دوهی دوشەمبی 30/6/2025، مەسرور بارزانی سەرۆكێ حوكمەتا هەرێما كوردستانێ، پێشوازی ل پاتریك دۆرێل، بالیۆزێ فرەنسا ل ئیراقێ كر.
د دیدارەكێدا كو یان برێم، قۆنسلێ گشتیێ فرەنسا ل هەرێما كوردستانێ بەرهەڤبووی، بیر و بۆچوون ل دۆر زێدەتر پێشئێخستنا هەڤبەندیێن دو ئالییانە و رەوشا گشتییا ئیراقێ و دەڤەرێ هاتنە لێكگۆهارتن.
تەوەرەكێ سەرەكیێ كۆمبوونێ، تایبەت بوو ب پێدڤییا چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالیدا، سەبارەت ڤێ چەندێ دووپاتی ل گرنگییا رێزگرتنێ ل قەوارەیێ دستووریێ هەرێما كوردستانێ و دابینكرنا مافێن دستووری وشایستەیێن دارایی یێن خەلكێ كوردستانێ هاتە كرن.
هەردو ئالی د هەڤڕابوون ل سەر پێدڤییا پاراستنا ئاسایش و ئارامییا دەڤەرێ.

ئەندامەكێ دەستەیا كارگێرییا مەكتەبا سیاسییا پارتی دیموكراتی كوردستان راگەهاند: دەمێ وێ چەندێ یێ هاتی داخواز بكەین، دادگەها فیدرالییا ئیراقی ب گۆڕەی مادەیا 92 ژ دستوورێ بەردەوام ئیراقێ بهێتە دروستكرن.
پشتی قەبوولكرنا داخوازییا دادوەر جاسم عەمیری، سەرۆكێ دادگەها فیدرالییا ئیراقێ و پێشنیازكرنا دادوەرەكێ دی بۆ دانانا وی وەكو سەرۆكێ دادگەها فیدرالی، كارڤەدانێن جۆرا و جۆر دروست بوون.
د ڤی چارچۆڤەیدا، هشیار زێباری، ئەندامێ دەستەیا كارگێرییا مەكتەبا سیاسییا پارتی دیموكراتی كوردستان، د پێگەهێ تایبەتێ خوە ل تۆرا ئێكس بەلاڤكر» دادپەروەریكرن بنەمایێ فەرمانرەوایەكرنێیە. پشتی وێ قەیرانا دادوەری ل گەل دادگەها بلند یا فیدرالی هاتییە پێش، نوكە دەمێ وێ چەندێیە كو هەموویان داخوازا دووبارە دروستكرنا دادگەها فیدرالی ب گۆڕەی دستووری و ب گۆڕەی بڕگەیا دویێ ژ مادەیا 2 ژ دستووری بكەین».
هشیار زێباری ئەوژی بەرچاڤكر» ئەڤە ژی ژ پێخەمەت بدەستڤەئینانا ئارامییا سیاسی بۆ دەولەتا ئیراقێ یا فیدرالییا دیموكراتییا ئێكگرتی، هەروەسا بدەستڤەئینانا سەربخوەییا دادوەرییا دوور ژ سیاسیكرنێ».
دهێتە زانین، ب گۆڕەی مادەیا 92 ژ دستوورێ بەردەوامێ ئیراقێ، پێدڤییە دادگەها فیدرالی ژ چەند تەخان پێك بهێت كو ئەوژی ( دادوەر، قانوونزان و شارەزایێن فیقهێ ئیسلامی)، كارێن وان هەموو كەسان ژی ب گۆرەی قانوونەكا تایبەت ب دادگەها فیدرالی دێ هێتە رێكخستن، بەلێ ئەو دادگەها فیدرالییا نوكە هەی، ژ بلی وێ چەندێ تنێ ژ (دادوەران) پێك دهێت، ب گۆڕەی قانوونەكا راستڤەكری كار دكەت كو بەری بكاربوونا دستوورێ بەردەوامێ ئیراقێ هاتییە دەركرن.

