ئەڤرۆ

سیاسەتمەدارەکێ ناڤدار یێ باکورێ کوردستانێ دیار دکەت کو هەرێما کوردستانێ شیا رۆلەکێ سەرەکی بۆ هاریکاریا خەلکێ لێقەومی ل باکورێ کوردستانێ و تورکیا بگێریت، ئەو یەک گەلەک گرنگ بوو و ژ بەر هندێ ژی ئەم سوپاسیا سەرۆک بارزانی و هەرێما کوردستانێ دکەین.
ئەحمەد تورک ئەندامێ بەرێ یێ پەرلەمانێ تورکیا و سیاسەتمەدارێ ناڤدار یێ باکورێ کوردستانێ بۆ دەزگەهێن راگەهاندنێ دیار کر، کو بیڤەلەرزا ڤێ دووماهیێ زیانێن گەلەک مەزن گەهاندنە تورکیا و باکورێ کوردستانێ، مخابن ژ بەر بیڤەلەرزێ هەتا نها ب هزاران وەلاتیان جانێ خوە ژ دەست داینە، ب هزاران وەلاتی ژی نها بێ مال ماینە و د رەوشەکا گەلەک خراب دانە، پێدڤیا وان ب هاریکاریێن بلەز هەیە، ژ بەر هندێ ژی نها ل باکورێ کوردستانێ دەست ب چەندین کەمپینێن نوو ژی هاتیە کرن و گۆت: (کوردان جارەکا دی سەلماند کو د تەنگاڤیان دا ئەو هەڤدو ب تنێ ناهێلن، ل ڤێرێ من دڤێت ب تایبەت سوپاسیا سەرۆک بارزانی و هەرێما کوردستانێ بکەم، وان شیا ب رەنگەکێ باش هاریکاریا خەلکی بکەن و هەتا نها ژی بەردەوام هاریکاریا خەلکێ لێقەومی دکەن، ئەو یەک گەلەک گرنگە، ئەز هیڤیدارم کو ئەڤ هاریکاریا نها د ناڤبەرا کوردان دا دروست بوویە د بیاڤێ سیاسی دا ژی بەردەوام بیت، ئانکۆ د بیاڤێ سیاسی دا ژی کورد هەڤکاریا هەڤدو بکەن، چونکی دەمێ کورد هاریکاریا ئێکتر بکەن وی دەمی هەم کورد بهێز دبن و هەم ژی گیانەکێ نەتەوەیی و بهێز د ناڤبەرا کوردێن هەر چار پارچێن کوردستانێ دا دروست دبیت).
ئەحمەد تورک ئەو یەک ژی دیار کر راستە هەتا نها گەلەک هاریکاری گەهشتینە خەلکی، لێ رەوش گەلەک خرابە، پێدڤیا خەلکێ مە ل وان دەڤەران ب هاریکاریێن زێدەتر هەیە، ژ بەر هندێ ژی نها ل باکورێ کوردستانێ پارتێن سیاسی و رێکخستنێن مافێن مرۆڤی و سازیێن دی دەست ب کەمپینەکا نوو یا کۆمکرنا هاریکاریا کرینە، ئەو یەک ژی بێگومان گەلەک باشە، چونکی بیڤەلەرزێ کاریگەریا خوە ل ژیانا ب ملیۆنان مرۆڤان یا کری، نها ئەو پێدڤی هاریکاریێ نە.
ئەو یەک د دەمەکێ دایە کو هەتا نها ب دەهان سیاسەتمەدار، کەسایەتی و پارتێن سیاسی یێن باکورێ کوردستانێ د داخۆیانیێن جودا جودا دا سوپاسیا سەرۆک بارزانی و هەرێما کوردستانێ کرینە و دیار کرینە، کو دەزگەهێ خێرخوازیێ بارزانی وەکو ئێکەم دەزگەه شیا هاریکاریا خەلکی بکەت.
چاڤدێرێن سیاسی ژی دیار دکەن، کو پشتی رۆلێ باش و کاریگەر یێ هەرێما کوردستانێ بۆ هاریکاریا خەلکێ لێقەومی نها نێرینا گەلەک کەسێن شوفینی ل هەمبەر هەرێما کوردستانێ هاتیە گوهۆڕین و ئەو یەک کارەک گەلەک باشە و دڤێت دەستهەلاتدارێن تورکیا ژی ئێدی نێرینا خوە ل هەمبەر هەرێما کوردستانێ بگوهۆڕن.

