سەرۆكێ حوكمەتا هەرێما كوردستانێ، مەسرور بارزانی پشكداری د گۆپیتكا حوكمەتێن جیهانێ ل دوبی كر و تێدا پەیڤەك پێشكێشكر و راگەهاند، چاڤێ خەلكێ مە ل ئەوێ چەندێیە چارەنڤیسێ خوە دیاربكەت و سەقایەكێ بۆ پەیدا بكەین كو ب ئاسودەیی بژیت و مە بزاڤ بۆ ئاسایشێ و سەقامگیریێ و باشكرنا رەوشا ئابۆری كرییە.
دوپاتی ل ئەوێ چەندێ ژی كر كو پێدڤییە وێرەكی هەبیت هەتا بشێین كێشەیان چارەسەر بكەین، مافێ مەیە ژی بگەهینە مافێ چارەنڤیس، بەلێ دۆستێن مە داخوازێ ژ مە دكەن نەدادپەروەریێ قەبوول بكەین.
سەرۆكێ حوكمەتا هەرێما كوردستانێ باس ل ئەوێ چەندێ ژی كر، نابیت هیچ كەسەك ژ رێزگرتنێ ل مافێن نەتەوەیی و مافێن گەلان بترسیت، گەلێ كورد داخوازییەكا رەوا هەیە بۆ مافێ چارەنڤیسی. هەروەسا گۆت ژی» ژ بەر هەلویستێن مە نوكە بووینە قوربانی و مەترسییا رژد ل دەڤەرا مە یا هەی».
سەبارەت شەڕێ داعشێ گۆت: بەرانبەر داعشێ راوەستیاین و هەكە مە وەنەكربا نوكە رەوشا دەڤەرێ دا ب جۆرەكێ دی بیت، ئەم سەركەفتین».
ل دۆر گوهۆڕینا كەشوهەوای باسكر كو هەولێر و دوبەی یێن د ناڤ گەردۆنەكا گەرم دا و ئەم ئاگەهدارێ ئەوێ مەترسیێ نە و دبیت ببیتە ئەگەرێ ئەوێ چەندێ د دەمەكێ كێم دا تێچوویەكێ مەزن ل دۆر پیسبوونا ژینگەهێ بچیت و ئالۆزی و كێشەیێن دی پەیدا ببن.
دەقێ پەیڤا سەرۆكێ حوكمەتا هەرێمێ…

ئەڤرۆ وەكو سەرۆك وەزیرێن هەرێما كوردستانا ئیراقێ بۆ هەوە د ئاخڤم. ئەو هەرێما ب درێژاهییا بیست سالێن بۆری شیای ژناڤ پاشمایێن ئیراقا بەرێ خوە ئێكبێخیت. ل گەل ئەوێ چەندێ دا، ئەز وەكو كەسەكی بۆ هەوە د ئاخڤم كو مل ب ملێ ئەو خودان بڕیارێن دەڤەرا مە یا خوەشتڤی راوەستیایمە، پێكڤە روو ب روویێ گەلەك ئاستەنگێن هەڤپشك بووینە.
شەڕ، یاخیبوون، دژواری و نەبوونا سەقامگیرییا ئابۆری، مخابن یێن بووینە پشكەك ژ پێكهاتەیا مە، نابیت ماندەلیێ ل ئەوی تێچووی بكەین كو ژ ئەنجامێ ئەوان ئاستەنگان ل سەر ئاستێ گەشەپێدانا جڤاكی و ئابۆری روو ب روویێ مە بووینە.
بەلێ د چارچۆڤەیێ دانوستاندنێن مە دا ل گەل خودانێن بڕیارێن رۆژهەلاتا ناڤین و دەرڤە، من هەست ب هەبوونا خواستەكێ بۆ رزگاربوونێ ژ نەهامەتیێن هەڤپشكێن مە یێن بۆری كر.
ل سەرانسەری دەڤەرا مە خواست و ئیرادەیەك بۆ پێشكەفتنێ یا هەی، هەست ب ئەوێ چەندێ ژی هاتییە كرن، گوهۆڕین نە تنێ یا پێدڤییە، بەلكو پێدڤییەكا حەتمی ژی یە. مللەتان چ ل سەر ئاستێ تاكی یان كۆم چاڤێ ئەوان ل مافێن ئەوانە بڕیارێ ل چارەنڤسێ خوە بدەن. مافێ دەستەبەركرنا سەقایەكی كو وەلاتی پشێن تێدا ب ئاسوودەیی بژیت.
ب دیتنا من ل ڤێرێ چار پێنگاڤ بۆ ئەوێ پێشكەفتنێ یێن هەین، كو ئەم هەموو بزاڤێ بۆ دكەین، ئەوژی: سەقامگیرییا سیاسی، ئاسایش، پێشكەفتنا ئابۆری و روو ب رووبوونا گوهۆڕینێن سەقای. ئەڤە پرسێن ئالۆزن. بەلێ چارەسەركرنا ئەوان پێدڤی ب رێیازەكا تایبەت ب هەر ئێك ژ ئەوان یا هەی.
گومان تێدا نینە هەژمارەكا بابەتێن جیۆسیاسی ل دەڤەرا مە بۆ دەمەكێ گەلەك دوور و درێژ هاتینە خستن د ناڤ سەبەتا كێشەیان دا، بەلێ بۆچی دهێنە پشت گوه هاڤێتن؟ هەبوونا وێرەكیێ بۆ بڕیاردانێ ل دەمێ هەبوونا كێشەیێ دا پێنگاڤا ئێكێ یە بەر ب چارەسەركرنا كێشەیێ ب خوە.
ئەو قەیرانا ل فلستینێ دبینین سەبارەت ب گەلەك ژ مە هەتا رادەیەكی جهێ دلتەنگیێ یە. زیانێن مرۆڤایەتی گەلەك گرانبەهانە ل سەر وەلاتیێن سڤیل. سەرەرای چارەسەرنەكرنا هۆكارێن ریشەیی یێن ستەمكاریێ, هەكە بەری 80 سالان مامەلە ل گەل مافێن بنەرەتی یێن فلستینییان هاتبا كرن، یان ژی د دەمێ ئەوان سالێن بۆری دا، ئەوی دەمی دەلیڤەیا روودانا ئەو نەهامەتیێن نوكە دبینین دا كێمتر بن، بەلێ ل شوینا ئەڤێ چەندێ، پرس هاتە پشت گوهـ هاڤێتن و ئالۆزتربوو، د دەمەكی دا خودان بەرژەوەندییان ئەو ڤالاهییە وەكو دەلیڤە بۆ ئەجندەیێن خوە بكارئینا.