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: شاندێن دانوستاندكارێن هەولێرێ و بەغدایێ گەلەك نێزیك بووینە ژ رێككەفتنێ و چارەسەرییا بنەڕەتی بۆ كێشەیا مووچەیێن فەرمانبەرێن هەرێما كوردستانێ.
د. سەباح سوبحی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندامێ لژنەیا پەترۆل و غازێ ل جڤاتا ناڤبری گوت» ژ نێزیك ئاگەهداری دانوستاندنێن د ناڤبەرا شاندێ دانوستاندكارێ حوكمەتا هەرێما كوردستانێ و حوكمەتا فیدرالییا ئیراقێ نە و نێزیكی رێككەفتنێ بووینە ل گەل بەغدا».
د. سەباحی گوت ژی» شاندێن دانوستاندكار یێن هەرێما كوردستانێ و ئیراقا فیدرال گەلەك ب هووری و ب درێژی بابەتان ل گەل هەڤدو گەنگەشە دكەن و هەروەسا رۆژا دوشەمبی كۆمبوونەكا ئێكلاكەر هەبوو ل سەر بابەتێ پەترۆلێ و مووچەیێن ئەڤسالە، هەموو بزاڤ ژی بەر ب چارەسەرییەكا دووماهیێ نە».
وی پەرلەمانتاری باس ل وێ چەندێ ژی كر» ل كۆمبوونا رۆژا سێشەمبی یا جڤاتا نوونەرێن ئیراقێ ب فەرمی چارەسەرییا بنەڕەتی بۆ مووچەیێ فەرمانبەرێن هەرێما كوردستانێ دێ هێتە راگەهاندن».
هەروەسا ل دووڤ چەندین ژێدەران ژبەر وێ پێشڤەچوونا كۆمبوونێن هەردو شاندێن حوكمەتا هەرێما كوردستانێ و حوكمەتا ئیراقا فیدرال، ل رۆژا سێشەمبی جڤاتا وەزیرێن ئیراقێ دێ بڕیارێ ل سەر هنارتنا مووچەیێ مەها گۆلانێ یێ فەرمانبەرێن هەرێما كوردستانێ دەت، هەڤدەم وان ژێدەران ئاماژە ب وێ چەندێ ژی كر كو ل نێزیك دێ دەست ب هنارتنا پەترۆلا هەرێما كوردستانێ هێتە كرن.

چاڤدێرەكا سیاسی دبێژیت: بەغدا ئەركێ خوە یێ دستووری و قانوونی بەرانبەر هەرێما كوردستانێ بجهنائینیت و ب بڕیارا سیاسی فەرمانبەرێن هەرێمێ سزا ددەت، هەروەسا دیاركر: نەهنارتنا بەهرا بودجەی و شایستەیێن دارایی و مووچەیێ فەرمانبەرێن هەرێمێ ژ ئالیێ وەزارەتا داراییا حوكمەتا فیدرالی، بڕیارەكا تمام سیاسییە و سزادانا فەرمانبەر و هەڤوەلاتیێن هەرێما كوردستانێیە.
د. نەدا مێرگەسۆری، چاڤدێرا سیاسی گوت» بڕیارا راگرتنا مووچەیێن فەرمانبەرێن هەرێما كوردستانێ بەرۆڤاژی دستوورێ ئیراقا فیدرال و قانوونێن پەیوەندیدارێن دارایی یە، گرنگە و پێدڤییە هەردو حوكمەت كێشەیێن دارایی چارەسەر بكەن، تاكو ئێدی مافێن هەڤوەلاتی و فەرمانبەرێن هەرێمێ نەهێتە بنپێكرن».
