ئه‌ڤرۆ نيوز، نيوار محه‌مه‌د سه‌ليم:
ل دووڤ بڕيارا دادگه‌ها تاوانان ل دهۆكێ، سوبه‌هى 21\12\2014 بڕياره گه‌را دويێ يا دادگه‌هكرنا بكوژێ دونيايێ يێ ب ناڤێ سلێمان دياب بهێته ئه‌نجام دان، پشتى كو بۆ جارا ئێكێ هاتيه پاشخستن ژ به‌ر هنده‌ك ئه‌گه‌ران.
شيمال بورهان، ئێك ژ تيما پارێزه‌رێن خێزانا دونيايێ، بۆ ئه‌ڤرۆ نيوز دياركر كو بڕياره ئه‌ڤرۆ بۆ جارا دويێ دادگه‌هكرنا بكوژێ دونيايێ برێڤه بچيت و گۆت: “چو پێزانين نه‌گه‌هشتيبنه مه كو دادگه‌هكرنا وان بهێته پاشخستن”.
ل 13\11\2014 روونشتنا ئێكێ يا دادگه‌هكرنا تاوانبارێ ب كوشتنا دونيايێ هاتبوو پاشخستن و ل وى ده‌مى ئێك ژ تيما پارێزه‌رێن دونيايێ كه‌وسه‌ر محمه‌مه‌د دابوو زانين كو ژ ئه‌گه‌رێ وێ چه‌ندێ كو خێزانا وێ سكالا ل سه‌ر چه‌ند كه‌سان تۆماركر بوو كو د تۆمه‌تبار بوون ب كوشتنا وێ، به‌لێ ب تنێ ئێك كه‌س د كێشێ دا نڤيسبابوو، ديسا پارێزه‌رێ بكوژێ دونيايێ دابوو زانين كو پرۆژه‌كێ ئاشتبوونێ د ناڤبه‌را هه‌ردو لايان دا هه‌يه”.
دونيا يا 15 سالى د شوويێ خوه يێ دويێ دا، شوو ب بابێ شه‌ش زارۆيان كربوو كو 45 سالى بوو و خه‌لكێ كۆمه‌لگه‌ها كه‌له‌كچى يا سه‌ر ب پارێزگه‌ها دهۆك ڤه بوو، هه‌ڤژينێ وێ يێ نوو ئه‌وێ ب ناڤێ سلێمان دياب ب تۆمه‌تا هه‌بوونا په‌يوه‌نديان ل گه‌ل گه‌نجه‌كێ كه‌له‌كچى كوشت.
هه‌ر چه‌نده ب گۆره‌ى دايكا دنيايێ، خێزانا سلێمان دياب ب باب و برا ڤه يا تۆمه‌تباره د ڤێ كێشى دا، به‌لێ ئه‌و ته‌كستێ ل سه‌ر وێ ئێكێ دكه‌ن كو سلێمان ب تنێ ئه‌ڤ كاره ئه‌نجامدايه.
نيشاندان
