رێکخراوا ساخلەمیا جیھانی دیاردکەت ھەر دەمژمێرەکا روونشتنێ ل بەر نارگیلێ ل بەرامبەر کێشانا ١٠٠ -٢٠٠ جگارەیانە و قەوارێ دووکێلا دھێتە ھلکێشان بۆ ھەر جگارەکێ دبیتە ٠.٥ لتر، بەلێ دووکێلا کێشانا ھەر نارگیلەکێ دبیتە ئێک لتر و پێکھاتێن (معسل)ێ کو دناڤ نارگیلێ دا دھێتە ب کارئینان ھەر وەکو پێکھاتێن جگارەیانە, دیسا نارگیلە دبیتە رێژا تووشبۆنێ ب پەنجەشێرا سەھان، دەڤی، نەخۆشیێن دلی و ھەموو نەخۆشیێن دومدرێژ ھەر وەکو جگارەیان زێدەدکەت.

شووشەیێن نارگیلێ نەخۆشیێن دومدرێژ ڤەدگوھێزن

ئەو کەسێن دناڤ سەقایەکی دا دژین و یێ پر بیت ژ دووکێلا نارگیلێ ھەر وەکو ویژی ئەو دووکێل ھلکێشای و دێ کارتێکرنێن نەرێنی لێ بن، ل گەل ڤێ چەندێ شیشەیێن نارگیلێ و کەرستێن ب کارئینانا وێ ناھێنە گوھارتن و گەلەک کەس پێکڤە پشکداریێ دکێشانا واندا دکەن و ئەڤ چەندەژی دبیتە ئەگەر کو نەخۆشیێن دومدرێژ دناڤ واندا بھێنە ڤەگوھاستن و کا چاوان بۆ مرۆڤی ئیدمان ژ جگارەیان پەیدادبیت وەسان ئیدمان ژ ھیبوونا نارگیلێ ژی ھەیە، ژبەرکو نیکوتین ھەر وەکو جگارێ دناڤدا ھەیە. دەربارەی زیانێن وێ ل سەر ژنان دوگیانژی دبیتە ئەگەر کو زارۆیەکێ کێم سەنگ ببیت و دەلیڤە ڤەدبیت کو ژن تووشی نەخۆشیێن دەروونی ببیت.

گرنگترین زیانێن نارگیلێ

کێشانا نارگیلێ دبیتە ئەگەر دەڤ و لیڤێن مرۆڤی تێک بچن و ل دووماھیێ ژی زێدە کێشانا وێ دەلیڤا تووشبۆنێ ب بێھێزیا سێکی زێدەدکەت و ب تایبەت ژی ل دەڤ گەنجان.لەورا باشترە ھەر ژ نوکە پلانەک بھێتە دانان و گەنج خوە ژ کێشانا نارگیلێ دووربکەن.

ئەڤرۆ:

دەمێ ئێک ژ مە ھەست ب ئێشانا گەوریێ و بەلاعیمان دکەت، ئێشان ناچیتە دخانەیا نەخۆشیان دا، بەلکو نیشانەکە بۆ ھەبوونا نەخوشیەکێ ژوانژی ھەودانا بەلاعیما و ھندەک نەخۆشیێن دیتر، ئەرێ ئەو چ نەخوشینە کو گەوریا مرۆڤی لێ دکەنە ئێش؟

ئێشانا بەلاعیمان ژ بەربەلافترین نیشانێن نەخۆشیانە و ب تایبەت د وەرزێ زڤستانێ دا، بەلێ ئەو د رادەیێ خوە دا نەخوشی نینە بەلکو نیشانەکە بۆ بۆ نەخوشیەکێ و رەنگە وێ نەخۆشیێ پەیوەندی ب گەوریێ یان بەلاعیمان ڤە ھەبیت و رەنگە ژی ل جھەکێ دیتر بیت، لەورا پێدڤیە مە ئاگەە ژێ ھەبیت و نیشانێن دی یێن ل گەلدا پەیدادبن دەستنیشان بکەین داکو بشێین نەخۆشیێ بزانین، د پتریا دەمان دا نەخۆشیا ھەودانا بەلاعیمان دەرباز دبیت بێی چ بەرژەنگ و سەربارکان ل دووڤ خوە بھێلیت و پێدڤی ب ئالوزیێ ژی ناکەت، بەلێ ھندەک جاران نیشانەکا ب مەترسی یە و ب تایبەت ھەکە پتری رۆژەکێ ڤەکێشا، ل وی دەمی پێدڤی ب وەرگرتنا شیرەتێن نوشداری دبین.