دشیاندایە هەمان پێناسە بۆ گەلێ كورد ژی بهێتە كرن. مە ژی داخوازییەكا رەوا یا هەی بۆ بڕیاردانێ ل مافێ چارەنڤیس. دۆست و هەڤپەیمانێن مە دانپێدان ب ئەوی مافی كرییە، بەلێ د هەمان دەمدا دبێژنە مە، پێدڤیێن سیاسی ئاستەنگان دئێخنە پێشبەری هاریكاریێن ئەوان و رێگرن ل پێشبەری دادپەروەرییا دیرۆكی دا.
داخواز ژ مە دهێتە كرن ئەڤێ نە دادپەروەریێ قبوول بكەین. د دەمەكی دا ئەو نەدادپەروەرییە بوویە خۆراكەك بۆ نەیەكسانیێ، هەژاریێ، گەندەلیێ و نەسەقامگیرییا سیاسی. بۆ ئەوێ چەندێ وەلاتی و جڤاك و ئالیێن دی یێن جڤاكی ب ئەڤی شێوەی دلسۆزییا خوە بۆ ئەوان دیاربكەن. پێدڤییە هەست بكەن پشكەك ژ دادپەروەرییا سروشتی بدەستڤەئینایە. پێدڤییە رێك پێ بهێتە دان ب گۆڕەی مەرجێن خوە یێن تایبەت نەخشەیێ پاشەڕۆژا خوە بكێشن. نابیت هیچ كەسەك ژ رێزگرتنێ ل مافێن خوە بترسیت، یان ژی وەكو رەوشا مە ژ مافێ مللەتان بترسیت. رێزگرتن ل ئەوان مافان سەقامگیریێ ب هێز دكەت و بەر پێشڤەچوونێ پەیدا دكەت.
ل سەر ئاستێ ئەمنی، مە پێدڤی ب بزاڤێن زێدەترە بۆ چارەسەركرنا ئاسایشا مە یا گشتی. هاریكاریێن هەرێمایەتی بۆ شكەستنا داعشێ نموونەیەكە بۆ ئەوێ چەندێ مفای ژێ وەرگرین كا چاوان ئارمانجێن خوە بدەستڤەدئینین و چاوان خودان مەژی دشێن مل ب ملی هەڤدو ب راوەستن.
ل گەل زێدەبوونا گرژییان ل غەزە، ئیراق، سووریێ و دەریا سوور، بزاڤ بووینە پێدڤییەك تاكو پلانەكا نوو بۆ پاراستنا بەرژەوەندیێن نیشتمانی و هەرێمایەتی و جیهانی بهێنە دانان.
پێدڤییە روو ب روویێ ئەوان بین یێن ب هێرشكرنێ ل جیرانێن خوە و ژ پێخەمەت بەرژەوەندیێن خوە بزاڤا شەڕی دكەن. دڤێت ئەوێن بەرپرسیار بهێنە نیاسین. نابیت جڤاكێ نێڤدەولەتی بەرامبەر ژێدەرێ گەفان نەرمیێ نیشا بدەت، هەتا هەكە ئەو گەف ل گەل بەرژەوەندییا تایبەت ژی دژی ئێك بن.
ل سەر ئاستێ هەرێمی ژی ژ بەر هەلوەستێن خوە باجەكا گەلەك گران ددەین. نوكە دەڤەر روو ب روویێ جۆرەكێ جودا یێ قەیرانان بوویە. دڤێت هەموو پێكڤە كاری بۆ پاراستنا ئاسایش و سەقامگیرییا هەرێمی بكەین. بێ بەهانە ئەم بووینە ئارمانج. دڤێت ئەڤ شەڕە بهێتە راگرتن. وەكو پێشتر من گۆتی. ل ڤێرێ و ل پایتەختێن دی ژی، كوردستان چ جاران نەبوویە گەف ل سەر هیچ كەسەكی. ئەم فاكتەرێ ئاشتیێ و سەقامگیریێ نە. ئەم دخوازین رەفتارێن هەرێمایەتی ل سەر بنەمایێ رێزگرتنێ و بەرژەوەندییا هەڤپشك بیت. ئەم پێشبینییا پشتەڤانیێ دكەین و مە پێدڤی ب كارێ هەڤپشك یێ هەی بۆ روو ب رووبوونا گەفێن ئەمنی یێن مەترسیدار كو دبیت هەموو ئەو تشتان ژناڤ ببەت كو مە ب دەستڤەئیناینە.
بلا ئەڤە ساتەكا دیرۆكی بیت، سەركردە تێدا بشێن ب ئەوێ رێكێ ل هەموو جهەكی سنوورەكی بۆ دانن. مە پێدڤی ب چارەسەرییا بەردەوامە بۆ كێشەیێن ئاشكرا.
ئەم ل سەر دەمێ شەڕێ داعشێ مل ب ملێ هەڤپەیمانێن خوە بووین. ئەوی دەمی مە باشترین كار پێكڤە ئەنجامدا، هەكە ئەو چەندە مە ب دەستڤەنەئینابا، نوكە دەڤەر ب تمامی دا بیتە جهەكێ جودا، دا دەڤەرەكا پڕ بیت ژ تیرۆرستێن بیانی ئەوێن دخوازت جهێ پێین خوە ل رۆژهەلاتا ناڤین بكەن، بۆ ئەوێ چەندێ هەر ساتەكا ئەوان ڤیابا گرژی بۆمە دروست كربا. بەلێ ئەم سەركەفتین، خەباتا بیست سالێن بۆری و بەرخۆدانا چەندین سالان كورد بوونە رێكخوەشكەر بۆ ئەوێ سەركەفتنێ، ئەم وەكو مللەتەك مە مافێ ئەوێ چەندێ یێ هەی خودان سەروەری و پشكەكا نە ڤەقەتیای بین ژ رۆژهەلاتا ناڤین.