ئەڤرۆ

سەرۆك مەسعود بارزانی ل سەلاحەددین پێشوازی ل شاندەكێ وەزارەتا دەرڤە یا وەلاتێ هندستانێ كر كو پێكهاتبوو ژ دكتۆر سەعید جێگرێ وەزیرێ دەرڤە یێ هندستانێ و براشانت پیسی بالیۆزێ هندستانێ ل ئیراقێ و سوبهاش چاندرا قونسۆلێ هندستانێ ل هەولێرێ.
د دیدارەكێ دا شاندێ مێهڤان پێزانین بۆ خەباتا سەرۆك بارزانی و گەلێ كوردستانێ هەبوو و دووپاتی ل خواستا وەلاتێ خوە بۆ پێشڤەبرنا پەیوەندیێن د ناڤبەرا هەرێما كوردستانێ و هندستانێ دا د بوارێن تەكنەلۆژیا و نوشداری و زانستی و ئەكادیمی و مەشق و ڕاهێنانێ كر. هەروەسا ئەوژی ڕاگەهاند سەقامگیریا هەرێما كوردستانێ و ئیراقێ و ڕۆژهەلاتا ناڤین بۆ هندستانێ گرنگیەكا تایبەت هەیە.
د پشكەكا وێ دیدارێ دا سەرۆك بارزانی پەیوەندی و دۆستایەتیا د ناڤبەرا گەلێ كوردستانێ و گەلێ هندستانێ ب دیرۆكی و دێرین هەژمارت و پشتەڤانیا خوە بۆ بەرفرەهكرنا پەیوەندیێن د ناڤبەرا هەردو ئالیان دا دووپاتكر.

ئەڤرۆ

سەرۆكێ هەرێما كوردستانێ ل ڕۆژا جیهانی یا زمانێ دایك دووپاتیێ ل پاراستن و پێشڤەبرنا زمانێ كوردی دكەت و دبێژیت: سلاڤ ل قەلەمێن خزمەتا زمانێ كوردی دكەن.
ڕۆژا سێشەمبی 21/2/2023 كو هەڤدەمە ل گەل ڕۆژا جیهانی یا زمانێ دایك، نێچیرڤان بارزانی، سەرۆكێ هەرێما كوردستانێ ل پێگەهێ خوە یێ تایبەت ل سەر تۆرا جڤاكی یا تویتەری نڤیسی» ل ڕۆژا جیهانی یا زمانێ دایك، دووپاتیێ ل پاراستن و پێشڤەبرنا زمانێ شیرین یێ كوردی و هەموو زمان و زاراڤێن كوردستانێ دكەین».
سەرۆكێ هەرێما كوردستانێ د پشكەكا دی یا نڤیسینا خوە دا دا دبێژیت» سلاڤ ل وان قەلەمێن خزمەتا زمانێ دایك و ل ئەوێن فرەزمانی و فرەكەلتووریا كوردستانێ دپارێزن و كاری بۆ پێكڤەژیانێ دكەن».
ڕۆژا 21/ 2 ل هەموو سالان ڕۆژا جیهانی یا زمانێ دایكە و هەموو گەلێن جیهانێ ب چالاكیێن جۆرا و جۆر وێ ڕۆژێ بلند ڕادگرنز ل جیهانێ شەش هزار زمان یێن هەین، بەلێ پتریا وان مەترسیا ژناڤچوونێ ل سەرە و پتریا جیهانێ ب 100 زمانان د ئاخڤن، زمانێ كوردی ژی ل پلەیا 59 یا زمانێن جیهانی دایە.

ئەڤرۆ

سیاسەتمەدارەکێ باکورێ کوردستانێ و ئەندامێ بەرێ یێ پەرلەمانێ تورکیا راگەهاند کو دەزگەهێ خێرخوازیێ بارزانی شیا هاریکاریا وەلاتیێن لێقەومی ل باکور و رۆژئاڤایێ کوردستانێ بکەت، چونکی براستی ژی رەوشا خەلکێ لێقەومی گەلەک خرابە و ئەو پێدڤی هاریکاریێن زێدەترن.

