ئەڤرۆ نیوز، ھەیفا دۆسکی:

نەجات محەمەد ئەنداما پەرلەمانێ کورستانێ د ئاخفتنەکا خوە دا بۆ ئەڤرۆ نیوز گۆت: “رەوشا ژنێن سەرێ چیایێ شنگالێ نەخۆش کرم ژ بەر رەوشا وان نەیا باشە و ب تایبەت ئەو ژنێن ب دو گیان ھەتا ب سلامەت دکەڤن و رەوشا وان نە یا باشە ژ بەر ژینگەە و ھەوایێ چیایێ شنگالێ بۆ ساخلەمیا وان نەیا ئارامە و رەوشا وان ژنا ب گشتی گەلەکا ئالوزە”.

نەجات خانێ گۆتژی: “گەلەک تشت د بەرھەڤن ژی بۆ وان بەس ژ بەر کەش و ھەوا تێک دچیت فرۆکە نەشێت د دەمێن دەستنیشان کری بگەھینیتە وان ژنا، ژ بەر خودانکرنا زارۆیان ل سەرێ چیایی نە یا ب ساناھی یە زارۆ ژی بێزار بووینە و ئافرەت ژ پێڤە ماندوو بووینە”.

ئه‌ڤرۆ نيوز، نيوار محه‌مه‌د سه‌ليم:

عه‌لى حسێن بلانى به‌حس نوشداره‌ و به‌حس ل چيرۆكا بريندار بوونا شێخ ئه‌حمه‌د گه‌لى رۆمانى، فه‌رماندێ هێزا دژى تيرۆرێ يا پارێزگه‌ها دهۆكێ دكه‌ت ل ده‌مێ بريندار بوونا وى ل شه‌رێ دوهى يێ ل نێزيك زۆمار.

دوهى ل ده‌مێ ئازادكرنا هنده‌ك گۆندێن ده‌ڤه‌را زۆمار ب مه‌ره‌ما ئازادكرنا شنگال، د ئه‌نجامێ ته‌قينا ترۆمبێله‌كا مينرێژكرى دا، فه‌رماندێ هێزا دژى تيرۆرێ يا پارێزگه‌ها دهۆكێ عه‌قيد ئه‌حمه‌د گه‌لى رۆمانى ب گرانى بريندار بوو و نوكه‌ ل ژێر چاڤدێريا چره‌.

عه‌لى حسين بلانى چيرۆكا برينداربوونا وى ل سه‌ر تۆڕا جڤاكيا فه‌يسبۆكى به‌لاڤ كريه‌ و ئاماژێ ب وێ چه‌ندێ دكه‌ت كو كارێ ئه‌حمه‌د گه‌لى رۆمانى كرى، كاره‌كێ گه‌له‌ك پيرۆزه‌ و پێدڤيه‌ د پرتووكێن مێژووى دا بهێته‌ نڤيسين.

ئه‌و دبێژيت: “پێشمه‌رگه‌كێ نێزيك جهێ روودانێ گۆت من ديت ده‌ما ترۆمبێلا مينرێژكرى به‌ر ب پێشمه‌رگه‌يى ڤه‌ دهات، يا درعكرى بوو، هندى پێشمه‌رگه‌يى گۆله‌ تێوه‌ردكرن چو فايده‌ نه‌بوو، شێخ رابوو ترۆمبێلا خوه‌ بر كره‌ د رێ دا دا كو ببيته‌ رێگر و نه‌گه‌هيته‌ پێشمه‌رگه‌يى”.

زێده‌تر دبێژيت: “شێخ ئه‌حمه‌د ژ ترۆمبێلا خوه‌ هاته‌ خوار و ب ده‌ستى ئيشاره‌ت دانه‌ پێشمه‌رگه‌يى كو خوه‌ خلاس كه‌ن، به‌لێ ئه‌و نه‌شيا خوه‌ خلاس كه‌ت و ترۆمبێل پێڤه‌ په‌قى”.

