سه‌ره‌كى نووترين نووچه

پارێزگه‌رێ دهوكێ ل گه‌ل رێكخراوا مندال پارێزى یا جیهانى كومبو

15/10/2014 20:14

ئه‌ڤرۆ نیۆز، ئه‌كره‌م ئیبراهیم:

ئه‌ڤرو پشتى نیڤرو 15-10-2014به‌رێز فه‌رهاد ئه‌تروشى پارێزگه‌رێ دهوكێ پێشوازیا شانده‌كێ رێكخراوا مندال پارێزى یا جیهانى ب سه‌روكاتیا(هوستن فورسین( رێڤه‌به‌رێ گشتى یێ رێكخراوێ یێ جیهانى كر.

دهه‌ڤدیتنه‌كێدا به‌حسێ ره‌وشا په‌نابه‌ر و ئاواره‌یان ب تایبه‌تى یا زاروكان وئه‌و كار وخزمه‌ت وهاریكاریا پارێزگه‌ها دهوكێ ورێكخراوێن خێرخاز دبوارێ ساخله‌میێ وپه‌روه‌ردێ وجڤاكى دا پێشكێشى ئاواره‌ وپه‌نابه‌را دكه‌ن ب گشتى هاته‌ كرن.

پارێزگه‌رێ دهوكێ ده‌ست خوشى ل وان هه‌موو سازى ولایه‌نان كر یێن هاریكاریا په‌نابه‌ر وئاواره‌یان وزاروكان دكه‌ن نه‌خاسمه‌ ئه‌وێن لناڤ كه‌مپان وخواست كو ئاستێ هاریكاریێ وپاراستنا زاروكان به‌رزتر لێ بهێت دوارێ ته‌ندورستى وپه‌روه‌رده‌ى وخزمه‌تگوزارى یا زاروكان دا كو رێكخراوا مندال پارێزى ل دوڤ بسپوریا خو پێشكێش دكه‌ت.

بله‌ز: سالح موسلم هاریكاریێن هه‌رێما كوردستانێ بۆ مه‌ دباشن

15/10/2014 20:05

ئه‌ڤرۆ نیۆز:
د كونگره‌كێ رۆژنامه‌ڤانى دا ئه‌ڤرۆ ل پارێزگه‌ها دهوكێ سالح موسلم دانپێدان ب هاریكاریێن هه‌رێما كوردستانێ دا كرو گۆت: هاریكاریێن هه‌رێمێ بۆ مه‌ دباش بوون و دێ باشتر بن، هه‌روه‌سا گوت مه‌ رێ ل هه‌مبه‌رێ كىس نه‌گریته‌ ل ئاخا رۆژئاڤا یا كوردستانێ شه‌رى بكه‌ت و شه‌ر بتنێ ل كوبانێ نینه‌، به‌لكۆ ل سه‌رێ كانیێ و هنده‌ك جهه و ده‌ڤه‌رێن دى یێن كوردستانێ هه‌نه‌.

