ئەڤرۆ

ئەندامەكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ دبێژیت، پشتی ڕوودانێن 16 ێ ئۆكتۆبەرێ، پارتی دەستهەلات ل نەینەوا نەمایە. هەروەسا دبێژیت، نوكە دەڤەر دبن دەستهەلاتا حوكمەتا ئیراقێ ژی دا نینە و سێ سەرۆك وەزیران نەشیان ئێك لیوایا حەشدا شەعبی ژ مووسلێ دووربێخن.
شێروان دوبەردانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گوت» مە داخواز كریە ڕێڤەبەرێ ناحیا باشیك د پۆستێ خوە دا بەردەوام بیت تاكو ئەنجامدانا هەلبژارتنێن جڤاتێن پارێزگەهان، بەلێ پیلانەكا سیاسی دژی پارتی دیموكراتی كوردستان هاتە كرن و بۆ دژایەتیكرنا كوردان و وەكو موزایەدەیا هەلبژارتنان ل قەزا و ناحیێن مووسل كێشە بۆ بەرپرسێن كارگێری دهێنە دروستكرن».
ئەو ئاخڤتنێن وی پەرلەمانتارێ پارتی د دەمەكی دانە، ل ڕۆژا دوشەمبی 24/4/2023 پەرلەمانتارێن فراكسیۆنا پارتی دیموكراتی كوردستان ل دەشتا نەینەوا د كۆنفرانسەكێ ڕۆژنامەڤانی دا یاداشتەكا نەڕازیبوونا فەرمی بەلاڤكر ل دۆر گوهۆڕینا ڕێڤەبەرێ ناحیە بەرپرسێن كارگێری یێن قەزایێن دەشتا نەینەوا و ب بزاڤەك بۆ پەیداكرنا كێشەیان د ناڤبەرا پێكهاتەیێن پارێزگەها نەینەوا هەژمارت.
نوونەرێن پارتی ل بازنەیێ نەینەوا هۆشداری ل دۆر ڕەوشا دەشتا نەینەوا ددەن و دبێژن، هەژمارەكا كەس و ئالیێن سیاسی، دخوازین كێشە و ناكۆكی د ناڤبەرا ئالی و پێكهاتەیێن پارێزگەها نەینەوا دروست بكەن.
شەریف سلێمان، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئێك ژ نوونەرێن پارێزگەها نەینەوایە د وی كۆنفرانسێ ڕۆژنامەڤانی دا گوت» ئەم وەكو فراكسیۆنا پارتی، دژی هەر گوهۆڕینەكا كارگێری نە كو جوداهیێ د ناڤبەرا پێكهاتەیان دا بكەت».
شێروان دوبەردانی، ئەندامێ فراكسیۆنا پارتی ل جڤاتا نوونەرێن ئیراقێ ل دۆر بڕیارێن سیاسی و كارگێری ل پارێزگەها نەینەوا دبێژیت» نوكە نەینەوا د دەستێ حوكمەتا ئیراقێ ژی دا نەمایە، ل دەمێ بۆری سێ سەرۆك وەزیرێن بەرێ یێن ئیراقێ بڕیار دەركربوو بۆ دوورخستنا ئێك لیوایا حەشدا شەعبی ل مووسل، بەلێ بڕیارا وان نەهاتە بجهئینان».

