ئەڤرۆ:
رێڤەبەرێ نەخشەدانانا ئاڤەدانی ل پارێزگەھا دھۆکێ بۆ ئەڤرۆ دیار کر، ل سەر ئاستێ پارێزگەھا دھۆکێ لژنەک بۆ دووڤچوونا پرۆژێن دەڤەرا پیشەسازی یا سڤک ل نزارکێ ھاتە پێکئینان کو رێکخستن ل دەڤەرا پیشەسازی بھێتەکرن، گەلەک ژ وان جە د پلانێ دا بۆ مەرەمەکێ ھاتیە دانان، لێ د راستی دا بۆ مەرەما دێ ھاتینە بکارئینان کا مۆلەت بۆ چو مەرەمێ ھاتیە دانان، پێدڤیە پرۆژە ل دووڤ وێ مەرەمێ بھێتە چێکرن و کار یێ دھێتە کرن کو پیشەسازیا مالتایێ و بەروشکێ ژی بھێنە راکرن و ل دەڤەرا نزارکێ و سەرتەنگێ بھێنە دانان.
کوردو ئیسحان رێڤەبەرێ نەخشەدانانا ئاڤەدانی ل پارێزگەھا دھۆکێ دیار کر، پارچێن بەری نوکە ل دەڤەرا پیشەسازی یا سڤک ل نزارکی ھاتینە دانان دێ دووڤچوون ل سەر ھەموویان ھێتە کرن و لژنە دێ دیارکەت کا چەند رووبەر مایە و چەند بوویە پارچە و چو جۆرە پرۆژە ل سەر ھاتیە دانان، یێ سەرپیچی کربیت دێ ھەولدەین وێ سەرپیچیێ نەھێلین ودێ زڤرینن بۆ وێ مەرەما پارچە ئەرد پێ ھاتیە دان و مۆلەت پێ وەرگرتێ و دووبارە دێ پێداچوون و دیراسەت د پیشەسازیا سڤک ل دەڤەرا نزارکێ دا ھێتە کرن، د پلانێ دایە دەڤەرا پیشەسازیا بەروشکێ ببیتە دو بەش، ئێک ل جھێ خوە بمینیت و یا دیتر بھێتە ڤەگوھاستن بۆ دەڤەرا سەرتەنگێ و دولبێ.
ئەندازیار کوردو ئیسحان گۆت ژی: دەڤەرا پیشەسازی یا گران ل کواشی نوکە ئەم تێدا کار دکەین بھێتە بەرفرەھکرن و رێکخستن و دەڤەرا پیشەسازیا ئاھێن خوارنێ ژێ دی دھۆک ھێتە دانان ئەو ژی دێ ل دەڤەرا دولبێ بیت ئەم ھەولددەین ل دەڤەرێن پێشەسازی ژێک بھێنە جوداکرن و ل بەرە دەڤەرا پیشەسازی یا سڤک ل دولبێ و ل سەرتەنگێ بھێتە دانان و ل دەڤەرا پیشەسازیا کەرەستێن ئاڤاکرنێ ژی ل زاوا بھێتە دانان و پێشەسازیا مالتایێ ژێ دێ ھێتە راکرن بۆ سەرتەنگێ ھێتە ڤەگوھاستن.
رێڤەبەرێ نەخشەدانانا ئاڤەدانی دیار کر، دەمێ ماستەر پلان دھێتە دانان ھزر د رێژا کەسکاتیێ دا دھێتە کرن و ل دووڤ ماستەر پلانێ پێدڤیە رێژا ٢٠% کەسکاتی بمینیت و گۆت: ل سالە ٢٠١٢ وەرە ھەتا نوکە، رێ نەھاتیە دان چو کەس جھێ کەسکاتیێ بکاربینیت بۆ بەرژوەندیێن خوە و تاکە کەسی، ئانکو ب چو رەنگەکی ئەردێ کەسکاتیی بیت د ماستەر پلانێ دا، ئەم رێ نادەین کەسکاتی بھێتە گوھۆرین بۆ مەرەمێن ئاڤاکرنێ.
ئەندازیار کوردو ئاشکرا کر کو دەمێ ئەم پلانەکێ ددانین تووشی گەلەک ئاستەنگان دبن، چونکو بریارێ ل سەر بەرژوەندیێن خەلکەکی دھێتە دان و د ماستەر پلانێ دا ھزرا پاشەرۆژێ دھێتە کرن جە بمینیت بۆ قوتابخانەیان و نەخۆشخانەیان و ھەموو خزمەتێن دێ ھەمەجۆر بیێ رازەمەندیا خەلکی ئەم پلانێ پەسەند ناکەین، چونکو ھەکە خەلک رازی نەبیت دێ ئاریشە ل پاشەرۆژی پەیدابن د پلانێ دا، لەورا یا گرنگە ئەو خەلکی تێبگەھینن پلان بۆ بەرژوەندیێن وان ھێتە دانان ل پاشەرۆژێ زارۆیێن وان تووشی ئاریشێن کیم خزمەتگوزاریان نابن، ژ بەر کو پلاندانان بۆ پێشکەفتن و خزمەتکرنا باژێری ھێتە دانان، ئەم ل گەل بەرژەوەندکاران تووشی ئاستەنگان دبن.
ناڤبری ئەو ژی خویا کر، د وەختی دا دەڤەر ھەنە بێی پلاندانان یێن ھاتینە ئاڤاکرن، نوکە ئەو دەڤەر بەرفرەە بووینە، ئاریشە ل وان دەڤەران زۆر بووینە، بۆ نموونە ژی ل دەڤەرا بەروشکێ و قەسارا و مالتایێ و شاخکێ و نزارکێ و ئێتیتێ ھەموو ب شێوکێ نە رێکخستی ھاتینە ئاڤاکرن، نوکە بەرفرەە بووینە، ئارشێن پلانسازی گەلەک تێدا ھەنە و پێدڤێ خزمەتگوزاریان ھەنە وەکو قوتابخانە و بنگەھێن ساخلەمیێ پێدڤی بوو دەمێ ھاتینە ئاڤاکرن ھزر ل جھێ قوتابخانان و بنگەھێ تەندروستی و چێکرن و بەرفرەھکرنا جادەیان ھاتباکرن، دانانا نەخشەیی بۆ دەڤەرەکا وەسا ئاڤاکری بێگومان گەلەک ئاستەنگ پەیدادبن، چونکو مولکێ خەلکی دکەڤیتە بەر بارگرانیێ ل سەر رێڤەبەریێن حکوومی دروست دبیت ژ لایێ دابینکرنا بوودجەکا تایبەت بۆ قەرەبووکرنا خەلکی.
کوردو ئیسحان رێڤەبەرێ نەخشەدانان ئاڤەدانی ل پارێزگەھا دھۆکێ گۆت ژی: نوکە ئەم کار د دانانا ماستەر پلانا کەلەکچی و رۆڤیا و بەردەرەشێ دا دکەن و ھەڤکاریا کۆمپانیەکا لوبنانی و نەخشەیی ل قەزا شێخان و باعەدرێ ژی ھێتە دانان، نوکە کار د قوناغێن دەستپێکێ دایە و بەردەوام پلان بۆ باژێر و قەزا و ناحی و گۆندێن پارێزگەھا دھۆکێ ھێنە دانان و گەلەک جاران دووبارە پێداچوون د پلانێ دا دھێتە کرن ب مەرەما باشتر لێ کرنێ.

