ئەڤرۆ، زنار زوبێر:
دھۆک ب ناسناما یاریا باسکت بۆلێ دھێتە نیاسین ل سەر ئاستێ عیراقێ، لێ ل دووڤ بوچونا شارەزایێن ڤێ یاریێ ل پارێزگەھێ ڤی شێوازێ نوکە تایبەت یانا دھۆک پەیرەو دکەت ئەڤ ناسناڤە د مەترسیێ دایە، ژ بەرکو ل ڤی وەرزی تنێ پشتبەستن ل سەر یاریکەرێن بیانی و پیشەکاران کریە بۆ خولێن ھەرێمێ و عیراقێ ل سەر کیستێ یاریکەرێن کورد یێن پارێزگەھێ.
ل دۆر ڤی بابەتی رێڤەبەرێ وەرزشا زانکویا دھۆک فەلاح سەعدون بۆ رۆژناما ئەڤرۆ گۆت: پارێزگەھا دھۆک ب ناسناما باسکت بۆلێ دھێتە نیاسین، لێ جھێ داخێ یە نوکە ئەڤ ناسناڤە دھێتە ژ دەستدان و نوکە ھند یاریکەر نینن یاریێ بۆ تیما باسکت بۆلا یانا دھۆک بکەن، تایبەت خولا کوردستانێ و کارگێریا یانا دھۆک پشتبەستنێ ل سەر یاریکەرێ پیشەکار ژ دەرڤەی پارێزگەھێ دکەت و یا ئاشکرایە یاریکەرێ ژ دەرڤەی پارێزگەھێ بۆ یانێ نابیتە مال ژ بەرکو تنێ چاڤێ وی ل گرێبەستێ یە و ھەردەمێ یا ب دلێ وی نەبیت دێ یانێ بجە ھێلیت، لەورا یا پێدڤیە ھەر زوو کارگێریا یانا دھۆک کار ل سەر دروستکرنا یاریکەرێن باسکت بۆلێ یێن تیما لاوان بکەت ژ بەرکو یاریکەرێن باش یێن خودان شیان ھەنە داکو ھەتا سێ سالێن دی یاریکەرێ پارێزگەھێ یێ بەرھەڤ بیت بۆ یاریێ ل سەر بنەمایەکێ زانستی.
ھەر د ڤی چارچوڤەی دا راھێنەرێ بەرنیاس یێ باسکت بۆلێ سەردار سالح بۆ رۆژناما ئەڤرۆ گۆت: پێدڤیە ھەر زوو گرنگیێ ب یاریکەرێ خوە یێ پارێزگەھێ ل سەر ئاستێ تیمێن لاوان و پێگەھشتیان بدەین، دیسان راھێنەرێن کورێن پارێزگەھێ ژی بینن داکو یاریکەران بۆ تیما یانا دھۆک یا خولا کوردستانێ دروست بکەن و زێدەکرنا زێدەتر ژ چار یاریکەرێن ژ دەرڤەی پارێزگەھێ تنێ بۆ خولا کوردستانێ کارەکێ نە یێ دروستە ژ بەرکو مەترسیە ل سەر پاشەروژا یاریکەرێن پارێزگەھێ و ب ڤی شێوازی نامینن یاریێ بۆ یانا دھۆک بکەن ژ بەرکو راھێنەرێ عەرەب ناسناڤ دڤێت و دلێ وی ب پاشەرۆژا یانێ ڤە نینە و راھێنەرێ کورد یێ پارێزگەھێ شیانێن ژ یێ عەرەب کێمتر نینە بۆ دروستکرنا یاریکەران,
ناڤبری ئەو چەندە ژی دیارکر بەری نوکە دەمێ وی ل تیما لاوان یا یانا دھۆک کار دکر مەرجێ وی ئەو بوو زێدەتر دو یاریکەران دروست بکەت ھەر چ نەبیت یاریێ بۆ خولا کوردستانێ بکەن و ئەگەر ب شێوازێ نوکە بیت پارێزگەھا دھۆک وەکو کانیا یاریکەرێن باسکت بۆلێ نامینیت و یانێن پارێزگەھێن ھەولێر و سلێمانی و کەرکوک دێ بھێزتربن و پارێزگەھا دھۆکێ ژی دێ پاشڤە زڤریت.
