ئه‌ڤرۆ نیوز،زنار توڤى:
دلاوه‌ر ئاژگه‌یى نوونه‌رێ حكومه‌تا هه‌رێما كوردستانێ ل په‌رله‌مانێ ئه‌وروپى ل بروكسل بو ئه‌ڤرۆ نیوز دیاركر:كو پشتى هه‌ولێن وان یێن به‌رده‌وام دگه‌ل ئێكه‌تیا ئه‌روپى بو دانانا ناڤێ حكومه‌تا هه‌رێما كوردستانێ ب شێویه‌كێ فه‌رمى د كوموبونێن په‌رله‌مانێ ئه‌وروپا دا، د ده‌مێ به‌شداریكرنا نوونه‌راتیا حكومه‌تا هه‌رێمێ،پشتى به‌حسكرنا ڤى بابه‌تى دگه‌ل سه‌روكێ په‌رله‌مانێ ئه‌وروپى و به‌شێ پروتوكولان،ره‌زامه‌ندى لسه‌ر نیشاندا و گوتژى:ئه‌م ژلایێ لیژنا په‌یوه‌ندیێن په‌رله‌مانى دگه‌ل حكومه‌تا عێراقێ هاتینه‌ هایداركرن،له‌ورا ئه‌ڤرۆ 4/12/2014 بو ئێكه‌م جار ب فه‌رمى دكومبونا په‌رله‌مانێ ئه‌وروپا دا بناڤێ حكومه‌تا هه‌رێما كوردستانێ ل پال وه‌لاتێن ئه‌وروپى پشكدار بوین،ناڤهاتى ئه‌وژى گوت:ئه‌ڤ پێنگاڤا په‌رله‌مانێ ئه‌وروپا وه‌رچه‌رخانه‌كا گرنگ و ده‌سكه‌فته‌كێ مه‌زنه‌،كو ب فه‌رمى ناساندن و بایه‌خدانه‌ ب حكومه‌تا هه‌رێما كوردستانێ.

ئه‌ڤرۆ نیۆز:
ئه‌میندارێ گشتیێ وه‌زاره‌تا پێشمه‌رگه‌ى یێ هه‌رێما كوردستانێ جه‌بار یاوه‌ر دیاركر، ئه‌و رێككه‌فتنا دناڤبه‌را حوكمه‌تا هه‌رێمێ و به‌غدا و ده‌ستنیشانكرنا كۆژمێ ملیاره‌ك و 200 ملیۆن دیناران ئه‌و دێ هنده‌ك پێدڤیێن وه‌ازره‌تا پێشمه‌رگه‌ى دابین كه‌تن د شه‌رێ دژى تیرۆرێ دا.
دداخویانیه‌كا تایبه‌ت دا بۆ مالپه‌رێ (KDP) ئه‌ڤرۆ جه‌بار یاوه‌ر گۆت: سوپاس بۆ شاندێ حوكمه‌تا هه‌رێما كوردستانێ و رۆلێ وانا بۆ چاره‌كرنا كێشێن هه‌لاویستى و ده‌ستنیشانكرنا كوژمه‌كێ تایبه‌ت بۆ وه‌زاره‌تا پێشمه‌رگه‌ى كو دێ هنده‌ك ژ پێدڤیێن ماینه‌ هه‌لاویستى یێن پێشمه‌رگه‌ى و مووچێن وانا دابین كه‌ت.
زێده‌بارى وێ جه‌بار یاوه‌ر گۆت: د پاشه‌رۆژێ دا و كومبوونێن داهاتى دا هه‌روه‌كى سه‌رۆك وه‌زیرێن هه‌رێمێ نێچیرڤان بارزانى دیاركرى ئه‌ڤه‌ رێككه‌فتنه‌كا ده‌ستپێكى یه‌ و قووناغا ئێكێ یه‌، ئه‌م چاڤه‌رێ رێككه‌فتنا به‌رفره‌ها چاره‌كرنا هه‌موو ئاریشێن هه‌لاویستى دناڤبه‌را به‌غدا و هه‌ولێرێ دا و چاره‌كرنا قه‌یرانا هێزا پێشمه‌رگه‌ى وه‌زراه‌تا پێشمه‌رگه‌ى ل كوردستانێ.

