ئه‌ڤرۆ نيوز:
د ماوێ 24 ده‌مژمێرێن بۆرى دا، ل دڤه‌رێن جودا يێن بارانێ بارينه و ل پارێزگه‌ها دهۆكێ و زاخۆ ژى رێژا باران بارينێ نه‌هاتيه تۆماركرن.
دا كو رێژێن باران بارينێ ب روونى ب ده‌ركه‌ڤن، وێنه‌يى كليك بكه:
رێژا باران بارينا 24 ده‌مژمێرێن بۆرى
نووترين نووچه
- سەرۆكێ حوكمەتێ و قونسلێ فلستینێ دووماهی پێشهاتێن رەوشا غەزە گەنگەشەكرن
- د. خەلیل غازی: داهاتێ دەزگەهێن حوكمەتا ئیراقێ بۆ گەنجینەیا وەلاتی ناچن
- هەكە دۆزێن مللەتان د هندەك ویستگەهاندا تووشی راوەستییانێ ژی ببن، چو جاران ب دووماهی ناهێن
- مەسرور بارزانی و پاتریاركێ كەنیسەیا ئاشۆرییا رۆژهەلاتی دوپاتیێ ل پێشڤەبرنا كەلتوورێ پێکڤەژیانێ دكەن
- پارتی ل گەل ئێك لیستییێ یە ل دەڤەرێن كوردستانی یێن ل دەرڤەی ئیدارەیا هەرێمێ
- لەیلا قاسم نموونەیا قەهرەمانییا كچا كوردە و سیمبۆلا ئازادیخوازیێیە
- نێچیرڤان بارزانی: پێشوازیێ ل خوە هەلوەشاندنێ و چەكدانانا پەكەكێ دكەین
- نێچیرڤان بارزانی و مەسرور بارزانی پیرۆزباهیێ ل بنگەهێ لالشێ دكەن
- مەسرور بارزانی: پشتەڤانییا حوكمەتێ بۆ ب هێزكرنا ژێرخانەیا ئابۆری دێ بەردەوام بیت
- بنگەهێ لالش خزمەتەكا بەرچاڤ یا جڤاكێ ئێزدیاتیێ كریە
سه‌ره‌كى نووترين نووچه
سەرۆکێ زانکۆیا مووسل: دێ ل ھەرێمێ دەوامێ کەین
ئەڤرۆ:
سەرۆکێ زانکۆیا مووسل دکتۆر ئوبەیی سەعید دێوەچی بۆ رۆژناما ئەڤرۆ دیارکر کو ١٤ ھزار قوتابیێن زانکۆیا مووسل نوکە ل ھەرێما کوردستانێ د ئاکنجی نە، لەورا دبیت ھندەک پشکێن زانکۆیا مووسل ل ھەرێمێ بھێنە ڤەکرن و ئەو قوتابیێن ئاوارە ل ھەرێمێ بەردەوامیێ بدەنە خواندنا خوە.
دکتۆر ئوبەیی سەعید دێوەچی ئەو ژی ئاشکراکر کو نێزیکی ٧٥٠ مامۆستایێن زانکۆیا مووسل ژی ل ھەرێمێ نە و ل ھندەک پشکێن مرۆڤایەتی دبیت چو ئاریشە ل ستافێ ئەکادیمی دا نەبیت و بشێن پشتبەستنێ ل سەر مامۆستایێن خوە بکەن بۆ ڤەکرنا وان پشکان، گۆت ژی وەزارەتا خواندنا بلند یا بەغدا ل سەر ڤێ پێنگاڤێ یا رازیی یە و ب تنێ ل ژڤانی رازیبوونا وەزارەتا خونادنا بلند یا ھەرێمێ دکەن و جھەک بۆ بھێتە دابین کرن، ب فەر ژی زانی ل زانکۆیەکا ھەرێمێ جھەک ل پشتی ئێڤاری بۆ بھێتە دابین کرن داکو خواندانا ئەڤ سالە ژ قوتابیێن زانکۆیا مووسل نەچیت.