د. نەدا مێرگەسۆری گوت ژی» ئارامییا سیاسی و جڤاكی ژی ل ئیراقێ ب هەموو شێوەیەكی یا گرێدایە ب ئارامی و جهگیرییا هەڤبەندیێن د ناڤبەرا هەرێما كوردستانێ و حوكمەتا فیدرالیدا، لەوما گرنگە حوكمەتا ئیراقێ یا راستگۆ بیت د هەڤبەندیێن خوە ل گەل هەرێمێ وچارەسەركرنا كێشەیێن دارایی و پرسیچن دستووری و قانوونی و ب ئەجیندایێن ڤی ئالی و ویێ دی نە لڤیت و بەرژەوەندییا هەڤوەلاتیێن هەرێما كوردستانێ ل بەرچاڤ بیت».
رۆهنكر ژی» پێدڤییە حوكمەتا فیدرالییا ئیراقێ و ب تایبەتی محەمەد شیاع سودانی بۆ چارەسەرییا ڤێ پرسێ ب نیازەكا رۆهن كار بكەن، بۆ وێ چەندێ مافێ هەڤوەلاتییان ب دستووری بهێتە پاراستن نەك ب پشتبەستنێ ب بڕیارێن سیاسی».
د. نەدا مێرگەسۆری دیاركر ژی» نابیت وەزیرا دارایی ب بڕیارا سیاسی، مووچەیێ فەرمانبەرێن هەرێمێ راگریت و رێككەفتن و دستووری و قانوونێ پشت گوه بهاڤێژیت، چونكە ئەوا ل سەر حوكمەتا هەرێمێ بوو یا ئەنجامدای و ئەركێن خوە یێن دستووری یێن بجهئیناین، ئەو حوكمەتا فیدرالی و وەزیرا دارایییە كو بەهانەیێن نە دستووری و سیاسی دئینن بۆ وێ چەندێ ماف و شایستەیێن دارایی یێن هەرێما كوردستانێ راگرن و ژ ئەگەرێ وێ چەندێ فشارێن زێدەتر بێخنە سەر هەرێمێ بۆ وێ ئێكێ هەرێم زێدەتر پێشنەكەڤیت».
ل دووماهیێ گوت ژی» مخابن هندەك ئالی و نوونەرێن كوردان ژی ل بەغدایێ، رۆلەكێ نەرێنی و دوژمنكارانە دگێرن بۆ وێ چەندێ كێشەیێن د ناڤبەرا هەرێمێ و بەغدایێ دا زێدەتر بكەن و پشكا مەزن یا چارەسەر نەبوونا ڤان كێشەیان هەبوونا ئەجیندایێن دەرەكییە و تێكڤەدانا بابەتایە ب نیازەكا دۆژمنكارانە دژی هەرێما كوردستانێ بۆ نەئارامكرنا هەرێما كوردستانێ و ئالۆزكرن و دژواركرنا رەوشا ژیانا خەلكی كو ئەڤە ژی ب راستی دژی هەموو پرنسیبێن ئەخلاقی و دستووری و قانوونییە».

سەرۆكێ هەرێما كوردستانێ و قونسلێ نوو یێ هندستانێ كۆمبوون، هەردو ئالییان دوپاتی ل پێشڤەبرنا هەڤبەندییان كر.
سەرۆكایەتییا هەرێما كوردستانێ راگەهاند» د كۆمبوونەكێدا نێچیرڤان بارزانی، سەرۆكێ هەرێما كوردستانێ پیرۆزباهییا دەستبكاربوونێ ل بریجیش كۆمار، قۆنسلێ نوو یێ هندستانێ كر و هیڤییا سەركەفتنێ بۆ خواست و پشتەڤانییا ئالیێن پەیوەندیدارێن هەرێما كوردستانێ بۆ سەرئێخستنا ئەركێ وی، دوپاتكر» .