ئه‌ڤرۆ نیۆز:
به‌رپرسه‌كێ میحوه‌رێ گوێر بۆ مالپه‌رێ پارتى دیموركاتى كوردستان راگه‌هاند، تیرۆرستێن داعشێ تووشى بێ ئومێدى و بێوه‌ڕه‌یى بووینه‌ دشه‌رێ ل گه‌ل پێشمه‌رگه‌ى دا، له‌ورا ل میحوه‌رێ مه‌خمور و گۆیر، ب نه‌چارى ڤه‌ خوه‌ راده‌ستى هێزێن پێشمه‌رگه‌ى دكه‌ن، كو هه‌تا نها 17 چه‌كدراێن داعشێ خوه‌ راده‌ستى هێزێن پێشمه‌رگه‌ى كرینه‌.
زێده‌بارى وێ گۆت: هێزا پێشمه‌رگه‌ى وانه‌كا دژوار نیشا چه‌كدارێن تیرۆرستێن داعشێ ل میحوه‌رێ مه‌خمور گوێر دایه‌ كو تووشى بێهڤیبوونه‌كا مه‌زن بووینه‌ و بتنێ رێیا خوه‌رادستكرنێ دبینن.
غازى قادر عه‌بدوللا به‌رپرسێ لژنا گۆێریا پارتى دیموكراتى كوردستان دوپاتكر، هێزێن پێشمه‌رگه‌ى شیان وڕه‌یێن چه‌كدارێن داعشێ ل میحوه‌رێ مه‌خمور و گوێر ب ته‌مامى بشكێنن، كو هه‌تا نها نه‌شیانه‌ چو پێشڤه‌چوونان بكه‌ن، به‌لكى تووشى شه‌كه‌ستنێن دژوار ژى دبن.
قادر عه‌بدوللاى ئاماژه‌دا هندێ چه‌كدارێن داعشێ ل ده‌ڤه‌را سۆلتان ژ هه‌موو ئالیه‌كێ ڤه‌ هاتینه‌ دوورپێچكرن، بتنێ وان رێیه‌ك مایه‌ بزاڤێ تێدا بكه‌ن ئه‌و ژى رێیا رووبارى یه‌ به‌لێ هێزێن پێشمه‌رگه‌ى هه‌موو بزاڤێن وان چاڤدێریێ لێ دكه‌ت و هێرشێن گولله‌بارنكرنێ ل بزاڤێن وانا دكه‌ت.

ئه‌ڤرۆ نیوز،زنـار تـوڤى:
ل ئێڤاریا روژا پێنجشه‌مبى رێكه‌فتى 4/12/2014 فروكێن شه‌ركه‌ر و بێ فروكه‌ڤان یێن سوپایێ توركى سنورێن هه‌رێما كوردستانێ ل ده‌ڤه‌را به‌روارى بالا و به‌زاندن و بو ماوێ پتر ژ ده‌مژمێر و نیڤا ل هنداڤ ئاسمانێ ڤێ ده‌ڤه‌رێ و چیایێ مه‌تینا زڤرینه‌. ئه‌حمه‌د یوسف ئێكه‌ ژ ئاكنجیێن ده‌ڤه‌را به‌روارى بالا بو ئه‌ڤرۆ نیوز راگه‌هاند:كو ل روژا 4/12 و لده‌مژمێر 3 ئێڤارى فروكێن شه‌ركه‌ر و بێ فروكه‌ڤان یێن سوپایێ توركى بو ماوێ پتر ژ ده‌مژمێر و نیڤا لسه‌ر ئاسمانێ كوردستانێ ل ده‌ڤه‌را به‌روارى بالا و ل هنداڤ چیایێ مه‌تینا و رووبارێ زێى دزڤرین و ڤێ چه‌ندێ دلگرانیه‌ك لده‌ف خه‌لكێ ده‌ڤه‌رێ په‌یداكر،ژبه‌ركو ئه‌ڤه‌ ئێكه‌مین جار بوو فروكه‌ هند ماین و ده‌ور ڤه‌ داین،خه‌لكێ وه‌سا هزر دكر كو دێ هنده‌ك جهان بومبه‌ باران كه‌ن،ب به‌هانه‌یا هه‌بونا چه‌كدارێن په‌كه‌كێ و گوتژى:ئه‌ڤه‌ ماوه‌یه‌كه‌ فروكێن توركى دهێنه‌ دناڤا ئاخا هه‌رێما كوردستانێ،لێ هه‌تانوكه‌ چ جه ژلایێ وانڤه‌ نه‌هاتینه‌ بومبه‌ بارانكرن.