ژ لایێ خوە ڤە زەکی نەبی سەروکێ ئێکەتیا باسکت بۆلا پارێزگەھێ دیارکر دروستکرنا یاریکەرێن باسکت بۆلێ یا ب ساناھی نینە و ماوێ چار سالان پێدڤێت ھەتا یاریکەرەکی دروست بکەی و د ڤی ماوەی دا یاریکەرێن کورد یێن پارێزگەھێ نینن بشێن یاریێ بۆ یانا دھۆک بکەن ژ بەرکو پێنج یاریکەر نوکە ل گەل خولا عیراقێ یاریێ دکەن، لەروا چارەسەری ئەوە ھژمارەکا یاریکەرێن پیشەکار ل تیما باسکا دھۆک بھێنە زێدەکرنا داکو بشێت یاریێ بکەن.

زاخۆ، ھشیار دوبانکی:
د چارچوڤێ یاریێن گەرا چارێ دا ژ قۆناغا ئێکێ یا خۆلا عیراقێ یا تەپا پێ بۆ یانێن پلا نایاب ژ ڤانە ئەڤرۆ ل یاریگەھا دەلال یانا زاخۆ یاریا خوە یا چارێ ژ کوما ئێکێ دگەل یانا جەویە بکەت و زاخۆ دێ ھەمی بزاڤان کەت قەرەبویا یاریێن بوری بکەت و خالێن خو بگەھینتە شەش خالان و ژ ڤشارا جەماوەری دوورکەڤت.
ل دۆر ڤێ یاریێ حەیدەر مەحمود ھاریکارێ راھێنەرێ یانا زاخۆ دبیژیت: یاریەکا بزەحمەتە پشتی دو خوشارەتیا دگەل تیمەکا جەماوەری وەکو جەویە و فشارەکا زێدە ژلایێ جەماوەر و کارگێریا یانێ یا ل سەر تیمێ، لەورا دێ ھەمی شیانێن خوە تەرخان کەین د ڤێ یاریێ دا سەرکەفتنێ ب دەستڤە بینین و قەرەبویا خالێنن ھاتینە ژ دەستدان بکەین و دیسان مفای ژ خەلەتیێن خوە یێن یاریێن بوری بینین.
ژلایەکێ دووڤە راھێنەرێ یانا جەویە نازم شاکر دبێژیت: زاخۆ نە تیمەکا ب ساناھی یە دناف یاریگەھا خوە دا، لێ دێ یاریا تیما مە یا ئەڤرۆ زێدەتر پشتبەستنێ ل سەر ھێلا ھێشبەریێ کەین، پێخەمەت ب ئەنجامەکێ باش ژ ڤێ یاریێ دەرکەڤین و ئەو بارێ دەرونی یێ لاواز یێ زاخۆ دێ بزاڤێ کەین وەکو چەکەک دژی وان بکار بینن.
عەبدولرەحمان سوبحی شرۆڤەکارێ یاریا تەپا پێ ل زاخۆ ل دۆر ڤێ یاریێ دبێژیت: دڤێت کارگیریا یانێ رولەکی مەزن ھەبت دڤێ یاریێ دا چونکو خوسارەتیا زاخۆ د ڤێ یاریێ دا مەترسیە ل سەر یاریکەر و راھێنەری، ھەر چ نەبا ل سەر دەرونی یاریکەرا کارکربا و نازم شاکر یاریا ھێرشبرنی دکەت، بەروڤاژی راھێنەری زاخۆ لەورا دێ یاریەکا بزەحمەت بیت بۆ زاخۆ ھەر چەندە سەقا دبەرژەوەندیا یانا زاخۆ دایە.