دامەزراندنا ئابۆرێ مە ل سەر بناغەیەكێ ب هێزە، بناغەیێ بنەرەتیێ ئەوان دەستكەفتان بوو كو ل كوردستانێ مە ب دەستڤەئینان، گەشەپێدانا ئابۆری ژی د ئاستەكێ بەرفرهە دا بوو بنەمایەكێ زیندی بۆ گەشەكرن و سەقامگیرییا هەرێمایەتی.
پێدڤیە سەرنجا سەركردەیان ل سەر خوەشگوەزەرانییا خەلكی بیت و بەردەوام بن ل وەبەرئێنانێ د ژێدەرێن مرۆڤی دا. پراكتێزەكرنا حوكمڕانییا باش گەلەك یا گرنگە بۆ پێشئێخستنا جڤاك و كەلتوورێن مە یێن سیاسی، مافێ وەلاتیانە ژی چاڤەڕێی ئەوێ چەندێ ژ مە بكەن كو گەشەپێدان و بەر ب پێشڤەچوون و دەلیڤەیێن كاری دروست دكەن و خۆراكن ژی بۆ هیڤی و ئارمانجان. هەكە مە شیا سەقایەكێ ئابۆری و سیاسی بۆ كێمكرنا رێژەیا هەژاریێ و گەندەلیێ پەیدا بكەین، دێ شێین دەلیڤەیێن بەلاڤبوونا توندرەویێ ژی بەرتەنگ بكەین و پلەیێن سەقامگیرییا سیاسی و ئەمنی ژی بەر ب پێش ببەین.
دشێم بێژم ل ڤێرێ خواستەكا ب كۆم بۆ روو ب رووبوونا ئێك ژ مەزنترین ئاستەنگان كو تووشی مە دبیت، یا هەی، ئەوژی گوهۆڕینێن سەقایانە، ئەڤە ژی دێ ب رێكا پەیڕەوكرنا رێبازەكا نوو و جودا بیت. ئەو سەركەفتنا وەلاتێ ئیماراتێ د مێهڤانداریكرنا گۆپیتكا 28 یا سالێن بۆری ب دەستڤەئینای، بوویە ئەگەرێ پێدانا سۆزەكێ بۆ روو ب رووبوونا زێدەبوونا گەرمێ ل جیهانێ, بەری وێرانكاری بال ب سەر هەسارا مە بكێشیت.
ئەو ئاستەنگێن ئەڤرۆ ل پێشبەرییا مە پێدڤی ب بڕیارێن وێرەكە بۆ هەمەجۆركرنا ژێدەرێن وزێ و وەبەرئێنانێ د وزا نوو دا. دەولەتا ئیماراتێ پێشەنگەكا جیهانییە د بوارێ بكارئینانا تەكنەلۆژیا نوو دا. دوبەی و هەولێر هەردو د نیڤا هەسارەكێ گەرمن دانە، ئەم ب تمامی ئاگەهداری مەترسیێن پشت گوهـ هاڤێتنا راستیەكا كارەساتبارین.
گەلەك ژ ئەوان پێگیریێن هەتا نوكە هاتینە ئەنجامدان، دژی بەرژەوەندیێن ئابۆری یێن كورتخایەنن، ئەو پێگیری و سۆز هاتینە دان بۆ پاراستنا نڤشێ داهاتی بوون، گۆمان د ئەوێ چەندێ دا نینە ڤەگوهاستن و گەهشتن و ژێدەرێ وزەیا پاقژ دبیت د دەمەكێ كورت دا تێچوویا ئەوێ یا زێدەتر بیت. بەلێ پاشكەفتێ درێژخاەین بۆ مە هەموویانە. مە ژ ئەڤی رووی ڤە پێدڤی ب وێرەكیێ، راستگۆیێ و دانپێدانێ یا هەی بۆ ئەوێ چەندێ بڕیارەكا وەسا گران بدەین. هەكە د ئەنجامدانا ئەوێ بڕیارێ شكەستنێ بینین، ژ ئەگەرێ ئەوێ چەندێ پشكەكا بەرفرهە یا ئەردی نامینیت بۆ ژیانێ، ژێدەرێن ئاڤێ دێ هشك بن و ئاسایشا خۆراكی دێ روو ب روویێ ئاستەنگەكا مەزن بیت، ژ وان ژی بیابانیبوون، كۆچكرنا ب كۆم و ژناڤچوونا ئابۆری ب دووڤ خوە دا دئینیت. پاشی دێ كۆچكرنا ناڤخوەیی، كۆچكرنا نێڤدەولەتی و گوهۆڕینا دیموگرافی بینین. هەڤڕكی ل سەر ژێدەرێن بچووك، دێ مللەتان روو ب روویێ ناكۆكییان كەت، ئەڤە ژی دێ وەكەت كێشەیەكا نێڤدەولەتییا فرە رەهەند دروست بیت.
پێدڤییە هەر وەلاتەك مامەلێ ل گەل ئەوان كێشەیێن ئابۆری، سیاسی، كەلتووری و ئەمنی بكەت كو دێ بنە ئەگەرێ كۆچكرنا ب كۆم. نوكە سەركردایەتی بۆ مەبەست و ئارمانجەكا دیاركری ژ هەموو دەمەكێ پێدڤیترە. ئەم نوكە د ناڤبەرا بڕیارب دەستێن جیهانێ و نڤشێن داهاتی دا دڤێن سەركردەیێن باوەرپێكری خەلات بكەین و زێدەتر هان بدەین. پێدڤییە ب رۆهنی ئەوێن ل گەل پێشكەفتنێ و مۆدێرنییەتێ دانە، جودا بكەین ژ ئەوێن دخوازن مە ب راوەستینن و بۆ پشتڤە بزڤرینن.
ئەم دشێین حەزێن خوە كۆمڤەبكەین بۆ روو ب رووبوونا ئەوان كێشەیێن دبنە بەربەست ل بەرمە. هەردەم یا ب ساناهی نینە وەكو سەركردەیان بنێرینە پاشەڕۆژێ. بەلێ بەرپرسیارەتییا مە ئەوە دڤێت بكەین. ئەم قەرداری ئەوانین كو باوەری دایە مە.

