ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا پۆليسێن پارێزگه‌ها دهۆكێ راگه‌هاند كو شڤێدى كچه‌كا 18 سالى يا ئاواره ل دهۆكێ ب گۆله‌يان هاتيه كوشتن.
به‌رپرسێ راگه‌هاندنا رێڤه‌به‌ريا پۆليسێن پارێزگه‌ها دهۆك بۆ ئه‌ڤرۆ نيوز گۆت: “شڤێدى ده‌مژمێر 10ى شه‌ڤ ئه‌م هاتينه ئاگه‌هداركرن كو كچه‌كا 18 سالى ل نێزێك شوقێن زوزان ستى خوه كوشتيه و پشتى لاشێ وێ هاتيه ڤه‌گوهاستن بۆ نوشداريا داد ديار بوو كو ب گۆله‌يا ده‌بانجێ بوويه”.
هێمن سلێمان به‌رپرسێ راگه‌هاندنا رێڤه‌به‌ريا پۆليسێن پارێزگه‌ها دهۆك زێده‌تر گۆت: “پشتى دووڤچوونا رێڤه‌به‌ريا پۆليسێن نه‌هێلانا گۆنه‌هباريان (نڤيسينگه‌ها كوشتن) ديار بوو كو ئه‌ڤ كچه ئاواره‌يه و خوه نه كوشتيه به‌لكو ژ لايێ برايێ وێ ڤه هايته كوشتن”.
دا زانين ژى كو برايێ وێ ژ لايێ پۆليسان ڤه هاتيه ده‌سته‌سه‌ركرن و دان ب تاوانا خوه كريه.
به‌رپرسێ راگه‌هاندنا رێڤه‌به‌ريا پۆليسێن پارێزگه‌ها دهۆك خۆيا ژى كر كو هه‌ر ديسا پۆليسێن نه‌هێلانا گۆنه‌هباريان هاتينه ئاگه‌هداركرن كو ل گوندێ گرشينێ زه‌لامه‌كێ 55 سالى هاتيه كوشتن و پشتى چووينه وێرێ و ته‌رمێ وى بۆ نوشداريا داد هاتيه ڤه‌گوهاستن ديار بوويه كو ب گوله‌يێن كلاشينكوفێ هاتيه كوشتن و گۆت: “پشتى دووڤچوونێ ديار بوو كو كێشه‌كا خێزانى يه و تاوانبار هاتيه ده‌ستنيشانكرن، به‌لێ هێشتا نه‌هاتيه گرتن”.
نيشاندان