ئه‌ڤرۆ نيوز، نيوار محه‌مه‌د سه‌ليم:
سه‌رۆكێ حوكمه‌تا هه‌رێما كوردستانێ فۆرما ئاشكه‌راكرنا به‌رژه‌وه‌نديێن دارايى يا گرێدايى ده‌سته‌يا ده‌سپاكيا هه‌رێمێ ڤه‌گه‌راند.
ده‌سته‌يا گشتى يا ده‌سپاكيا هه‌رێمێ راگه‌هاند كو ئه‌ڤرۆ 11\11\2014 نێچيرڤان بارزانى سه‌رۆكێ حوكمه‌تا هه‌رێما كوردستانێ فۆرما ئاشكه‌راكرنا به‌رژه‌وه‌نديێن دارايى بۆ ده‌سته‌يا گشتيا ده‌سپاكيا هه‌رێما كوردستانێ ڤه‌گه‌راند.
ب ڤێ چه‌ندێ ژى نوكه هه‌رسێ سه‌رۆكاتيێن هه‌رێمێ سامانێ خوه بۆ ده‌سته‌يا گشتيا ده‌سپاكيا هه‌رێمێ ره‌وانه‌كرينه.
ئه‌ڤرۆ نيوز، بارزان مزوورى:
ئه‌ڤرۆ 11\11 ل ده‌مێ ژ ناڤبرنا TNT يان دا ل سنورێ ميحوه‌رێ زۆمار، رائيد فاخر به‌روارى ل گه‌ل سێ پێشمه‌رگێن دى شه‌هيد بوون.
عه‌قيد شێرزاد نائيف ژ راگه‌هاند فه‌رماندا دهۆك يا پێشمه‌رگێ كوردستانێ بۆ ئه‌ڤرۆ نيوز گۆت: “ئه‌ڤرۆ ل ده‌مێ راكرنا TNT دا د ناڤبه‌را تلمۆس و گربه‌گۆزێ دا كو كيلۆمه‌تره‌كێ ژ زۆمار يێ دووره، رائيد فاخر به‌روارى ل گه‌ل سێ پێشمه‌رگان شه‌هيد بوون.
رائيد فاخر به‌روارى به‌رى نوكه ژى پيه‌كێ خوه ژ ده‌ست دابوو هه‌ر ژ ئه‌گه‌رێ راكرنا TNT يان.
رائيد فاخر ژ دايكبوويێ 1980 يه و ل ده‌ف خه‌لكێ دهۆكێ و ب تايبه‌ت ل سه‌ر تۆڕا جڤاكى يا فه‌يسبۆكى گه‌له‌ك حه‌زژێكه‌رێن خوه هه‌بوون و چه‌ندين ديمه‌نێن وى يێن ڤيديۆيى يێن راكرنا TNT ل په‌يچان هاتبوونه به‌لاڤكرن.
پشتى پرۆسا رزگاركرنا زۆمار ئه‌ڤه سێ تيمێن ئه‌ندازه‌يا راكرنا TNT يان ل وێ ده‌ڤه‌رێ شه‌هيد بوون كو هه‌ر جار سێ هه‌تا چار كه‌سان ل گه‌ل بووينه.
ب ڤيديۆ ل ده‌مێ راكرنا TNT يان به‌رى بهێته شه‌هيد كرن:
چه‌ند وێنێن شه‌هيد رائيد فاخر به‌روارى:
ئه‌ڤرۆ نيوز:
مه‌سعود بارزانى، سه‌رۆكێ هه‌رێما كوردستانێ ل گه‌ل فه‌رماندێن له‌شكرى يێن ميحوه‌رێ گه‌رمه‌سێرى يێ هێزێن پێشمه‌رگه‌ى كۆمبوو.
ئه‌ڤرۆ 11\11 مه‌سعود بارزانى، سه‌رۆكێ هه‌رێما كوردستانێ و فه‌رماندێ هێزێن چه‌كدار ل هه‌رێما كوردستانێ، سه‌ره‌دانا ميحوه‌رێ گه‌رمه‌سێرى كر و ل گه‌ل هێزێن پێشمه‌رگه‌ى يێن وێ ده‌ڤه‌رێ كۆمبوو.
د ڤێ سه‌ره‌دانێ دا يا كو مسته‌فا سه‌يد قادر ژى وه‌زيرێ پێشمه‌رگه‌ى ژى ب هه‌ڤرا چووى، سه‌رۆك بارزانى ته‌كست ل سه‌ر وێ چه‌ندێ كر كو پێدڤيه جه‌له‌ولا و سه‌عيده بهێنه كونترۆلكرن.
ب گۆره‌ى تله‌ڤزيۆنا رووداو، سه‌رۆك بارزانى گۆتيه ژى كو ئه‌و ميحوه‌رێ پێدڤى ب چه‌كێ گران بيت، دڤێت ب زووترين ده‌م بۆ بهێته دابينكرن.
