دینارته‌ ، نه‌وزاد زاده‌ هلۆرى:
پشتى هه‌شت هه‌یڤان ژ به‌رزه‌بوونا ژنه‌ك و دوو زاروكێن وێ ل ناحیا دینارته‌ ، ئه‌ڤرۆ زاروك هاتن دیتن به‌لێ دایكا وان هێشتا نه‌درایه‌.
دڤى واریدا ئیبراهیم عه‌بدوللا برایێ بابێ هه‌ردوو زاروكان تایبه‌ت بۆ ئه‌ڤرۆ نیوز گۆت : ( هه‌شت هه‌یڤان به‌ریا نها ژن برا من دگه‌ل دوو زاروكێن خوه‌ ب مه‌ره‌ما سه‌ره‌دانه‌كێ چووبویه‌ مالبابا خوه‌ و دوڤدا به‌رزه‌ دبیت و هه‌تا نها ژى نه‌دیاره‌ ، لێ ئه‌ڤرۆ رۆژا هه‌ینى هه‌ردوو زارویێن وێ مه‌ ل به‌رده‌رگه‌هێ مزگه‌فته‌كا هه‌ولێرێ ل تاخێ مه‌لومه‌ران دیتن به‌لێ ب مخابنیڤه‌ دایكا وان ل گه‌ل دا نه‌بوو )
زێده‌تر گۆت : ( برا و ژن برا من چوو كێشه‌یێن جڤاكى نینن و دیسان مه‌ چوو كێشه‌یێن جڤاكى ل گه‌ل مالباتا ژن برا خوه‌ ژى نین ، و به‌لێ ل گوره‌ى زانیاریێن كو ده‌ستمه‌كه‌فتین هنده‌ك كه‌سێن نه‌ ناسیار ب رێیا تێله‌فونێ په‌یوه‌ندى ب ژن برا من كریه‌ و بێزارى بۆ درۆستكریه‌ و ئه‌ڤجا ئه‌م نوزانین كا ئه‌و كه‌س كینه‌ و ئه‌رێ وان ئه‌ڤ یه‌ك كریه‌ یان نه‌، چوو دیار نینه‌)
ناڤبرى دڤیا ب رێیا ئه‌ڤرۆ نیوز داخوازێ ل جهێن شوله‌ژێ بكه‌ت كو هه‌ڤكاریا وان بكه‌ن بو لێگه‌ریانا دایكا وان زاروان.
ل بارا ساخله‌میا ئه‌وان هه‌ردو زاروان گۆت : ( ئه‌و هه‌ردوو زاروك ژیێ سێ سالى و دوو سالێى دانه‌ و نها ره‌وشا ساخله‌میا وان نه‌یا باشه‌ و گه‌له‌ك ژى لاواز و زه‌عیف بوینه‌ )

ئه‌ڤرۆ نیۆز، قائید میرۆ
فڕاكسیۆنه‌كا په‌رله‌مانێ كوردستانێ داخواز ژ ده‌زگه‌هێن بجه ئینانێ كر، كریا خانی و شوقان ب رێژه‌یه‌كا به‌رچاڤ بهێنه‌ ئه‌رزانكرن، ژبه‌ركو وه‌لاتی نه‌شێن كریێ بده‌ن.
شوان قه‌لادزه‌یی، ئه‌ندامێ په‌رله‌مانێ كوردستانێ ب ئه‌ڤرۆ نیۆز راگه‌هاند” مه‌ وه‌كی فڕاكسیۆنا بزاڤا ئیسلامی ل په‌رله‌مانێ كوردستانێ یاداشته‌ك ئاراسته‌ی لایه‌نێن جێ به‌جێكاركریه‌ و تێدا داخوازكریه‌، بۆ سڤككرنا ره‌وشا گرانا یا لسه‌ر ملێن وه‌لاتیان هاریكاربن و كرێ بهێته‌ ئه‌رزانكرن، چونكه‌ دڤێ قه‌یرانێ دا وه‌لاتی نه‌شێن پاره‌یه‌كێ زۆر بمه‌زێخین.
قه‌لادزه‌یی دیاركر، مه‌ داخوازكریه‌، كریا دۆكان و خانی و شوقان ب رێژیا 40%ێ بهێنه‌ كێمكرن و ئیك لیترا پانزینێ ببیته‌ 450 دینار، هه‌روه‌سا كریا ڤه‌گوهاستنێ ب رێژه‌یا 20%ێ بهێته‌ كێمكرن.