ب گۆڕەی بەیاننامەیا سەرۆكایەتییا هەرێما كوردستانێ» هەردو ئالییان دوپاتی ل خواستا دو ئالییانە بۆ پێشڤەبرنا هەڤبەندییان، هەروەسا چاوانییا بەفرەهكرنا هاریكارییا هەڤپشك د وارێن جودا جودا دا گەنگەشەكر».
د كۆمبوونێدا هەردو ئالییان رۆناهی ئێخستە سەر كار و چالاكیێن دەستێ كاری و كۆمپانیێن هندستانی ل ئیراقێ و هەرێما كوردستانێ.

ب گۆڕەی ژێدەرێن مالپەرێ (ئەلمۆنیتەر) یێ ئەمریكی، بڕیارە ل چەند رۆژێن داهاتی تۆم باراك، هنارتیێ تایبەتێ سەرۆكێ ئەمریكا بۆ سووریێ سەرەدانا هەولێرا پایتەختێ هەرێما كوردستانێ بكەت و ل گەل مەسرور بارزانی، سەرۆكێ حوكمەتا هەرێما كوردستانێ كۆمببیت، ئەڤە ژی دێ ئێكەمین سەرەدانا وی یا فەرمی بیت بۆ هەرێما كوردستانێ.
وی ژێدەری راگەهاند، بڕیارە تۆم باراك كو د هەمان دەمدا بالیۆزێ ئەمریكایە ژی ل توركیا، ل گەل مەسرور بارزانی، سەرۆكێ حوكمەتا هەرێما كوردستانێ كۆمببیت.
سەرەدانا تۆم باراكی د دەمێ هەڤبەندییا تەلەفۆنییا 9 خزیرانێ ل گەل سەرۆكێ حوكمەتا هەرێمێ پلان بۆ هاتبوو دانان. هەردو ئالییان بڕیاردا كو گرنگییا كێشەیێن گرێدای سووریێ و ئیراقێ و دەڤەرێ، پێدڤی ب كۆمبوونەكا روو ب روویی هەیە.
وی مالپەرێ ئەمریكی بەلاڤكر ژی، مەسرور بارزانی د دانوستاندنێن خوە دا ل گەل تۆم باراكی داكۆكی ژ مافێن كوردێن سووریێ كریە و دبیت د چارچۆڤەیێ كۆمبوونا چاڤەڕێكریدا ل هەولێرێ دانوستاندن ل دۆر ڤێ چەندێ د بەردەوام بن.
مالپەرێ (ئەلمۆنیتەر) ئاماژە ب وێ چەندێ ژی كریە هەر ل هەولێرێ تۆم باراك بۆ جارا ئێكێ دێ ل گەل مەزلوم عەبدی، فەرماندەیێ گشتیێ هێزێن سووریا دیموكرات كۆمبیت.
وی مالپەری دیاركر ژی، تۆم باراك، شارەزایی ل دەڤەرێ هەیە، ب بزاڤ رۆلێ خوە وەك هنارتیێ سەرۆكێ ئەمریكا دگێریت و ب دۆست و كەسەكێ نێزیك ژ دۆنالد ترەمپ، سەرۆكی ئەمریكا دهێتە هەژمارتن.

