ئەڤرۆ نيوز:
رێڤەبەرێ راگەھاندنێ ل رێڤەبەریا گشتی یا پەروەردا پارێزگەھا دھۆکێ بۆ رۆژناما ئەڤرۆ ئاشکرا کر کو ب مەرەما پتر خزمەتکرنا قوتابیان ل حەفتیا بۆری کۆمبوونەک ل دۆر وان پێشنیارێن وەزارەتا پەروەردێ ل حوکمەتا ھەرێما کوردستانێ بۆ رێڤەبەریا گشتی یا پەروەردا پارێزگەھا دھۆکێ رەوانەکرین ل دۆر ئەزموونێن گشتی یێن قووناغا 12 ێ ئامادەیی ل کۆچکا رێڤەبەریا گشتی یا پەروەردا پارێزگەھا دھۆکێ ھاتە ئەنجام دان.
ئەحمەد عەبدوللا زۆبێر، رێڤەبەرێ راگەھاندنێ ل رێڤەبەریا گشتی یا پەروەردا پارێزگەھا دھۆکێ دیار کر کو د ڤێ کۆمبوونێ دا چەندین پێشنیار ھاتنەکرن ژ وان ژی دانا کودی بۆ قوتابی ژ لایێ وەزارەتێ ڤە بیت یان نە و سەرەرایی ڤێ چەندێ دەستنیشانکرنا رۆژێن ئەنجامدانا ئەزموونان د حەفتیێ دا و گۆت: ” پێشنیار ھاتیە کرن کو قوتابی ل قوتابخانێن خوە ئەزموونان بکەن و رەنگە پارە بۆ پشکداریا ئەزموونان ژ قوتابیێن 12 ێ ئامادەیی بھێنە وەرگرتن، بەلێ دڤێت ئەو پارێ ژ قوتابی دھێتە وەرگرتن ژ ھەشت ھزار دیناران پتر نەبیت”.
ناڤبری ئاماژە دا وێ چەندێ کو د کۆمبوونێ دا پێشنیار ھاتەکرن کو ھەموو مامۆستا ل رۆژێن ئەزموونان پێگیریێ ب چاڤدێریێ بکەن و ھەر رێڤەبەرەکێ بۆ ب رێڤەبڕنا بنگەھەکێ ئەزموونان دھێتە راستپاردن یێ پێگیر نەبیت بھێتە لادان و گۆت: ” ئەو پێشنیارێن د ڤێ کۆمبوونێ دا ھاتینەکرن ھەموو دێ بۆ وەزارەتا پەروەردا حوکمەتا ھەرێما کوردستانێ ھێنە رەوانەکرن، چونکی ل بەرە ئەڤرۆ رۆژا 3/1/2016 کۆمبوونەکا بەرفرەە ل دۆر ئەزموونێن گشتی یێن قووناغا 12 ێ ئامادەیی ل سەرانسەر ھەرێما کوردستانێ ل وەزارەتا پەروەردا حوکمەتا ھەرێما کوردستانێ بھێتە ئەنجامدان”.
رەنگە بۆ پشکداریا ئەزموونان پارە ژ قوتابیێن 12 بھێنە وەرگرتن
نيشاندان