ئه‌ڤرۆ نيوز:
دادگه‌ها تاوانێن عيراقێ برياردا كو پروسه‌يا دادگه‌هكرنا 36 تومه‌تبارێن سه‌ربازگه‌ها سپايكه‌ر بۆ رۆژا ئێك شه‌مبيا بهێت بهێته پاشخستن.
ل دووڤ گوتنا ژێده‌ره‌كێ ژبه‌ر بهێنڤه‌دانا سه‌رێ سالێ، دادگه‌ها بلندا تاوانێن عيراقێ، دوه‌مين روونشتنا پروسا دادگه‌هكرنا تومه‌تبارێن كه‌يسا كوشتارا سپايكه‌ر بۆ رۆژا ئێكهشه‌مبيا بهێت پاشخست.
ئه‌ڤرۆ نيوز:
ئێكه‌تيا ماموستاييێن كوردستانێ راگه‌هاند كو ئه‌و دێ درێژيێ ب خواندنێ ده‌م و ده‌وامێ راناگرن كو مووچه گيروبوويه و داخوازێ ژ حكومه‌تێ دكه‌ت كو زوو موچێ هه‌يڤا 9 ديار بكه‌ن.
سكرتێرێ ئێكه‌تيا ماموستايێن كوردستانێ عه‌بدولواحد محه‌مه‌د ل دۆر گيروبوونا موچێ ماموستايان گۆت: وه‌كو سالێن 2014 و 2015 سه‌ره‌راى هه‌بوونا قه‌يرانان مه هه‌ر به‌رده‌وامى دايه پرۆوسا خواندنێ، له‌وما ئه‌ڤ ساله ژى دێ به‌رده‌واميێ ده‌ينه پروسا خواندنێ و ده‌وامێ تێكناده‌ين.
ئه‌ڤرۆ نيوز، نيوار محه‌مه‌د سه‌ليم:
د پرێسكۆنفرانسه‌كى دا ئه‌ڤرۆ ل باره‌گايێ پشكا ناڤ باژێرى يا رێڤه‌به‌را هاتنوچوونا پارێزگه‌ها دهۆكێ ئامارا سالا 2015ێ هاته راگه‌هاندن.
رائيدێ مافپه‌روه‌ر ئازاد تاها د پرێسكۆنفرانسه‌كى دا گۆت: “ل پارێزگه‌ها دهۆكێ و ده‌وروبه‌رێن وێ هزار و 223 روودانێن جواروجور په‌يدابووينه و ژ وان ژى 966 لێكدان و 170 وه‌رگه‌ريان و87 لێدان بوون”.
زێده‌تر گۆت: “د ڤان روودانان دا، 181 كه‌سان گيانێ خوه ژ ده‌ست دايه و ژ وان ژى 140 ژ ره‌گه‌زێ زێر و 41 ژ ره‌گه‌زێ مێ بوون، سێ هزار و 825 كه‌س ژى بريندار بووينه”.
رائيدێ مافپه‌روه‌ر داخواز ژى ژ ته‌ڤايا شوفێران كر كو پێگريێ ب قانوون و رێنمايێن هاتنوچوونێ بكه‌ن دا كو گيان و سامانێ وان يێ پاراستى بيت ژ هه‌موو مه‌ترسيێن هاتنوچوونێ.
ئه‌ڤرۆ نيوز، نيوار محه‌مه‌د سه‌ليم:
چه‌كدارێن داعش كه‌سه‌كێ به‌رچاڤێ عه‌شيره‌تا جبۆرى سه‌رژێكر پشتى كو زانى ئه‌و يێ رابوويى ب ره‌ڤاندن و ده‌ربازكرنا چه‌ند كچێن ئێزدى.
ب گۆره‌ى ژێده‌رێن ده‌نگوباسان، چه‌كدارێن تيرۆرستێن داعش، كه‌ساتيێ به‌رنياسێ عه‌شيره‌تا جبۆرى “محه‌مه‌د عه‌بدولا جبۆرى” موختارێ گوندێ ئه‌بۆ كدور ل ناحيا حه‌ميدات رۆژئاڤايێ مووسل سه‌رژێكر، ده‌ما كو بزاڤا ره‌ڤاندن و ئازادكرنا كچێن ئێزدى دكر، كه‌فتيه ده‌ستێن وان.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا باجا كۆمپانيان ل دهۆكێ راگه‌هاند كو ب گۆره‌يى نڤيساره‌كێ كو ژ وه‌زاره‌تا دارايى و ئابوورى يا حوكمه‌تا هه‌رێما كوردستانێ بۆ وان هاتيه ره‌وانه‌كرن ئه‌و مامه‌لێن وه‌لاتيان ب رێڤه نابه‌ن.
