ئه‌ڤرۆ نيوز، ناجی به‌ده‌ل:

زیاد عابد رێڤه‌به‌رێ چالاكیێن قوتابخانان ل پارێزگه‌ها دهۆكێ بۆ ئه‌ڤرۆ نیوز  دياركر كو ب گۆره‌ی نڤیساره‌كا فه‌رمی ژ لایێ په‌روه‌ردا گشتیا پارێزگه‌ها دهۆكێ ڤه‌ ئه‌و هاتينه‌ ئاگه‌هداكرن كو  ژ به‌ر ئه‌و‌ ره‌وشا ل سه‌ر پارێزگه‌هێ دا هاتی بڕیار هاتیه‌ داین پرانیا چالاكیان د ئه‌ڤ ساله‌ دا بهێنه‌ راوه‌ستاندن.

ریڤه‌به‌رێ چالاكیێن قوتابخانان دیاركر ژی كو مه‌ره‌م ژێ‌ مفا وه‌رگرتنه‌ ژ ده‌می ژ به‌ر كو پرۆسا خواندنێ‌ ل ده‌ڤه‌رێ‌ گیرۆ بوویه‌، راوه‌ستاندنا ئاهه‌نگێن هه‌ڤنیاسینا قوتابیان و سه‌یرانێن قوتابخانا و ئه‌و چالاكیێن د ناڤ قوتابخانان دا ل گشت په‌روه‌ردێن سنوورێ‌ پارێزگه‌ها دهۆكێ‌ هاتينه‌ راوه‌ستاندن كو ئه‌و ژی پێخه‌مه‌ت مفا وه‌رگرتنێ‌ يه‌ ژ ده‌می.

زیاد عابدی ئه‌و چه‌نده ‌ژی ئاشكه‌را كر كو پشكێن چالاكیان ل په‌روه‌ردێن قه‌زایان تنێ‌ دێ‌ پیشانگه‌ها شێوه‌كاری یا سالانه‌ یا سه‌رانسه‌ری ڤه‌كه‌ن و فیستڤالا سالانه‌ یا (9)ێ‌ یا چالاكیێن هۆنه‌ری ئه‌وا ل مه‌ها نیسانێ‌ دهێته‌ كرن یا تیپ و گرۆپێن چالاكیان.

ئه‌ڤرۆ نيوز:

مه‌سعود بارزانى سه‌رۆكێ هه‌رێما كوردستانێ يێ رژده‌ ل سه‌ر ئه‌نجامدانا ريفراندومێ و دبێژيت په‌رله‌مانێ كوردستانێ دێ ده‌مێ وێ دياركه‌ت و ئاماژێ ب وێ چه‌ندێ ژى دكه‌ت كو بۆ وى سه‌ربه‌خۆيا كوردستانێ ژ سه‌رۆكاتيا وێ گرنگتره‌.

د ديداره‌كێ دا ل گه‌ل كه‌نالێ فرانس 24 يێ فره‌نسى سه‌رۆكێ هه‌رێما كوردستانێ، مه‌سعو بارزانى، ته‌كست ل سه‌ر وێ چه‌ندێ كر كو ريفراندوم و بڕيار دان ل سه‌ر مافێ چاره‌نڤيسى مافه‌كێ گه‌لێ كورده‌ و چو پێشهات رێگريێ لێ ناكه‌ن.

ئاماژێ ب وێ چه‌ندێ ژى دكه‌ت كو ڤه‌گه‌ريان ژ بڕيارا ريفراندومێ نينه‌ و دبيت بۆ ده‌مه‌كى بهێته‌ پاشخستن، به‌لێ بۆ پاشڤه‌ ناڤه‌گه‌رين و كورد ده‌ست ژ مافێ خوه‌ به‌رناده‌ت.

سه‌رۆك بارزانى د پشكه‌كا دى يا ديدارا خوه‌ دا ئاماژێ ب وێ چه‌ندێ دكه‌ت كو په‌رله‌مانێ كوردستانێ كار ل سه‌ر دياركرنا ريفراندومێ دكه‌ت.

به‌حس ل ره‌وشا عيراقێ ژى دكه‌ت و دبێژيت: “دڤێت ئه‌و راستى بهێته‌ زانين كو كورد و عه‌ره‌ب دو نه‌ته‌وێن سه‌ره‌كى يێن ناڤا عيراقێ نه‌ و دڤێت كورد يێ هه‌ڤپشك بيت د عيراقێ دا”. د هه‌مان ده‌م دا بۆ كه‌نالێ فره‌نسى ره‌ت دكه‌ت كو به‌حس ل سه‌ر هه‌ڤبه‌ركيا د ناڤبه‌را نورى مالكى و حه‌يده‌ر عه‌بادى دا بكه‌ت.