ئەڤرۆ

هەولێر، سولین سلێمان

پشتی كو ژ ئەگەرێ شەڕ و ئالۆزیان د ناڤبەرا هێزێن ئێراقی و كوردێن گوندێ (پەلكانە) ل ڕۆژئاڤایێ پارێزگەها كەركووكێ دروست بووی و تێدا هەژمارەكا وەلاتیێن كورد بریندار بووین، ب چونا هێزەكا پێشمەرگەی بۆ وی گوندی جارەكا دی ئارامی ب خوەڤە دیت.چاڤدێرەكێ سیاسی ژی دیاردكەت كو داگیركرن و سوتنا مالێن كوردان ل كەركووكێ نە تشتەكێ نوویە ل سەر دەستێن ئەرەبان.
ڕامیار جەمال، چاڤدێرێ سیاسی ومامۆستایێ پشكا پەیوەندیێن نێڤدەولەتی ل زانكۆیا سەلاحەدین بۆ ڕۆژنامەیا (ئەڤرۆ) ڕاگەهاند»جهێ داخێ یە كو هەردەم دەستهەلاتا ئەرەبان حەزا داگیركرنێ و ئازاردانا نەتەوەیێن دی هەیە».
خویاكر ژی» د دەمەكی دا ئێكەم ڕۆژا جەژنا ڕەمەزانێ بوو لێ ٤٠٠ ئەرەبێن هاوردە بێ هەبوونا هیچ وژدانەكی زیان گەهاندنە خەلكێ ڤی گوندی وكێلگەهێن وان، هەروەسا هێزێن سەربازی یێن ئیراقی ژی تەقە ل كوردێن ڤی گوندی كر».
ڤی چاڤدێرێ سیاسی ئاماژەكر» ئەڤە بۆ جارا ئێكێ نینە هێزێن ئێراقی هێرشێ دكەنە سەر خەلكێ ڤی گوندێ كوردنشین ل پارێزگەها كەركووكێ».
هەروەسا ئاشكراكر ژی» گەلەكا فەرە كو سنۆرەك بۆ وان پێشێلكاریێن دژی كوردان ل وان دەڤەران بهێتە دانان وئەڤە ئەركێ پەرلەمانتار و دەستهەلاتدارێن كورد و ئێراقێ نە كو فشارێ بكەن داكو ئێدی ئەڤ جۆرە ڕوودانە دوبارە نەبن».
ژ ئالیەكێ دی ڤە ڕێبوار تالەبانی، شیرەتكارێ حوكمەتا هەرێما كوردستانێ بۆ مادەیێ 140 ئاشكراكر ئەو كێشەیێن ل هندەك دەڤەران وەكو (پەلكانە) دهێنە دروستكرن هندەك هێز یێن ل پشت بۆ تێكدانە پەیوەندیێن باش د ناڤبەرا بەغدا و هەولێرێ دا و نیەتەكا باش هەیە ژ ئالیێ محەمەد شیاع سودانی سەرۆك وەزیرێن ئیراقێ بۆ چارەسەركرنا كێشەیان، بەلێ هەكە ئاستەنگ بۆ وی نەهێنە دروستكرن.
ڕێبوار تالەبانی دیاركر ژی» وەكو چاوان بەیاننامەیا حوكمەتا هەرێمێ ئاماژەكریە كو دەستەك هەیە بۆ تێكدانا ئەوێ پەیوەندیا باش د ناڤبەرا بەغدا و هەولێرێ دا، پێدڤیە هەم حوكمەتا هەرێمێ و هەم حوكمەتا فیدرال نەهێلن كەس دەستێوەردانێ بكەت، چونكە ڕێككەفتنەكا باش دناڤبەرا بەغدا و هەولێرێ دا هەیە بۆ پێكئینانا حوكمەتێ، پێدڤیە ژی پرسا كەركووكێ و دەڤەرێن كوردستانی یێن سنۆرێ مادەیێ 140 ب دەستووری بهێنە چارەسەركرن، مخابن حوكمەتێن ئیراقی یێن پێشتر هیچ ئیرادەیەك نەبوو بۆ چارەسەركرنا پرسا وان دەڤەران».

