ئه‌ڤرۆ نيوز:
ل ڤێ داویێ چەند شوونوار ل بن گرێ سێمێلێ دەرکەفتینە کو دزڤرنە بەری چەند ھزار سالان، ئەڤە ژی بوویە سەدەما ھندێ ئەو خانیێن دورماندور گری ژی بھێنە کونترولکرن و دورپێجکرن ژ لایێ جھێن پەیوەندیدارڤە. رێڤەبەرێ شوونواران راگەھاند، مە بەری نھا ڤەکۆلینەک ل سەر وی گری کربوو، بەلێ ژ بەر نەبوونا خەرجیان مە داخواز ژ زانکۆیەکا ئەمریکی کریە ڤەکۆلینێ د وی گری دا بکەت دا کو خەرجیان ژی بدەت و ئەو شوونواری ژی ئاستەکێ نێڤدەولەتی وەربگریت.
بەشیر جندی سمو ئاکنجیێ تاخێ کوچەرا ل قەزا سێمێلێ دبێژیت: ئەم نێزیک 80 مالاینە ل دورماندور گرێ سێمێلێ کو د سالێن چلان دا مە خانی ئاڤاکرینە و دەستووری و سەنەدا ئاڤاکرنێ مە پێ ھەنە، نھا گەلەک ژ ڤان خانیان پێدڤی ب نووژەنکرن و سەر ژ نوو ئاڤاکرنێ نە، لێ ل ڤێ دووماھیێ و پشتی وان شوونوارێن ل بن گرێ سێمێلێ ھاتینە دیتن خانیێن مە ژی ماینە ھەلاویستی کو ناھێتە قەبوولکرن ئەم خانیێن خوە ئاڤا بکەین یان نووژەنبکەین، ب بھانا ھندێ کو دێ ھێنە راکرن، لێ کەنگی نزانم.
زێدەتر گۆت: مە چەندین جاران دووڤچوونا باژێرڤانیا سێمێلێ ژی کریە کو رێ بدەنە مە ژ بۆ ئاڤاکرنێ دبێژن بلا، بەلێ ھەکە خانیێن ھەوە ھاتنە راکرن دێ قەرەبوویا ھەوە ل دووڤ نەخشێ خانی یێ کەڤن ھێتە کرن.
موسا ئیبراھیم ژ ئاکنجیێن تاخی دبێژیت: ئاریشا مە گەلەک نەیا ئالۆزە، مادەم رێ نادەنە مە ئەم چو ل خانیێن خوە بکەین، بلا مە قەرەبور بکەن دا ئەم ژی بۆ خوە تشتەکی بکەین.
د. حەسەن ئەحمەد قاسم، رێڤەبەرێ شوونواران ل پارێزگەھا دھۆکێ دیار کر، گرێ سێمێلێ ئێک ژ وان گرێن شوونواری یێن گرنگە ل دەڤەرێ کو ب دەھان چینێن دیروکی یێن د ناڤ ڤی گری دا، ھەموو دیرۆکا ڤێ دەڤەرێ ددەتە خویا کرن، سەربارەی ھندێ ژی ئێک ژ تەلارێن مەزن یێن مەلیکێ ئاشوری (شەلیمەنسەرێ سیێ) د ڤی جھی دایە، ئەڤە ئەو تشت بوون یێن ئەنجامێ ب تنێ ئێک وەرز کو ل سالا 2011 مە لێ کارکریە و ئەنجام زور دباشبوون، ل ل سالێن دووڤ دا مە داخوازا بودجێ کر، لێ رازەمەندی ل سەر نەھات و ھەتا نوکە کار ل سەر راوەستایە، لێ ھەر دەمێ بودجا پێدڤی ھەبیت، دێ دووبارە کار ھێتە کرن.
د. حەسەن زێدەتر دبێژیت: ل سالا بۆری من پەیوەندی ب زانکۆیەکا ئەمریکی کر کو ڤی کاری پێکڤە ئەنجام بدەین، ئەو ژی ژبەر دو ئەگەران، ئێک دا ئاستەکێ نێڤدەولەتی وەربگریت، یا دویێ ژی خەرجیان ب ستوویێ خوەڤە بگریت دا کو کار بەردەوام بیت، لێ ژ بەر کو ئەمریکا ھەموو سیستەمە، لەورا وان ژی پرۆژە پێشکێشی وان دەزگەھان کریە یێن خەرجیا ڤان جۆرە پرۆژان دکەن، ھەر دەمێ رازەمەندی وەرگرتن دێ گرێبەستەکێ ل گەل وان گرێدەین ژ بۆ جێبە جێکرنا کاری، ئەڤ گرە زورێ گرنگە بۆ سێمێلێ و دێ زنجیرەکا بەرزە ژ دیروکا دەڤەرێ دیارکەت، ئەڤجا ھەر کەس یان لایەنێ دڤێت سێمێلێ پێشبێخیت کلیلا ڤێ پێشکەفتنێ ئەڤ گرەیە، بلا ھەموو پێکول بھێنەکرن ژ بۆ ئەنجامدانا ڤی کاری.