ده‌رباره‌ى پرسيارا كه‌نالێ فرانس 24 كا ئه‌وى دڤێت ببيته‌ سه‌رۆكێ هه‌موو كوردان، سه‌رۆكێ هه‌رێمێ دبێژيت: “چو جاران من ئه‌و خه‌ون نه‌بوويه‌ كو ببمه‌ سه‌رۆكێ هه‌موو كوردان و من پێشبينيا ڤێ چه‌ندێ ژى نه‌كريه‌. گرنگترين خال ئه‌وه‌ كوردستان يا سه‌ربه‌خۆ بيت نه‌كو كى سه‌رۆكێ وێ بيت”.

ده‌قێ ديدارێ ب ڤيديۆ

ئه‌ڤرۆ نيوز:

كه‌شناسيا هه‌رێمێ راگه‌هاند كو ژ ئه‌نجامێ چوونا پاله‌په‌ستوويێن نزم يێن توركيا ل سه‌ر هه‌رێمێ و هاتنا پاله‌په‌ستوويێن نزمێن ده‌ريا ناڤه‌راست هه‌رێما كوردستانێ دێ كه‌ڤيته‌ به‌ر پێله‌كا باران بارينێ و هه‌تا رۆژا دوشه‌مبى 24\11 دێ يا به‌رده‌وام بيت.

رێڤه‌به‌ريا گشتيا كه‌شناسيا هه‌رێما كوردستانێ راگه‌هاند كو ل رۆژا ئه‌ينى 21\11\2014 هه‌رێم دێ كه‌ڤيته‌ به‌ر كارتێكرنا پاله‌په‌ستوويێن نزم يێن ده‌ريا ناڤه‌راست و پشتى ڤه‌كشانا په‌له‌په‌ستوويێن بلندێن توركيا ژ ئه‌سمانێ هه‌رێمێ دێ ل هنده‌ك ده‌ڤه‌ران بيته‌ عه‌ور و ساهى و هنده‌كان ژى ب تمامى بيته‌ ئه‌ور و باران ب شه‌ڤ دێ چپ چپ ل ده‌ڤه‌رێن چيايى باريت.

پشكا پێشبينيا ل رێڤه‌به‌ريا گشتيا كه‌شناسى و بيڤه‌له‌زرێ ئاشكه‌را ژى كر كو پشتى زێده‌بوونا كارتێكرنا په‌له‌په‌ستوويا نزم يا ده‌ريا ناڤه‌راست ل رێكه‌فتى 22\11\2014 رۆژا شه‌مبى دێ ئه‌سمان ب ته‌مامى بيته‌ ئه‌ورۆ ل گه‌ل بارينا بارانێ.

د ڤێ به‌ياننامێ دا هاتيه‌ ژى: “كارتێكرنا ڤێ پاله‌په‌ستۆيا نزم دێ يا به‌رده‌وام بيت پشتى ئێكگرتنا پاله‌په‌ستويا نزم يا ده‌ريا سۆر ل رۆژا ئێكشه‌مبى پێشبينى دهێته‌ كرن بارانه‌كا بۆش ل ده‌ڤه‌رێن جودا يێن هه‌رێم بباريت، ل ده‌مێ بارينا بارينێ دێ له‌زاتيا بايى زێده‌ بيت و هنده‌ك جاران دێ بريسى ژى ل گه‌ل بن و پلا گه‌رماتيێ ژى دێ هێته‌ خوار”.

ئاشكه‌را ژى كريه‌ كو كارتێكرنا ڤان شه‌پۆلان هه‌تا رۆژا دوشه‌مبى 24\11\2014 يا به‌رده‌وام بيت ل گه‌ل هاتنا پاله‌په‌ستوويێن بلند يێن وه‌لاتێ توركيا دێ يا به‌رده‌وام بيت.

دايه‌ زانين ژى كو پێشبينى دهێته‌ كرن رێژا باران بارينێ ل دهۆك و سلێمانيێ 15 هه‌تا 25 پله‌ بيت و ل هه‌ولێر 10 هه‌تا 20 پلان بيت.