ئەڤرۆ

هەولێر، قائید میرۆ

بسپۆرەكێ دیرۆكا ئیراقێ ئاماژێ ب وێ چەندێ دكەت، پرۆسەیا سیاسی ل ئیراقێ ب هاریكاریا كوردان هاتیە بەرهەم و كوردان ڕۆلەكێ مەزن هەبوویە د پرۆسەیا ئازادیا ئیراقێ دا و دوبارە ئاڤاكرنا ئیراقەكا دیموكراتی، لەوڕا نابیت كورد بهێنە بێ بەهركرن ژ پرۆسەیا سیاسی یا ئیراقێ و بەردەوام پێكڤە كار بكەن بۆ بدەستڤەئینانا مافێن گەلێ كوردستانێ.
د. محەمەد كاكەسۆر، پسپۆرێ دیرۆكا هەڤچەرخا ئیراقێ بۆ ڕۆژنامەیا (ئەڤرۆ) گوت « ب درێژاهیا دیرۆكێ كوردان شەڕ دژی رژێمێن ئیراقێ كریە ب مەرەما بدەستڤەئینانا مافێن خوە یێن ڕەوا، بتایبەتی ل سەردەمێ ڕژێما بەعس كوردان بۆ دەمێ چەندین سالان شەڕكریە بۆ بدەستڤەئینانا مافێن خوە یێن رەوا، هەمیان ژی دیت هێزێن پێشمەرگەی چەندین داستان هەمبەری هێزێن ڕژێما بەعس تۆماركرن و ب خوینا چەندین شەهیدان ئەم شیاین خوە ڕاگربین ل هەمبەر ستەم و زۆرداریا وێ ڕژێمێ، بەلێ پشتی پرۆسەیا ئەنفال و كیمیابارانێ كورد شیان ڤان تاوانێن هوڤانە نیشا جیهانێ بدەن و پشتەڤانیەكا مەزن ل سەر ئاستێ نێڤدەولەتی بدەستڤەبینن بۆ ژناڤبرنا ڕژێما بەعس، د دەمێ پرۆسەیا ئازادكرنا ئیراقێ دا ژی كورد بوونە هەڤپەیمانێن ئەمریكا بۆ ژناڤبرنا ڕژێما سەدام حوسێن، هەرچەند پشتیگریا كوردان بۆ ئەمریكا ل سەردەمێ ژناڤبرنا ڕژێما بەعس مەترسی بۆ سەر هەرێما كوردستانێ هەبوو، ژ بەر كو هەكە پرۆسەیا ئازادیا ئیراقێ سەرنەگرتبا ئەڤە مەترسی هەبوو دوبارە سەدام حوسێن هێرشی سەر هەرێما كوردستانێ بكەت، بەلێ كورد د ڕژدبوون ل سەر پشتەڤانیا هەڤپەیمانیا نێڤدەولەتی بۆ شەڕێ ئازادیا ئیراقێ، بەلێ دەولەتەكا وەكو توركیا نەشیا پشتەڤانیا ئەمریكا و هەڤپەیمانێن وێ بكەت دژی ڕژێما سەدام حوسێن».
د. محەمەد كاكەسۆر گوت ژی» كوردان ڕۆلەكێ سەرەكی هەبوویە د ئازادكرنا ئیراقێ دا، لەوڕا ژی پشتی پرۆسەیا ئازادیا ئیراقێ كوردان ڕۆلەكێ دی ژی هەبوو ئەوژی ئاڤاكرنا ئیراقەكا دیموكراسی بوو، چونكە هەكە كوردان پشكداری د پرۆسەیا سیاسی یا ئیراقێ دا نەكربا بێگومان پرۆسەیا سیاسی ل ئیراقێ یا سەركەفتی نەدبوو، ب هەموو پیڤەران كوردان هاریكاریا هەڤپەیمان و هێزێن ئیراقی كر بۆ ئاڤاكرنا ئیراقا نوو، چونكە كوردان ل دەستپێكێ پشكداری د جڤاتا حوكمڕانیا دا كر ل ئیراقێ و دووڤدا هاریكاری د پێكئینانا هێزێن ئیراقی دا حوكمەت و جڤاتا نوونەرێن ئیراقێ نڤیسینا دەستووری دا كر، لەوڕا ژی پێدڤیە كورد بەردەوامبن ل سەر بدەستڤە ئینانا مافێن خەلكێ كوردستانێ و نابیت كورد بهێنە بێ بەهركرن د هەموو پرۆسەیێن ئیراقێ دا، ئیراقا نوكە بەرهەمێ كوردانە و نابیت دەستان ژێ بەردەن».