ھەر ژ نھا خەلکێ سنوونێ قەستا مالێن خوە دکەن
ئەڤرۆ:
رێڤەبەرێ ناحیا سنوونی دیار کر کو ھێزێن پێشمەرگەی شیان سنوونێ ب گوندو کۆمەلگەھڤە ب تمامی کونترۆل بکەن و گۆت تیرۆرست درەڤن و ھیبەتا وان ب دەستێن پێشمەرگەی ھاتە شکاندن، ل ھەمان دەمی قائیمقامێ قەزا شنگال دیار کر پشتی کو دەڤەرێن سەر ب قەزا شنگالێ ڤە ھاتینە رزگارکرن خەلکەک یێ سەرەدانا مال و حالێن خوە دکەن و گۆت “لێ ئەم داخوازێ ژ وەلاتیان دکەین دبێھن فرەھبن و لەزێ نەکەن ھەتا کو ژ بۆمبێن تیرۆرستان پشتراست بین”.
نایف سەیدو رێڤەبەرێ ناحیا سنوونێ بۆ ئەڤرۆ گۆت “ھەر شەش کۆمەلگەھێن سەر ب ناحیی سنوونێ ڤە ب تمامێ ژ دەستێن تیرۆرستان ھاتنە دەرێخستن کو نوکە ھەر شەش کۆمەلگەە ل گەل ھەموو گوندێن ب سەرڤە دبن کونترۆلا ھێزێن پێشمەرگەی دانە. ئەز وەکو رێڤەبەرێ ناحیێ ل بەرۆکێن شەری ل گەل ھژمارەکا زۆرا پێشمەرگەی مەعنەویێن خەلکی زۆر بلند کرینە و نوکە تیمێن ئەندازیاری ل سنوونێ ب کاری راکرنا بۆمبەیان رادبن و ھەر دەمێ ھاتە پاقژکرن وەلاتی دێ ڤەگەرنە سەر مالێن خوە”.
ژ ئالیێ خوەڤە میەسەر حەجی قائیمقامێ قەزا شنگال دیار کر کو رزگارکرنا سنوونێ مەعنەویێن خەلکی وەسا بلند کرینە، ب ئاوایەکی کو نھا خەلک رێژەکا زۆر سەرەدانا مالێن خوە دکەن بۆ دیتنا مال و حالێن خوە و گۆت “داخوازێ ژ وەلاتیان دکەین کو نھا سەرەدانا مالێن خوە نەکەن ھەتا کو ژ بۆمبان دھێنە پاقژکرن، داکو وەلاتی زیانان نەدەن”.
میەسەر حەجی ئاشکرا ژی کر کو سنوونێ زێدەتر ژ ١٤٠ کیلومەتران ژ مووسل یا دوورە و دکەڤیتە د ناڤبەرا سنووری سووریا و چیایێ شنگالێ دا و ھژمارا ئاکنجین سوونێ دگەھیتە زێدەتر ژ ١٢٠ ھزار کەسان و ٤٠ گوندان ب خوڤە دگریت و رۆبەرێ سنوونێ پتر ژ ١٧١٤ کیلومەترە و گۆت “نھا چ مەترسی ل سەر ژیانا وەلاتی و مەزارگەھێ شەرفەدینی نەمایە”.
پێشمه‌رگه‌يى نه‌خشێ ده‌وله‌تا ئيسلامى گوهۆڕى
ئه‌ڤرۆ نيوز:
رۆژناما Daily Mail يا بريتانى د راپۆرته‌كێ دا نڤيسيه، ئه‌و ئۆپه‌رسيۆنێن هێزێن پێشمه‌رگێ كوردستانێ ل سنورێ شنگالێ ئه‌نجامداينه، نه‌خشێ ده‌وله‌تا ئيسلامى هاته گوهۆڕين و پێشمه‌رگه‌يى گه‌رمترين سه‌ركه‌فتن تۆماركر.
ئاماژه ب وێ چه‌ندێ ژى كريه كو هێزێن پێشمه‌رگه‌يى شيان هاريكاريا بگه‌هيننه ئاوارێن سه‌رێ چيايێ شنگال، ئه‌ڤ هاريكاريه ژى د ده‌مه‌كى دا هاتن كو پێشمه‌رگه‌يى ئۆپه‌راسيۆنێن مه‌زن ل ده‌ڤه‌رێن بن ده‌ستێ داعش ئه‌نجامداينه و ژ ده‌ستێ وان ئيناينه ده‌ر و ئابلۆقا داعش بۆ سه‌ر چيايێ شنگال بشكێنن.