رۆیته‌رز: چه‌كێ هه‌رێمێ كوردستانێ نه‌گه‌هشتیه‌ كوبانێ 32 داعشێ هاتن كوشتن

15/10/2014 19:53

ئه‌ڤرۆ نیۆز:
ده‌زگه‌هێ چاڤدێریا مافێن مروڤى یا سورى بۆ رۆیته‌رز گۆت: د هێرشێن ئه‌سمانى دا ب سه‌رۆكاتیا ویلایه‌تێن ئێكگرتى 32 چه‌كدارێن تیرۆرستێن داعشێ هاتن كوشتن و پێشڤه‌چوونا وانا ل كوبانێ هاتیه‌ راگرتن، ئه‌ڤه‌ ژى ب سه‌ده‌ما هه‌ماهنگیا هێزێن كوردان و چڕكرنا هێرشێن ئه‌سمانى ل سه‌ر باژێرێ كوبانێ.
به‌پرسێن كوردان ل كوبانێ هه‌روه‌سا راگه‌هاندن، یه‌كه‌یێن پاراستنا گه‌ل پێزانینێن راست ل سه‌ر بنگه‌هێن چه‌كدارێن داعشێ ل كوبانێ بۆ هێزێن هه‌ڤپه‌یمانان بۆ بجهئینانا هێرشێن ئه‌سمانى.
په‌یڤدارێ بناڤێ یه‌كه‌یێن پاراستنا گه‌ل بولات جان هه‌روه‌سا گۆت: مه‌زن به‌رپرسێن یه‌كه‌یێن پاراستنا گه‌ل پێزانینێن هوربین ل سه‌ر بنگه‌هێن داعشێ دده‌نه‌ هێزێن هه‌ڤپه‌یمانان دا فرۆكه‌ توپباران بكه‌ن.
رێڤه‌به‌رێ چاڤدێریا مافێن مرۆڤى رامى عه‌بدولره‌حمان گۆت: 7 چه‌كدارێن تیرۆرستێن داعشێ و 5 شه‌رڤانێن ئێكینه‌یا پاراستنا گه‌ل د شه‌رۆپێكدادانێن دژوار دا هاتن كوشتن، هه‌ڤده‌م خوه‌یاكر ب ئه‌گه‌رێ هه‌ماهنگیا ته‌مام د ناڤبه‌را به‌رپرسێن كوردان و هێزێن هه‌ڤپه‌یمانان ژى هێرشێن ئه‌سمانى كارتێكرنه‌كا هه‌ره‌ مه‌زن ل سه‌ر ره‌وشا شه‌رێ كوبانێ د حه‌فت رۆژێن بۆرى دا كریه‌.
ژئالیه‌كێ دیڤه‌ رۆیته‌رز دیاركر، ئه‌و چه‌كێ هه‌رێما كوردستانێ ب مه‌ره‌ما هاریكاریا باژێرێ كوبانێ كو ژ ته‌قه‌مه‌نى و مووشه‌كێن موتور بوون، هێشتا نه‌گه‌هشتینه‌ كوردێن كوبانێ ب ئه‌گه‌رێ وێ دورپێچكرنا چه‌كدارێن داعشێ ل سه‌ر كوبانێ كرى، ئه‌و چه‌ك ل باكورێ رۆژهه‌لاتا سوریا مایه‌ ل ده‌ڤه‌رێن ژێر كونترۆلا كوردان دا.

دو شه‌رڤانێن بریندار ل سه‌ر سنۆرێ توركیا شه‌هید بوون

15/10/2014 19:18

ئه‌ڤرۆ نیۆز:
رۆیته‌رز: پشتى نه‌مانا كه‌لوپه‌لێن ساخله‌مى و برینپیچانێ ل باژێرێ كوبانێ، چالاكڤانێ كورد بلیسا عومه‌ر سێ شه‌رڤانێن(ypk ) كو دشه‌رێ دژى داعشێن تیرۆرست دا بریندار ب بوون، ب مه‌ره‌ما چاره‌سه‌كرنا وان ل وه‌لاتێ توركیا به‌ر ب سنۆرێ توركیا ڤه‌ برن، به‌لێ ب مخابنى ڤه‌ توركیا رێ نه‌دایێ ئه‌و هه‌ردو شه‌رڤان ده‌ربازى ئاخا توركیا ببن و ل سنۆرى هه‌ردو شه‌رڤانان گیانێ خوه‌ ژده‌ستان.
بلیسل عومه‌ر بۆ رۆیته‌رز گۆت: هه‌ر چار ده‌مژمێرێن دووماهیێ من ئه‌و شه‌رڤان دیتن كو ئێك ل دووڤ ئێك گیانێ خوه‌ژده‌ستان ب ئه‌گه‌رێ برینێن وان كو برینێن وان گه‌له‌ك نه‌د گران بوون و ب ساناهى دا هێنه‌ چاره‌كرن.