ئەڤرۆ

ئەندامەكا پەرلەمانێ كوردستانێ ژ فراكسیۆنا پارتی دیموكراتی كوردستان ڕاگەهاند، ئەوێن بایكۆتا كۆمبوونێن جڤاتا وەزیرێن هەرێما كوردستانێ كری، بەرپرسیارەتیا مەزن ل سەر ملێ وانە، ل هەموو وەلاتەكی ژی هەكە ئالیەك، یان كەسەك ژ كارێ خوە یێ حكومی یێ ڕازی نەبیت دەست ژ كاری بەردەت و بایكۆتێ ناكەت.
لیزا فەلەكەدین كاكەیی، ئەنداما پەرلەمانێ كوردستانێ ژ فراكسیۆنا پارتی و ئەنداما جڤاتا ناڤەندی یا پارتی دیموكراتی كوردستان گوت» ئەركێ سەرەكی یێ وان ئەوە بڕڤرن بۆ جڤاتا وەزیران و كار بكەن».
لیزایێ گوت ژی» ئەم وەكو پارتی دیموكراتی كوردستان د ڕژدین ل سەر ئەنجامدانا هەلبژارتنێن پەرلەمانێ كوردستانێ، نێچیرڤان بارزانی، سەرۆكێ هەرێما كوردستانێ ڕۆژا ئەنجامدانا هەلبژارتنان یا دیاركری و مەسرور بارزانی سەرۆكێ حوكمەتا هەرێما كوردستانێ بەرهەڤیێن تمام یێن دەستپێكرین بۆ وێ چەندێ حوكمەت ڕێكاران بگریتەبەر بۆ ئەنجامدانا هەلبژارتنێن پەرلەمانێ كوردستانێ د ژڤانێ خوە یێ دیاركری دا».
هەروەسا گوت» بۆ پارتی تاكە بژاردە ئەنجامدانا هەلبژارتنایە، بەلێ مە پێخوەشە هەموو ئالی پێكڤە ڕێكبكەڤن و هەلبژارتنان بهێنە ئەنجامدان، چونكە پرۆسەیا هەلبژاتن گرەنتیا پاراستنا قەوارەیێ هەرێما كوردستانێ یە و پرۆسەیەكا دیموكراسیە كو بەردەوام هەرێما كوردستانێ شانازی پێكریە و پێدڤیە د ژڤانێ خوە دا بهێنە ئەنجامدان».
ئەوژی بەرچاڤكر» ڕاستە د ڕەوشەكا هەستیار داینە، بەلێ چاوان د دەمێن بۆری دا ڕوو ب ڕوویێ قەیرانان بووینە و نوكە ژی ئەڤ ڕەوشەدێ دەرباز بیت، وەلاتیان پشتڕاست دكەین كو حوكمەتا هەرێما كوردستانێ و ب تایبەتی پارتی دیموكراتی كوردستان ژ بەرپرسیارەتیێ نا ڕەڤیت و دێ بەرپرسیارەتیێ هەلگریت، ئەوێن بایكۆتا كۆمبوونێن جڤاتا وەزیران كری، هەكە ئەڤرۆ د خەما خەلكی دابن بلا بزڤرنە جڤاتا وەزیران و هەموو تشتەك ب دانوستاندنێ چارەسەری بۆ دهێتە دیتن».
لیزا فەلەكەدین دیاركر ژی» ئەەڤ ڕەوشا هاتیە پێش مخابن ڕەوشەكا نالەبارە ل هەرێما كوردستانێ هەتا نوكە، بەلێ د بێ ئۆمێد نابین، پارتی و ئێكەتی دو هێزێن سەرەكی نە و وان بۆریەكێ پڕ شانازی هەیە ب تایبەتی پارتی، وان هەموو قەهرەمانان ژ پێخەمەت ڤێ قەوارەی گیانێ خوە بەخشی و شەهیدبوون».