ڤێ رۆژنامێ نڤيسيه ژى: “ئۆپه‌راسيۆنێن هێزێن پێشمه‌رگێ كوردستانێ بۆ شنگال گه‌هشتنه سه‌رێ چيايێ شنگال، ب سه‌ركه‌فتيانه كارێ خوه ته‌مام كر، گۆرانكارى ژى د نه‌خشێ ده‌وله‌تا ئيسلامى دا كرن”.
ل رۆژا چارشه‌مبيا بۆرى د ئۆپه‌راسيۆنه‌كا مه‌زن و به‌رفره‌هـ دا، هێزێن پێشمه‌رگه‌يى شيان روويه‌كێ گه‌له‌ك مه‌زن ژ ده‌ڤه‌رێن كوردستانى يێن ده‌رڤه‌يى ئيدارا هه‌رێمێ ل ده‌ڤه‌را شنگال ژ بن ده‌ستێ داعش ئيناينه ده‌ر و شيان ئابلۆقا سه‌رێ چيايێ شنگال بشكێنن و هه‌تا نوكه ژى شه‌ر بۆ رزگاركرنا سه‌نته‌رێ قه‌زا شنگال يێ به‌رده‌وامه.
سەعید شنگالی بۆ ئه‌ڤرۆ نيوز به‌حس ل نووترين پێشهاتێن شنگال دكه‌ت
ئەڤرۆ نیوز، لەزگین جۆقى:
بەرپرسێ لقێ 17 يێ پارتى ديموكراتى كوردستانبۆ ئەڤرۆ نیوز دیارکر کو ژ شڤێدى وه‌ره، خوه‌كۆژێن داعش و هێزێن پێشمه‌رگێ كوردستانێ شڤێدێ هه‌تا نوكه شياينه سێ تاخێن مه‌زنێن ل شنگال كۆنترۆل بكه‌ن.
سەعید شنگالى بەرپرسێ لقێ 17 يێ پارتى دیموکراتی کوردستان گۆتژی: “تاج بورج و تاخێ گەلی و تاخێ بەر بەرورش نوکە دبن کۆنترۆلا پێشمەرگه‌يى دانە و ژ شڤێدی وەرە فرۆكێن ھەڤپەیمانان ژى بەردەوام جهـ و بارەگایێن تیرورستان ل شنگال تۆپباران دکە”.
ناڤبری دیارکر کو چەکێ وان يێ سڤک ب تنێ كه‌فتيه ده‌ستێن پێشمه‌رگه‌يى و گۆت: ” گەلەک كەلەخێن تیرورستان بجهـ دا ماینە”، زێده‌تر گۆت: “پێشمەرگه‌يى پلانەکا ھوور داناینە بۆ کونترولکرنا شنگال و ھێدی ھێدی تاخ و گەرەکێن شنگال کۆنترۆل دکەن، چونکو تیرورستان گەلەک بۆمبە داناینە و مە ژى نەڤێت پێشمەرگێ کوردستانێ زیانان بدەت، لەورا ب ھووری تاخ و گەرەکێن شنگال دھێنە کۆنترۆلکرن”.
سەعید شنگال دا زانين ژى كو ئه‌و نەشێن بێژن کا چەند ژ سەدێ کەڤتیە دەستێن پێشمەرگه‌يى دا، به‌لێ نوکە تیرۆرست بەر ب سوریا د ره‌ڤن ب تنی ھندەک خوەکوژێن داعش ماینە ب قەناسی شەری دکەن ئەو ژی دێ ژناڤ چن شنگال ھەموو دێ ھێتە کۆنترۆلکرن.
هۆله‌ندا دێ مه‌شقكرنێ ب هێزێن پێشمه‌رگه‌يى كه‌ت
ئه‌ڤرۆ نيوز:
پشتى بۆ ماوێ دو ده‌مژمێران ل گه‌ل سه‌رۆكێ حوكمه‌تا هه‌رێما كوردستانێ ماينه د كۆمبوونێ دا، د كۆنگره‌كێ رۆژنامه‌ڤانى دا، وه‌زيرێ ژ ده‌رڤه يێ هۆله‌ندا پيرۆزباهيا هه‌رێما كوردستانێ كر ب هه‌لكه‌فتا سه‌ركه‌فتنا مه‌زنا هێزێن پێشمه‌رگه‌يى ل سه‌ر داعش و گۆت: “ئه‌م يێن ل ڤێره دا ژ نێزيك هايدارى ره‌وشا هه‌وه ببين و چاوان هه‌ڤكاريا باشترا مرۆڤى و هێزێن پێشمه‌رگه‌يى بكه‌ين”.