ئۆسمان بایدەمیر ئەندامێ بەرێ یێ پەرلەمانێ تورکیا راگەهاند کو ژ بەر بیڤەلەرزا ل باکور و رۆژئاڤایێ کوردستانێ زیانێن گەلەک مەزن گەهشتنە خەلکی، براستی ژی نها رەوشا وەلاتیان ل وان دەڤەران گەلەک خرابە و گۆت: (دەزگەهێ خێرخوازیێ بارزانی شیا وەکو ئێکەم دەزگەهێ خێرخوازی هاریکاریێن مرۆڤی بگەهینتە باکور و رۆژئاڤایێ کوردستانێ، دەزگەهێ خێرخوازیێ بارزانی ل گەل تیمێن هەوارهاتنێ یێن هەرێما کوردستانێ شیان کارێن گەلەک مەزن ئەنجام بدەن، ئەو یەک جهێ شانازیێ یە، ئەڤرۆکە هەموو کورد شانازیێ ب کارێ دەزگەهێ خێرخوازیێ بارزانی دکەن، ئەز سوپاسیا دەزگەهێ خێرخوازیێ بارزانی دکەم، کو شیان د دەمەکێ وەسا دا هاریکاریا برایێن خوە ل باکور و رۆژئاڤایێ کوردستانێ بکەن).
سیاسەتمەدارێ کورد ئەو یەک ژی دیار کر مخابن رەوشا وەلاتیان ل دەڤەرێن بیڤەلەرزێ گەلەک خرابە، نها ژی ئەو پێدڤی هاریکاریێ نە، هێڤیدارم کو هەموو وەلاتێن جیهانێ ب ئەرکێ خوە یێ مرۆڤاهی رابن و هاریکاریا خەلکی بکەن، چونکی پشتی بیڤەلەرزا شەشێ شوباتێ مخابن جارەکا دی ژی بیڤەلەرزەکا بهێز ل هاتای و چەندین دەڤەرێن دی دایە و د ئەنجاما بیڤەلەرزێ دا ئێدی خەلک نەشێن بچمە مالێن خوە، ئانکۆ خەلک پێدڤی ب هاریکاریێن زێدەترن، ژبەر هندێ ژی ئەز داخواز دکەم پتر هاریکاریا خەلکێ لێقەومی بهێتە کرن و گۆت: (پێدڤیە هاتای، مەراش و ئەو هەموو باژێرێن کو ژ بەر بیڤەلەرزێ خراب بووینە ژ نوو ڤە بهێنە ئاڤاکرن، پێدڤیە ئێدی ل تورکیا سیستەمەک نوو بۆ ئاڤاکرنا ئاڤاهیان بهێتە دانان، بیڤەلەرزێ نیشا دا کێماسیێن گەلەک مەزن د دروستکرنا ئاڤاهیان دا ل تورکیا هەنە، ژ بەر هندێ ژی دڤێت دووڤچوون هەبیت، دڤێت یا پێدڤی بۆ پاراستنا جانێ خەلکی ژ بیڤەلەرزێ بهێتە کرن، مخابن ژ بەر خەمساریا حوکمەتێ گەلەک وەلاتیان جانێ خوە ژ دەست داینە و ئەو یەک ژی ئازارەکا مەزنە، ئەڤرۆکە ل هەموو کوردستانێ خەلک ژ بەر وان وەلاتیێن کو ل باکور و رۆژئاڤایێ کوردستانێ جانێ خوە ژ دەست داینە، خەمگینن).
ئۆسمان بایدەمیر د دووماهیا ئاخڤتنا خوە دا ئەو یەک ژی دیار کر کو ئەڤرۆکە پتر ژ هەر دەمەکێ پێدڤیا کوردان ب هەڤدو هەیە، د رۆژێن تەنگاڤ دا دیار دبیت کو کورد هاریکاریا هەڤدو دکەن، رۆلێ دەزگەهێ خێرخوازیێ بارزانی گەلەک گرنگ بوو و گۆت: (دەزگەهێ خێرخوازیێ بارزانی شیا جارەکا دی کوردان پتر نێزیکی هەڤدو بکەت و ئەز هێڤیدارم ئەو یەک ببیتە دەستپێکەکا نوو بۆ بهێزکرنا ئێکەتیا نەتەوی ل هەر چار پارچێن کوردستانێ).

ئەڤرۆ

بەرپرسێ پەیوەندیێن پارتی دیموكراتی كوردستان، جەعفەر ئێمینكی ڕاگەهاند، قەوارەیێ هەرێما كوردستانێ قەوارەیەكێ دەستووریە و مەترسیێن دەستووری و سیاسی ل سەر نینن.
جەعفەر ئێمینكی ئاشكراكر ژی، كۆمبوون ل گەل ئالیێن سیاسی دێ دەستپێكەن ب مەبەستا ئەنجامدانا هەلبژارتنان.
بەرپرسێ پەیوەندیێن پارتی دیموكراتی كوردستان داخواز ژ ئالیێن سیاسی كر ب ئەركێ بەرپرسیارەتی و دیرۆكی یێ خوە ڕاببن.
جەعفەر ئێمینكی ئاماژەكر ژی» كۆمبوونێن ئالیێن سیاسی بۆ وێ چەندێ نە د ئەڤ سالەدا هەلبژارتنێن پەرلەمانێ كوردستانێ بهێنە ئەنجامدان، چونكە هەلبژارتن پرسەكا گرنگ یا هەرێما كوردستانێ یە و نابیت ب هیچ بەهانەیەكێ ئەو ماف ب خەلكێ هەرێما كوردستانێ نەهێتە دان».