دیدار/ دلۆڤان ئاكرەیی

عەلی حسێن، ئەندامێ مەكتەبا سیاسییا پارتی دیموكراتی كوردستان بۆ رۆژنامەیا (ئەڤرۆ) سەبارەت ب چارەسەرییا پرسا مووچەیێ مووچەخۆرێن كوردستانێ راگەهاند» بابەتێ مووچەیێ خەلكێ كوردستانێ بابەتەكێ گرنگە و چارەسەركرنا ڤێ پرسێ گرێدای ب سیستەمێ ئیراقێ ڤەیە كو سیستەمێ فیدرالی ماف و ئەركێن هەرێما كوردستانێ دیار كرینە ، بەلێ ب نێرینا مە ئەوا دهێتە روودان بابەتەكێ سیاسییە كو ژ سالا 2014 وەرە هەر جار ب بەهانەیەكا بێ بنەما كو ئاراستەیا وێ رەوشێ سیاسییە كارتا دارایی و ئابۆری و مووچەیێ خەلكێ كوردستانێ ب كاردئینن كو خەلك و حوكمەتا هەرێمێ هەڤبەری هەڤ بكەن ، ئەگەر نە هەرێمێ چو بەهانەیێن تەكنیكی و قانوونی بۆ حوكمەتا فیدرال نەهێلاینە وەكو چارەسەركرنا كێشەیا تەوتێنێ كو ب رێكا (هەژمارا من) ئەوا دادگەها فیدرالی ژی دانپێدان پێكری و بابەتێ پەترۆلی كو سێ جاران ئەڤ بابەتە چوویە دادگەها بەغدایێ و ل دادگەهێ د بەرژەوەندیا هەرێما كوردستانێدا بڕیار ل سەر هاتیە دان ، لەوما دبێژین یا رۆهن و زەلالە پرسا مووچەی بتنێ بەهانەیێن سیاسینە بەلێ ب هیڤینە ب رێكا هاتنوچوونا شاندێن هەولێرێ و بەغدایێ ئەڤ پرسە بهێتە چارەسەركرن».
ل دۆر رۆلێ پارتی ل چارەسەركرنا پرساندا دبێژیت» پارتی ژ بەرپرسیارییان نا ڕەڤیت و پارتی خوە ب بەرپرس دزانیت ، بەلێ ئەڤ بابەتە بتنێ گرێدای پارتەكا سیاسی نینە چونكو بابەتێ هەرێما كوردستانێیە وەك قەوارەیەكا دستووری كو د ڤی قەوارەیێ سیاسیدا كۆمەكا ئالیێن سیاسی تێدا هەنە، ل حوكمڕنیێ ژی چو جاران پارتی بتنێ نەبوویە كو بریارێ بدەت ، و ڤێ چەندێ پێتڤی ب ئیرادەیەكا سیاسی یا هەمەجۆر هەیە و بێگۆمان هندەك جاران ئاریشەیێن مە ل گەل بەغدا ژ بەر نە ئێكگرتن و نە ئێكدەنگییا كوردان بوویە ، وەك پێكنەئینانا حوكمەتا هەرێمێ و گیرۆكرنا هەلبژارتنان و بەغدا ژی مفا ژ ڤان دەرڤەتان دیتییە ، لەوما پێدڤییە ئەم د رژد و پێداگیر بین چونكو بابەتێ مووچەی گرێدای ب ژین و ژیارا خەلكێ كوردستانێیە و ئەم بەرپرسین ژ ژیانا ڤی خەلكی و ب رێكێن قانوونی و فشارێن نێڤدەولەتی و یێن ناڤخوە و یێن جەماوەری بزاڤێ دكەین بۆ چارەسەركرنا ڤان پرسگرێكان و مەسرور بارزانی كور هەم سەرۆكێ حوكمەتێیە و هەم ژی نوونەرێ پارتییە ب رێكا هەڤبەندییان ل گەل سەرۆك وەزیرێن ئیراقێ و سەرۆكێ دادگەها فیدرالی و جڤاكا نیڤدەولەتی و نەتەوەیێن ئێكگرتی و ئالیێن سیاسی یێن هەرێمێ ل سەر هێلە بۆ چارەسەركرنا ڤێ پرسێ لەوما ژی پارتی كاراكتەرا سەرەكییە ل هەرێما كوردستانێ و سەرۆكێ حوكمەتێ ژی جێگرێ سەرۆكێ پارتییە و كاراكتەرەكێ گرنگە د ناڤ پارتیدا كو پارتی پشتەڤانییا پێنگاڤێن وی دكەت بۆ ڤەدیتنا دەرگەهەكی بۆ چارەسەركرنا پرسان نەخاسمە پرسا مووچەیێ خەلكێ كوردستانێ».