به‌رى ده‌مه‌كێ كێم كۆنگرێ رۆژنامه‌ڤانى وه‌زيرێ ژ ده‌رڤه يێ هۆله‌ندا، ئه‌لبێرت كوندێرس و نێچيرڤان بارزانى، سه‌رۆكێ حوكمه‌تا هه‌رێما كوردستانێ هاته گێران و تێدا نێچيرڤان بارزانى پشتى بخێرهاتنا وه‌زيرێ ژ ده‌رڤه يێ هۆله‌ندا و شاندێ ل گه‌ل ئاماژه ب وێ چه‌ندێ كر كو سه‌ره‌دانا وان يا هه‌ڤده‌مه ل گه‌ل سه‌ركه‌فتنێن مه‌زنێن هێزێن پێشمه‌رگه‌يى ل ده‌ڤه‌را شنگال تۆمار كرين.
ژ لايێ خوه ڤه ئه‌لبێرت كوندێرس ئاماژه ب وێ چه‌ندێ كر كو جارا ئێكێ يه سه‌ره‌دانا هه‌رێما كوردستانێ دكه‌ن و دايه زانين كو ئه‌و هاتينه هه‌رێمێ دا كو بزانن دێ چاوان ب ره‌نگه‌كێ باشتر ڤه ژ لايێ مرۆڤايه‌تى هه‌ڤكاريا هه‌رێمێ بكه‌ت كا چاوان يا پشكداره ژى د شه‌رێ دژى تيرۆرێ دا ل گه‌ل هه‌ڤپه‌يمانيا نێڤده‌وله‌تى دا.
وه‌زيرێ ده‌رڤه يێ هۆله‌ندا دا زانين ژى كو په‌يوه‌نديێن ناڤبه‌را هه‌رێم و هۆله‌ندا بۆ سه‌رده‌مێن كه‌ڤن ڤه‌دگه‌رن و گۆت: “د خۆشحالين ب سه‌ركه‌فتنێن پێشمه‌رگه‌يى ل سه‌ر داعش”، زێده‌تر گۆت: ” من دڤێت پيرۆزيێ ل هه‌وه بكه‌م بۆ وان سه‌ركه‌فتنێ هه‌وه ل دژى داعش تۆماركرين كو ب ره‌نگه‌كێ گه‌له‌ك باش پێشره‌ويى ل وان ده‌ڤه‌ران كريه”.
ئه‌لبێرت ئه‌و ئێك ژى دا زانين كو ئه‌و ل سه‌ر وێ هه‌ڤكاريا باشا هێزێن پێشمه‌رگه‌يى بۆ هێزێن عيراقێ د هايدارن و بلند د هه‌لسه‌نگينن كا چاوان شياينه به‌رسينگێ داعش بگرن.
ل دۆر رۆلێ هۆله‌ندا ل هه‌رێمێ ژى گۆت: “ژبلى كو هۆله‌ندا ب رێيا فرۆكێن F16 پشته‌ڤانيا ئه‌سمانى يا هێزێن ئه‌ردى يێن پێشمه‌رگه‌يى دكه‌ت، دشێت ژ لايێ ئابوورى و بازرگانى ژى ڤه هاريكاره‌كا باش بيت بۆ هه‌رێما كوردستانێ”.
ژ لايێ خوه ڤه نێچيرڤان بارزانى ژى ل دۆر بڕيارا هۆله‌ندا يا مه‌شقكرنا ساله‌كێ ب هێزێن پێشمه‌رگه‌يى بۆ رۆژنامه‌ڤانه‌كێ بيانى گۆت: “ده‌سپێكه‌كا باشه كو يا پابه‌نده ب بڕيارا په‌رله‌مانى و هه‌كه پێدڤى كر، دێ داخواز كه‌ين ئه‌و ماوه بهێته زێده‌كرن”.