ئەڤرۆ:
سەرۆکێ باژێرڤانیا رۆژئاڤا ل دھۆکێ بۆ ئەڤرۆ دیارکر کو ھەتا سوبەھی 30\12 دێ پشکەک ژ پرۆژێ ئوڤەر پاسا کوردستان ھێتە ڤەکرن، کو ترۆمبێل ژ زەری لاند ئیکسەر دێ چنە سەنتەرێ دھۆکێ و رێژا 50% ئەو قەرەبالغا ترۆمبیلان ل جادا نەخۆشخانا شیلان نامینیت.
جەلال رەشید سەرۆکێ باژێرڤانیا رۆژئاڤا ل دھۆکێ دیارکر کو ب رێژا 69% پرۆژێ ئوڤەر پاسا کوردستان ب دووماھی ھاتیە و د ماوێ 75 رۆژێن کارکرنێ دا دێ ب تمامی ب داووماھی ھێت، رۆژێن باران دبارین کار د پرۆژەی دا ناھێتە کرن و ئەو رۆژ ناھێنە ھژمارتن، گۆت ژی د ماوەکێ کیم دا ھەکە چ ئاستەنگ دروست نەبن پشکەکا دیتر ژی دێ ھێتە ڤەکرن.
جەلال رەشید ئاماژە دا وێ ژی پشتی پرۆژە بۆ کۆمپانیەکا ناڤخۆیی ھاتیە دان و پاریزگەرێ دھۆکێ پرۆژە ب ستۆیێ خوە ڤە گرتی کار باش یێ دھێتە کرن، گۆت ژی کۆژمێ زێدەتر ژ 11 ملیار دیناران بۆ چیکرنا ڤێ ئوڤەر پاسێ ھاتینە تەرخان کرن.

ئەڤرۆ:

ھژمارەکا کەسایەتی و چالاکڤانان ل دھۆکێ بۆ پێشوازی کرنا سالا نوو یا 2015 چالاکیەکا جۆری یا رێکخستی و د وێ چالاکیێ دا ل شەڤا سەرێ سالێ دێ پێخاس پێشوازیێ ل سالا نوو یا زاینی کەن.

رێکخەرێ ڤێ چالاکیێ حەسۆ ھورمی بۆ رۆژناما ئەڤرۆ دیارکر کو ھژمارەکا کەساتی و چالاکڤان و رۆژنامەڤانێن کورد ژ چەند وەلاتێن جیھانێ ل گەل چەند کەساتیێن دەڤەرێ بەرھەڤی کریە بۆ شەڤا سەرێ سالێ ل دەمژمێر 11 ھەتا پشتی دەمژمێر 12 دێ خوە پێخاس کەن و پێشوازیێ ل سالا نوو کەن، گۆت ژی ڤێ چالاکیێ دێ ل کەمپا باعەدرێ یا ئاواران کەن.

حەسۆ ھورمی ئەو ژی دیارکر کو ھەر دڤێ چالاکیێ دا دێ 104 زارۆیێن ئێتیم و 50 زارۆیێن کێم ئەندام دێ دیاری ب سەر ھێنە بەلاڤ کرن، ھەروەسا گۆت مەرەم ژ ڤێ چالاکیێ ئەوە پتر جڤاکێ نێڤدەولەتی ل دۆر رەوشا ئاواران ئاگەھدار کەین، ھەروەسا دێ ل ناڤ ئاواران چالاکی ھێتە کرن داکو پتر نێزیکی نەخۆشی و دەردەسەریێن وان بیت، دیسا دێ دیار کەین کو ھەکە ئەم ل کەمپان ژی بژین ھەر دێ ل ڤی وەلاتی بین.