ئه‌ڤرۆ نيوز:
ئه‌ڤرۆ سێ ياريێن گه‌را چارێ ژ خولا نايابا كوردستانێ هاتنه كرن و ژ گرنگترين ياريا ئه‌ڤرۆ زێره‌ڤانى به‌رده‌وامى دا كاروانێ خوه يێ وه‌كهه‌ڤيان و ڤێ جارێ ژى ل گه‌ل پێشمه‌رگه‌ى هه‌ولێر ل پيرمام.
ئه‌ڤرۆ رۆژا پێنجشه‌مبى سێ يارى ژ قووناغا چارێ يا خولا نايابا كوردستانێ بۆ ته‌پا پێ هاتنه كرن و د ياريا خوه دا، تيما ته‌پا پێ يا يانا زێره‌ڤانى تووشى وه‌كهه‌ڤيا سيێ بوو ل ڤى وه‌رزى ل ئه‌نجامێ چار ياريان پشتى ڤێ جارێ ژى ل گه‌ل تيما پێشمه‌رگه‌ى هه‌ولێر ل پيرمام ب گۆله‌كێ وه‌كهه‌ڤ بووى.
هه‌ر دياريێن ئه‌ڤرۆ دا، هندرين تووشى خوساره‌تيێ بوو ل سه‌ر ده‌ستێ مێڤانا خوه تيما سلێمانى و شێروانه ژى سه‌ركه‌فتن ل كه‌لار ل سه‌ر پێشمه‌رگه‌ى سلێمانى تۆماركر.
سوبه‌هى ژى ل رۆژا ئه‌ينى بڕياره سێ ياريێن دى بهێنه كرن كو ل دهۆكێ هه‌موو چاڤ دێ به‌ر ب كلاسيكۆيا پارێزگه‌هێ چن، ئه‌وا دێ تێدا دهۆك مێڤانداريا زاخۆ كه‌ت ل ياريگه‌ها خوه.
د ياريێن دى يێن رۆژا ئه‌ينى ژى دا، هه‌ولێر دێ برايه‌تى ل ياريگه‌ها دويێ يا شه‌هيد فره‌نسۆ هه‌ريرى مێڤان كه‌ت و كه‌ركووك ژى خودانا رێزا دووماهيێ دێ نه‌ورۆزا سه‌ركێشا كۆمێ مێڤان كه‌ت.
نوكه نه‌ورۆز ل سه‌ر ليستا خولا ناياب كوردستانێ دهێت ب 9 خالان ژ سێ سه‌ركه‌فتنان ل دووڤ ئێك و پاشان ئارارات ل رێزا دويێ دهێت ب دو سه‌ركه‌فتن و خوساره‌تيه‌كان و زێره‌ڤانى ژى ب سه‌ركه‌فتنه‌ك و دو وه‌كهه‌ڤيان ل رێزا سيێ دهێت، هه‌ردو نوونه‌رێن دى يێن پارێزگه‌هێ ژى دهۆك و زاخۆ ب چار خالان ل رێزێن شه‌شێ و حه‌فتێ دهێن.
نيشاندان