ئه‌ڤرۆ نیۆز، قائید میرۆ:
سه‌رۆكێ لیژنا كاروبارێن پێشمه‌رگه‌ی ره‌تكر موچێ هێزێن پێشمه‌رگه‌ی بهێته‌ كێمكرن و دیاركر، هه‌ركه‌سه‌كێ نوچه‌یه‌كێ وه‌سا شاش به‌لاف بكه‌ت مونافقه‌. ئاری هه‌رسین، سه‌رۆكێ لیژنا پێشمه‌رگه‌ی ل په‌رله‌مانێ كوردستانێ ب ئه‌ڤرۆ نیۆز راگه‌هاند” پشتی پلانا چاكسازیا حوكمه‌تێ و پرسا كێمكرنا موچێ فه‌رمانبه‌ران هاتیه‌ به‌لافكرن، هنده‌ك كه‌س و لایه‌ن به‌حسێ كێمكرنا موچێ هێزێن پێشمه‌رگه‌یژی دكه‌ن، به‌لێ چو راستی بۆڤێ چه‌ندێ نینه‌.
هه‌رسین گۆتژی” ئه‌ز هێزێن پێشمه‌رگه‌ی پشتڕاست دكه‌م ب چو شێوه‌یه‌كی موچێ وان ناهێته‌ كێمكرن و هه‌ر كه‌سه‌كێ نوچه‌یه‌كا وه‌سا یێ شاش لدۆر كێمكرنا موچێ پێشمه‌رگه‌ی به‌لاف بكه‌ت مونافقه‌.

ئه‌ڤرۆ نيوز:

رێڤەبەریا ئاسایشا پاریزگەها دهوکی د راگه‌هاندنه‌كێ دا كو بۆ ئه‌ڤرۆ نيوز هنارتيه‌ دياركريه‌ كو بكوژێن پێشمه‌رگه‌ محه‌مه‌د موسا کانیکى هاتنه‌ گرتن، ئه‌ڤه‌ ده‌قێ راگه‌هاندنێ يه‌:

لسەر رویدانا هاوولاتى (محمد موسا کانیکى)ئەوێ ل روژا (14/1/2016) ژلایى هەندەک کەساڤە هاتیە بریندارکرن و پاش گیانی خو ژ دەست دایی ، پشتیی رویدانى بەردەوامی دیڤچوون ژلایێ مەڤە لسەر بابەتی هاتە کرن بو دیارکرن و ئاشکراکرنا تاوانباران و خوش بەختانە ل رۆژا (28/1/2016)مە شیا تاوانباران بنیاسین و لشەڤا (28/29،1/ 2016) هەردوو تاوانبارێن بناڤین (خ.خ.ى)و (ج.ع.ا)ژلایێ مە هاتنە گرتن و دان پیدان ب تاوانا خو کرن  و کێشە هاتە رەوانەکرن بو دادگەهێ بو وەرگرتنا پێرابونێن یاسایى .

خەلکی خو یی خوشتفى دلنیا دکەین کو ب هاریکارى و دلسوزیا خەلکێ مە دگەل دەزگایێن ئینماهیێ کو هەردەم دێ باژیرێ مە یێ پاراستى بیت. و تاوانبار دێ گەهنە سزایێن خو یین عادیلانە .

رێڤەبەریا ئاسایشا پاریزگەها دهوکی 29/1/2016

ئامێدیێ، مه‌حمود نهێلى
ژ ئه‌نجامێ بوردومانكرنا باله‌فرێن له‌شكه‌رى یێن توركیا بۆ سه‌ر ده‌ڤه‌رێ، به‌رى سپێده‌هیا رۆژا پێنج شه‌مبى 28/1/2016 ئاڤا سێ گوندێن سنورێ ناحیا دێره‌لۆك ل گه‌لیێ شێرانه‌ خراب كریه‌.
ته‌مه‌ر گه‌له‌كى هه‌لبژێرێ گوندێ گه‌له‌كى بۆ ئه‌ڤرۆ نیوز دیاركر، كو دوهى سپێدى فرۆكه‌یێن توركیا ب دژوارى گه‌لیێ شێرانه‌ بۆردومانكریه‌ و د ئه‌نجامێ دا ئاڤا گوندێ وانا خراب كریه‌ و گۆت: ( خه‌لكێ گوندى ل دووڤ دا چوویه‌ و دیار بوویه‌ چه‌ند قونبه‌له‌یێن مه‌زن ل سه‌روكانیا ئاڤێ كه‌فتینه‌ و بوریێن وانا یێن ئاڤێ دانه‌ و چه‌ندین بورى شكاندینه‌).