وەلاتیێن کورد ل رۆژئاڤایێ کوردستانێ دیار دکەن، مانا هێزێن ئەمریکا د رەوشا نها دا بۆ سووریێ و رۆژئاڤایێ کوردستانێ گەلەک یا گرنگە، چونکی رەوشا سووریێ گەلەک ئالۆزە و هەکە هێزێن ئەمریکا نەمینن دێ ل ئالیەکێ تورکیا و رژێما سووریێ و ل ئالیێ دی ژی رێکخستنا تیرۆرستی یا داعشێ ئێرشی رۆژئاڤایێ کوردستانێ کەن.

وەلاتیێن کورد ل رۆژئاڤایێ کوردستانێ دیار دکەن، نها رەوشا سووریێ گەلەک یا ئالۆزە و ئالۆزیێن دی یێن رۆژهەلاتا ناڤین ژی کاریگەریا خوە ل رەوشا سووریێ دکەن، ژ بەر ڤێ یەکێ ژی مانا هێزێن ئەمریکا بۆ ئارامیا سووریێ و رۆژئاڤایێ کوردستانێ گەلەک یا گرنگە، هەکە نها ئەمریکا هێزێن خوە ڤەکێشیت دێ جارەکا دی رێکخستنا تیرۆرستی یا داعشێ ل سووریێ و رۆژئاڤایێ کوردستانێ دەست ب کریارێن تیرۆرستی کەت و ئەو یەک دێ کاریگەریەکا خوە یا گەلەک خراب ل رەوشا سووریێ ب گشتی و یا رۆژئاڤایێ کوردستانێ ب تایبەتی کەت.
وەلاتیێن کورد ل رۆژئاڤایێ کوردستانێ وەسا دبینن، هەکە هێزێن ئەمریکا ژ سووریێ و رۆژئاڤایێ کوردستانێ نەمینن دێ تورکیا دەست ب ئۆپەراسیۆنەکا نوو ل رۆژئاڤایێ کوردستانێ کەت و ئەو یەک دێ بیتە ئەگەرێ ڤێ یەکێ جارەکا دی ب هزاران وەلاتیێن سڤیل ژ بەر شەری کۆچبەری دەڤەرێن دی ببن، ئەو یەک دێ بارێ ئابووری یێ خەلکێ ل رۆژئاڤایێ کوردستانێ گەلەک خرابتر لێ کەت، چونکی نها هێزێن ئەمریکا هەنە لێ دیسان ژی تورکیا ئێرش دکەت، ژ بەر ڤێ یەکێ ژی گەلەک یا گرنگە هەموو هێزێن سیاسی یێن رۆژئاڤایێ کوردستانێ ل گەل بەرپرسێن ئەمریکی کۆم ببن و داخواز بکەن جارێ ئەمریکا هێزێن خوە ل سووریێ و رۆژئاڤایێ کوردستانێ بهێلیت.
چاڤدێرێن سیاسی ژی وەسا دبینن هەکە ئەمریکا هێزێن خوە ڤەکێشیت، رژێما سووریێ و تورکیا دشێن ل دژی رۆژئاڤایێ کوردستانێ رێککەفتنەکا نوو بکەن و پێکڤە ئێرشی رۆژئاڤایێ کوردستانێ بکەن، چونکی بەری نها چەندین جاران تورکیا دیار کریە ئەو بەرهەڤن ل دژی رێڤەبەریا خوەسەر و هێزێن سووریا دیموکرات هاریکاریا شامێ بکەن.
ل گۆر باوەریا چاڤدێرێن سیاسی، ژ بەر شاشیێن هێزێن سیاسی ل رۆژئاڤایێ کوردستانێ نها رەوش گەلەک هەستیارە و دڤێت هێزێن کوردی هەر زوو پێکڤە دەست ب ئاڤاکرنا بەرەیەکێ کوردی بکەن، چونکی هێزێن ئەمریکا بۆ هەتا هەتای ل رۆژئاڤایێ کوردستانێ و سووریێ نامینن و دێ هەر رۆژەکێ هێزێن ئەمریکا ژ سووریێ چن، وی دەمی دڤێت هێزێن کوردی ل رۆژئاڤایێ کوردستانێ خوە بۆ هەر ئەگەرەکێ بەرهەڤ بکەن، دڤێت کورد خوە بهێز بکەن و رێ نەدەن تورکیا و رژێما بەشاری ئێرشی رۆژئاڤایێ کوردستانێ بکەن، دڤێت د ئاستێ دبلۆماسی دا کارێن مەزن بۆ پشتەڤانیا رۆژئاڤایێ کوردستانێ بهێنە کرن، ژ بۆ ڤێ یەکێ ژی دڤێت هەر دو جڤاتێن کوردی ل رۆژئاڤایێ کوردستانێ هەموو ئاریشێن هەی د ناڤبەرا خوە دا چارەسەر بکەن.

سەرۆكێ هەرێما كوردستانێ، نێچیرڤان بارزانی د پەیامەكێ دا پیرۆزباهی ل ئێكەتییا نڤیسەرێن كورد كر.
د پەیاما سەرۆكێ هەرێما كوردستانێ دا هاتییە» ل سالڤەگەرا 54 یا دامەزراندنا ئێكەتییا نڤیسەرێن كورد، ب گەرمی پیرۆزباهیێ ل نڤیسەرێن كورد دكەم، هیڤییا سەركەفتنێ و پێشكەفتنا بەردەوام بۆ دخوازم، ب رێز و پێزانین ڤە ل رۆل و خزمەتا ئەوان یا پیرۆز بۆ پێشڤەبرنا زمان و وێژەیا كوردی دنێرم».
نێچیرڤان بارزانی گوت ژی» نڤیسەرێن دلسۆزێن كورد هەردەم بۆ هشیاری و پاراستنا ناسنامەیا نەتەوەیی و نیشتمانی یا كورد و كوردستانێ و ئاڤاكرنا جڤاكەكێ مەدەنی، رەنج و خزمەتەكا مەزن كرییە و بزاڤێن بەردەوام بۆ چەسپاندنا بهایێن پێكڤەژیانێ و هەڤدو قەبوولكرنێ و لێبۆرینێ كرینە».
ل دووماهییا پەیاما خوە دا، سەرۆكێ هەرێما كوردستانێ گوت» سلاڤ ل گیانێ ئەوان نڤیسەرێن مەزن یێن ب خزمەت و بەرهەمێن ئەوان هەردەم دێ د هزرا مە دا مینن و ب رێز ڤە بیرئینانا ئەوان دكەین».