جه‌لال كه‌مال، رێڤه‌به‌رێ باجا كۆمپانيان ل دهۆكێ بۆ ئه‌ڤرۆ نيوز گۆت: “ل دووڤ گه‌شتاندنا وه‌زاره‌تا دارايى و ئابوورى، رێڤه‌به‌ريا گشتى يا باجێ، رێڤه‌به‌ريا كارگێرى و خۆيه‌تى يا هژماره 4768 ل 29\12\2015 دێ ده‌واما مه هێته راگرتن”.
زێده‌تر گۆت: “ئه‌ڤ راگرتنه دێ ژ 3\1\2015 هه‌تا 5\1\2015 بيت و ب مه‌ره‌ما جه‌ردكرن و رێكخستنا كارى بۆ سالا نوو 2015 بيت”.
جه‌لال كه‌مال داخواز ژ خودانێن كۆمپانيان ژى دكه‌ت ل ده‌مێ سه‌ره‌دانا وان بۆ ئه‌داكرنا باجا خوه گه‌رده‌ن ئازاكرنێ ژ لايێ رێڤه‌به‌ريا باجا ده‌رامه‌تى ڤه بۆ رێڤه‌به‌رێ كۆمپانيێ و پارێزه‌رێ كۆمپانيێ و گۆت: ” بودجا خوه يا بۆ سالا 2016ێ ئاماده بكه‌ن”.
زێده‌تر گۆت: “هيڤيه سه‌ره‌دان بۆ رێڤه‌به‌ريێ ژى دێ ب تنێ ژ لايێ رێڤه‌به‌رێ كۆمپانيێ يان پارێزه‌رێ كۆمپانيێ يان ژى ئه‌و كه‌سێ هاتيه ته‌خويلكرن بيت”.
ل دووماهيێ ژى دا زانين كو ل ده‌مێ پێشكێشكرنا هه‌ر داخوازيه‌كێ بۆ رێڤه‌به‌ريا باجا كۆمپانيان و داخوازا ڤه‌ديتنێ بۆ كۆمپانيێ دڤێت نڤيسار ب كه‌ليشا كۆمپانيێ بيت و ئيمزا رێڤه‌به‌رێ كۆمپانيێ ل سه‌ر بيت.
ئەڤرۆ نیوز ، نەوزاد زادە ھلۆری:
قوتابیێن ھەرێمێ ئەوێن کو ناڤێن وان ل زانکویێن پارێزگەھێن دن یێن عیراقێ ھاتین دکارن ل زانکویێن سەر ب پارێزگەھا کەرکوکێ بخوونن.
ئەمیرا کەریم زەنگەکە ئەنداما پەرلەمانێ عیراقێ لسەر تۆرا کومەلایەتیان فەیس بووکێ گوتیە: ( ب ھەول و بزاڤەکا زۆر ب ھەڤکاریا پەرلەمانتار ” شێرکو ” ئەم شیاین رەزامەندیا ” حسێن شەھرستانی ” وەزیرێ خوێندنا بلندا یا عیراقێ وەربگرین کو ئەو قوتابێن ناڤێت وان ل زانکویێن باژێر و پارێزگەھێن دن یێن عیراقێ ھاتین وەکو زانکۆیا ” تکریت ” بکارن ل زانکویێن پارێزگەھا کەرکوکێ بخوونن و بەردەوام بن لسەر خوێندنێ )
گوت ژی : (ئەم دێ لسەر ھەول و بزاڤێن خوە بەردەوام بین و ئومێدەوارین کو قوتابی سەرکەفتی بن د ھەموو قوناغێت خواندنێ دا ژبۆ خزمەتا کورد و کوردستانێ )
پێشتر کومەکا قوتابێن ھەرێما کوردستانێ ب تایبەتی قوتابێن سنوورێ پارێزگەھا کەرکوکێ ب رێیا ئەندامێن پەرلەمانێ عیراقێ دخواست کو وەزارەتا خوێندنا بلندا یا عیراقێ رازی بیت ژبەر ئەگەرا شەر و ئالوزیێن ھندەک دەڤەرێن عیراقێ ب تایبەتی تکریتێ ل زانکویێن ھەرێمێ بخوونن.