نێچيرڤان بارزانى ل دۆر سه‌ركه‌فتنێن پێشمه‌رگه‌يى ژى گۆت: “سلاڤان بۆ پێشمه‌رگه‌يى دهنێرين و ده‌ست و چاڤێن وان ماچ دكه‌ين، كاره‌كێ ب زه‌حمه‌ت بوويه، ب پشته‌ڤانيا سه‌رۆك بارزانى يا ئێكسه‌ر سه‌ركه‌فتنه‌كا مه‌زن تۆماركريه، ل هه‌موو جهان هه‌ڤكار بوويه، به‌لێ شنگال بۆ مه ده‌ڤه‌ره‌كا گه‌له‌ك گرنگه، هه‌تا نوكه شنگال ب ته‌مامى رزگار نه‌بوويه، به‌لێ چاڤه‌رێينه مزگينێن خۆش ئه‌ڤرۆكه بگه‌ن، به‌لێ من دڤێت بێژم كو ئه‌ڤه ئێك ژ وان سه‌ركه‌فتنێن هه‌ره مه‌زن بوويه يێن هێزێن پێشمه‌رگه‌يى تۆمار كريه”.
وه‌زيرێ ژ ده‌رڤه يێ هۆله‌ندا ئاماژه ب وێ چه‌ندێ ژى كر كو ب كۆژمێ 17 مليۆن دۆلاران هاريكاريا عيراقێ كريه و دێ سه‌ره‌دانا كه‌مپا به‌حركێ ژى كه‌ن دا بزانن چ پێدڤيه.
نێچيرڤان بارزانى ل دۆر ڤه‌گه‌ريانا وان ده‌ڤه‌ران ژى بۆ هه‌رێما كوردستانێ گۆت: “يا گرنگ ئه‌و بوو ئه‌ڤ ده‌ڤه‌ره هاتنه پاقژكرن، بۆ عيراق و هه‌رێمێ ئه‌ڤه يا گرنگ بوو، دێ بۆ ڤه‌گه‌ريانا وێ پابه‌ندى دستوورى بين كو چاوانيا ڤه‌گه‌ريانا وان ده‌ڤه‌ران به‌حسكريه”.
هاتيه نووكرن: هۆله‌ندا ل هه‌رێمێ دێ دانوستاندنێ ل سه‌ر هه‌ڤكاريا پێشمه‌رگه‌يى كه‌ت
ئه‌ڤرۆ نيوز:
ئه‌ڤرۆ رۆژا ئێكشه‌مبى وه‌زيرێ ژ ده‌رڤه يێ هۆله‌ندا گه‌هشته هه‌رێما كوردستانێ و بڕياره چه‌ند كۆمبوونان ئه‌نجام بده‌ت.
ئه‌لبێرت كوندێرس، وه‌زيرێ ژ ده‌رڤه يێ هۆله‌ندا ب هه‌ڤالينيا شانده‌كى گه‌هشته هه‌رێما كوردستانێ و ژ لايێ د. فوئاد حسێن سه‌رۆكێ ديوانا سه‌رۆكاتيا هه‌رێمێ و فه‌لاح مسته‌فا به‌رپرسێ په‌يوه‌نديێن ده‌رڤه يێ حوكمه‌تێ هاته پێشوازيكرن.
دهێته چاڤه‌رێكرن د كۆمبوونان دا، د ناڤبه‌را به‌رپرسێن بلندێن هه‌رێما كوردستانێ و وه‌زيرێ ده‌رڤه يێ هۆله‌ندا هه‌ڤكاريێن نێڤده‌وله‌تى بۆ پێشمه‌رگه‌يى دژى گرۆپێ تيرۆرستى يێ چه‌كدارێن داعش و گه‌هاندنا هاريكاريێن مرۆڤى بۆ ئاوارێن سوريا و ده‌ڤه‌رێن دى يێن عيراقێ بكه‌ڤنه به‌ر دانوستاندنێ.
سه‌ره‌دانا ئه‌لبێرت كوندێرس يا هه‌ڤده‌مه ل گه‌ل سه‌ركه‌فتنا هێزێن پێشمه‌رگه‌يى ل شنگال و گرنگيدانا زێده‌ترا جڤاتا نێڤده‌وله‌تى ب هه‌رێما كوردستانێ و پشته‌ڤانيكرنا ئه‌زموونا ته‌نا و ئاراما هه‌رێما كوردستانێ.