ئەڤرۆ

سەرۆك مەسعود بارزانی ل سالڤەگەرا تۆپبارانكرنا زانكۆیا سلێمانیێ و باژێرێ قەلادزێ پەیامەك بەلاڤكر و تێدا دبێژیت» ئەو كارەسات ستەمەكا مەزن و بەرپەڕەكێ دی یێ درندییا ڕژێما بەعس بوو بەرانبەر گەلێ كوردستانێ».
سەرۆك مەسعود بارزانی د پەیاما خوە دا دبێژیت» هێز و ئیرادەیا گەلێ كوردستانێ ژ فرۆكە و ناپالمان ب هێزتربوو و ل دووماهیێ ئیرادەیا كوردستانێ ل سەر ستەمێ و داگیركاریێ دا ب سەركەفت».

ئەڤرۆ

نێچیرڤان بارزانی، سەرۆكێ هەرێما كوردستانێ ل سالڤەگەرا 49 یا تۆپبارانكرنا زانكۆیا سلێمانیێ و باژێرێ قەلادزێ، پەیامەك بەلاڤكر و تێدا ڕاگەهاند» ب ئارمانجگرتنا زانكۆیا سلێمانیێ و باژێرێ قەلادزێ، بزاڤەكا دی یا نەزۆك یا ڕژێما بەعس بوو بۆ شكاندنا ئیرادەیا خەلكی و بزاڤا ڕزگاریخوازا كوردستانێ».
سەرۆكێ هەرێما كوردستانێ د پەیاما خوە دا دبێژیت» ل سالڤەگەرا 49 سالیا تۆپبارانكرنا زانكۆیا سلێمانیێ و باژێرێ قەلادزێ، ب ڕێز ڤە بیرئینانا شەهید و قوربانیێن وێ تاوانا ڕژێما بەرێ یا ئیراقێ دكەین. سەرێ ڕێزێ ل بەردەم گیانێ وان یێ پاقژ د چەمینین وسلاڤان بۆ خێزان و كەسوكارێن وان یێن سەربلند د هنێرین».
گۆت ژی» ب ئارمانجگرتنا زانكۆیا سلێمانیێ و باژێرێ قەلادزێ، بزاڤەكا دی یا نەزۆك یا ڕژێمێ بوو بۆ شكاندنا ئیرادەیا خەلكی و بزاڤا ڕزگاریخوازا كوردستانێ، بەلێ شەهیدكرنا قوتابی و مامۆستایێن زانكۆیێ و خەلكێ سڤیل یێ قەلادزێ، ورەیێن زێدەتر ب گیانێ بەرهنگاربوونا گەلێ كوردستانێ بەخشی و ل سەر داخوازیێن خوە یێن ڕەوا و خەباتێ بۆ ئازادیێ زێدەتر بەردەوام بوو».
ل دووماهیا پەیاما خوە گوت» د ڤێ هەلكەفتێ دا هەموو پشتەڤانیەكێ بۆ داخوازیێن خەلكێ نیشتمانپەروەرێ قەلادزێ و پشدەر دووپات دكەین و پێدڤیە ژ هەموو ڕوویەكی ڤە زێدەترخزمەتا وێ دەڤەرێ بهێتە كرن. دەڤەرا پشدەر بەردەوام كەلها شۆڕەش و سەرهلدانێن كوردستانێ بوو و ژ پێخەمەت ئازادیێ دا خودانا گەلەك شەهید و قوربانیێن مەزنە».

