ئەڤرۆ نیوز:
رێڤەبەرێ کۆمپانیا گشتیا بازرگانی یا ئاھێن خوارنێ ل دھۆکێ بۆ ئەڤرۆ دیار کر کو ھەتا نوکە بەغدا برنج و زەیت یێن بەھرا پاریزگەھا دھۆکێ نەھنارتینە، ئەم د بزاڤێن بەردەوام داینە د گەل بەغدا بۆ ھندێ وان ژی فرێکەت و گۆت: “بەغدا نێزیکی 400 تەنێن زەیتێ بۆ دھۆکێ ھنارتبوون، لەو ئەوێ تیرا پاریزگەھا دھۆکێ ھەموویێ نەکر”.
ئەحمەد تەھا، رێڤەبەرێ کۆمپانیا گشتیا بازرگانی یا ئاھێن خوارنێ ل دھۆکێ ئاشکرا کر، ئەو بەردەوام یێ بزاڤان دکەن، دا کو وان کەرەستێن خوارنێ یێن بەھرا پارێزگەھا دھۆکێ و ھەتا نوکە بەغدا نەھنارتین، ب زووترین دەم فرێکەت، چونکو مافێ وەلاتیانە و دڤێت بۆ بزڤریت و گۆت: “ئەو جۆرین ئاھێن خوارنێ یێن سالا بۆری ماین و ھەتا نوکە نەھاتینە بەلاڤکرن، پارە ژ پێش وان ڤە ل سەر وەلاتیان دێ ھێتە بەلاڤکرن، لێ جارێ دیار نینە دێ کەنگی ئەو پارە ھێتە بەلاڤکرن”.
خویا ژی کر، نوکە ئەو یێ پارێ ئاھێن خوارنێ یێ وان ھەیڤێن کەرەستە نەھاتینە دان ل سەر ئاواران بەلاڤ دکەن و گۆت: “دۆرین 57 ھزار کەسان پارێ ئاھێن خوارنێ دێ وەرگرن، کو یێ چار ھەیڤانە و ھەر کەسەک دێ 17 ھزار دیناران وەرگریت، رەنگە ل ڤان رۆژان پارە ل سەر ئاوارێن دەڤەرا شیخان و ئاکرێ ب ریێا بریکارێن ئاھێن خوارنێ بھێتە بەلاڤکرن”.
رێڤەبەرێ کۆمپانیا گشتیا بازرگانی یا ئاھێن خوارنێ ل دھۆکێ ئاماژە ب وێ چەندی ژی کر، نوکە ئار یێ ل سەر وەلاتیان دھێتە بەلاڤکرن، ھەروەسا ب رێژا 90% شەکرا ھەیڤا ئیک ژی یا ھاتیە بەلاڤکرن و ئەو 400 تەنێن زەیتێ ژی یێن گەھشتینە مە، ب تنێ ل سەنتەرێ دھۆکێ ھاتینە بەلاڤکرن و گۆت: “بزاڤێن مە دبەردەوامن، دا کو بەغدا پشکا ئاھێن خوارنێ یا خەلکێ ھەرێمێ ب گشتی و پارێزگەھا دھۆکێ ب تایبەتی بھنێریت”.

ئه‌ڤرۆ نيوز:

وه‌زاره‌تا دارايى و ئابوورى ل حوكمه‌تا هه‌رێما كوردستانێ خشتێ به‌لاڤكرنا مووچێ هه‌يڤا كانوونا دويێ يا سالا 2016ێ راگه‌هاند.

ب گۆره‌ى وێ راگه‌هاندنا وه‌زاره‌تا دارايى، بڕياره‌ ئه‌ڤرۆ رۆژا پێنجشه‌مبى رێكه‌فتى 11ى شوباتا 2016ێ دێ مووچێ هه‌يڤا كانوونا دويێ يا سالا 2016ێ يێ ده‌زگه‌هێ گشتيێ ئاسايشێ و جڤاتا ئاسايش و وه‌زاره‌تا په‌روه‌ردێ هێته‌ به‌لاڤكرن.

