ئەڤرۆ، ھۆشەنگ تاجر:

ئەندامەکێ سەرکردایەتیا پارتی دیموکراتی کوردستان-سووریا دیار دکەت کو د کۆمبوونێن بەریا نھا د ناڤبەرا شاندێ کوردی ل گەل شاندێ ئەمریکی و وەلاتێن ئورۆپا ئەو یەک بۆ وان ھاتیە دیار کرن کو ھەکە ھێزێن کوردی یێن رۆژئاڤایێ کوردستانێ ب تایبەتی ژی ھەر دو جڤاتێن کوردی ببنە ئێک دێ دەرگەھێ ھاریکاریێ بۆ وان ھێتە ڤەکرن و ژ بەر ڤێ یەکێ ژی ئەم ھیڤیدارین کو د سەرەدانا خوە یا ڤێجارێ دا سالح موسلم وەک بەرێ نەکەت و قەبوول بکەت دا ئەم پێکڤە کار بکەین.

حسێن کوچەرو ئەندامێ سەرکردایەتیا پارتی دیموکراتی کوردستان-سووریا بۆ رۆژناما ئەڤرۆ دیار کر کو ھێرشێن ل سەر کۆبانێ رۆژ ب رۆژێ دژوار دبن و ھەتا نھا ژی پارتیا ئێکەتیا دیموکراتیک قەبوول نەکریە کو ھێزێن دی یێن کوردی بەرەڤانیێ ژ ئاخا خوە بکەن و ژ بەر وێ یەکێ ژی ھێزەکا مەزن یا کوردی نەھاتیە ئاڤاکرن و گۆت: (سالح موسلم دوھی سەرەدانا ھەرێما کوردستانێ کر و بریارە ھەڤدیتن د ناڤبەرا مە دا ژی دروست ببن، ئەم داخواز دکەین کو سەرەدانا ڤێجارێ وەک جارێن بەرێ نەبیت و ئەو سۆزێن خوە ددەن براستی ژی وان بجە بینن، چونکو نھا رەوشەکا گەلەک خراب ل کۆبانێ و ھەموو رۆژئاڤایێ کوردستانێ ھەیە و مەترسیا راگیرکرنێ ھەیە و ژ بەر وێ یەکێ ژی دڤێت ھەموو ھێزێن کوردی ببنە ئێک و مە بزاڤێن مەزن بۆ ئێکەتیا کوردان کریە و دێ بەردەوام ژی بکەین).

ناڤھاتی ئەو یەک ژی دیار کر کو مە دڤێت ئەم ھێزەکا لەشکری یا ھەڤپشک بۆ بەرەڤانی کرن ژ رۆژئاڤایێ کوردستانێ ئاڤا بکەین و مە بەرنامەکا باش ژی ئامادە کریە و ھەکە PYD وەک بەرێ دیسان ل سەر وێ یەکێ رژد بیت کو ناھێلن چو ھێزەکا دی یا لەشکری ژ بلی یا وان ھەبیت وێ دەمێ ئەم دێ ھێزا خوە یا لەشکری ئاڤا بکەین و دێ دەربازی رۆژئاڤایێ کوردستانێ ببین و دێ شەرێ داعشێ بکەین و گۆت: (گەلێ کورد ل رۆژئاڤایێ کوردستانێ ئێدی وێ یەکێ قەبوول ناکەت، ئەم دبێژین ھەکە نھا مە نەشیا ئەم ئێکەتیا سیاسی ژی ئاڤا بکەین دڤێت ئێکەتیا لەشکرێ ھەر بھێتە ئاڤا کرن چونکو پێدڤیا رۆژئاڤایێ کوردستانێ ب ھێزەکا مەزن یا لەشکری ھەیە و ھەکە ئەم وێ یەکێ بکەین دێ ئەمریکا و ھێزێن ھەڤپەیمان ژی پتر ھاریکاریا مە بکەن و دڤێت ئەم ڤێ یەکێ ژی قەبوول بکەین کو ھەکە سەرۆک بارزانی نەبا نھا فرۆکێن ھێزێن ھەڤپەیمان ھێرشی بنگەھێن داعش ل کۆبانێ نەدکرن).

ل ئالیێ دی موراد قەرەیلان سەرکردێ پارتیا کرێکارێن کوردستانێ ژی دیار کر کو دڤێت پێشمەرگە دەربازی کۆبانێ ببن و ھەکە تورکیا ئاستەنگیان بۆ وێ یەکێ دروست بکەت دێ ب ھەموو ھێزێن خوە شەرێ تورکیا بکەن و چاڤدێرێن سیاسی ژی دیار دکەن کو ئەو داخۆیانیا قەرەیلان ئاماژەکا راستەخوەیە بۆ چووینا پێشمەرگە و پێکڤەکارکرنا ھێزێن کوردی ل رۆژئاڤایێ کوردستانێ و ئەوە ژی رێخوەشکەرە بۆ ئاڤاکرنا ھێزەکا لەشکری ل رۆژئاڤایێ کوردستانێ.

ل ئالیێ دی چاڤدێرێن سیاسی ئاماژە ب ڤێ یەکێ دکەن کو تورکیا ژ بەر پەیوەندیێن PYD ل گەل PKK ناخوازیت کو تنێ ئەو ھێزە ل رۆژئاڤایێ کوردستانێ ببیتە دەستھەلات و سەرۆک وەزیرێن تورکیا بەریا نھا ژی دیار کربوو کو مە ب رەنگەکێ ئاشکرا بۆ سالح موسلم دیار کریە ھەکە ئەو گوھۆرینێ د ھەلویستێ خوە یێ سیاسی بکەن و رێگر نەبن بۆ پشکداریا پارتێن دی یێن کوردی ل خەباتا سیاسی و سەربازی ل رۆژئاڤایێ کوردستانێ وێ دەمێ دێ ھەلویستێ تورکیا ژی ھێتە گوھۆرین و ژ بەر وێ یەکێ ھەکە پارتێن رۆژئاڤا ئێکەتیا خوە دروست بکەن دێ ھەلویستێ تورکیا ژی ل ھەمبەر کۆبانێ ھێتە گوھۆرین و دێ ئەمریکا و ئورۆپا ژی ھاریکاریا رۆژئاڤایێ کوردستانێ بکەن و سەرۆک بارزانی دشێت وان پەیوەندیان بۆ خزمەتا رۆژئاڤایێ کوردستانێ بکار بینیت و تنێ یا پێدڤی ئەوە کو ھەر دو جڤاتێن رۆژئاڤایێ کوردستانێ واتە ئەنجوومەنێ نیشتمانی یا کوردێن سووریێ و جڤاتا گەل یا رۆژئاڤایێ کوردستانێ ئێکەتیا خوە دروست بکەن.

ل ئالیێ دی رۆژناما مللیەت یا تورکیا راگەھاند کو دوھی فرۆکێن ھێزێن ھەڤپەیمان ب رەنگەکی دژوار ھێرشی ناڤەندێن داعشێ ل کۆبانێ کرینە و پرانیا چەکێن وان یێن گران ژناڤبرینە و نھا بالانسا ھێزی د بەرژەوەندیا کوردان دا ھاتیە گوھۆڕین و ھێزێن داعش خوە ژ گەلەک ناڤەندا ڤەکێشاینە و زیانێن گەلەک مەزن گەھشتینە وان.