ئه‌ڤرۆ نيوز:

د كاردانه‌ڤه‌كێ دا به‌رامبه‌ر دامه‌زراندنا جڤاتا كانتۆنا شنگال، ژ لايێ په‌كه‌كێ ڤه‌، ميرێ ئێزديان هاته‌ ده‌نگ و هوشداريه‌كا دژوار دا و دا زانين كو ئه‌و دێ ب خوينێ به‌ره‌ڤانيێ ژ كاره‌كێ ژ ڤى ره‌نگێ يێ خوه‌ سه‌پاندنێ كه‌ن.

مير ته‌حسين به‌گ ميرێ ئێزديان د داخۆيانيه‌كا تله‌فۆنى دا بۆ باسنيوز راگه‌هاند كو ماوه‌كه‌ ئه‌و ئاگه‌هدارى كاره‌كێ ژ ڤى ره‌نگى يه‌ و هوشدارى دايه‌ كو هه‌موو لايه‌نێن ئێزديان و شنگال ژ حوكمه‌تا هه‌رێمێ ب سه‌رۆكاتيا بارزانى ناهێنه‌ جوداكرن و هه‌ر لايه‌ك ژى بزاڤا ڤێ چه‌ندێ بده‌ت و كێشان دروست بكه‌ت، دێ ب دژوارى رووى ب روويێ وان بن.

ميرێ ئێزديان ل كوردستان و جيهانێ راگه‌هاند ژى كو ئه‌وێن مژوولى پلاندانێ ب كرێگرتى و دوژمنێن ئێزديان و گه‌لێ كوردستانێ ته‌ماشه‌ دكه‌ين و مامه‌لا دوژمنێن راسته‌قينه‌ يێن ملله‌تى دێ ل گه‌ل كه‌ين.

مير ته‌حسين به‌گ گۆت: “ب تنێ سه‌رۆكێ ئێزديان مه‌سعود بارزانى يه‌ و ب تنێ ئه‌و دشێن ب وه‌رگرتنا رايا ئێزديان بڕيارێ ل سه‌ر مان و نه‌مانا ئێزديان بده‌ت”.

هه‌ر وه‌سان ميرێ ئێزديان به‌حس ل وێ جڤاتێ كر و گۆت: “هيڤيدارم به‌رى هه‌ر تشته‌كى خو ژ ده‌ڤه‌را شنگال ڤه‌كێشن و چو جار بير ل هندێ نه‌كه‌ن كاره‌كێ وه‌سان يێ ترسناك بكه‌ن و بلا بهێلن خه‌لك ل بن سيبه‌را پێشمه‌رگه‌يى دا يێ ئارام بيت”.

ميرێ ئێزديان سلاڤ و رێزێن خوه‌ ژى بۆ هه‌موو پێشمه‌رگه‌يى هنارتن و سه‌ره‌خۆشى ل شه‌هيدا كرن و هيڤيا زوو ساخبوونا برينداران ژى كر.

رۆژا چوار شه‌مبی پارتا كرێكارێن كوردستانێ PKK د كومبوونه‌كێ دا ئه‌نجومه‌نه‌ك بۆ كانتونا شنگالێ دروست كر كو ژ 27 كسان پێك دهێت ب ناڤێ جڤاتا ئێزديێن شنگال و ب بۆچوونا وان ئه‌ڤ كانتۆنه‌ بۆ پتر خزمه‌تكرنا ده‌ڤه‌را شنگاله‌ و ئێكه‌تيێ ژى ده‌ستخۆشى ل ڤێ پێنگاڤێ كريه‌، به‌لێ قاسم شه‌شۆيێ سه‌ركردێ پێشمه‌رگێن ئێزدى ل چيايێ شنگال ژى بۆ ئه‌ڤرۆ نيوز راگه‌هاند بوو كو هه‌كه‌ ئه‌و ده‌ستبه‌رداريى ڤان ره‌نگه‌ كاران نه‌بن، چو ب سه‌رێ داعش ئينايه‌، دێ وه‌ل په‌كه‌كێ ژى كه‌ن.

