‌هاند:پشتی هاتنا داعشێ زێده‌باری كارتێكرنا وێ ل هه‌مو بیان، كارتێكرن ل گه‌شتوزارێ هاتیه كرن و بوویه ئه‌گه‌رێ كێم بوون و نه‌هێلانا گه‌شت و گوزارێ ل ده‌ڤه‌رێ.
ناڤبری ئه‌و چه‌نده ژی دا زانین كو ته‌ڤایا كه‌رتێن ئاڤه‌دانكرنێ و پێشڤه‌برنا ژیانێ ب ئاوایه‌كێ راسته‌وخو كارتێكرن لێ هاتیه كرن، و دهێته چاڤه‌رێكرن ئه‌ڤ ئاریشه ب دووماهى بهێت و تشته‌كێ ده‌مكی یه و ره‌وش وه‌ك جاران ب ده‌مه‌كێ كورت ڤه‌گه‌ریته‌ڤه .
رێڤه‌به‌رێ گشتیێ گه‌شت و گوزارا دهۆكێ ئه‌و ئێكه ژی دیاركر كو ل سالا 2014 رێژا گه‌شتیارا كو ژ پارچه‌یێن دیێن عیراقێ دهاتن بو پارێزگه‌ها دهۆكێ زێده‌تر ژ 60% كێمكریه و كاریگه‌ریه‌كا نه‌رێنی هه‌بویه ل سه‌ر داهاتی و ژیانا ئه‌و كه‌سێن د وی بیاڤی دا كار دكه‌ن، مینا پێشوازیكرن و خزمه‌تكرنا گوزاریی ل پارێزگه‌هێ .
ناڤبری ئه‌و چه‌نده ژی دیاركر چ جهێن گه‌شتیاریی یێن حكومه‌تا هه‌رێما كوردستانێ نه كه‌فتبوونه بن ده‌ستێ تیرۆریستان .
ئه‌ڤرۆ نيوز، نيوار محه‌مه‌د سه‌ليم:
سۆپاسالارێ له‌شكرێ كوردستانێ راگه‌هاند كو ئه‌ڤرۆ ژى شه‌ر ل ناڤا شنگال يێ به‌رده‌وامه و ب ره‌نگێ كولان كولان يێ دهێته كرن و ئه‌گه‌رێن زوو رزگارنه‌كرنا شنگال ژى ئاشكه‌را دكه‌ت.
فه‌ريف جه‌مال ئێمينكى، سۆپاسالارێ له‌شكرێ كوردستانێ، بۆ ئه‌ڤرۆ نيوز گۆت: “شه‌ر يێ به‌رده‌وامى ب قه‌ناسان و هنده‌ك جاران بزاڤێ دكه‌ن هێرشێ بكه‌نه سه‌ر پێشمه‌رگه‌يى، به‌لێ هه‌موو هێرشێن وان تێك دشكێنين”.
زێده‌تر گۆت: “هه‌موو هێزێن پێشمه‌رگه‌يى ژ يه‌كا 70 و 80 و وه‌زاره‌تا پێشمه‌رگه‌يى و زيره‌ڤانى د شه‌رێ ئازادايا شنگال دا د پشكدارن ژ لايێ هه‌رێما كوردستانێ ڤه”.
دا زانين كو هه‌تا نوكه تاخێ قه‌نديل و به‌رۆژ ل گه‌ل جهێن ستراتيژى يێن شنگال كو گرێ معاويه و شۆرا رۆمانيا و گرێ تانكى ئه‌ڤێ پشتا به‌ربه‌رۆژ يێن د ده‌ستێ پێشمه‌رگه‌يى دا و گۆت: “هه‌ر جهه‌كێ بلند بيت ژ لايێ چيايى ڤه نوكه د ده‌ستێ پێشمه‌رگه‌يى دايه، به‌لێ رێژا وێ ب سه‌دێ نه‌شێين بێژين”.
فه‌ريف جه‌مال ئێمينكى ل دۆر ئه‌گه‌رێ گيرۆبوونا رزگاركرنا شنگال گۆت: “تى ئێن تى گه‌له‌ك يا هه‌يى و ئه‌و ب خوه ژى به‌ره‌ڤانيه‌كا مه‌زن دكه‌ين چونكو رێيه‌كا ستراتيژى يه، ل سه‌ر رێيا سوريا و تله‌عفه‌ر و مووسل دايه، ديسا ل ده‌سپێكێ ژى د پلانا پێشمه‌رگه‌يى دا نه‌بوو بچنه ناڤ شنگال، به‌لێ بێ نه‌خشه‌كێ دارشتى چوون”.
سۆپاسالارێ له‌شكرێ كوردستانێ گۆتژى: “شنگال به‌رنامه‌كێ ته‌مام دڤێت، هه‌تا بهێته كۆنترۆلكرن، به‌لێ يا گرنگ ئه‌و بوو، هنده‌ك جهێن ستراتيژى يێن هاتينه گرتن، دێ رێخۆشكه‌ر بن بۆ رزگاركرنا شنگالێ”.