ئاماژێ ب وێ چه‌ندێ دكه‌ت كو فه‌رماندێ هێزا دژى تيرۆرا دهۆكێ شيا ب ڤێ رێيێ ژيانا ب سه‌دان پێشمه‌رگه‌يى ژ وێ كرياريا تيرۆرى قورتال بكه‌ت و ژيانا خوه‌ بێخيته‌ د مه‌ترسيێ و دبێژيت: “دڤێت ئه‌ڤ سه‌رهاتيه‌ ل قوتابخانان بهێته‌ خواندن”.

ل دووماهيێ ژى هيڤى ژ خودێ دكه‌ت كا چاوان ئه‌وى ژيانا پێشمه‌رگه‌يى پاراست، خودێ ژى وه‌سان ژيانا وى ب پارێزيت.

ئه‌ڤرۆ نيوز، ناجی به‌ده‌ل:

ئه‌ندازیار ئدریس نه‌بی رێڤه‌به‌رێ كه‌مپان ل پارێزگه‌ها دهۆكێ بو ئه‌ڤرۆ نیوز گۆت: “مه‌ وه‌كو رێڤه‌به‌ريى ب هه‌ماهه‌نگی ل گه‌ل پارێزگه‌ها دهۆكێ و UN ده‌ست ب به‌رهه‌ڤیێن ته‌مام كرینه‌ بۆ پێشوازیكرنا ئه‌وان ئاوارێن ل سه‌رێ چیایێ شنگالێ، هه‌كه‌ هات و بۆ پارێزگه‌ها دهۆكێ هاتنه‌ ڤه‌گوهاستن ب تايبه‌ت دابينكرنا جهێ ئاكنجيبوونێ و خوارن و ڤه‌خوارنێ”.

زێده‌تر گۆت: “نها هنده‌ك هاتینه‌ به‌لێ كێمن و چاڤه‌ریێ هه‌موویان دكه‌ین كو ب رێيا فرۆكان یان هه‌ر رێيه‌كا دی بۆ بهێته‌ دیتن و بهێنه‌ ڤه‌گوهاستن بۆ ناڤ كه‌مپان، هه‌تا ره‌وش ل ده‌ڤه‌رێن وان به‌رقرار دبیت”.

ئدریس نه‌بی خۆيا كر كو كه‌مپا ماملیان ل ده‌ڤه‌را ئاكرێ كو دشێت سێ هزار ئاواران ب خوه‌ ڤه‌ بگریت هاتیه‌ ته‌رخانكرن بۆ ئه‌و ئاوارێن دێ ژ سه‌رێ چيايێ شنگال هێن.

دا زانین ژى كو هاتنا ئاوارێن ل چیایێ شنگالێ دێ جهێ ڤه‌حه‌واندنێ بۆ وان هه‌مویان ل كه‌مپا ناڤبری هێته‌كرن و ل ده‌مێ ڤه‌گوهاستنا وان بۆ وێ كه‌مپێ كوسته‌ر ژی هاتینه‌ به‌رهه‌ڤكرن و گۆت: “هه‌ر ده‌ما ده‌ست ب هاتنا وان هاته‌كرن، دێ ده‌ست ب كار بین، خوارن و ڤه‌خوارن ژی ب شیوه‌یه‌كێ به‌روه‌خت دێ بۆ هێته‌ به‌رهه‌ڤكرن”.

نوكه‌ نێزيكى 11 هزار كه‌س ل چيايێ شنگال ماينه‌ و هه‌شت هزار ژ وان ئاواره‌نه‌ و ب گۆره‌يى ئه‌و زانياريێن ئه‌ڤرۆ نيوز به‌رى نوكه‌ به‌لاڤكرين، نوكه‌ ئه‌و د ره‌وشه‌كا گه‌له‌ك خراب دا دژين ژ به‌ر كو ئه‌ڤه‌ سێ هه‌يڤه‌ چو ريێيێن سه‌ر ئه‌ردى ناچنه‌ ده‌ف وان و خزمه‌تكارى ب تنێ ب رێيا فرۆكان دگه‌هنه‌ وان.