ئامینا زکری: پارتی دژی دانپێدانکرنێ ب کاتنۆنان نینە

15/10/2014 16:26

609

ئەڤرۆ نیۆز، سالار دۆسکی:
جێگرا سەرۆکێ فراکسیۆنا پارتی ل پەرلەمانێ کوردستانێ بۆ ئەڤرۆ نیوز دیارکر کو وەکو پارتی دیموکراتی کوردستان د گەل ئێکرێزی و ئیرادا خەلکێ رۆژئاڤا کوردستانێ نە و ھەر بڕیارەکا رۆژئاڤایێ کوردستانێ بدەت دێ رێزێ لێ گرن.
ئامینا زکری، جێگرا سەرۆکێ فراکسیۆنا پارتی دیموکراتی کوردستان ل پەرلەمانێ کوردستانێ زێدەتر بۆ مالپەرێ ئەڤرۆ نیۆز گۆت: “کێشە نەدانپێدانە ب کانتۆنێن رۆژئاڤا، ئەڤە دەست تێوەردانێن وەلاتەکێ دی نە و سیاسەتا دەرڤە دەستەلاتا حوکمەتا ئێکگرتی یە، پارتی یا رژدە رێز ل ئیرادە و ئێکرێزیا خەلکێ رۆژئاڤا بھێـتەگرتن”.
ئامینا خانێ ئاشکەرا ژی کر کو کۆمبوون ل سەر رەوشا کۆبانێ یا بەردەوامە و دڤێت ل گۆر دستووری دانپێدان ب کۆبانێ بھێتە کرن.
ئەڤرۆ ل دەمێ دەسپێکرنا روونشتنا پەرلەمانێ کوردستانێ یا رۆژا دویێ ژ بەحسکرنا رەوشا کۆبانێ پەرلەمانتارێ گۆڕان ئەنوەر فائیق ئاخفتنێن بێ رێز گۆتنە پارتی و پشتی نەرازیبوونا فراکسیۆنا پارتی سەرۆکێ پەرلەمانێ کۆمبوون راوەستاندن و پشتی پارتی داخواز کری کو ئەو داخوازا لێبۆرینێ بخوازیت و فراکسیۆنا شین ھەلۆیستێ خوە دیارکەت و ئاخفتنێن وی ژی بھێنە ژێبرن ژ پرۆتۆکۆلێ بھێنە دەر، پشتی رازیبوونا گۆڕان جارەکا دی بەردەوامی ب کۆمبوونێ ھاتە دان و نوکە یێن د کۆمبوونێ دا.

وێنه‌: کەڤنترین مەزارێ ئێزدیان ھاتە پەقاندن

15/10/2014 15:47

133

ئەڤرۆ نیوز، شێخان، بارزان سلێمان مزووری:
ژێدەرەکی ژ ھێزێن پێشمەرگەی ل میحوەرێ باشیک بۆ ئەڤرۆ نیوز دیار کر کو دێ ئەڤرۆ دەمژمێر دوی پشتی نیڤرۆ 15\10 دەنگەکێ ب ھێز و دوکێلەکا مەزن ل ناحیا باشیک رابوو، پشتی دووڤچوون ھاتیە کرن دیار بوو کو چەکدارێن تیرورستێن داعش مەزارێ نەسرەدین یێ ئێزدیان ل نێزیک تاخێ “عین علق” ل ناحیا باشیک پەقاند.
ژ لایەکی دی ڤە رەوشەنبیرەکێ دەڤەرا باشیک ب ناڤێ، خدر خەلات، بۆ ئەڤرۆ نیوز دیار کر کو ئەڤ مەزارە کەڤنترین مەزارێ ئاینێ ئیزدیانە بەری شەش سەد سالایە ھاتیە دروست کرن.

**مه‌زارێ نه‌سره‌دين به‌رى بهێته‌ په‌قاندن**

ساخله‌ميێ هه‌لكه‌فته‌كا جيهانى ب ناڤ ئاواران ساخ كر

15/10/2014 15:37

170

ئەڤرۆ نیوز، حەمزە رەزیکی:

ل قوتابخانا عەفرین ل کەمپا دومیز و ب سەرپەرشتیا رێڤەبەرێ ناحیا فەیدیێ قادر یاسین، رێ و رەسمێن رۆژا جیھانیا دەستشووشتنێ ھاتنە گێران.

د. خەلیل ئیسماعیل، نوونەرێ رێڤەبەریا گشتی یا ساخلەمیا پارێزگەھا دھۆ کێ دیارکر کو ل ڤێ رۆژێ پێدڤیە خەلک بھێتە ئاگەھدارکرن و ئارمانجا سەرەکی ژێ ئەوە خەلک ب گشتی مفایێن دەست شووشتنێ د خوپاراستنێ ژ نەخوشیان دا بزانن کو دەستشووشتن ژی رێیا سەرەکی یە د ڤی واری دا و گۆت: چونکو ھەموو کارێن رۆژانە ئەنجام ددەین ب رێیا دەستینە و دڤێت دەست پاقژ بھێنە راگرتن.