عەلی حسێنی دیاركر ژی» پرسا مووچەیێ خەلكێ كوردستانێ د دەستێن تەیف سامی دا نینە چونكو ئەو راستە وەزیرە بەلێ وەك فەرمانبەرەك رەفتار ل گەل وێ دهێتە كرن و وێ شیانێن بریاڕدانێ نینن ، بەلكو سەرۆك وەزیرێن ئیراقێ بڕیار ب دەستە و ب دانا دەستهەلاتی ب ئالیێن پەیوەندیدار دێ كێشە هێنە چارەسەركرن و مە تێبینی ل سەر سەرۆك وەزیرێن ئیراقێ هەنە و مە گەهاندینە وی و بەرسڤێن وی ژی پەیامێن سیاسی ل پشت هەنە و رەنگە د دەستهەلاتا ویدا نەبیت ژبەر رەوشا سیاسییا ل ئیراقێ و دەڤەرێ هەی بڕیاران بدەت».
ل دۆر پێكئینانا حوكمەتا نوویا هەرێما كوردستانێ گوت» ل سەر كاغەزا سیاسی و چەوانییا ب هەڤڕا كاركرنێ ل گەل ئێكەتی رێككەفتینە و ئەڤە ژی پێنگاڤەكا گرنگە ، هەرچەندە هندەك كێشە هەبوون وەكو بابەتێ باوەریێ و جوداهییا تێروانێن جودا و خواستا پارتی قەبوولكرنا ئەنجامێن هەلبژارتنانە كو پێگەهێ پارتی و ئێكەتی ل سەر وی ئەنجامی بهێنە دیار كرن ، هەر چەندە پارتی بەردەوام ئێكەتی ب هەڤپشكاخوە دیتییە و چاڤپووشی گەلەك جاران ل پشكێن خوە ژ پۆستان ل هەرێمێ و حوكمەتا فیدرالیدا ژی كریە ، پارتی د كۆمبووناندا مەبەست و حەزا خوە بۆ ئێكەتی رۆهن كریە و ل سەر وێ چەندێ رێككەفتن هاتیە كرن و پارتی پشكا خوە ژ پۆستان گەهاندییە ئێكەتی و ئەوژی د نوكەدا ل قۆناغا دیراسەتكرنێدانە و پارتی چو بابەتان ب هێلا سور نزانیت».
ئەندامێ مەكتەبا سیاسییا پارتی گوت» : پارتی كاغەزەك رادەستی ئێكەتی كریە ل سەر پشكێن وێ ژ وەرگرتنا پۆستان و هەر چەندە ئێكەتیێ هندەك تێبینی هەبوون بەلێ نە دوێ قۆناغێدانە كو نەهێنە چارەسەركرن بەلێ د كۆمبوونا داهاتیدا دێ گەنگەشە ل سەر وان ژی هێتە كرن و پارتی پۆستێ سەرۆكێ هەرێمێ ب پشكا خوە دزانیت ل دووڤ ئەنجامێن هەلبژارتنان و هەڤالێن هەردو شاندێن پارتی و ئێكەتی ژی چو جاران باسی پۆستێ سەرۆكێ هەرێمێ نەكریە بۆ ئێكەتیێ بەلكو ب بەردەوامی دووپاتی ل بەلاڤكرنا پۆستان ل دووڤ ئەنجامێن هەلبژارتنان كریە كو هەردو پۆستێن سەرۆكێ هەرێمێ و سەرۆكێ حوكمەتێ پشكا پارتینە و پێشبینییێ ژی دكەم بەری هەلبژارتنێن جڤاتا نوونەرێن ئیراقێ حوكمەتا نوو یا هەرێمێ بهێتە پێكئینان».