ئه‌ڤرۆ نيوز، نيوار محه‌مه‌د سه‌ليم:
مه‌سعود بارزانى و حه‌يده‌ر عه‌بادى د په‌يوه‌نديه‌كا تله‌فۆنى دا كاودانێن مه‌يدانى يێن شه‌رى پشتى پێشڤه‌چوونێن ڤێ دووماهيێ يێن له‌شكرى ل دژى تيرۆرستێن داعش گه‌نگه‌شه كرن و ته‌كست ل سه‌ر وێ چه‌ندێ كر كو فشاران ل سه‌ر داعش بۆ ب دووماهى هاتنا وێ رێكخراوێ د به‌رده‌وامن.
ب گۆره‌يى به‌ياننامه‌كا سه‌رۆكاتيا هه‌رێما كوردستانێ كو وێنه‌ك بۆ ئه‌ڤرۆ نيوز ره‌وانه‌كريه، تێدا هاتيه: “ئه‌ڤرۆ رۆژا چارشه‌مبى 30ى 12ى 2015 مه‌سعود بارزانى سه‌رۆكێ هه‌رێما كوردستانێ و حه‌يده‌ر عه‌بادى سه‌رۆك وه‌زيرێن عيراقێ، د په‌يوه‌نديه‌كا تله‌فۆنى دا كاودانێن مه‌يدانى يێن شه‌رى پشتى پێشڤه‌چوونێن له‌شكرى ل دژى تيرۆرستێن داعش گه‌نگه‌شه كرن.
ب گۆره‌ى به‌ياننامێ، بارزانى پيرۆزباهى ل حه‌يده‌ر عه‌بادى كرن ب هه‌لكه‌فتا ئازادكرنا باژێرێ روومادى و ئه‌و سه‌ركه‌فتنا هێزێن عيراقێ ل روومادى ب ده‌ست ڤه ئيناى و باژێر ژ بن ده‌ستێ تيرۆرستان ئازاد كرى.
به‌ياننامێ ئاماژه ب وێ چه‌ندێ ژى كريه كو سه‌رۆك بارزانى و سه‌رۆك وه‌زيرێن عيراقێ به‌حس ل به‌رده‌واميا هاريكارى و هه‌ماهه‌نگيا ناڤبه‌را هێزێن پێشمه‌رگه‌ى و هێزێن عيراقى كريه ل شه‌رێ دژى تيرۆرێ دا و ئه‌و ژى دووپات كريه كو قشارێن له‌شكرى ل هه‌موو به‌ره‌يان ل سه‌ر تيرۆرستان دێ د به‌رده‌وام بن بۆ ئازادكرنا ده‌ڤه‌ران و شكاندن و ژناڤبرنا داعش.
ئه‌ڤرۆ نیوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا سێشه‌مبى رێكه‌فتى 31ى كانوونا ئێكێ يا 2015 ئه‌سمانێ دهۆكێ دێ ب ته‌مامى ئه‌ور بيت ل گه‌ل بارينا بارانێ ب درێژاهيا ده‌مێن رۆژێ و ل هنده‌ك ده‌ڤه‌ران ژى دێ ب دژوارى باران باريت و به‌فر ژى دێ ل ده‌ڤه‌رێن چيايى باريت و ل ناڤ سه‌نته‌رێ باژێرى ژى ده‌ليڤا بارينا به‌فرێ يا هه‌ى.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ هاتنا فشارێن نزمێن ده‌ريا سپى بۆ سه‌ر هه‌رێما كوردستانێ دهێته پێشبينيكرن ئه‌سمانى دهۆكێ دێ ب ته‌مامى ئه‌ور بيت ل گه‌ل بارينا بارانێ ب درێژاهيا ده‌مێن رۆژێ و ل هنده‌ك ده‌ڤه‌ران ژى دێ ب دژوارى باران باريت و به‌فر ژى دێ ل ده‌ڤه‌رێن چيايى باريت و ل ناڤ سه‌نته‌رێ باژێرى ژى ده‌ليڤا بارينا به‌فرێ يا هه‌ى.
