ئه‌ڤرۆ نیۆز:
وه‌ك هاریكارى و پشته‌ڤانى بۆ شه‌رڤانێن كوردێن كوبانێ ب رێیا فرۆكخانا نێڤده‌ولى یا هه‌ولێرێ ئه‌ڤرۆ چه‌ك گه‌هشته كوبانێ، ل دۆر وێ پشته‌ڤانیێ هنده‌ك سه‌ركردێن كوردێن رۆژئاڤا یا كوردستانێ بوچوونێن خوه هه‌بوون و گۆتن، سكرتێرێ پارتا چه‌پا دیموكراتى یا كورد ل سوریا شه‌لال گه‌دو دبێژیت، ئه‌و پشته‌ڤانیا حوكمه‌تا هه‌رێما كوردستانێ بۆ شه‌رڤانێن كوردێن كوبانێ كرى ب قه‌بارێ 27 ته‌نانێن چه‌كى یێن جودا جودا و كه‌رستێن نوشدارى بوون.
هه‌روه‌سا شه‌لال گه‌دوى گۆت: ئه‌ڤه ل گۆڕ ستراتیجیه‌تا حوكمه‌تا هه‌رێمێ ل به‌ره‌ڤانیا ژ كوردان ب شێوه‌كێ گشتى دهێت نه‌ك بتنێ كوردستانا عیراقێ، به‌لكى بۆ هه‌ر چار پارچێن دى ژى هه‌یه، هه‌روه‌سا ئاماژه دا، گۆتنا سه‌رۆك بارزانى ل دۆر پاراستن و به‌ره‌ڤانیا ژ خه‌لكێ كوردستانێ ل هه‌ر جهه‌كێ هه‌بیت.
ژ ئالیه‌كێ دیڤه فه‌یسه‌ل نه‌عسو ئه‌ندامێ لیژنا ناڤه‌ندیا پارتى دیموكراتى كوردستان ل سوریا گۆت: سه‌رۆك مه‌سعود بارزانى پتر ژ به‌رپرسێن كوردێن رۆژئاڤایێ خه‌م و ژانا كوردستانا رۆژئاڤا یێ هه‌یه، هه‌ڤده‌م ژ جڤاتا دانوستاندێن كوردان ل باژێرێ دهوكێ خواست، ل گۆڕ قه‌بارێ به‌رپرسیا ل سه‌ر ملێن وانا بن و ئه‌جامێن هه‌ره‌باش بۆ ملله‌تێ كورد بلا ده‌ركه‌ڤن، به‌رژه‌وه‌ندیا ملله‌تێ كورد بلا لبه‌ر چاڤێن خوه دانن به‌رى هه‌ر تشته‌كێ دى.
فه‌یسه‌ل نه‌عسوى گۆت: سه‌رۆكێ هه‌رێما كوردستانێ مه‌سعود بارزانى وه‌ك هێمایێ نه‌ته‌وه‌یا كورده نه بتنێ سه‌رۆكێ هه‌رێما كوردستانێ یان سه‌رۆكێ پارتى دیموكراتى كوردستانه، ئه‌و مه‌رجه‌عیه‌تا هه‌ر چار پارچێن كوردستانێ یه.
هه‌روه‌سا نوونه‌رێ پارتا ئێكه‌تیا دیموكراتى یا كوردى ل هه‌رێما كوردستانێ غه‌ریب حه‌سوى گۆتنا خوه هه‌بوو، سه‌رۆكاتیا هه‌رێما كوردستانێ و هه‌موو ئالیێن سیاسى یێن هه‌رێمێ پشكدارى د گه‌هاندنا هاریكرایێن له‌شكرى و مرۆڤایه‌تى بۆ باژێرێ كوبانێ كریه.
ئه‌و پرۆسه ب رێیا سه‌رۆكاتیا هه‌رێما كوردستانێ و هه‌موو ئالیێن سیاسى ل هه‌رێمێ هاتیه ئه‌نجامدان، و ئه‌م نه‌شێن بێژین ئالیه‌كێ بتنێ ئه‌و چه‌ك گه‌هاندیه كوبانێ چونكى هه‌موو ئالیێن سیاسى پشكدارى دوێ پرۆسێ دا كریه.
پشته‌ڤانیا چه‌كى بۆ كوبانێ ب رێیا سه‌رۆكاتیا هه‌رێما كوردستانێ هاتیه ئه‌نجامدان
نيشاندان