هەولێر، قائید میرۆ

بەرپرسەكێ پارتی دیموكراتی كوردستان ئاشكراكر، پارتی یا بەرهەڤە بۆ هەلبژارتنێن جڤاتا نوونەرێن ئیراقێ و بەردەوام پارتی دگەل ئەنجامدانا پرۆسەیا هەلبژارتنان بوویە، هەروەسا گوت ژی: ئارمانجا پارتی ئەڤە زێدەتری ئێك ملیۆن دەنگان ل هەلبژارتنێن جڤاتا نوونەرێن ئیراقێ بدەستڤە بینیت و دێ بیتە حزبا ملیۆنی ب پشتەڤانییا جەماوەرێ خوە.
ساناو فەرەیدۆن، ئەندامێ كۆمیتەیا ناڤەندییا پارتی دیموكراتی كوردستان بۆ رۆژنامەیا (ئەڤرۆ) گوت» پارتی هەردەم یا بەرهەڤە بۆ ئەنجامدانا هەلبژارتنان، چو جاران پارتی دگەل پاشئێخستنا پرۆسەیا هەلبژارتنان نەبوویە، چونكە ئەم حزبەكین بەردەوام خزمەتا خەلكی دكەین و هەردەمێ هەلبژارتن بهێنەكرن پارتی یا بەرهەڤبوویە، پارتی یا ب هێزە ب پشتەڤانییا جەماوەرێ خوە بۆ هەلبژارتنێن ئیراقێ، ل سنوورێ سلێمانیێ ئەو دەنگێن پارتی بەری نوكە ب هەر ئەگەرەكێ كێم كربن زێدە بكەین، پارتی پشتی كۆنگرەیێ 14ێ هندەك گوهۆڕین ئەنجامداینە و خەلك ژی ب ئەرێنی باسێ گوهۆڕینێن پارتی دكەت، ئانكو گوهۆڕینێن پارتی رەنگڤەدان هەبوویە د ناڤا خەلكێ كوردستانێدا، پارتی زێدەتر هاتیە د ناڤا جەماوەریدا و دێ یا بەردەوام ژی بیت، چونكە خەلكێ هەرێما كوردستانێ باوەری ب پارتی دایە و پارتی ژی خوە ب خزمەتكارا خەلكی دزانیت و دخوازیت خزمەتا هەموو دەڤەران بكەت بێی جوداهی، چاڤێ خەلكی ژی ل دەستێ پارتییە هەم بۆ خزمەتێن زێدەتر و هەم ژی بۆ هەموو هەلوەستێن نیشتیمانی و نەتەوەیی هەر پارتییە بەرگریێ ژ مافێن هەڤوەلاتییان دكەت».
ساناو فەرەیدۆن ئاماژەكر» هەكە ئەنجامێن هەلبژارتنێن بۆری بەرچاف وەر بگرین و بهێنە هەڤبەركرن دگەل هەلبژارتنێن بەرێ ئەڤە بێگومان دەنگێن پارتی ل هەلبژارتنێن ئەڤسالە دێ گەلەك زێدەتربن ژ هەلبژارتنێن سالا بۆری یێن پەرلەمانێ كوردستانێ، ژ بەر كو ل هەلبژارتنێن سالا بۆری پارتی زێدەتری 800 هزار دەنگان بۆ پەرلەمانێ كوردستانێ بدەستڤەئینابوون، هەلبژارتنێن ڤێجارێ یێن ئیراقێ دێ دەنگێن دەڤەرێن كوردستانی یێن دەرڤەی ئیدارەیا حوكمەتا هەرێما كوردستانێ ژی پشكداریێ كەن و زێدەبن، ئەڤە ئەم د پشتڕاستین دێ دەنگێن پارتی ژ ئێك ملیۆن دەنگان دەرباز بن و ئارمانجا پارتی ژی ئەوە زێدەتری ئێك ملیۆن دەنگان د هەلبژارتنێن جڤاتا نوونەرێن ئیراقێدا بدەستڤە بینیت و دێ بیتە حزبا ملیۆنی ب پشتەڤانییا جەماوەر و دەنگدەرێن خوە».