ئه‌ڤرۆ، ڤه‌گێر:

رۆژا چوار شه‌مبی پارتا كرێكارێن كوردستانێ PKK د كومبوونه‌كێ دا ئه‌نجومه‌نه‌ك بۆ كانتونا شنگالێ دروست كر، ل دور ڤێ پێنگاڤا په‌كه‌كێ، قاسم شه‌شو فه‌رماندارێ پێشمه‌رگێن ئێزدی ل چیایێ شنگالێ بۆ رۆژناما ئه‌ڤرۆ گۆت: (په‌كه‌كه‌ نه‌ خودانا شنگالێ یه‌، چوار گه‌نجێن وان یێن ژ رۆژاڤا و چوار ژ توركا هاتین كانتونا چێ كه‌ن و ئه‌قلیما ئاڤا كه‌ن ئه‌و نه‌ بابێ شنگالێ و وه‌لی ئه‌مرێن شنگالێ نه‌ ، مه‌ و داعش چ ل ئێك و دو كر دێ وه‌ل وان ژى كه‌ین و ئه‌م ژ وان و غه‌یری وان ژی قه‌بوول ناكه‌ین).
د پشكه‌كا دی یا ئاخفتنێن خو دا قاسم شه‌شوی گۆت: (رۆژا ده‌ستپێكێ ده‌مێ هاتین گۆت ئه‌م دێ هاری هه‌وه‌ كه‌ین نه‌ گۆت دێ وه‌كو سوریێ لێ كه‌ین. بلا بچن وه‌لاتێ خو چێ كه‌ن، هه‌ر وه‌ختێ ژ سه‌رجه‌مێ 19 ویلایه‌تێن توركیا په‌كه‌كه‌ شیان ئێكێ رزگار كه‌ن و كانتونه‌كا خو لێ ئاڤا كه‌ن، بلا ده‌ستێ خو بدانه‌ سه‌ر شنگالێ ژى. وان چ حه‌ق د شنگالێ دا نینه‌ و بلا ب ئه‌ده‌ب و ئه‌خلاق د جهێ خو ب رینن و بلا باش بزانن شنگال نه‌جهێ وانه‌).
د به‌رده‌وامیا ئاخفتنێن خو دا قاسم شه‌شوی گۆت: (72 فه‌رمان هاتینه‌ سه‌رێ ئێزدیان و یێ ڤێ دووماهیێ بۆ 73، له‌وما هه‌كه‌ په‌كه‌كه‌ به‌لایا خو ژ مه‌ ڤه‌ نه‌كه‌ن مه‌ و داعش چ ل ئێك و دوكر دێ وه‌ل وان ژى كه‌ین و ئه‌م ژ وان و غه‌یری وان ژی قه‌بوول ناكه‌ین. ئه‌م هه‌موو كوردین، ئه‌م برایێن ئێك دوینه‌ و ئه‌م هیڤی دكه‌ین ئه‌م تبلێن خو نه‌كه‌ینه‌ د چاڤێ هه‌ڤدو را).
قاسم شه‌شوی ئه‌و یه‌ك ژی دیار كر كو چوار كه‌س د خانیه‌كێ دا یێن گه‌هشتینه‌ ئێك دو و دبێژن مه‌ ئه‌نجومه‌نك بۆ شنگالێ یێ پێكئینای، ئه‌و ئه‌نجومه‌ن نه‌یا موعته‌ره‌فه‌ و كه‌س نوزانیت ئه‌و كینه‌ و كورێن كێ نه‌ و نه‌ ئێزدی و نه‌ چ حزب ژى وان ناس ناكه‌ن و گۆت: (ئه‌م ب چو ره‌نگان وان قه‌بوول ناكه‌ین).