روسیا و ئەمریکا شەرەکی نوو ل دژی ھەڤدۆ دکەن
ئەڤرۆ:
ئاژانسا دەنگێ فرەنسا د راپۆرتەکێ دا ئاماژە ب ڤێ یەکێ دکەت کو روسیا بزاڤێ دکەت پەیوەندیێن خوە ل گەل تورکیا و وەلاتێن دی یێن رۆژھەلاتا ناڤین گەلەک باش بکەت و ب ڤی رەنگی دخوازیت کو سەنگێ ئەمریکا ل رۆژھەلاتا ناڤین لاواز بکەت و ل ئالیێ دی ئەمریکا و وەلاتێن رۆژئاڤا ژی ب رێیا سزایێن ئابووری روسیا بەر ب قەیرانەکا ئابووری یا مەزن دبەن و ھەروەسا ئەمریکا بزاڤێ دکەت کو پەیوەندیێن خوە ل گەل کۆبا و ئیرانێ باش بکەت دا کو نەھێلیت ئەو ھەر دو وەلات وەک کارتەکا فشاری ژ ئالیێ روسیا ڤە بھێنە بکارئینان.
د بەردەوامیا راپۆرتێ دا ھاتیە پتر ژ پێنجی سالانە پەیوەندیێن ئەمریکا و کۆبا خراب بوون و نھا ئەمریکا بزاڤەکا مەزن دکەت کو پەیوەندیێن خوە ل گەل وی وەلاتی باش بکەت و ل ئالیێ دی سەرەرای ئالۆزیێن گەلەک مەزن ئەمریکا رژدە پەیوەندیێن خوە ل گەل ئیرانێ سروشتی بکەت و نەھێلیت ئیران د بەرەیێ روسیا دا جھێ خوە بگریت و ژ بەر ڤێ یەکێ ژی نھا روسیا و ئەمریکا وەک دو وەلاتێن ب ھێز ل جیھانێ ب ڤی رەنگی شەرێ ھەڤدۆ دکەن و دخوازن بەرەیەکێ نوو ل دژی ھەڤدع ئاڤا بکەن.
ھێزەکا بریتانی بۆ کوشتنا سەرکردێن داعش دێ گەھیتە عیراقێ
ئەڤرۆ:
بەرپرسەکێ بریتانی بۆ رۆژناما “دەیلی مەیل” راگەھاند کو ھێزەکا تایبەت یا بریتانی کو ژ ٦٠ سەربازان پێک دھێت، ب مەرەما کوشتنا سەرکردێن داعش ب تایبەتی (جۆن بریتانی) کو سەرکردەکێ داعشە ب رەگەز بریتانیە و بارمتێن ئەمریکی و بریتانی یێن سەرژێکرین دێ ھێنە عیراقێ.
ئاشکرا ژی کر کو چەکدارێن داعش یێن فێری چاونیا خوە ڤەشارتنێ ژ فرۆکان بووین و رێیا ئێکانە بۆ ژ ناڤبرنا وان نێزیکبوونا ل سەر ئەردیە و گۆت:(بڕیار بوو ڤێ ھێزێ بۆ ژناڤبرنا سەرکردێن تالیبانێ رەوانەی ئەفغانستانێ بکەین، لێ بڕیار ھاتە گوھۆڕین و دێ بۆ عیراقێ ھنێرین).
ئەڤرۆ نيوز بەھرا پارێزگەھا دھۆکێ ژ بودجا گەشەپێدانا ھەرێمان ئاشکرا دکەت
ئه‌ڤرۆ:
ئەندامەکێ لیژنا دارایی و ئابووری ل جڤاتا نوونەرێن عێراقێ ھووربینیێن بودجا تەخمینکریا سالا ٢٠١٥ێ یا عیراقێ بۆ ئەڤرۆ ئاشکرا دکەت و دبێژت “بودجا گشتی یا عیراقێ بۆ سالا ٢٠١٥ دێ گەھیتە ١٤٨ تریلیون دینارێن عیراقێ ژ وانا ژی ١٠٣ تریلیون مەزاختیێن بەکارخستنێ نە و ٤٥ تریلیۆن دینارێن عێراقێ بۆ وەبەرھێنانێ ھاتینە تەرخانکرن و کورتھێنان د بودجەیێ دا ٣٦ تریلیۆن دینار ھاتینە دانان.