كۆمسیۆنا بلند یا سەربخوە یا هەلبژارتنان ل ئیراقێ راگەهاند: زێدەتر ژ 150 هەڤپەیمانی و ئالیێن سیاسی و لیستێن تاكەكەسی، لیستا ناڤێن بەربژارێن خوە بۆ هەلبژارتنێن جڤاتا نوونەرێن ئیراقێ پێشكێش كرینە، هەروەسا دیاركر: هووربینییا ناڤێن بەربژاران دێ مەهەكێ ڤەكێشیت.
جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ گوت» 160 هەڤپەیمانی و ئالیێن سیاسی و لیستێن تاكەكەسی، لیستا ناڤێن بەربژارێن خوە بۆ هەلبژارتنێن جڤاتا نوونەرێن ئیراقێ پێشكێشی كۆمسیۆنێ كریە».
گوت ژی» كۆمسیۆن یا بەردەوامە د كارێ هووربینییا داتا و پێزانین و بەلگەنامەیێن بەربژاران و دەمێ مەهەكێ ژی پێدڤییە بۆ تمامكرنا وێ پرۆسەیێ».
پێشتر موهەنەد مستەفا، ئەندامێ تیما راگەهاندنا كۆمسیۆنا بلند یا سەربخوە یا هەلبژارتنان ل ئیراقێ گوت» پرۆسەیا وەرگرتنا لیستێن بەربژاران ب دووماهی هاتیە و ناهێتە درێژكرن و پێنگاڤا دوویێ پێك دهێت ژ وەرگرتنا پێزانینێن بەربژاران ژ نڤیسینگەها كۆمسیۆنێ ل پارێزگەهان و پاشی هنارتنا وان بۆ ناڤەندا نیشتمانی یا كۆمسیۆنێ و ژ وێرێ بۆ ئالیێن پەیوەندیدار».
گوت ژی» هەر ئێك ژ وەزارەتێن بەرگریێ و ناڤخوە، دەستەیا لێپرسینێ و دادپەروەریێ، دەستەیا دەستپاكیێ، هەڤدەم دەزگەهێن ئەمنی ل هەرێما كوردستانێ، وەزارەتا ناڤخوەیا حوكمەتا هەرێما كوردستانێ، رێڤەبەرییا بەلگەیێن تاوانان و وەزارەتێن پەروەردەیێ و خواندنا بلند، سەرپەرشتییا پرۆسەیا هووربینیێ دكەن و دەمێ 15 رۆژان دێ بەردەوام بیت».
ل 9/4/2025، نڤیسینگەها رۆژنامەڤانییا محەمەد شیاع سودانی، بەلاڤكربوو، جڤاتا وەزیران ب پترییا دەنگان، 11/11/2025 وەكو رۆژا ئەنجامدانا هەلبژارتنێن جڤاتا نوونەرێن ئیراقێ دیاركربوو.

سەرۆك مەسعود بارزانی، ب هەلكەفتا هاتنا سەرێ سالا نوو یا مشەختی، پیرۆزباهی ئاراستەی هەموو موسلمانێن كوردستانێ و ئیراقێ و جیهانێ كر.
د پەیانا سەرۆك بارزانی دا هاتیە» ب هەلكەفتا هاتنا ئێكێ مەحەرەمێ و سەرێ سالا مشەختی گەرمترین پیرۆزباهیێن خوە ئاراستەی هەموو موسلمانێن كوردستانێ وئیراقێ و جیهانێ دكەم».
سەرۆك بارزانی د پەیاما خوە دا گوت ژی» لاڤا ژ خودایێ مەزن دكەم هاتنا سالا نوو یا مشەختی ببیتە ئەگەرێ ئاسوودەییێ و خوەشیێ بۆ هەموو ئالییەكی و ئاشتی و ئارامی ل دەڤەرا مە پەیدا ببیت».