ئەڤرۆ

سەرۆكێ حوكمەتا هەرێما كوردستانێ، مەسرور بارزانی ڕاگەهاند، ب ڕێز ڤە بیرئینانا شەهیدێن قەلادزێ و هەموو شەهیدێن گەلێ كوردستانێ دكەین.
ل سالڤەگەرا هەردو كارەساتێن تۆپبارانكرنا باژێرێ قەلادزێ ل سالا 1974 و گوللەبارانكرنا سەرهلدانا 1982، مەسرور بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت دا ل سەر تۆرا جڤاكی یا تویتەری دبێژیت» ب ڕێز ڤە بیرئینانا شەهیدێن قەلادزێ و هەموو شەهیدێن گەلێ كوردستانێ دكەین» هەروەسا گوت» بەردەوام ل بیرا مەنە».
دهێتە زانین ل 24/4/1974 فرۆكەیێن ڕژێما بەعس باژێرێ قەلادزێ و زانكۆیا سلێمانیێ ل وی باژێری تۆپبارانكرن و د ئەنجامدا 163 كەس شەهید بوون كو 9 كەس ژوان قوتابیێن زانكۆیێ بوون و نێزیكی 300 كەسان ژی برینداربوون.
ل سالا 1982 ل دەمێ بیرئینانا 24 نیسانێ و وێ تۆپبارانكرنێ، خەلكێ قەلادزێ دژی ڕژێما بەعەس سەرهلدا و ڕژێمێ دەست دڕێژی ب گوللەیان لێكر و دئەنجامدا دو كەس شەهیدبوون و پێنج كەسێن دی ژی برینداربوون.

ئەڤرۆ

هەولێر، قائید میرۆ

بڕیارە جڤاتا نوونەرێن ئیراقێ دەست ب كۆمبوونان بكەت بۆ پەسەندكرنا پڕۆژە قانوونا بودجەیا گشتی یا ئیراقێ، پەرلەمانتارەكێ پارتی دیموكراتی كوردستان ژی دبێژیت، پشتی پەسەندكرنێ قانوونا بودجەی دێ چیتە سەرۆكایەتیا كۆماری بۆ ئیمزا سەرۆك كۆماری و ل ڕۆژنامەیا فەرمی هێتە بەلاڤكرن بەلێ نێزیكی دو مەهـان دێ پێچن، لەوڕا ژی حوكمەتا ئیراقێ بڕیاردایە ٤٠٠ ملیار دیناران وەكو قەر بدەتە هەرێما كوردستانێ بۆ بەلاڤكرنا مووچێ فەرمانبەران.
شێروان دوبەردانی، ئەندامێ جڤاتا نوونەرێن ئیراقێ ژ فڕاكسیۆنا پارتی دیموكراتی كوردستان بۆ ڕۆژنامەیا (ئەڤرۆ) گۆت»بەری جەژنا ڕمەزانێ خواندنا دویێ بۆ پڕۆژە قانوونا بودجێ گشتیێ ئیراقێ هاتیەكرن و بڕیارە ل چەند ڕۆژێن داهاتی وەزیر و پارێزگار بهێنە گازیكرن بۆ جڤاتا نوونەرێن ئیراقێ لدۆر پڕۆژە قانوونا بودجێ گشتیێ ئیراقێ و دووڤدا دێ خواندنا سیێ ژئالیێ جڤاتا نوونەران ڤە بۆ پڕۆژە قانوونا بودجەی هێتەكرن و هێتە پەسەندكرن، پێشبینیێ دكەین هەتا سێ حەفتیێن دی پەسەندكرنا قانوونا بودجەی ڤەكێشیت و پشتی پەسەندكرنێ ژی دێ پڕۆژە قانوونا بودجەی هێتە هنارتن بۆ سەرۆك كۆماری و پشتی ئەوژی ئیمزایێ ل سەر دكەت دێ ل ڕۆژنامەیا فەرمی هێتە بەلاڤكرن و كەڤیتە د بیاڤێ بجهئینانێ دا».
شێروانی گۆت ژی» پڕۆژە قانوونا بودجەیا ئەڤسالە مەزنترین پڕۆژە قانوونە، چونكە تنێ بۆ ئەڤسالە نینە بەلكو بودجە بۆ سێ سالان دێ هێتە پەسەندكرن و سالانە ئاریشەیا گیرۆبوونا پڕۆژە قانوونا بودجەی نامینیت وەكو سالێن بۆری هەر جار چەند هەیڤەكا ڤەكێشیت، لەوڕا ئەم د وێ باوەریێ داینە دێ بیتە ئێك ژ قانوونێن مەزن یێن بودجەی ل ئیراقێ بۆ سێ سالێن بهێن».
ناڤبری ئاماژە كر» ژ بەر كو ڕێكارێن پەسەندكرنا پڕۆژە قانوونا بودجەی دێ گیرۆبن و دبیت هەتا دو مەهێن دی قانوونا بودجەی نەكەڤیتە د بیاڤێ بجهئینانێ دا حوكمەتا ئیراقێ بڕیاردایە ٤٠٠ ملیار دیناران وەكو قەر بدەتە حوكمەتا هەرێما كوردستانێ بۆ بەلاڤكرنا مووچێ فەرمانبەران بۆ هەیڤا نیسانێ، ئەو پارە ژی وەكو قەر دێ هێتە هەژمارتن ل سەر هەرێما كوردستانێ، پشتی قانوونا بودجەی دهێتە پەسەندكرن دێ ئەو پارە ژ پشكا هەرێما كوردستانێ هێتە ڤەگەڕاندن، چونكی دەمێ مەهەكێ یە هەرێما كوردستانێ پرۆسەیا هنارتنا پەترۆلێ بۆ ژ دەرڤە ڕاگرتیە وپێدڤیە حوكمەتا ئیراقێ هاریكاریا هەرێما كوردستانێ بكەت بۆ بەلاڤكرنا مووچێ فەرمانبەران، هەردەمێ قانوونا بودجەی هاتە بجهئینان ئەڤە هەرێما كوردستانێ دێ پشكا خوە یا بودجەی وەرگریت و مووچێ فەرمانبەران وەك بەرێ د دەمێ خوە دا هێتە بەلاڤكرن و ئەم گەلەك د گەشبینین پشتی ڕێككەفتنا د ناڤبەرا مەسرور بارزانی، سەرۆكێ حوكمەتا هەرێما كوردستانێ و محەمەد شیاع سۆدانی، سەرۆكێ حوكمەتا ئیراقا فیدرال لدۆر پەترۆلێ و بودجەی دێ هێشتا ڕێككەفتن و نێزیكبوون هەبن بۆ چارەسەركرنا ئاریشەیێن دی ژی».