ئەڤرۆ

پسپۆرەكێ پەیوەندیێن نێڤدەولەتی ڕاگەهاند، پێشوازیا سەركردە و سەرۆكێن وەلاتان ل كونفرانسێن نێڤدەولەتی وەكو كۆربەندێ داڤۆس و كونفرانسێ ئاسایشێ ل میونشن و كونفرانسێ جیهانی یێ حوكمەتان ل دوبەی و ل گەلەك جهێن دی ژی، ئەو پێشوازیێ ل سەركردەیێن هەرێما كوردستانێ وەكو هەرێمەكا قانوونی و ئەكتەرەكێ نێڤدەولەتی یێ نەدەولەت مامەلێ ل گەل نوونەرایەتیا هەرێما كوردستانێ ل وان كۆنفرانسان دكەن.
د. هەوار نێروەیی، پسپۆرێ پەیوەندیێن نێڤدەولەتی گوت» دیارە ئەم نەشێین بێژین وەكو نوونەرێن دەولەتا سەربخوە مامەلە دگەلدا دهێتە كرن ژ ئالیێ سەرۆكێن وەلاتان ڤە، بەلێ وان پێشوازیان شێوەیەكێ دەستووری یێ نێڤدەولەتی هەیە كو ل مادێ 117 د دەستوورێ ئیراقێ دا ڕەنگڤەدایە و ل سەر بنەمایێ ڤێ مادەیا دەستوورێ ئیراقێ سەركردەیێن وەلاتان مامەلا ڕاستەوخوە ل گەل سەركردەیێن هەرێما كوردستانێ هەیە كو ل سەر بنەمایێ سەروەری و سیادەیا ناڤخوەیە ب گۆرەی دەستووری و ل سەر ئاستێ نێڤدەولەتی ژی كیانێ هەرێما كوردستانێ كیانەكێ فەرمیە، ئانكو مە بڤێت یان نەڤێت قەوارەیێ سیاسی یێ هەرێما كوردستانێ دێ یێ پاراستی بیت و بەردەوام ژی دێ هێتە پاراستن ژ ڕوویێ نێڤدەولەتی ڤە و مە ب دەهان ڕێككەفتنێن نێڤدەولەتی یێن هەین، وەكو هەرێما كوردستانێ ب گۆرەی دەستووری ل گەل توركیا و وەلاتێن دی، ژ بەر ڤێ چەندێ ئەڤ قەوارەیە یێ دانپێدانكریە ژ ڕوویێ نێڤدەولەتی ڤە و ژ ئالیێ UN ڤە ل دووڤ بڕیارا 688 حەسانە یا هەی، ئانكو نە ب ئاخڤتنایە هەر كەسێ حەزبكەت ل سەر باخڤیت».
د. هەوار دبێژیت» ژ ڕوویێ پێگەهی ژی ڤە هەرێما كوردستانێ پێگەهەكێ ب هێز هەیە ل سەر ئاستێ نێڤدەولەتی و سەركردایەتیا هەرێما كوردستانێ هەموو دەمان بزاڤكریە ژ بلی پاراستنا ڤێ هەرێمێ، پێگەهێ وێ ژی پێشڤە ببەت».
زێدەتر گوت» دیارە د سیاسەتێ دا بەرژەوەندی یا گرنگە، ئانكو مە چەند شیایە بەرژەوەندیێن نێڤدەولەتی د ناڤ هەرێما كوردستانێ دا بپارێزین؟ دیارە مە ئەو چەندە یا ئەنجامدای، هەر ژ بابەتێ پاراستنا مافێن مرۆڤی تاكو پرسا پەنابەر و ئاوارەیان، پێكڤەژیانا ئایینی و مەزهەبی ل كوردستانێ، ئەو هەموو ئامرازێن سیاسی نە كو حوكمەتا هەرێما كوردستانێ گرنگی پێ داین و جڤاكێ نێڤدەولەتی ژی ئەڤ پرسە ب گرنگە وەرگرتینە و پشتەڤانی كریە كو هەرێما كوردستانێ ل سەر ڤی ڕێكێ بچیت، لەوما هەرێما كوردستانێ بۆ پاراستنا دیموكراسیێ و بهایێن دیموكراسی بزاڤێن مەزن كرینە، ب تایبەتی د پرسا مافێن مرۆڤی دا، ڕاستە ڕەخنە هەیە و بۆچوونێن جودا یێن هەین، بەلێ ل گەل ڤێ چەندێ ژی هەرێما كوردستانێ گەشەیا باش ب خوەڤە دیتیە ژ ڕوویێ سیاسی و مرۆڤایەتی و بوارێن دی و دشیاندایە زێدەتر گەشە پێ بهێتە دان».