• ئەو نەخۆشیێن ژ ئێشانا گەوریێ پەیدادبن

ئەو نەخوشیێن کو دبنە ئەگەرێ ئێشانا بەلاعیما و گەوریێ و سوریلانچکێ گەلەکن، مەترسیا وان یا جودایە، ھندەک ژێ دخوازن ئێکسەر مرۆڤ پەیوەندیێ ب نوشدارێ خوە بکەت بۆ نوموونە ( ھەودانا باھیڤکان و نەخۆشیا ئێک ھێڤێنی و ھەودانا بەلاعیمان یا پەیوەندیدار ب دفنێ ڤە و رەنگە ژی نیشانا ھەبوونا وەرەمەکێ بیت چ یا باش یان پەنجەشێر بیت، ژ ئەگەرێن دی یێن ئێشانا بەلاعیمان توشبوون ب ھەستداریێ یە، ب تایبەت ل دەمێ دەرکەتنا گول و کلیلک و گیایان ب تایبەت ل وەرزێ بوھارێ، ل گەل ڤێ چەندێ ژی جگارەکێشان و ڤەخوارنا کحولی ژی دبنە ئەگەرێ ئێشانا بەلاعیمان و گەوریێ، ل وی دەمی پێدڤی ب وەرگرتنا شیرەتێن نوشدارەکێ تایبەتمەند نابی، بەلکو یا پێدڤیە خوە ب ئێکجاری ژ جگارەکێشانێ و مەی ڤەخوارنێ دوور بکەی، ھەروەسان پێدڤیە ئەم ئەگەرێن میکانیکی یێن ئێشانا بەلاعیمان ژی بزانین، بۆ نموونە ئێشانا وان ب گەلەک ئاخفتنێ و قەرەبالغێ یان ھەتا داعوورانا شلەمەنیەکی ئەو ھەموو کارتێکرنێن میکانیکی دکەنە ل سەر گەوریێ و مرۆڤ ھەست ب ئێشانا گەوریێ و بەلاعیما و باھیفکان دکەت.

• ھەودانا باھیفکان

ئەگەرێ ھەودانا باھیفکان یان بەکتری یان ڤایرۆسی یە و ژ بەرچاڤترین نیشانێن ڤی جورێ ھەودانێ ئێشانەکا د١وار دکەڤیتە بەلاعیمان و ب شێوەیەکێ دیار و بەرچاڤە و ھەر دەمێ توشبووی تشتەک خوار یان ڤەخوار دێ گەوریا وی ئێشیت و ژ نیشانێن دیتر یێن ڤێ نەخوشیێ پێکھاتینە ژ ( تا و کێمبوونا پلا گەرماتیا لەشی، ھاتنە خوارا دفنێ وەکو پەرسیڤ ل نەخوشی بیت، دامابوونەکا گشتی و بێھێزبوونا لەشی و نەشیانا لڤین و کارکرنێ، ھندەک جاران کوخک پەیدادبیت، سۆربوونا گەوریێ و مەزنبوونا وێ، دبیت ھندەک پرسکێن سپی ل گەوریێ دیارببن) بەلێ رەنگە ئەڤ ھەموو نیشانە پێکڤە دیارنەبن ژبەرکو ئەگەرێ ھەودانێ رۆلەکێ گرنگ دبینیت کا ڤایروسی یان بەکتری یە.

• شیرەتکاری یا پێدڤیە

ھەودانا باھیفکان نەخوشیەکە پێدڤی ب شیرەتکاریا نوشدارەکێ تایبەتمەند ھەیە داکو نوشدار بزانیت ئەگەرێ نەخوشیێ بەکتری یان ڤایروسی یە و چارەسەریا پێدڤی بدەتێ، ھەکە ژ ئەگەرێ ڤایروسی بیت کو پتریا جاران کوخک ل گەل نیشانێن بەری نوکە دگەلدانە، ھەلبەت وی پێدڤی ب چارەسەریێ نابیت ژبلی ھندەک دەرمانێن ئێشکێمکرنێ و ھندەک دەرمانێن دژی ھەودانێ و چپکێن دفنێ بۆ کێمکرنا ئێشانێ، بەلێ نابیت دەرمانێن ئەنت بایوتیک بھێنە ب کارئینان، ھەکە ژ ئەگەرێ بەکتری بیت دێ ئێشان کەڤیتە بەلاعیمان و تا دھێتە نەخوشی و پرسکێن سپی ل گەوریێ پەیدادبن ل وی دەمی نەخوش دێ پێدڤی ب کارئینانا دەرمانێن ئەنتی بایەتیک بیت، ھەکە چارەسەریا بەکتری ھاتە پشتگوە ھاڤێتن رەنگە سەربارکێن ب مەترسی ژێ پەیداببن ب تایبەت ھەکە بەکتریایێن بیتا بن کو وان شیان ھەنە دناڤ خوینێ دا شرۆڤەببن و ببنە ئەگەرێ نەخوشیێن ب مەترسی وەکو لیرێن پیستی و تایا قورمزی و توشبوونا دلی ب روماتیزمێ و ھندەک تەنگەزاریێن دەماران و ھندەک جاران ژ کارکەتنا گولچیسکان، ھەروەسا دبیت عیداف بکەڤیتە گەوریێ، بەلێ ژ ئەنجامێ پێشڤەچوونا ساخلەمیێ دڤان سالێن دووماھیێ دا ئەڤ جورێ سەربارکان کێمبووینە.

• پشکنینا زوو

ژ دیاروکێن پێشکەفتنا تەکنیکێن دەستنیشانکرن و دیارکرنێ، نوشدارێن ئەڤرۆ دشێن پشکنینەکا ھوور بۆ نەخوشی بکەن و ئەنجامێن وێ ب لەز دیاردبن، پشکنین نە ب تنێ بەکتریایان دیاردکەت، بەلکو دژواریا نەخوشیێ ل گەل گرۆپ و جورێ وێ دیاردکەت و ئەڤەژی دەلیڤێ بۆ نوشداری ڤەدکەت کو دەرمانەکێ دروست بدەتە نەخوشی و رۆژێن پێدڤی بۆ خوارنا دەرمانی دەستنیشان بکەت، ھەکە ئەنجامێ پشکنینێ نێگەتیف بوو نوشدار ب تنێ دەرمانێ، ئێشکێمکرنێ و کێمکرنا تایێ دێ دەتە نەخوشی.