عەبدولا حەسەن، رێڤەبەرێ پەروەردا قەزا سێمێلێ، دیارکر کو پاقژی خالەکا گرنگە د پروسێسا پەروەردێ دا و دەما قوتابی ل دەستپێکێ دھێتە قوتابخانێ، ماموستا فێری دەست شووشتنێ دکەت، و پێدڤیە ژینگەھا قوتابی ژ مال ھەتا دگەھیتە قوتابخانێ پاقژ بھێتە راگرتن.

ئیدریس مەجید، رێڤەبەرێ ژیگەھا دھۆکێ دیارکر کو ژینگەە و ساخلەمی دو خالێن پێکڤە دگرێداینە، ژینگەھەکا پاقژ رامانا وێ ساخلەمیەکا باش ھەیە و ھەکە تە گوت ساخلەمیەکا باش رامانا وێ ژینگەھەکا پاقژە، لەرا پێدڤیە ژینگەە و ساخلەمی کارا پێکڤە بکەن و پێدڤیە گرنگیەکا تایبەت ب روژا جیھانیا دەست شووشتنێ بھێتە دان و ب تایبەت ل قوتابخانا، ژبەرکو ئەو پاشەروژا ڤی مللەتینە، ھەکە ئەڤ رەوشتە دناڤ زارۆیان دا ھاتە پەیرەوکرن دێ بیتە فاکتەر بۆ جڤاکەکێ پاقژ و دێ پووتەی ب ژینگەھێ دەت ئەوا مروڤ ژیانا خو تێدا دبورینیت.

دیارکر ژی کو سالانە سێ ملیون و پێنجسەد ھزار زارۆ ل جیھانێ ژ ئەگەرێ نەخۆشیا گیانێ خوە ژدەست ددەن کو ٤٠% ژوان ژئەگەرێ پیساتیێ نە.

حەمزە رەزیکی، بەرپرسێ راگەھاندنا ساخلەمیا دھۆکێ دیارکر کو ب ھەلکەفتا رۆژا جیھانی یا دەستشووشتنێ دێ ھژمارەکا چالاکیان ل ئاکرێ و بەردەرەش ژی ھێنە ئەنجامدان و گۆت: مەرەما مە ژ دەستنیشانکرنا کەمپێن ئاوەران ئەوە پتر ھشیاری و رەوشەنبیریا ساخلەمیێ لێ بھێتە بەلاڤکرن.

فراكسيۆنا گۆڕان ل دۆر روودانا په‌رله‌مانى ب فه‌رمى داخوازا لێبۆرينێ ژ پارتى كر

15/10/2014 15:22

ئەڤرۆ نیوز، سالار دۆسکی:
د روونشتنا دویێ یا تایبەت و ب کۆبانێ ڤە، ئەڤرۆ ل پەرلەمانێ کوردستانێ شەرەدەڤ د ناڤبەرا ئەندامێن پەرلەمانێ کوردستانێ یێن فراکسیۆنا زەر و شین دا پەیدا بوو.
ئەندامەکێ پەرلەمانێ کوردستانێ ژ فراکسیۆنا گۆڕان ب ناڤێ ئەنوەر قادر ب چەندین گۆتنا ھێرش کرنە سەر پارتی، ھەر ئێک ژ ئومێد خوشناو و ئامینا زکری سەرۆک و جێگرێن فراکسیۆنا پارتی بەرامبەر ڤی ئەندام پەرلەمانێ گۆڕان راوستیان و ژ سەرۆکاتیا پەرلەمانی خواستن ئەڤ ئەندام پەرلەمانە داخواز لێبورینێ ژ پارتی بکەت، سەرۆکێ پەرلەمانی بۆ (١٠) خولەکان کۆمبوون راوستاند.
ھەڤدەم دلشاد شەعبان غەفار ئەندامێ پەرلەمانێ کوردستانێ ژ فراکسیۆنا زەر بۆ ئەڤرۆ نیوز گۆت: “ڤی ئەندام پەرلەمانی بەری نوکە ژی زێدەگاڤی ل سەر مام جەلال، سەرۆک کۆمارێ بەرێ یێ عیراقێ کربوون، ئەڤرۆ ژی زێدەگاڤی ل سەر پارتی کرن”.