حاکم سرحان سلێڤانەی ئەندامێ لیژنا دارایی و ئابووری ل جڤاتا نوونەرێن عێراقی بۆ ئەڤرۆ دیارکرکو داھاتیی پترۆلێ د بودجا سالا ٢٠١٥ێ دا ٨٩ تریلیۆن دینارێن عێراقێ نە و ١٣ تریلیۆن دینار ژی داھاتیێ گرمرک و باجێ یە بەھرا ھەرێما کوردستانێ ژ بودجەیا سالا ٢٠١٥ێ دبیتە ١٧ تریلیۆن و ٣٧٣ ملیار و ٧٩٠ ملیۆن دینارن، ل بەرە ٥٥ ھزار و ٤٠٨ فەرمانبەر ل دووڤ بودجا سالا ٢٠١٥ی ل سەرانسەری عێراقێ بھێنە دامەزراندن کو ھژمارا گشتی یا فەرمانبەران ل عێراقی دگەھیتە سێ ملیون و ٢٧ ھزار فەرمانبەران.
دەرباری بەھرا ھەرێما کوردستانێ ژ پارەیی گەشەپێدانێ حاکم سرحان سلێڤانەی گۆت پارێزگەھێن ھەرێما کوردستانێ ژ بودجا گەشەپێدانا ھەرێمانان نەھاتنیە بێی بەھرکرن ژ بودجا سالا ٢٠١٥ێ، بۆ پاریزگەھا ھەولێر کوژمێ ١٥٨ ملیار و ٥٠٠ ملیۆن دینار ھاتینەدانان بۆ گەشەپێدانی و بۆ پاریزگەھا سلێمانیێ ژێ کوژمێ ١٧٥ ملیار و٧٠٠ ملیۆن دینار یێن ھاتینە دانان بۆ پارێزگەھا دھۆکێ ژی ١٠٧ ملیار و ١٠٠ ملیۆن دینارێن عێراقی یێن ھاتینە دانان ژ بودجا گەشەپێدانا پاریزگەھان.
سرحان سلێڤانەی ئاشکرا ژی کر کو بەھرا ھەرێما کوردستانێ ژ دامەزراندنا فەرمانبەران د بودجا سالا ٢٠١٥ێ دا ٢٤١١ کەسن، کو ھژمارا ئاکنجیێن عێراقی ٣٥ ملیون و ٢٨٢ ھزار و ٤٧٣ کەسن و ل ھەرێما کوردستانێ ژی ژمارا ئاکنجیان چوار ملیۆن و ٤٤٩ ھزار و ١٢٥ کەسن کو دبیتە ١٢% و بودجا سالا ٢٠١٥ێ ل سەر بنیاتی ژمارا ئاکنجیبوویان ھاتیە دانان.
ئەندامێ لیژنا دارایی و ئابووری ل جڤاتا نوونەرێن عێراقێ ئەوژی خۆیا کرکو ٢٧ تریلیۆن دینارێن عێراقی بۆ کەرتێ کارەبێ ژ بودجا سالا ٢٠١٥ێ دا ھاتنیە تەرخانکرن کو دبیتە رێژا ١٨% ژ بودجەی و بۆ حەج وعومەرێ و ھەلبژارتنان و پێدڤیێن نوشداری ژێ ئێک تریلیۆن و ٩٣٤ ملیار دینار یێن ھاتنیە تەرخانکرن و کۆی گشتی ژ داھاتان ١١١ تریلیۆن و ٨٠٠ ملیۆن دینارن.
حاکم سرحان سلێڤانەی ئەندامێ لیژنا دارایی و ئابۆری ل جڤاتا نوونەرێن عێراقێ گۆت ژێ پتریا بۆدجا عێراقی یا سالا ٢٠١٥ بۆ ئارامیا عێراقی و بەرگریێ ھاتینە تەرخانکرن کو ٣٢ تریلیۆن دینارن و دبیتە ٢١% ژ بودجا عێراقێ، ھەکەر ھەرێما کوردستانێ زێدەتر پترۆلێ ب فروشیت ژ وێ ریکەڤتنا دناڤبەرا ھەرێمێ و بەغدایێ دا ھاتیە کرن ئەوا ل سەر رێکەڤتنی دمینت کا چ ھاتیەکرن، ئەڤ بودجیا ھاتیە دانان یا تەخمینکریە نوکە جڤاتا نوونەرێن عێراقی یا دبێھن ڤەدانێ دایە و ھێشتا دان و ستاندن ل سەر بودجێ دەست پێ نەکرینە، پەرلەمان دێ ب تێر و تەسەلی گەنگەشێ ل سەر بودجێ کەت و لیژنە دێ راپۆرتێن خوە بەرھەڤ کەن و پاشی دێ چیتە د قوناغا پەسەندکرنێ دا.
نيشاندان
WP Facebook Auto Publish Powered By : XYZScripts.com