ئەڤرۆ نیوز:
ئەندامەکێ بەرێ یێ جڤاتا نوونەرێن عیراقێ دیارکر کو کێشا ھەرە مەزن یا حوکمەتێن مە پێ پلانی یە، دیسا دبێژیت بەری بریار بھێتە دان کو سەربخوەیا ئابووری ب راگەھینین، پێشبینی ھەبوون کو دێ بھایێَ پەترولێ ھێتە خوار.
سامی ئەترووشی ئەندامێ بەرێ یێ لژنا دارایی ل جڤاتا نوونەرێن عیراقێ بۆ رۆژناما ئەڤرۆ گۆت” حوکمەتێَ چو پلان نەبووینە بۆ زێدەکرنا ژێدەرێن داھاتیان، مە چەندین کەرت یێن ھەین کو چو کار نە ھاتیەکرن بۆ پێشئێخستنا وان ، وەکو پیشەسازی و ھەتا بزمار وبورغی دڤێت ھاوردە بکەین، کەرتێ پیشەسازیا پترۆکیماوی و بەرھەمئینانا پانزینێ و گازا سپی وکەرەستێن دی ژ پەترولێ، کو ئەم زێدەی وان بەرھەمان ژ دەرڤە ھاوردە دکەین وگران ل سەر مە دکەڤیت، لەوما دبینین ھەتا نوکە لترەکا پانزین ب (600) دینارایە ل گەل کێمبوونا بھایێ پەترولێ ودڤیابا نوکە لتر کێمتر ژ (400) دیناران ھاتبا فرۆتن، ھەروەسا کەرتێ چاندنێ وچەندین کەرتێن دی یێن کو ببنە ژێدەر بۆ زێدەکرنا داھاتیان”.
ئەترووشی ھێشتا گۆت” ل گەل کو ئەم گەلەگ گیروبووین بۆ پێشئێخستنا وان کەرتان، دڤێت ئەڤرۆ دەست پێ بکەین بەری سۆباھی وگەلەک کۆمپانی وکەس یێن ھەین دڤێن وەبەرھێنانێ دڤان واران دا بکەن، بەلێ پێدڤیە حوکمەت کار ئاسانیێ بۆ وان بکەت وڕێ بھێتە گرتن ل وان کەسان یێن مەرجان ل سەر وان کۆمپانیان دسەپینن کو دڤێت رێژەک یا دیارکری بۆ ھندەک کەسان بن وب دیتنا من ھەموو کەس تێدگەھن مەرما من چی یە ژ ڤێ چەندێ”.
خویاکر ژی” دانپێدان ب شاشیێ پێنگاڤا ئێکی یە بۆ راستڤەکرنا وێ، ھێشتا زوو بوو ھەرێما کوردستانێ سەربخوەیا ئابووری راگەھاندی، ژ بەر دو ئەگەران، یا ئێکێ مە مافەکێ دەستوری یێ ھەی د پەترۆل وسامانێن سروشتی یێن عیراقێ دا ودڤێت پشکا خو وەربگرین، ھندی ئەم پشکەک بین ژ عیراقێ، ئەگەرێ دویێ، پلانەکا رۆھن وئاشکرا مە نەبوو کا دێ چاوا داھاتیێن خوە یێن ئابووری مسوگەر کەین وب تنێ ئەم پشت راستیێن فرۆتنا پ ترولێ بووین وەکو ژێدەر بۆ داھاتیان و بھایێ پەترولێ د دەستێن مەدا نەبو ومە چو ژیدەرێن دی نەبووینە”.
ل دۆر چوونا شاندێ ھەرێمێ بۆ بەغدا، گۆت” دڤێت پەیوەندیێن خوە ل گەل بەغدا موکم بکەین ھندی رۆژەکێ ئەم گرێدای بین ب عیراقێ ڤە بین ومە سەربخوەیا خوە وەرنەگرتبیت، ڕێککەفتن ل گەل بەغدا ڕێیەکا سەرەکی یە بۆ چارەکرنا قەیرانا مە یا دارایی، دگەل کو بەغدا ژی یا د قەیرانان دا دژیت، بەلێ ئەو رۆژانە چار ملیۆن بەرمیلێن پەترولێ دفرۆشیت و عیراق دەولەتە و بۆ ھەیە ھاریکاری یا وەربگریت ژ بانک و رێکخراو و وەلاتێن جیھانی”.
سامی ئەترووشی بۆ چارەکرنا ڤێ قەیرانێ، دبێژیت” زڤرین بۆ دانوستاندنان وموکمکرنا پەیوەندیان ل گەل بەغدا وداخوازا پشکا ھەرێمێ ژ بودجا گشتی یا عیراقێ، زێدەکرنا داھاتیان ب تایبەت فرۆتنا پەترولێ وپێشئیخستنا کەرتێن دی یێن داھاتیان وکێمکرنا مەزاختنا پارەی ب تایبەت یێن دامودەزگەھان و چارەکرنا مووچێن بن دیوار.
سەبارەت چاکسازیێن حوکمەتێ، گوت” ھندەک پێنگاڤێن حوکمەتێ دباشن بۆ چاکسازیێ، بەلێ ھندەک کێماسی یێن ھەین و بڕینا مووچێن فەرمانبەران یا قانوونی نینە کو دبێژنێ (ادخار اجباری)، وڕێیێن قانوونی یێن ھەین دشێن بکار بینن وەکو فرۆتنا (سند) یێن گەنجینێ بۆ دەمەکی وبەرامبەر مفایەکی دھێتە دەستنیشانکرن وئەو (سند) دبنە باوەریەک بۆ فەرمانبەری، یان ھەر ھاولاتیەکی”.
گوت ژی” ل شوینا حوکمەت دەست ب بڕینا مووچێن بن دیواران بکەت، کو ھەموو دانپێدانێ ب ھەبوونا وان دکەن، پێنگاڤا ئێکێ یا حوکمەتێ کێمکرنا موچێن فەرمانبەران بوو، دیسا چو نیشان نینن کو حوکمەتێ پێنگاڤ ھاڤێتینە بۆ زێدەکرنا داھاتیان، بەلکو ب تنێ کار دکەت بۆ کێمکرنا خەرجیان، دیسا پێدڤی بوو کار ل سەر ھندێ ھاتبا کرن کو پەرلەمان ھاتبا کاراکرن، دا بریارێن حوکمەتێ پەسەند کربان وئەو بریارە ببانە بریارێن قانوونی”.