ب، ڤەگێر:

پارتیا ئازادیا کوردستانێ “PAK”کو ل 18ی ھەیڤا 10 یا ئەڤ سالە ل باکورێ کوردستانێ “ئامەد)ێ دامەزراندنا خوە راگەھاند ئەو چەند رۆژن بەرپرسێن وێ پارتیێ سەرەدانا وەزارەتا ناڤخوە یا تورکیا دکەن ژ بۆ کو پارتیا وان ب فەرمی بھێتە قەبوولکرن، لێ ھەتا نوکە چو بەرسڤ نینن.

ئەندامێن دەستەیا رێڤەبەریا پارتیا ئازادی ب سەرۆکاتیا سەرۆکێ گشتی مستەفا ئوزچەلیک، ئەڤە ژ رۆژا دوشەمبێ وەرە ل پایتەختێ تورکیا ل ئەنقەرە نە و ل ھیڤیا قەبوولکرنا فەرمی نە ژ بۆ پارتیا خوە کو دوکیومێتا فەرمی یا قەبوولکرنێ بدەنە وەزارەتێ، لێ ھێشتا دەلیڤە ب وان نەھاتیە دان.

د ھەڤپەیڤینەکێ دا کو رۆژنامەڤان سالح توران ل گەل ئەنجامدایە، سەرۆکێ پارتیا ئازادی ل دۆر ئاستەنگێن وەزارەتا ناڤخوە یا تورکیا بۆ وان دروستکرین بۆ بەشێ کوردی یێ دەنگێ ئەمریکا گۆت: “د سەر ھندێ را کو مە ھەموو بەلگەنامەیێن پێدڤی رادەستی وان کرینە، لێ قانوونێن تورکیا دھێنە بن پێکرن”.

د پشکەکا دی یا ئاخڤتنێن خوە دا سەرۆکێ پارتیێ دبێژیت: “بەرپرسێن وەزارەتا ناڤخوە چو رێ نینن کو بەرسڤا مە نەدەن و وەزارەت نەچارە ئەڤرۆ نەبیت سوباھی داخوازناما مە قەبوول بکەت”.

 ل دووڤ گۆتنێن سەرۆکێ پارتیێ درووشمێ پارتیا وان ئازادی یە و ئەو دبێژن: “ئازادی بۆ کوردستانێ و ل سەر بنگەھێ ھەڤپشکیێ پارتیا ئازادیا کوردستانێ داخوازا ستاتویەکێ ژ بۆ کوردستانێ د ناڤ تورکیا دا دکەت”.

سەرۆکێ پارتیا ئازادی داخۆیانیێن جێگرێ سەرۆکێ پارتیا داد و گەشەپێدانێ محەمەد عەلی شاھین رەخنە کرن کو گۆتبوو: “نەیا دروستە کو پارتیەک د ناڤ تورکیا دا داخوازا پێکھاتەکا جودا بکەت بھێتە ئاڤاکرن”.

سەرۆکێ پارتیا ئازادی گۆت: “بەرێز شاھین خوە د دانیتە جھێ دادگەھێ کو ب ڤان داخۆیانیان کاریگەریێ ل سەر بادەکا دادگەھێ دروست بکەت، ئەڤە خەلەتیەکا گەلەک مەزنە. پارتیا ئازادی دشێت ل گور قانوونێن نێڤدەولەتی یێن کو تورکیا ژی ئیمزا ل سەر کرین خەباتێن خوە یێن سیاسی ئەنجام بدەت کو ئەڤە ژی پشکەک ژ دیموکراسیێ و ئازادیا رادەربرینێ یە”.

د پشکەکا دی یا ئاخڤتنێن خوە دا مستەفا ئوزچەلیک گۆت: “ژ بەر کو مە بەلگەیێن خوە رادەستی بەرپرسان کرینە، پارتیا مە نوکە یا ئاڤا بووی و ئەم دێ وەکو پارتیەکا سیاسی ل گور قانوونێ کارێ خوە کەین و کارێ مە دێ دوور ژ توندوتیژیێ بن و دێ ب رێکێن دیموکراسی کارێن خوە ئەنجام دەین”.