شێخان، بارزان مزووری:

بەرپرسێ میحوەرێ سکرێ مووسل چاڤدێری کرنا سکرێ مووسل، شێخ محیەدین مزووری، بۆ ئەڤرۆ نیوز دیار کر کو ل شەڤا بورێ درەنگانی شەڤ چەکدارێن تیرورستێن داعش خرڤەبونەک مەزن کربۆ ل ئاسکێ مووسل و وانکێ حەتا بگھینە گوندێ سھلێجە ژبۆ ھێرش کرنێ بۆ سەر ھێزێن پێشمەرگەی ل میحوەرێ سکرێ مووسل پتر ژ حەشتێ ترومبێلێن سەربازی و مەدەنی بون فروکەیێن جەنگی یێن ئەمریکی ھێزێن وان بوردومان کرن ژناڤبرن .

ناڤبری دیار کر کو دەمێ فروکەیێن جەنگی ھێزێن وان ئاسکێ مووسل و وانکێ حەتا بگھینە گوندێ سھلێجە بوردومان کرن، ھێزەک مەزن ل میحوەرێ ناوەران خرڤەکربوو ژ بوو ھێرشکرنا سەر پێشمەرگە ئەو ھێزێن وان یێن ناوەران ژی ھا تن ڤەگوھاستن بۆ دەڤەرا ئاسکێ مووسل و وانکێ حەتا بگھینە گوندێ سھلێجە فروکەیان ئەو ژی بوردومان کرن حەتا نوکە بوردومان یا بەردەوامە .

ئەڤرۆ، رەوان نھێلی:

بڕیارە ئەڤرۆ ٢٢/١٠/٢٠١٤ پەرلەمانێ کوردستانێ خواندنا ئێکێ بۆ پرۆژە قانوونا پارێزگەھبوونا زاخۆ بکەت و عەلی ھالو نوونەرێ قەزا زاخۆ ل پەرلەمانێ کوردستانێ راگەھاند زاخۆ قوربانیەکا زۆرا دایی لەوما مافێ خەلکێ وێ یە ببیتە پارێزگەە.

بەیار تاھر دوسکی ئەندامێ پەرلەمانێ کوردستانێ بۆ ئەڤرۆ دیارکر کو بڕیار بوو دوھی خواندنا ئێکێ بۆ پرسا پارێزگەھبوونا زاخۆ بھێتە کرن، بەلێ ژ بەر بەرفرەھیا بەرنامێ کارێ پەرلەمانی ھاتە پاشخستن و بڕیارە ئەڤرۆ دانوستاندن ل سەر ڤێ پرسێ بھێتە کرن و گۆت پرۆژە قانوونا پارێزگەھبوونا زاخۆ وەکو ھزر ژ ئالیێ نوونەرێن زاخۆ ل پەرلەمانێ کوردستانێ ھاتیە ئازراندن و د ووڤ دا کرینە پرۆژە و پرانیا پەرلەمانتاران ئیمزا ل سەر کرینە و پێشکێشی سەرۆکاتیا پەرلەمانی کرینە داکو کار ل سەر بھێتە کرن.

ل دۆر سنوورێ پارێزگەھا زاخۆ عەلی ھالو نوونەرێ قەزا زاخۆ ل پەرلەمانێ کوردستانێ دیارکر کو سنوورێ پارێزگەھا زاخۆ دێ ھەمان ئەو سنوور بیت کو نوکە قەزا زاخۆ پێک دئینیت و پشتی پەرلەمانێ کوردستانێ بڕیارێ ل سەر بدەت پێدڤیە حوکمەتا ھەرێمێ رێکارێن پێدڤی بکاربینیت بۆ وێ یەکێ بکەڤیتە د بیاڤێ بجھئینانێ دا.

قەزا زاخۆ ئێکە ژ قەزایێن سەر ب پارێزگەھا دھۆکێ و ب ئێک ژ مەزنترین قەزا دھێتە ھژمارتن و ھژمارا ئاکنجیێن وێ نێزیکی ٣٠٠ ھزار کەسان دھێتە تەخمین کرن.