سەرۆكێ حوكمەتا هەرێما كوردستانێ، مەسرور بارزانی، ب سەرۆكایەتییا شاندەكێ حوكمەتا هەرێمێ بۆ پشكداریكرنێ د گۆپیتكا جیهانی یا حوكمەتان بەر ب وەلاتێ ئیمارات چوو.
نڤیسینگەها راگەهاندنا سەرۆكێ حوكمەتا هەرێما كوردستانێ د بەیاننامەیەكێ دا بەلاڤكر»
مەسرور بارزانی، سەرۆكێ حوكمەتا هەرێما كوردستانێ ل سەر داخوازنامەیەكا تایبەت یا شێخ محەمەد بن راشد ئال مەكتووم، جێگرێ سەرۆكێ دەولەتا ئیمارات و سەرۆكێ جڤاتا وەزیرێن ئیمارات و حاكمێ دوبەی، بەر ب ئیمارات چوو بۆ پشكداریكرنێ د گۆپیتكا جیهانییا حوكمەتان كو دێ ل رۆژێن 12 هەتا 14 ئەڤێ مەهێ بەردەوام بیت.
هەروەسا سەرۆكێ حوكمەتا هەرێما كوردستانێ د چارچۆڤەیێ گۆپیتكێ دا، دێ چەندین دیدار و كۆمبوونان ل گەل بەرپرس و بیرمەند و خودانكارێن ئەرەب و هەرێمی و جیهانی هەبن.
مەسرور بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت ل سەر تۆرا جڤاكی یا ئێكس (تویتەرا بەرێ) بەلاڤكر» خوەشحالم ب پشكداریكرنێ د گۆپیتكا جیهانی یا حوكمەتان 2024».

نێزیكی شەش رۆژان بوو شاندێ سەرۆكایەتییا هەرێما كوردستانێ ل ئەمریكابوو، پشتی چەندین كۆمبوونان ل گەل بەرپرسێن كۆنگرێس و كۆچكا سپی و وەزارەتا دەرڤە و بەرگرییا ئەوی وەلاتی، دوهی دوماهی ب سەرەدانا خوە ئینا. فەلاح مستەفا، هاریكارێ سەرۆكێ هەرێمێ بۆ كاروبارێن دەرڤە و ئەندامێ شاندێ دیاركر، د هەموو كۆمبوونێن شاندێ سەرۆكایەتییا هەرێمێ ل واشنتۆن ئەمریكا پشتەڤانییا خوە بۆ هەرێمێ دوپات دكر.
دوهی ئێكشەمبی 11/2/2024، سەرۆكایەتییا هەرێما كوردستانێ بەلاڤكر» شاندەك ب سەرۆكایەتییا فەوزی حەریرێ، سەرۆكێ دیوانا سەرۆكایەتییا هەرێمێ و ئەندامەتییا فەلاح مستەفا، هاریكارێ سەرۆكێ هەرێما كوردستانێ بۆ كاروبارێن سیاسەتا دەرڤە، نیاز سالح مستەفا، بەرپرسێ پەیوەندیێن دەرڤە و دبلۆماسی ل سەرۆكایەتییا هەرێما كوردستانێ و دگەلدا تریفە عەزیز، نوونەرا حوكمەتا هەرێما كوردستانێ ل واشنتۆن ل رۆژا 5/2/2024 سەرەدانا ئەمریكا كربوو و چەندین دیدار و كۆمبوون ل گەل ئالیێ ئەمریكی ئەنجامدابوون».
ب گۆڕەی بەیاننامەیەكا سەرۆكایەتییا هەرێمێ» د چارچۆڤەیێ سەردانا خوە دا، شاندێ سەرۆكایەتییا هەرێمێ ل گەل بەرپرسێن كۆنگرێسێ و كۆچكا سپی و وەزارەتا دەرڤە و بەرگریێ كۆمبوویە و دەربارەی پەیوەندیێن ئەمریكا ل گەل هەرێما كوردستانێ د چارچۆڤەیێ رێككەفتنا ستراتیژی د ناڤبەرا ئیراقێ و ئەمریكا دا دانوستاندن كرییە و رەوشا گشتییا ئیراقێ و هەرێما كوردستانێ و دەڤەرێ و چەندین پرسێن جهێ گرنگییا هەڤپشك باسكرن».
هەروەسا شاندێ سەرۆكایەتییا هەرێما كوردستانێ سوپاس و پێزانین بۆ پشتەڤانییا كۆنگرێسی و حوكمەتا ئەمریكی ل ئیراقێ و هەرێما كوردستانێ دەربڕی و دوپاتی ل گرنگییا بەردەوامییا هاریكارییا هەڤپشك و بەرهنگاربوونا تیرۆرێ و پاراستنا ئارامی و سەقامگیرییا ئیراقێ و ب دوورگرتنێ ژ ئالۆزیێن دەڤەرێ كر».
سەرۆكایەتییا هەرێما كوردستانێ دبێژیت ژی» ژ ئالیێ خوەڤە بەرپرسێن ئەمریكی بەردەوامییا هاریكاری و پشتەڤانییا وەلاتێ خوە بۆ ئیراقێ و هەرێما كوردستانێ دوپاتكر».
فەلاح مستەفا، هاریكارێ سەرۆكێ هەرێما كوردستانێ بۆ كاروبارێن دەرڤە د داخۆیانییەكێ دا راگەهاند» ئەمریكا دۆستایەتی و پشتەڤانییەكا مەزن بۆ هەرێما كوردستانێ یا هەی و ل هەموو كۆمبوونان دا پشتەڤانییا خوە بۆ هەرێما كوردستانێ دوپاتكر».
فەلاح مستەفا گوت ژی» پەیوەندیێن هەرێما كوردستانێ و ئەمریكا د چارچۆڤەیێ پەیوەندیێن ئەوی وەلاتی دانە ل گەل ئیراقێ و ئەم چ بۆ هەرێما كوردستانێ و چ بۆ ئیراقێ بیت، دخوازین د بەرژەوەندییا هەردو ئالیان پەیوەندییەكا ستراتیژی یا دۆمدرێژ هەبیت» .
