ئەڤرۆ:

بریارە ئەڤرۆ ھەردو نوونەرێن پارێزگەھا دھۆکێ د خولا پلە ئێکا ھەرێما کوردستانێ یا تەپا پێی دا سێمێل و گارە یاریێن خوە یێن گەرا چارێ ل یاریگەھێن خوە بکەن.

ل یاریگەھا خوە تیما تەپا پێی یا یانا سێمێل دێ مێڤانداریا یانا شەھیدان کەت د یاریەکا گرنگ دا، تایبەت بو یانا سێمێل کو  دووماھی یاریا خوە دا وەکھەڤ ببو ل گەل ئالا، لەورا بو ڤێ یاریێ سێمێل بتنێ رێکا سەرکەفتنێ یا ھەیی بو وێ چەندێ خوە نێزیکی سەرێ لیستێ بکەت و بمینیتە د ھەڤرکیێ دا و بەرامبەر ڤێ چەندێ شەھیدان د سێ یاریێن خوە یێن بوری دا توشی خوسارەتیێ نەبوویە لەورا دێ یاریەکا ب زەحمەت بیت بو سێمێل.

ل دور ڤێ یاریێ راھێنەرێ یانا سێمێل بەھزاد چافشین بۆ رۆژناما ئەڤرۆ گوت: یاریەکا ب زەحمەتە چنکو ھەڤرکا مە د سێ یاریێن بوری دا خوسارەت نەبوویە و مە ژی باش خوە بەرھەڤکریە بو ڤێ یاریێ و ئەڤ یاریە بومە گرنگترین یاریە چونکو سەرکەفتنا مە دێ مە نێزیکی سەرێ لیستێ کەت و بەرامبەر ھەر ئەنجامەکێ دی دێ ھەلویستێ مە خراب کەت.

د یاریەکا دی دا ل یاریگەھا خوە یانا گارە ب زاخەکا مەزن پشتی کەسەکی خوە لێکریە خودان و ھەروەسا پشتی د گەرا بوری دا سەرکەفتن تومارکری ل سەر ھەلۆ دێ مێڤانداریا یانا سوران کەت د یاریەکا ب زەحمەت دا، دڤێ یاریێ دا گارە ب سەرکەفتنێ دێ خوە نێزیکی سەرێ لیستێ کەت و دێ ئاگرێ ھەڤرکیێ ھلکەت، لەورا ژی یاریا مان و نەمانێ یە بو گارە.

ل دور ڤێ یاریێ راھێنەرێ یانا گارە خالد موسا بۆ رۆژناما ئەڤرۆ گوت: یاریەکا گەلەک ب زەحمەتە چونکو ھەڤرکا مە د یاریا بوری دا سەرکەفتن تومارکریە، لەورا دێ ب زاخەکا مەزن ھێتە یاریێ لێ مەژی تیما خوە باش بەرھەڤکریە و چەندین رۆژە لسەر نەخشەکی کار دکەین بو وێ چەندێ سەرکەفتنێ تومارکەین.

زێدەتر خالدی دیارکر کو چو کێماسی د پێکھاتێ یما وان دا نینن و ھەمی یاریکەر بو ڤێ یاریێ دبەرھەڤن.

ئەڤرۆ:
پشتی پشککێشانا یاریێن قوناغا دویێ یا قارەمانیا یانێن ئوروپا قارەمانێن خولان ھاتیە ئەنجامدان کو ھژمارەکا یاریێن ئاگرینە و چەندەکێن دی ژلایێ جەماوەری ڤە ئەو گرنگیا خوە نینە لێ ژلایێ داری ڤە دبیت گرنگیا خوە ھەبیت و یاریا یانا بەرشەلونە و مانچستەر سیتی ل رێزا ئێکێ دھێت کو بھایێ یاریکەرێن وان د گەھیتە ملیارەک و 61 ملیون یورویان و ل رێزا دویێ یاریا ریال مەدرید و شالکە دھێت ب 899 کلیون یورویان و یاریا چێلسی و پاریس سان جێرمان ل رێزا سیێ ب 842 ملیون یورویان و دووڤدا بایرن میونخ و شاختار دھێت ب 740 ملیونا و ب 671 ملیونان یاریا یوڤانتوس و بروسیا دورتموند دھێت و ل رێزا شەشێ یاریا موناکو و ئەرسینال ب 534 ملیونا و ل رێزا حەفتی یاریا ئەتلەتیکو و بایر لێڤەرکوێزن ب 490 ملیونا و ل دووماھیێ یاریا پورتو و بازل ب 247 ملیونان کو بھایێ ڤان یاریکەران ل دووڤ ملپەرێ ترانسفیر مارکێت.

ئەڤرۆ:
د داخویانیەکێ دا پیشەکارێ سوری یێ یانا دھۆک ئەحمەد دونی دیارکر کو دوھی مولەتا وی دایە کارگێریا یانا دھۆک ب دووماھی ھاتیە و دبیت ئەو نەزڤریتە یانێ ڤە.
زێدەتر د پەیوەندیەکا تلەفونی دا ژ مێرسینێ ئەحمەد دونی بۆ رۆژناما ئەڤرۆ گوت: من خێزانەک ھەیە و ب ھیڤیا من ڤەنە، لەورا ھەمی مافێن من نەدەنە من ئەز نازڤرمە یانێ ڤە و ھەردەمێ مافێن من دابینکرن ئێکسەر دێ پەیوەندیێ ب تیمێ کەم، چونکو ماوەکێ کورت ل دھوکێ مایمە لێ حەزژێکرنەکا مەزن لنک من پەیداکریە.
زێدەتر ئەحمەد دونی دیارکر کو دوھی دووماھی ژڤانێ وی مولەتێ بو دایە کارگێریا یانێ کو مافێن وی دابینکەن، لێ دیارکر ھەتا نوکە کەسێ ژ کارگێریێ پەیوەندی پێ نەکریە، لەورا ژی یێ دلگرانە و ھەکە کیشا وی چارە نەبوو ئەو پەیوەندیێ ب یانێ ناکەت و بو یاریا بەرامبەر شورتە یێ ئامادە نابیت.
ل دووماھیێ دونی ھیڤی خواستن کو کێشا وی چارەبیت و گوت: ھەر یاریکەرەکی دڤێت یاریێ ل یانا دھۆک بکەت لێ دڤێت مافێت خوە ژی وەرگریت و راستە کاودانێن یانێ د ئالوزن، لێ من ژی ھندە شیان ھەنە بێھنا خوە فرەھکریە، لێ من ژی خێزانەک ھەیە و پێدڤی ب منن لەورا ژی من ئەڤ داخوازیا رەوا کریە.