دلشاد شەعبان غەفار گۆتژی: “پشتی ڤێ چەندێ فراکسیۆنا گۆڕان سەردانا فراکسۆنا پارتی کریە و لێبۆرین خواستیە و دیار کریە ئەڤە دەربڕینێ ژ ھەلۆیستێ تەڤگەرا گۆڕان و فراکسیۆنێ ناکەت، دیسا دێ د روونشتنێ ژی دا ب فەرمی فراکسیۆنا گۆڕان لێبورینێ ژ فراکسیۆنا پارتی خوازیت”.
ئەندامێ پەرلەمانێ کوردستانێ ئاماژە دا وێ چەندێ ژی کو ئەڤ کێشە نابنە ئەگەر کێشە د ناڤبەرا دو فراکسیۆنێن کوردستانیێن پەرلەمانی چێ بن و ئەڤە د کەسوکی نە و گۆت: “دبیت ئەڤە یێ نەخۆش بیت وەکو دەروون”.

ناڤبری ئاشکرا ژی کر کو ئەڤرۆ دێ کۆمبوونا پەرلەمانی ل سەر کۆبانێ ب دووماھی ھێت.

پەککەفتیێن شنگالێ دێ بۆ ئەلمانیا ھێنە ھنارتن

15/10/2014 14:59

131

دھۆک، لەزگین جۆقی:

سەرۆکێ گرۆپێ گەنجێن ھێزا شەرفەدین بۆ ئەڤرۆ دیارکر کو ب ھەڤکاریا وەلاتێ ئەلمانیا ل بەرە پێنچ ھزار پەککەفتیێن ئاوارێن شنگال بۆ چارەسەریێ بۆ ئەلمانیا بھێنە ھنارتن، داخواز ژی ژ سازیێن پەیوەندیدارێن حوکمەتا ھەرێمێ کر د ھەڤکار بن ل گەل وان بۆ سەرکەفتنا ڤێ پێنگاڤێ.

مەروان رەشو سەرۆکێ گرۆپێ گەنجێن ھێزا شەرفەدین کو ژ کۆمەکا گەنجێن خوە بەخش ئەڤ گرۆپە پێک دھیت گۆت نوکە ل ھەموو دەڤەرێن ئاوارێن شنگالێ لێ دئاکنجی ناڤ دھێنە تۆمار کرن و پرۆسە دی یا بەردەوام بیت ھەتا ھەموو ئاوارە دھێنە دیتن، یێ پیدڤی چارەسەریێ بیت دێ ناڤێ وێ ھێتە تۆمار کرن و بلند کرن بۆ وەلاتێ ئەلمانیا، ئەو ژی دیارکر کو بەرنامەک ھاتیە دانان ب ھەڤکاریا حوکمەتا ئەلمانیا ھەتا پێنچ ھزار پەککەفتیێن کارەساتا شنگال بھێنە رەوانە کرن بۆ وەلاتێ ئەلمانیا ب مەرەما چارەسەریێ.

ناڤبری ئەو ژی خۆیاکر کو کارەساتا شنگالێ ب سەدان وەلاتی پەککەفتی و نەخۆش کرینە ھەر چەندە حوکمەتا ھەرێما کوردستانێ ب ھەموو سازیێن خوە ڤە بەردەوام پشتەڤانیێ و ھاریکاریا وان دکەت.

چەکدارێن نەنیاس دوو داعش ل ناڤ باژێرێ مووسل کوشتن

15/10/2014 14:35

144

شێخان، بارزان سلێمان مزووری:

بەرپرسێ نڤیسینگەھا رەوشەنبیری و راگەھاندن لقا ١٤ مووسل، سەعید مەموزینی، بۆ ئەڤرۆ نیوز دیار کر کو ئەڤرۆ نیڤرۆ ١٥/١٠ ژ لایێ ھندەک چەکدارێن نەنیاس ڤە ل ناڤ باژێرێ مووسل تەقە ل چەکدارێن داعش ھاتەکرن و دو چەکدار ھاتنە کوشتن.

ناڤبری دیار کر کو ئاڤ و کارەب ل نەخوشخانێن موووسل ھاتیە بڕین، سەرەرایی ھندێ نەخوشخانە خالی ماینە ژ دەرمان و کەل و پەلێن پێتڤی و گۆت: “رەوشا نەخوشخانا گەلەک یا خرابە ھەمی تشت لێ ھاتینە بڕین ب چ رەنگاڤە دەرمان ناگەھنێ”.

نيشاندان 1...1,050 2,050 3,050 3,0563,0573,058...3,093 زێده‌تر

لاپه‌ر 3,057 ژ 3,093