ل دۆر ئێكخستنا هێزێن پێشمەرگەی، فەلاح مستەفای ئاماژەكر، ئەمریكی سەبارەت ئێكخستنا هێزێن پێشمەرگەی د بێهن فرەهن و گوت» راستە هندەك جاران تووشی بێ ئومێدیێ بوون و پێشبینییا ئەوێ چەندێ دكر كو پێدڤی بوو بلەزتر هاتبا كرن، بەلێ یا گرنگە ئەوە سەرۆكایەتییا هەرێما كوردستانێ ل گەل بڕێڤەچوونا پڕۆسەیێ یە وەكو هەی».
دیاركر ژی» رەخنەیێن ئەمریكییان ل ئێكخستنا هێزێن پێشمەرگەی یێن كێمبووین و چەند پێشكەفتن هەبین، وەسا زێدەتر ژی رەخنە دێ كێمتر بن، بەلێ رەخنەیێن ئەوان د خانەیا دۆستایەتی و خەمخۆرییا ئەوان بوو بۆ مە».
هێزێن هەڤپەیمانان و ئەمریكا ل دەستپێكرنا شەڕێ داعشێ ل سالا 2014 ب مەبەستا بەرهنگاربوونا تیرۆرێ، هاریكارییا پێشمەرگەی دكەن، ئەو هاریكاری ژی د چارچۆڤەیێ بودجەیا تایبەت یا پێنتاگۆنێ یە بۆ پڕچەككرن و مەشقپێكرنا پێشمەرگەی و لەشكرێ ئیراقێ یە. قەلاح مستەفا دبێژیت» ب گۆڕەی ئەوی بەرنامەیێ هەی، دێ هاریكاریێن ئەوان بۆ هێزێن پێشمەرگەی بەردەوام بن».
پشتی 7 ئۆكتۆبەرێ و دەستپێكرنا شەڕێ د ناڤبەرا بزاڤا حەماس و ئیسرائیلێ و پەیدابوونا ئالۆزییان، هێزێن نێزیك ژ ئیرانێ ب بەهانەیا ئەوێ چەندێ ئەمریكا پشتەڤانیێ ل ئیسرائیلێ دكەت، زێدەتر ژ 150 جاران هێرش كرینە سەر بەرژەوەندیێن ئەوی وەلاتی ل سووریێ و ئیراقێ. ئەمریكا ژی چەندین جاران بەرسڤا ئەوان دایە. نوكە پترییا ئالیێن شیعی دخوازن هێزێن ئەمریكی و هەڤپەیمانان ژ ئەگەرێ (پێشێلكرنا سەروەرییا) ئاخا ئیراقێ ژ ئەوی وەلاتی دەركەڤن.
فەلاح مستەفا ل دۆر ئەوێ چەندێ دبێژیت» پشتی 10 سالان ژ هەبوونا هێزێن هەڤپەیمانان ل ئیراقێ و هەرێما كوردستانێ، بێگومان پێدڤییە ئالیێ ئەمریكی و ئیراقێ پێكڤە روونن بۆ ئەوێ چەندێ هەلسەنگاندنێ بۆ رەوشێ بكەن و شێوازێ پەیوەندیێن داهاتی دیار بكەن».
هاریكارێ سەرۆكێ هەرێما كوردستانێ بۆ كاروبارێن دەرڤە دوپاتی ل ئەوێ چەندێ كر» ل گەل كۆمبوون و تێكگەهشتنا د ناڤبەرا حوكمەتا ئیراقێ و ئەمریكا داینە بۆ ئەوێ چەندێ بگەهنە ب بڕیارەكا ئێكلاكەر» هەروەسا گوت» بێگومان هەلسەنگاندنەكا بابەتیانە ل سەر ئەوان گەفێن هەین، هەروەسا بەرهەڤییا هێزێن ئیراقی و هەرێما كوردستانێ، دێ بڕیارێ ل شێوازێ مانا هەڤپەیمانان و پاشەڕۆژا پەیوەندیێن ئەوان ل گەل ئیراقێ دەن»

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، وەزارەتا كۆچ و كۆچبەران ل ئیراقێ چەندین جاران كەلوپەل و خورانا دەم ب سەرڤوچووی ل سەر كەمپێن ئاوارەیێن شنگالێ ل هەرێما كوردستانێ بەلاڤكرییە، هەڤدەم دخوازن ب زۆری ئاوارەیان بزڤرینن دەڤەرێن ئەوان د دەمەكی دا حوكمەتا هەرێما كوردستانێ ئەو كارە رەتكرییە.
ماجد شنگالی، ئەندامێ جڤاتا نوونەران ژ فراكسیۆنا پارتی و سەرۆكێ لژنەیا ساخلەمیێ ل جڤاتا ناڤبری گوت» مە گەلەك رەخنە ل كارێن وەزارەتا كۆچ و كۆچبەرێن ئیراقێ یێن هەین، ژ ئەگەرێ ئەوێ چەندێ ئاوارەیێن شنگالێ وەكو كارتەكا سیاسی بەرانبەر هەرێما كوردستانێ دهێنە بكارئینان».
ماجد شنگالی ئاماژەكر» ژبلی ئەوێ چەندێ گەلەك جاران خوارنا دەم ب سەرڤەچووی ل كەمپێن ئاوارەیێن شنگالێ هاتییە بەلاڤكرن، هەڤدەم ل سالا 2023 تنێ سێ جاران كەلوپەل و ئاهێن خوارنێ ل سەر كەمپێن ئاوارەیێن شنگالێ هاتییە بەلاڤكرن كو پێدڤی بوو مەهانە كەلوپەل و ئاهێن خوارنێ ل سەر ئەوان هاتبانە بەلاڤكرن».
دوپاتكر» بۆ هەموو ئالییەكی یا رۆهنە كو وەزارەتا كۆچ و كۆچبەران ل ئیراقێ گەندەلیێ د بەلاڤكرنا كەلوپەل و ئاهێن خوارنێ دا دكەت و چەندین جاران ئەو كەلوپەلە ب پارە ل دەرڤەی كەمپان هاتینە فرۆتن».
خویاكر ژی» مخابن وەزیرا كۆچ و كۆچبەران ل ئیراقێ ل سەردەمێ مستەفا كازمی وەزیرا ئەوێ وەزارەتێ بوو كو نەشیابوو د ئەنجامدانا كارێن خوە دا یا سەركەفتی بیت، بەلێ مخابن د ئەڤێ كابینەیێ ژی دا دوبارە ب وەزیرا ئەوێ وەزارەتێ هاتیە دانان و سەرۆك وەزیرێن ئیراقێ ژی ب گەندەلیێن وەزارەتا كۆچ و كۆچبەران یێ ئاگەهدارە، بەلێ مخابن هەتا نوكە هیچ هەلویستەك نەبوو ل بەرانبەر كارێن ئەوێ وەزارەتێ».