ئه‌ڤرۆ نيوز، چه‌كدار ئه‌ترووشى:
ژێده‌ره‌كى ژ رێڤه‌به‌ريا نه‌هێلانا گۆنه‌هباريان ل دهۆكێ راگه‌هاند كو پشتى به‌رى چه‌ند هه‌يڤان كه‌سه‌كى شۆفێره‌كێ ته‌كسيێ كوشتى و ترۆمبێلا وى ره‌ڤاندى، نوكه ئه‌و كه‌س هاتيه ده‌سته‌سه‌ركرن و چه‌ندين تاوانێن دژى ل سه‌ر ده‌رچووينه.
ئه‌ڤى ژێده‌رى بۆ ئه‌ڤرۆ نيوز گۆت: “پشتى به‌رى چه‌ند هه‌يڤه‌كان شوفێره‌كێ ته‌كسيێ ل دهۆكێ هاتيه كوشتن و ترۆمبێلا وى هاتيه دزين و پاشان هاتيه فرۆتن، چه‌ندين كه‌س ژى ل سه‌ر ڤێ كه‌يسێ هاتنه ده‌سته‌سه‌ركرن و پشتى چه‌ندين ڤه‌كۆلينێن هوور شيان بكوژێ شۆفێرێ ته‌كسيێ ده‌شتى مه‌رعان ده‌سته‌سه‌ربكه‌ن كو ئه‌و ژى ئه‌فسه‌ره‌كێ ب پلا جيدارێ ئێكێ يه د ناڤ له‌شكرێ عيراقێ دا”.
زێده‌تر گۆت: “ئه‌ڤى كه‌سێ ب ناڤێ (ج.هـ) ژ بلى كو دانپێدان ب ئه‌ڤێ كه‌يسێ كريه، دانپێدان ب چه‌ندين تاوانێن دى ژى كريه كو هه‌ر ژ لايێ وى ڤه هاتينه ئه‌نجام دان”.
دا زانين ژى كو ئه‌ڤه ئێك ژ وان تاوانباران بوويه يێن هێزێن وان گه‌له‌ك زه‌حمه‌ت ب گرتنا وى ڤه برى ژ به‌ر ئه‌ركێ وى يێ له‌شكرى.
ئه‌ڤرۆ نيوز:
هێزێن هه‌ڤپه‌يمانان دژى داعش راگه‌هاند كو ژ ئه‌نجامێ هێرشێن ئه‌سمانى بۆ سه‌ر پێگه‌هێن داعش، ئه‌وان هژماره‌كا مووشه‌كێن وان ل پارێزگه‌ها ئه‌نبار ژ ناڤبرن.
ئه‌ڤ ژناڤبرنا مووشه‌كان ژ ئه‌نجامێ هژماره‌كا هێرشێن ئه‌سمانى يێن نوو يێن هێزێن هه‌ڤپه‌يمانان هات ئه‌وا وه‌لاتێن ئێكگرتى سه‌ركرداتيا وێ دكه‌ت ل سه‌ر باره‌گايێن رێكخستيا داعش ل عيراق و سوريا.
ئه‌وان 15 هێرشێن ئه‌سمانى ل رۆژا ئه‌ينى ل سه‌ر باره‌گايێن رێكخستيا داعش ل نێزێك سكرێ مووسل و قائيم و بێجى و كه‌ركووك و تله‌عفه‌ر و شنگال ل عيراقێ كرينه ب گۆره‌يى راپۆرتا هێزێن هه‌ڤپه‌يمانان.
ئاشكه‌را ژى كريه كو ئه‌و هێرشێن وان بووينه ئه‌گه‌رێ ژناڤبرنا هژماره‌كا مووشه‌كان ل ئه‌سه‌د و ترۆمبێل و يه‌كه‌يێن ته‌كتيكى و باره‌گايێن چه‌كدارێن داعش.
ئه‌ڤرۆ نيوز:
بڕياره ئه‌ڤرۆ 27\12\2014 پشى نيڤرۆ جۆن مه‌كين بگه‌هيته فرۆكخانا نێڤده‌وله‌تى يا هه‌ولێر و ژ لايێ به‌رپرسێن هه‌رێما كوردستانێ ڤه بهێته پێشوازيكرن.
جۆن مه‌كين، سيناتۆرێ ب ناڤێ و ده‌نگێ كۆماريايێن ئه‌مريكا، رۆژا ئه‌ينى 26\12\2014 گه‌هشته به‌غدا و ل گه‌ل سه‌ليم جبورى سه‌رۆكێ جڤاتا نوونه‌رێن عيراقێ و هنده‌ك هوزێن سونى يێن پارێزگه‌ها ديالا و ئه‌نبار و نه‌ينه‌وار و سه‌لاحه‌دين و كه‌ركووك و ده‌وروبه‌رێن به‌غدا كۆم بوو.
دهێته پێشبينيكرن د سه‌ردانا خوه دا بۆ هه‌رێما كوردستانێ چاڤ ب هه‌ر ئێك ژ مه‌سعود بارزانى سه‌رۆكێ هه‌رێما كوردستانێ و نێچيرڤان بارزانى سه‌رۆكێ حوكمه‌تا هه‌رێما كوردستانێ بكه‌ڤيت.
نيشاندان