حه‌فتيا بۆرى ژى سه‌رۆك بارزانى سه‌ره‌دانا ميحوه‌رێ مه‌خمۆر كربوو و ئاماژه ب وێ چه‌ندێ كربوو كو داعش رووى ل شكه‌ستنێ يه.
ئه‌ڤرۆ نيوز:
ئه‌ڤرۆ بڕياره، سه‌رۆك كۆمارێ عيراقێ فوئاد مه‌عسوم ژ بوو خۆشكرنا په‌يوه‌نديان سه‌ره‌دانا وه‌لاتێ سعوديێ بكه‌ت كو دبيته سه‌ره‌دانا ئێكێ يا به‌رپرسه‌كێ پله بلندێ عيراقێ بۆ ڤى وه‌لاتى ل ماوێ بۆرى.
ژ ئه‌گه‌رێ ده‌سته‌لاتداريا نورى مالكى سه‌رۆك وه‌زيرێ به‌رى يێ عيراقى په‌يوه‌نديێن وه‌لاتێن عيراق و سعودى گه‌له‌ك نه‌خۆش ببوون، دبيت ئه‌ڤ سه‌ره‌دانا ب مه‌ره‌ما خۆشكرنا ڤان ره‌نگه په‌يونديان بيت.
هه‌ر وه‌كو به‌رپرسێن سعودى پێشتر دايه زانين كو مالكى فتنه و شه‌رێ تايفى ل عيراقێ دروست دكر و مه‌ره‌ما وى تێكچوونا په‌يوه‌نديێن عيراقێ بوو ل گه‌ل وه‌لاتێ سعودى.
د ڤێ گه‌را حوكمرانيێ دا دهێته پێشبينيكرن گوهۆڕين ل سه‌ر په‌يوه‌نديێن عيراقێ ل گه‌ل وه‌لاتێن هه‌ڤسۆ دا بهێنه كرن ب تايبه‌ت كو عه‌بادى و مالكى سه‌رۆك وه‌زيرێ نوكه و يێ به‌رى د سه‌ره‌دانێن جودا دا، سه‌ره‌دانا ئيرانێ كربوو و ئيراهيم جه‌عفه‌رى وه‌زيرێ ژ ده‌رڤه يێ عيراقێ سه‌ره‌دنا توركيا كربوو و محه‌مه‌د سالم غوبان وه‌زيرێ ناڤخۆ ژى سه‌ره‌دانا قه‌ته‌ر كربوو.
ئه‌ڤرۆ نيوز، ناجی به‌ده‌ل:
رێڤه‌به‌ریا ناڤه‌ندا وه‌رگرتنێ ل وه‌زاره‌تا خواندنا بلند و ڤه‌كولینێن زانستى دیاركر بوو كو وه‌كو كارئاسانى بۆ قوتابيێن پۆ پۆلا 12 ئاماده‌يى، بنگه‌هێن شيره‌تكارى بهێنه ڤه‌كرن و بۆ ڤێ مه‌ره‌مێ ژى 13 بنگه‌هـ هاتينه ڤه‌كرن.
هاريكارێ سه‌رۆكێ زانكۆيێ بۆ كاروبارێن ئيدارى بۆ ئه‌ڤرۆ نيوز گۆت: “ل سه‌رانسه‌رى پارێزگه‌ها دهۆكێ سێ مه‌لبه‌ندێن راوێژكارى هاتينه دانان ل زانكۆيێن دهۆك و پۆليته‌كنيك و زاخۆ”.
د. لوقمان ئاشكه‌را كر كو دانانا بنگه‌هێن شيره‌تكارى بۆ هاريكاريكرنا قوتابيانه ل ده‌مێ روودانا هه‌ر كێشه‌كا گرێدايى چاوانيا داگرتنا فۆرمێن زانكۆ لاين و گۆت: “قوتابى ب خوه دێ كارێن خوه كه‌ت، ئه‌ڤا ل ڤان بنگه‌هان ب تنێ شيره‌تن دێ بۆ هێنه گۆتن، ل ده‌مێ روو ب رووى بوونا هه‌ر كێشه‌كێ”.
گۆتژى: “ئه‌ڤه رێيه‌كا ب ساناهى يه و بۆ وه‌زاره‌تێ ژى بارسكڤيه و ئه‌ڤ ساله و هه‌ر ژ ده‌مژمێر 9 هه‌تا سێى ئێڤارى ده‌رگه‌هێ ئه‌ڤان مه‌لبه‌ندان بۆ قوتابيان د ڤه‌كرى نه”.
ب گۆره‌ى گۆتنێن هاريكارێ سه‌رۆكێ زانكۆيا دهۆك بۆ كاروبارێن كارگێرى ئه‌ڤ ساله ژ سالا بۆرى كێمتر بنگه‌هێن شيره‌تكارى هاتينه ڤه‌كرن.
ئه‌ڤرۆ نيوز:
به‌رپرسێ ژوورا كرياران ل پارێزگه‌ها سه‌لاحه‌دين، عه‌بدولوه‌هاب ساعدى، ئه‌ڤرۆ رۆژا سێشمه‌مبى راگه‌هاند كو قه‌زا بێجى ب ته‌مامى ژ چه‌كدارێن داعش هاتيه پاقژكرن و ئالايێ عيراقێ ل سه‌ر باره‌گايێ قاميقاميێ دانايه.
