ئه‌ڤرۆ نيوز، نيوار محه‌مه‌د سه‌ليم:

رێڤه‌به‌رێ گشتيێ په‌روه‌ردا پارێزگه‌ها دهۆكێ راگه‌هاند كو نوكه‌ فورمه‌ و رێنمايێن دامه‌زراندنا مامۆستايان ب ره‌نگێ گرێبه‌ست گه‌هشتينه‌ پارێزگه‌ها دهۆكێ و دێ ڤان رۆژان كار ل سه‌ر كه‌ن.

عه‌بد يوسف، رێڤه‌به‌رێ گشتيێ په‌روه‌ردا پارێزگه‌ها دهۆكێ، بۆ ئه‌ڤرۆ نيوز گۆت: “فۆرمێن دامه‌زراندنا مامۆستايان ب ره‌نگێ گرێبه‌ست گه‌هشتينه‌ ده‌ستێ مه‌ ل گه‌ل رێنمايان ژى”.

رێڤه‌به‌رێ گشتيێ په‌روه‌ردا پارێزگه‌ها دهۆكێ دا زانين ژى كو ئه‌و دێ د ڤان دو رۆژان دا كار ل سه‌ر كه‌ن و رۆژا ئێكشه‌مبى به‌لاڤ كه‌ن و وه‌لاتى دشێن پڕ بكه‌ن ب مه‌ره‌ما دامه‌زراندنێ وه‌كو گرێبه‌ست.

پێشتر ئاخفتنكه‌رێ ب ناڤێ وه‌زاره‌تا په‌روه‌ردێ ل حوكمه‌تا هه‌رێما كوردستانێ بۆ ئه‌ڤرۆ نيوز راگه‌هاند بوو كو ئه‌ڤ فورمه‌ دێ د ماوێ 10 رۆژان دا هێنه‌ داگرتن و ئه‌وان پێدڤى ب چار هزار مامۆستايان ل هه‌رێمێ هه‌يه‌.

فاتح مه‌وله‌وى زاده‌ ئاشكه‌را ژى كربوو كو ئه‌ڤ فورمه‌ بۆ خه‌لكێ ناڤ پارێزگه‌ها دهۆك نينن، ب تنێ خه‌لكێ قه‌زا و ناحيه‌ و گۆند و كۆمه‌لگه‌هان دێ يێ مفادار بيت مه‌ره‌ما وێ چه‌ندێ كو ئه‌و مامۆستايێن ل وان ده‌ڤه‌ران چار سالان خزمه‌ت هه‌ين بۆ ناڤ باژێرى بهێنه‌ ڤه‌گوهاستن.

ئه‌ڤرۆ نيوز:

فه‌رمانده‌كێ فه‌رمانده‌يا سپيلكى راگه‌هاند كو شه‌ر ل ميحوه‌رێ ره‌بيعه‌ يێ د ناڤبه‌را پێشمه‌رگێ كوردستانێ و چه‌كدارێن داعش دا يێ به‌رده‌وامه‌ و ناڤبه‌را پێشمه‌رگه‌ى و داعش نێزيكى 100 مه‌ترانن.

موقه‌دم نه‌عمان گه‌لناسى ئێك ژ فه‌رماندێن فه‌رماندا سپيلكى بۆ رووداو گۆت: “هه‌تا نوكه‌ هه‌شت ترۆمبێل كو دو ژ وان هه‌مه‌رن، كه‌فتينه‌ ده‌ست هێزێن پێشمه‌رگه‌ى، چه‌ند كه‌س ژى يێن كوشتين و ل جهێ خوه‌ هێلاين، به‌لێ ژ به‌ر كو هنده‌ك ل بن ديواران ماينه‌ نه‌شێين ئامارێن دروست بده‌ين”.

نه‌عمان گۆتژى: “چه‌ندين چه‌كێ گران و سڤك يێ داعش يێ ب جهـ ماين و پێزێن پێشمه‌رگه‌ى د پێشره‌ويێ دا د به‌ردوامن و نوكه‌ كێمتر ژ 100 مه‌تران د ناڤبه‌را وان و داعش دانه‌”.