رۆهنكر ژی» ئارمانجا وەزیرا ناڤبری دائێخستنا كەمپێن ئاوارەیانە ل هەرێما كوردستانێ و دخوازیت ب زۆری خەلكێ ل ئەوان كەمپان بۆ جهێن وان بزڤرینیت، د دەمەكی دا حوكمەتا هەرێمێ ئەو كارە رەتكرییە، بەلێ بەهانەیا ئەوان بۆ ئەڤی كاری ئەوە كو هەرێما كوردستانێ ل گەل وەزارەتا كۆچ و كۆچبەران یا هەماهەنگ نینە، بەلێ ئەڤ ئاخڤتنە د دوورن ژ راستیێ».

پشتی هەلبژارتنا وی وەكو جێگرێ ئێكێ یێ پارێزگارێ نەینەوا، سیروان رۆژبەیانی، سوپاسییا سەرۆك بارزانی بۆ بەخشینا ئەوێ باوەریێ دكەت و راگەهاند، سەرۆك بارزانی هەردەم داخواز كرییە د خزمەتا پێكهاتەیێن نەینەوا دا بین.
سیروان رۆژبەیانی، جێگرێ ئێكێ یێ پارێزگارێ نەینەوا گوت ژی» پێشتر ژی مە خزمەتا هەموو پێكهاتەیێن نەینەوا كرییە، د پاشەڕۆژێ دا ژی ب ئێك چاڤ دێ نێرینە هەموو قەزا و ناحییان و هەموو پێكهاتەیان».
خویاكر ژی» وەكو هەردەم چاوان دەرگەهێ مە بۆ هەموو پێكهاتەیان یێ ڤەكری بوو، ژ نوكە و پێڤە ژی هەر دەرگەهێ مە دێ یێ ڤەكری بیت».
دوپاتكر» پێكڤەژیانا نەینەوا دێ پارێزین و دێ جهێ باوەرییا هەموو دەنگدەران بین» و ئاماژەكر» پەیاما مە پێكڤەژیان و خزمەتكرنە، وەكو ئێك تیم دێ هاریكارێن هەڤدو بین، تاكو نەینەوا بەر ب پێشڤە ببەین».
جڤاتا نوو یا پارێزگەها نەینەوما بۆ جارا سیێ پشتی ئەنجامدانا هەلبژارتنێن جڤاتێن پارێزگەهێن ئیراقێ كۆمبوویە، و تێدا هەردو جێگرێن پارێزگارێ نەینەوا هاتنە هەلبژارتن و سیروان رۆژبەیانی ژ فراكسیۆنا پارتی دیموكراتی كوردستان ب پترییا دەنگان ب جێگرێ ئێكێ یێ پارێزگارێ نەینەوا هاتبوو هەلبژارتن.

زنار تۆڤی:

د. سەباح سوبحی، ئەندامێ جڤاتا نوونەرێن ئیراقێ ژ فراكسپیۆنا پارتی ئەندامێ لژنەیا پەترۆل و غازێ ل جڤاتا ناڤبری، بۆ رۆژنامەیا (ئەڤرۆ) گوت» پێشتر وەزارەتا پەترۆلا ئیراقێ سەرەدانا هەولێرێ كربوو، ل گەل كۆمپانیێن پەترۆلێ كۆمبوونەك كربوو، د ناڤبەرا هەردو ئالییان دا تێكگەهشتنەكا باش هەبوو بۆ ئەوێ چەندێ تێچوویێ دەرئێخستنا پەترۆلێ ل هەرێمێ بهێتە زێدە كرن، نوكە رێككەفتن ل وەزارەتا پەترۆلێ هاتییە كرن كو تێچوویێ دەرئێخستنا پەترۆلێ بۆ هەر بەرمیلەكێ د ناڤبەرا 18 بۆ 20 دۆلاران بیت، وەسا بڕیارە بهێتە هنارتن بۆ جڤاتا وەزیران، ئەو ژی بۆ راستڤەكرنێ دێ هنێرنە جڤاتا نوونەران، چونكی ئەو بڕگە یا گرێدایە ب مادەیێ راستڤەكرنا مووچەیێ فەرمانبەران، د مادەیێ 11 یێ بڕگا دووێ، دقانوونا بودجەیی دا باس دكەت كو» پێدڤییە هەردو پێكڤە بهێنە راستڤەكرن، هەكە بهێتە راستڤەكرن، چ ئاستەنگ د هنارتنا پەترۆلا هەرێما كوردستانێ دا بۆ ژ دەرڤە نامینن و دێ دەستپێكەت».
گوت ژی» رێككەفتن هاتییە كرن و نوكە هاتییە جهگیركرن بۆ ئەوێ چەندێ د ناڤا هۆلا جڤاتا نوونەران دا بهێتە راستڤەكرن، چونكی ئەوان دڤێت هنارتنا پەترۆلا هەرێما كوردستانێ زوو دەستپێبكەتەڤە، هەروەسا نەهنارتنا پەترۆلا هەرێمێ د بەرژەوەندییا حوكمەتا ئیراقێ ژی دا نینە، چونكی زیانێن نەهنارتنا پەترۆلا هەرێمێ نوكە دگەهنە پتر ژ 13 ملیار دۆلاران، بتنێ ئەو بەربەستە مابوو ئەو ژی دێ تەمام بیت و هنارتنا پەترۆلا هەرێما كوردستانێ دێ دەستپێكەتەڤە، نوكە ئەم چاڤەڕێی هاتنا راستڤەكرنا قانوونا بودجەی بۆ جڤاتا نوونەران دكەین، هەردەمێ بگەهیت دێ دەست ب راستڤەكرنێ كەین».

ئەندامەکێ سەرکردایەتیا پارتا کۆماری دیار کر، پشتی هەلبژارتنێن باژێرڤانیان دێ ل تورکیا قۆناغەکا نوو دەستپێ کەت، ئاکپارتیێ دڤێت سەرۆکاتیا باژێرڤانیا ئستەنبولێ بدەستڤە بینیت و پشتی کو پێگەهێ خوە ل تورکیا بهێز بکەت دێ ل گەل پارتا دەم دەست ب قۆناغەکا نوو یا چارەسەرکرنا پرسا کوردی کەت.