سەبارەت پرسیارەکێ، ئەو بۆرجێ ل سەر گری دێ ھێتە راکرن و کەنگی؟ د. حەسەن دبێژیت: مە داخواز ژ رێڤەبەریا گەھاندنێ کریە ب فەرمی و ب رێیا پارێزگەھێ بۆرجی راکەن و دڤێت نوکە ھاتبا راکرن، لێ پا ھەتا نوکە یێ مای و مە بۆ دەم ژی دەستنیشان کربوو و ئەو دەمە ژی ب سەر ڤە جوویە، ژ بەر کو ئەڤ جھە ناسناما دەڤەرا مەیە و دیروکا سێمێلێ یە وەکی ھێمایەکی یە دیروکا مەزنا بەرزە خویا دکەت، نڤێسین یێن ب دەست مە کەفتین ب دەست خەتێ میسماری کو یا نڤێسیە ئەڤە قەسرا شەلیمەنسەرێ سییێ یە، پاشایێ (رۆژھەلات و رۆژئاڤا و ئاشوریان).

ئەڤرۆ نیوز:

د ماوێ چەند رۆژێن بۆری دا ھژمارەکا دوکانێن بازارێ شێلادزێ ب شەڤ ژ لایێ ھندەک دزیکەران ڤە ھاتینە شەلاندن و پۆلیس ژی دبێژن ھندەک کەس ھاتینە گرتن، دوکاندار دخوازن دووڤچوونێن زێدەتر ل سەر ڤێ یەکێ بھێنەکرن.
جیھاد رێکانی، ئێکە ژ وان دوکاندارێن دزی ژێ ھاتیەکرن بۆ ئەڤرۆ دیار کر، درەنگانی شەڤ دەرگەھێ دوکانا من ھاتیە شکاندن و 150 ھزار دینار د قاسا دوکانێ دا بوون برینە و چوویە، مە پۆلیس و جھێن شولەژێ ئاگەھدارکرینە، بەلێ ھەتا نھا چو کەس نەھاتینە دەستەسەرکرن.
سەفین عەبدوللا ئەو ژی دوکاندارەکێ دی یە کو دەرگەھێ دوکانا وی ھاتیە شکاندن و ل دووڤ دا دزی ژێ ھاتینەکرن گۆت: (پشتی چوونا کارەبا گشتی دزیکەر کەفتینە دوکانا من و نێزیکێ 250 ھزار دینار ل گەل شەدەکا زورا کارتێن موبایلا ل دوکانا من ھاتینە دزین، ئەو وەختێ دزی ژ دوکانا من ھاتینەکرن د ھەمان وەخت دا چار دوکانێن دی ژی ل دورماندورێن دوکانا من ھاتینە شەلاندن، ژ بەر ڤێ دخوازین جھێن شولەژێ دووڤچونەکا جدی بکەن، ژ بەر کو ئەم نکارین ب شەڤ و رۆژ ببینە زێرەڤانێن دوکانێن خوە).
زێدەتر گۆت : (ھەتا نھا نێزیکێ 10 دوکانان ل شێلادزێ ھاتینە شەلاندن و ھندەک ژ وان دوکانان دزیێن گەلەک مەزن ژێ ھاتینەکرن، نھا جھێن شولەژێ ھاتن و چوون و ڤەکرنا دوکانان ل دەمژمێر ئێکێ شەڤێ وێڤە قەدەغەکریە و ئەڤ یەکە ژی بوویە جھێ نەرازیبوونا دوکانداران).
برقی ئیسلام رۆژنامەڤانەکێ دەڤەرێ یە دیار کر، دەرکەفتنا دزیکەران پشتی نەھاتنا مۆچەیی و قەیرانێن دارایی پەیدا بووینە و بۆ ئەڤرۆ گۆت : (نھا د جڤاکێ مە دا ھزاران گەنج و کەسانێن بێکار ھەنە و ئەڤ بێکاریە ژی ژ ئەنجامێ قەیرانا دارایی و نەبوونا مۆچان و بێ کاریێ پەیدا بوویە، ژ لایەکێ دی ڤە نھا رەوشا کارەبا گشتی و ماولیدان بەر ب خرابوونێ ڤە چویە و بوویە سەدەم ھندەک کەس ڤێ یەکێ ب دەرفەت ببینن و دزیان بکەن).
زێدەتر گۆت: (پێدڤیە حوکمەتا ھەرێمێ بزاڤان بکەت جارەکا دن قەیرانێن دارایی نەھێلیت و ئاسایشەکا توندتر بگریتە بەر بۆ پاراستنا گیان و سامانێ وەلاتیان).
ژ لایێ خوەڤە رائیدێ مافپەروەر ھێمن سلێمان بەرپرسێ پەیوەندی و راگەیاندنا رێڤەبەریا گشتیا پۆلیسێن دھوکێ بۆ ئەڤرۆ گۆت: چو راستی بو زێدەبوونا دزی و تاوانان ل شێلادزێ و پارێزگەھا دھوکێ نینن وەکو دھێتە گوتن، بەلکو رێژا تاوان و دزیان ھەر وەکو سالێن بۆری یە و قەیرانا دارایی و نەبوونا کارەبا گشتی تاوان و دزی زێدەنەکرینە).
گوت ژی : (ل رۆژانێن بوری چەند دزیکەرەک ل ناحیا شێلادزێ ھاتینە گرتن و دێ ل گۆرەی قانوونێ سەرەدەری ل گەل وان ھێتەکرن و ئەم خەلکی َخوە پشتراست دکەین پۆلیسێن مە ھەردەم د بەرھەڤیێ دانە بۆ ھەر روودانەکا نەچاڤەرێکری و دووڤچوونا تاوان و دزیکەران).
ل دووماھیێ گۆت: (بەھرا تاوان و دزیان ل وەرزێ ھاڤینیێ دھێنەکرن و کێمتر دزی و تاوان ل زڤستانێ دھێنەکرن).