ئەڤرۆ نیوز،زنار تۆڤی:
جۆ بایدن جێگرێ سەرۆکێ ئەمریکا دیارکر،ئەو شەرێ ئەمریکا ل دژی داعشێ بەرپاکری بوویە ئەگەرێ هندێ کو داعش دەڤەرەکا زۆر ژ دەست بدەت،ل دۆماهیا ئەڤ سالە دێ سەرکەفتنێن مەزن بدەستڤە ئینین.
د چارچووڤێ پشتەڤانیکرنا سیاسەتا دەرڤە یا وەلاتێ خۆ جۆ بایدن دبێژیت،مە سەرکەفتنێن مەزن ل شەرێ دژی داعشێ بدەستخستینە.
هەروەسا دیمۆکراتێن کۆنگرێسی ژی پستەڤانیا سەرۆکێ وەلاتێ خۆ دکەن و بەحسێ هندێ دکەن کو وەلاتێ وان پشتەڤانیەکا مەزن ل رزگارکرنا روومادی ئەنجامدایە ل عێراقێ و هەروەسا بۆ رزگارکرنا رەققا سووریێ ژی دێ ئەنجامدەن.
بایدنی گۆتیەژی ئەم شیاینە 40% وان دەڤەرێن دبن کۆنترولا داعشێ رزگار بکەین.

ئه‌ڤرۆ نیۆز، قائید میرۆ
به‌رپرسه‌كێ وه‌زاره‌تا ئه‌وقاف و كاروبارێن ئاینی ئاشكراكر، وه‌زاره‌ت دێ بڕیاره‌كێ ده‌ربكه‌ت و گوره‌ی بڕیارێ هه‌ر وه‌لاتیه‌كێ گه‌شتا عومرێ دكه‌ت پێدڤیه‌ گوژمه‌كێ پاره‌ی بۆ پێشمه‌رگه‌ی ژى بمه‌زێخیت.
كامه‌ران ئه‌حمه‌د، رێڤه‌به‌رێ په‌یوه‌ندیێن حه‌ج و عومرێ ب ئه‌ڤرۆ نیۆز راگه‌هاند” نوكه‌ وه‌زاره‌تا ئه‌وقافێ مژولی ده‌ركرنا بڕیاره‌كێ یه‌ لدۆر وه‌لاتیێن هه‌رێما كوردستانێ یێن گه‌شتا عومرێ دكه‌ن و گوره‌ی بڕیارێ هه‌ر وه‌لاتیه‌كێ هه‌رێمێ گه‌شتا عومرێ بكه‌ت، پێدڤیه‌ گوژمه‌كێ پاره‌ بۆ سندۆقا هاریكاریا پێشمه‌رگه‌ی بمه‌زێخیت.
كامه‌رانی گۆتژی” ئه‌ڤ بڕیارا ئه‌وقافێ پشتی نه‌ڕازیبوونا خه‌لكێ هه‌رێما كوردستانێ دهێت، كو دڤێ قه‌یرانێ دا خه‌لكه‌ك هه‌یه‌ گه‌شتا عومرێ دكه‌ت و ره‌وشا دارایی وان وه‌لاتیان یاباشه‌ و دڤێت هاریكاریا پێشمه‌رگه‌ی بكه‌ن.

ئه‌ڤرۆ نیۆز، قائید میرۆ
به‌رپرسێ میحوه‌رێ رۆژئاڤایێ كه‌ركووكێ ئاشكراكر، فڕۆكه‌یێن هه‌ڤپه‌یمانان تونێلێن داعش كرینه‌ ئارمانج و هژماره‌ك چه‌كدارێن داعش هاتینه‌ كوشتن و برینداركرن.
دكتۆر كه‌مال كه‌ركووكی، به‌رپرسێ میحوه‌رێ رۆژئاڤایێ كوردستانێ ب ئه‌ڤرۆ نیۆز راگه‌هاند” پشتی ده‌ستكه‌فتنا زانیاریێن هه‌والگه‌ری ژلایێ هێزێن پێشمه‌رگه‌ی، ئه‌ڤرۆ بۆ سێ جارا فڕۆكه‌یێن هه‌ڤپه‌یمانان چه‌ند تونێله‌كێن چه‌كدارێن داعش ل رۆژئاڤایێ كه‌ركووكێ بوردۆمانكرن و زیانێن مه‌زن گه‌هاندن تیرۆرستێن داعش.
كه‌ركووكی دیاركر، دده‌مێ بوردۆمانێ چه‌كدارێن داعش دناڤا تونێلانبووینه‌ و گوره‌ی زانیاریێن مه‌ شه‌ش چه‌كدار هاتینه‌ كوشتن و هژماره‌كا زێده‌ترژی برینداربووینه‌