عەلی حەیدەر فرات ئەندامێ سەرکردایەتیا پارتا کۆماری ل تورکیا راگەهاند، نها ژ بۆ ئاکپارتیێ سەرۆکاتیا باژێرڤانیا ئستەنبولێ گەلەک یا گرنگە، ئاکپارتیێ دڤێت ب هەر رەنگێ هەی ڤێجارێ سەرۆکاتیا باژێرڤانیا ئستەنبولێ ژ دەستێ پارتا کۆماری دەرخینیت، ژ بەر ڤێ یەکێ ژی ئاکپارتیێ نەڤێت وەکو هەلبژارتنێن بۆری جارەکا دی کورد دەنگێ خوە بدەنە بەربژارێن پارتا کۆماری، ژ بەر ڤێ یەکێ ڤێجارێ رەوشەکا نوو هاتیە پێش، نها پارتا دەم بەربژارێ خوە یێ جودا بۆ هەلبژارتنان دیار کر، ئەو یەک د رەوشا نها دا د بەرژەوەندیا ئاکپارتیێ دایە، چونکی ب ڤی رەنگی دێ دەنگێ پارتا کۆماری کێم بن، وەسا دیارە رێککەفتنەکا نهێنی د ناڤبەرا ئاکپارتیێ و پارتا دەم دا هەیە.
ناڤهاتی ئەو یەک ژی دیار کر، د ناڤ ئاکپارتیێ دا ژی دەمەکە گەلەک کەس دبێژن دڤێت ژ بۆ چارەسەرکرنا پرسا کوردی ل تورکیا دەست ب قۆناغەکا نوو بهێتە کرن، هەلوەستێ نها یێ پارتا دەم ژی وەکو سەردەمێ هەدەپێ نینە، پارتا دەم نەڤێت وەکو هەدەپێ هەموو هێزا خوە بۆ دوژمناتیا ئاکپارتیێ تەرخان بکەت، هەلوەستێ چەند رۆژان بەری نها یێ سەلاحەدین دەمیرتاش ژی نیشا ددەت ئەو وەکو بەرێ سیاسەتێ ناکەن، چونکی پارتا دەم دڤێت کار بۆ بهێزکرنا پێگەهێ خوە بکەت، پارتا دەم بەرۆڤاژی هەدەپێ نەڤێت بکەڤیتە ژێر کاریگەریا چەپێن تورک و ئەو یەک ژی رەوشەکا نوو یە و گۆت: (هەکە د ڤان هەلبژارتنان دا ئاکپارتی سەرۆکاتیا باژێرڤانیا ئستەنبولێ بدەستڤە بینیت بێگومان دێ پێگەهێ ئاکپارتیێ گەلەک بهێزتر لێ هێت و پشتی هەلبژارتنان ئاکپارتیێ دڤێت ل گەل پارتا دەم دەست ب قۆناغەکا نوو یا چارەسەرکرنا پرسا کوردی ل تورکیا بکەت).
سەبارەت ب چاوانیا قۆناغا نوو یا ئاشتیێ و چارەسەرکرنا پرسا کوردی ژی ناڤهاتی دیار کر، بێگومان ئاکپارتی دێ بزاڤێ کەت چارچۆڤەکێ دیار کەت و وەسا ل گەل پارتا دەم دەست ب دانوستاندنان بکەت، لێ دڤێت ژبیر نەکەین نها هەڤپەیمانیا ئاکپارتیێ ل گەل پارتا بزاڤا نەتەوەپەرست ژی هەیە، ئەو یەک ژی ئاستەنگیەکا مەزنە، لێ دبیت ئاکپارتی و پارتا دەم نێزیکی هەڤدو ببن و وی دەمی دبیت ئاکپارتی خوە ژ پارتا بزاڤا نەتەوەپەرست دوور بکەت، چونکی د سیاسەتێ دا هەر تشتەک دشێت روو بدەت و دڤێت تورکیا خوە بۆ هەر گوهۆڕینەکێ ژی بەرهەڤ بکەت و گۆت: (براستی ژی پێدڤیا تورکیا ب قۆناغەکا نوو یا ئاشتیێ و چارەسەرکرنا پرسا کورد هەیە، هەکە ئاکپارتی ب رەنگەکێ زەلال و دوور ژ بەرژەوەندیێن تەنگ کار بۆ قۆناغا ئاشتیێ بکەت وەکو پارتا کۆماری ئەم ژی دشێین پشتەڤان بین، لێ نابیت قۆناغا ئاشتیێ تنێ ل ژێر کۆنترۆلا ئاکپارتیێ دا بیت، بەلکو دڤێت پەرلەمانێ تورکیا جهێ چارەسەرکرنا پرسا کوردی بیت).

نێچیرڤان بارزانی، سەرۆكێ هەرێما كوردستانێ د پەیوەندییەكا تەلەفۆنی دا، پیرۆزباهی ل ئیلهام ئەلییەڤ ، سەرۆكێ كۆمارا ئازەربایجانێ كر ب هەلكەفتا جارەكادی هەلبژارتنا ئەوی وەكو سەرۆكێ وەلاتێ ئازەربایجانێ.
نێچیرڤان بارزانی هیڤییا سەركەفتنێ بۆ ئەلییەڤی و پێشكەفتنا بەردەوام بۆ وەلاتێ وی خواست و دوپاتكر كو هەرێما كوردستانێ دخوازیت پەیوەندیێن وێ ل گەل ئازەربایجانێ وهاریكارییا هەڤپشك د ناڤبەرا هەرێمێ و ئازەربایجانێ بەر ب پێشڤە بچیت، ژ ئالیێ خوەڤە سەرۆكێ ئازەربایجانێ سوپاسیا سەرۆكێ هەرێما كوردستانێ كر و خواستا وەلاتێ خوە بۆ پێشڤەبرنا پەیوەندییان ل گەل ئیراقێ و هەرێما كوردستانێ دوپاتكر، هەروەسا هەردو ئالییان باس ل دوماهی دیدارا د ناڤبەرا ئەوان دا ل باكو پایتەختنا ئازەربایجانێ كر.