ئەڤرۆ

عەزیز هەورامی

پشتی خیانەتا 16 ئۆكتۆبەرێ بەردەوام ئەرەبێن هاوردە شەڕی ب كوردێن دەڤەرێن كوردستانی یێن دەرڤەی ئیدارەیا هەرێما كوردستانێ دفرۆشن و ئاخا وان داگیردكەن. هێزا پێشمەرگەی و سەركردایەتیا كوردی، هوشداری دایە و دبێژین ڕێكێ ب ستەم و ب ئەرەبكرنا ئاخ و خەلكێ كوردستانێ نادەین، ئەندامەكێ كورد ل جڤاتا نوونەرێن ئیراقێ دبێژیت، دێ ئاخڤتن ل گەل ئالیێن ئیراقی هێتە كرن و ڕێك ب ئەرەبكرنا گوندێ پەلكانە ناهێتە دان.
شوان كەلاری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ ڕۆژنامەیا ئەڤرۆ گوت» ئەرەبێن هاوردە ل گوندێ پەلكانە غەدرێ ل كوردان دكەن، هێزێن حەشدا شەعبی ژی هاریكاریا وان دكەن، نە سەركردایەتیا سیاسی یا كوردی و نە خەلكێ ڕەسەن یێ وی گوندی و نە پەرلەمانتارێن كورد ژی ل بەغدا ڤێ چەندێ قبوول دكەن، ئەگەر ژی بجهنەئینانا مادەیێ 140 یێ دەستوورێ ئیراقێ یە، پەلكانە گوندەكێ كوردنشینە و هیچ دەمەكی غەدركرن ل خەلكێ مە ژ ئالیێ ئەرەبێن هاوردە ڤە قبوول ناكەین».
پەرلەمانتار شوان كەلاری زێدەتر گۆت» پشتی بێهنڤەدانا جەژنا ڕەمەزانێ دێ پێرابوونێن قانوونی دەست پێكەین و دێ مە ل گەل جێگرێ سەرۆكێ جڤاتا نوونەرێن ئیراقێ ئاخڤتن هەبیت هەروەسا ل گەل ئالیێن دی یێن پەیوەندیدار».
شوانی خویاكر ژی» سەركردایەتیا كوردی ژی ڕاستەوخوە ل سەر ڤێ پرسێ ل گەل سەرۆكایەتیا حوكمەتا ئیراقێ دێ ئاخڤیت و یا ل سەر هێلێ و ڕێكێ نادەین غەدر ل خەلكێ پەلكانە بهێتە كرن، ل دەمێ دەستهەلاتا بەعسیان ستەمەكا مەزن ل خەلكێ گوندێ پەلكانە هاتیە كرن و بۆ تێكدانا دیموگرافیا گوندی كورد ژێ دهاتنە دەركرن و ئەرەب ل جهێن وان ئاكنجی دكرن و پشتی ژناڤچوونا ڕژێما بەعس ئەرەبان ب خوە دزانی كو ئاخا وی گوندی یا داگیركری لەوما ئەو گوند چۆلكر بەلێ پشتی خیانەتا 16 ئۆكتۆبەرا 2017 دووبارە ئەرەبێن هاوردە و حەشدا شەعبی دەست ب داگیركاریێ كر».
ناڤبری ئەوژی گوت» حوكمەتا نوكە یا ئیراقێ ب سەرۆكایەتیا محەمەد شیاع سۆدانی هیچ سیاسەتەكا ئاشكرا بۆ ب ئەرەبكرنێ نینە، گرۆپێن حەشدا شەعبی و هندەك خەلكێ شۆفینی و ژ دەرڤەی قانوونێ دخوازن د ناڤبەرا هەولێرێ و بەغدا دا نەخوەش بكەن و كێشەیان د ناڤبەرا خەلكێ دەڤەرێ دا دروست بكەن».
دیاركر ژی» نوكە پەیوەندیێن مە ل گەل بەغدا دباشن و دخوازین ب ڕێكا قانوونێ وان كێشەیان چارەسەر بكەین، كوردان ب درێژیا دیرۆكێ گیانێ خوە كریە قوربانی بۆ ئازادیێ، پێشمەرگە داكۆكیێ ژ ئاخا كوردستانێ دكەت، برگەیەكا كارنامەیا حوكمەتا محەمەد شیاع سودانی ئەوە كو مادەیێ 140 یێ دەستووری بهێتە بجهئینان و بودجە بۆ بهێتە دابینكرن، حالەتا ساخلەم نوكە ئەوە ب قانوون ل گەل سەرۆك وەزیرێن ئیراقێ كارنامە و دەستوور بهێتە بجهئینان، بەلێ هەر كەسێ ستەمێ ل خەلكێ گوندێن كوردستانێ بكەت ب پشتڕاستی ڤە پێشمەرگە یێ بەرهەڤە سنۆرەكی بۆ دەستدرێژیان دانیت».
ل دووماهیێ گوت» دەمێ سنۆرەك بۆ خەلكێ ستەمكار دهێتە دانان د ڕەڤن، دەمێ زانی وەلاتیێن كورد یێن خەلكێ گوندێ پەلكانە ستەمێ قبوول ناكەن و ب ڕێكا قانوونێ و هێزێ دێ بەرهنگاری وان بن، پتریا وان چوون و پەلكانە بجهـ هێلا و كێمەك یێن ماین چونكە ئەو ل بەردەم هێزێ و قانوونێ د ڕەڤن».