ساعدى بۆ كه‌نالێ عيراقيه يێ فه‌رمى يێ حوكمه‌تا عيراقێ راگه‌هاند كو هێزێن ئه‌منى يێن عيراقى ئالايێ عيراقێ يێ ل سه‌ر ئاڤاهيێ قايمقاميێ بلندكرى.
ژ لايێ خوه ڤه وه‌زاره‌تا به‌ره‌ڤانيا عيراقێ راگه‌هاند كو هێزێن ئه‌منى ل پارێزگه‌ها سه‌لاحه‌دين قه‌زا بێجى يا ئازاد كرى ب ئاڤاهيێ قايمقاميێ و رێڤه‌به‌ريا پۆليسان و مزگه‌فت ڤه.
ژوورا كرياران ل پارێزگه‌ها سه‌لاحه‌دين دا زانين نوكه بێچى كۆنترۆل بوويه و ب تنێ پالاوگه‌هێن وێ ماينه و ئه‌ڤرۆ سپێدێ فرۆكێن بێ فرۆكه‌ڤانێن بريتانى ژى ئه‌و ده‌ڤه‌ر بۆردۆمان كرينه.
ئه‌ڤرۆ نيوز:
پشتى ل هه‌يڤا بۆرى سه‌رۆك وه‌زيرێ عيراقێ سه‌ره‌دانا عه‌لى سيستانى مه‌زنه مه‌رجه‌عێ شيعان ل عيراقێ كرى به‌رى بچيته وه‌لاتێ ئيرانێ، ئه‌ڤرۆ سپێدێ سه‌رۆك كۆمارێ عيراقێ فواد مه‌عسوم ژى گه‌هشته نه‌جه‌ف و ل گه‌ل عه‌لى سيستانى كۆمبوو.
بڕياره هه‌ر ئه‌ڤرۆ، سه‌رۆك كۆمارێ عيراقێ سه‌ره‌دانا وه‌لاتێ سعوديێ ژى بكه‌ت كو دبيته سه‌ره‌دانا ئێكێ يا به‌رپرسه‌كێ پله بلندێ عيراقێ بۆ ڤى وه‌لاتى ل ماوێ بۆرى.
ئه‌ڤه ماوه‌كێ درێژه، عه‌لى سيستانى ره‌تكربوو كو ئه‌و مايێ خوه د كاروبارێن سياسى يێن ده‌وله‌تێ دا بكه‌ت و رێ نه‌ددا چو كه‌سێن سياسى ل سه‌ر ئاستێ عيراقێ سه‌ره‌دانا مالا وى بكه‌ن، به‌لێ پشتى ل هه‌يڤا بۆرى، سه‌رۆك وه‌زيرێن عيراقێ، حه‌يده‌ر عه‌بادى سه‌ره‌دانا مالا وى كرى به‌رى بچيته وه‌لاتێ ئيرانێ ئه‌ڤرۆ سه‌رۆك كۆمارێ عيراقێ ژى فواد مه‌عسوم به‌رى بچيته سعوديێ سه‌ره‌دانا مالا وى كر.
د داخۆيانيه‌كێ ژى دا بۆ ده‌زگه‌هێن راگه‌هاندنێ سه‌رۆك كۆمارێ عيراقێ راگه‌هاند كو عه‌لى سيستانى مه‌زنه مه‌رجه‌عێ شيعان ل عيراقێ ب ئێك چاڤ ته‌ماشه‌ى هه‌موو پێكهاتێن عيراقێ دكه‌ت و چو جوداهيێ نائێخيته د ناڤبه‌را وان دا.
ئه‌ڤرۆ نيوز:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێمێ راگه‌هاند كو راگه‌هاند كو سوبه‌هى دێ ئه‌سمانێ هه‌رێمێ ساهى بيت و پلا گه‌رميێ دێ وه‌كو يا رۆژا به‌رێ بيت كو بلندترين پله 20 بيت و كێمرين ژى دێ 10 بيت.
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێمێ دياركر كو سوبه‌هى رۆژا سێشه‌مبى رێكه‌فتى 12\11\2014 دێ ئه‌سمان ساهى بيت و پلا گه‌رميێ ژى دێ وه‌كو ئه‌ڤرۆ بيت و چ گوهۆڕينێن به‌رچاڤ نابن.
ئاشكه‌را ژى كريه كو ئاراسته‌يێ بايى دێ ل باكوورێ رۆژئاڤا بيت ب ره‌نگه‌كى د ناڤبه‌را پێنج هه‌تا 10 كيلۆمه‌تران د ده‌مژمێره‌كێ دا.
ل دۆر ديتنێ ژى دايه زانين دێ ئاراستێ ديتنێ هه‌شت هه‌تا 10 مه‌تر بيت و بلندترين رێژا پێشبينيكرى دێ 20 پله بيت و نزمترين ژى 10 پله بيت.
نيشاندان