ئەڤرۆ، ئەمیر ئەترووشی:

رێڤەبەرێ بەلاڤکرنا بەرھەمێن گازێ ل پارێزگەھا دھۆکێ راگەھاند، ل سەنتەرێ پارێزگەھا دھۆکێ ھەتا نوکە دەست ب بەلاڤکرنا پلێتا ١٤ نەھاتیە کرن، چونکو چو گاز ل بەر دەست نینە بھێتە بەلاڤکرن، ب تنێ ل دەڤەرێن چیایی نھا گازا سپی دھێتە بەلاڤکرن و گۆت: “بۆ بەلاڤکرنا ئێک پلێتا گازا سپی، دھۆکێ پێدڤی ب ٦٠ ملیون لێترێن گازێ ھەیە”.

یوسف نوری سەعدوللا، رێڤەبەرێ بەلاڤکرنا بەرھەمێن گازێ بۆ رۆژناما ئەڤرۆ دیار کر، نھا سێ پلێتێن گازا سپی د دەستێ وەلاتیان دا ھەنە، ھژمارە (١٣، ١٤، ١٥)، پتریا وەلاتیێن سەنتەرێ قەزایێ ھژمار ١٣ وەرگرتیە و کتەکا کێم ژێ ماینە، ئەو ژی دێ ل گەل پلێتا ھژمار ١٤ وەرگرن، بەلێ ل ١٦/١٠ ل دەڤەرێن چیایی و بەفرین دەست ب بەلاڤکرنا ھژمار ١٥ ھاتیە کرن و گۆت: “رۆژانە نێزیکی ٣٠ تانکەران دگەھنە بەر دەستێ مە و ل سەر وەلاتیان دھێنە بەلاڤکرن”.

ناڤبری دیار کر، ھەتا نوکە چو گازا ھوسا ل بەر دەستێ مە نینە ل سەر وەلاتیێن سەنتەرێ قەزایێ بەلاڤ بکەین، لەوما وەزارەتا سامانێن سرۆشتی ھندەک کۆمپانیێن کەرتێ تایبەت راسپاردینە بۆ ب دەستڤەئینانا گازا سپی و گۆت: “ل دووڤ ئامارێن ل بەر دەست، نێزیکی ٢٣١ ھزار خێزانان ل پارێزگەھا دھۆکێ ھەنە و ھەر خێزانەکێ پلێتەکا گازا سپی ھەبیت دێ بەرمیلەکێ وەرگریت”.

یوسف نوری زێدەتر گۆت: “بۆ بەلاڤکرنا ھەر پلێتەکا گازا سپی، ئەم پێدڤی ب ٥٦ ھەتا ٦٠ ملیۆن لێترێن گازێ دبین ھەتا کو ھەر ٢٣١ ھزار خێزان دشێن بەرمیلەکا گازا سپی وەربگرن، ئەڤە ژی رێژەیەکا مەزنە و مە ژ وەزارەتێ داخواز کریە ب زووترین دەم رێژا پێدڤی یا گازێ بۆ مە دابین بکەن”.

ل دۆر ئاواران ژی دیار کر کو ھەتا نوکە چو دیار نینە کا دێ کەنگی گاز ل سەر ئاواران ھێتە بەلاڤکرن و نزانین کا دێ وەزارەتا مە پێ رابیت یان ژی جھەکێ دیتر.

سەبارەت وێ چەندێ، بۆچی ھەتا زڤستان دھێت ژ نوو ھوون دەست ب بەلاڤکرنا گازێ دکەن؟ د بەرسڤێ دا یوسف نوری گۆت: “ئەم ل دووڤ پلانێن وەزارەتێ دچین، بەلێ ھندەک پلێت د دەستێ خەلکی دابن، زوو دفرۆشن و ناھێلنە د دەستێ خوە دا، ب تایبەت ژی مە دو ھەیڤ دڤێن ھەتا بشێین ئێک بەرمیل ل سەر ھەموو خەلکی بەلاڤ دکەین”.

یوسف نوری گۆت ژی: “نھا ئەم چاڤەرێ ١٥ ملیۆن لێترێن گازێینە کو ل نێزیک دێ گەھیتە بەردەستێ مە و ل سەر خەلکی ھێتە بەلاڤکرن، بەلێ چو دەمێن نیشانکری نینن کا دێ کەنگی گاز گەھیت و کەنگی ل سەر خەلکێ سەنتەرێ قەزایێ ھێتە بەلاڤکرن”.