پشكا پێشبينيان دايه زايه زانين كو دێ ئاراستێ باى ژى دێ باشوورێ رۆژئاڤا بيت ب ره‌نگه‌كى د ناڤبه‌را 15 هه‌تا 20 كم دا و ماوێ ديتنێ ژى 7 بۆ 8 كم بيت، پلێن گه‌رمێ ژى دێ د ناڤبه‌را 4 بۆ 9 پلان دا بيت.
ئه‌ڤرۆ نيوز، حكمه‌ت زێوكى:
ئەنجومەنێ پارێزگەھا دھۆکێ ئەڤرۆ ٣٠/١٢/٢٠١٥ د کۆمبوونا خوە یا ٦٠ێ دا، کو تمامکەرا کۆمبوونا بۆری بوویە، ب پرانیا دەنگان بریار دا کو ھۆلێن یاریا کینویێ ل دھۆکێ بھێنە گرتن، ھەروەسا پۆستێ سکرتێرێ ئەنجومەنی بۆ عەبدولسەمەد تێلی ژ فراکسیۆنا یەکگرتووی ئیسلامی کوردستان ھاتە پەسەندکرن.
ل دەستپێکا کۆمبوونێ ب پرانیا دەنگان بریار ھاتە دان کو یاریا کینویێ ل دھۆکێ بھێتە قەدەغەکرن و پاشی راپۆرتەکا ھەڤپشک ل دۆر بریارێن دەڤەرا کواشێ ھاتە خواندن و گەنگەشە ژ ئالیێ ئەندامان ڤە ھاتەکرن.
ل دوماھیا کۆمبوونێ پرێس کۆنفرانسەک بۆ فەھیم عەبدولا حەمۆ سەرۆکێ ئەنجومەنێ پارێزگەھا دھۆکێ ھاتە رێکخستن و دیار کر پشتی کو د کۆمبوونا بۆری دا گەنگەشە ل سەر پرسا یاریا کینویێ و قومارێن دی ھاتیە کرن و ژ بەر کو ئەڤ جۆرێن قومارێ گرێداینە ب ھندەک کۆمپانی و نڤسینگەھێن بیانی ڤە و دبیتە ئەگەرێ دەرێخستنا کۆژمەکێ مەزن یێ پارێ ھەرێمێ بۆ ژدەرڤە و ئەڤە زەرەرێ دگەھینتە ئابوورێ نەتەوەیی و ژلایێ جڤاکی ڤە خەلکێ تووشی ڤان جۆرە یاریا بووی زەرەرێن مەزن گەھشتینێ و دبیتە ئەگەرێ پەیدابوونا چەندین ئالۆزی و ئاریشێن جڤاکی، رێکەفت بوون کو بریارا داخستنا وان بدەن و گۆت “ئەڤرۆ ب پرانیا دەنگان بریار ھاتە دان کو بھێتە راگرتن”.
د پرسیارەکا کەنالێ رووداو دا کو بریارا قەدەغەکرنێ نابیتە پرسگرێک، چونکی وەکی دبێژن دەستێ ھندەک مەزن و بەرپرسان تێدا بیت؟ سەرۆکێ ئەنجومەنی گۆت “مە ب خۆرایی ئەڤ بریارە نەدایە و ئەڤ بریارە مە د بەرژەوەندیا گشتی دا دایە و خەلکەک ژی پشتەڤانە و پێدڤیە ھەمی دامودەزگەھێن میری ژی پشتەڤان بن، چونکی ب راستی کارەکێ مەترسیدارە ل سەر ئابوور و جڤاک و پەیوەندیێن مە، نەمازە تەخا سنێلە و ژنوو پێگەھشتی قەستا ڤان جۆرە یاریان دکەن، لەورا ھەبوونا خەلکەکێ بەرپرسی یان ھەر ناڤەکێ دی بیت کو ل پشت ڤان جۆرە یاریان بن ئەو بۆ مە یا گرنگ نینە و مە بریارا خوە دا و پێدڤیە ئالیێ بجھئینەر بریارێ بکار بینیت، دیسا چونکی ئەڤە دیاردەکا سەرانسەری یە ل کوردستانێ د ھزرا مەدایە کو پرۆژە یاسایەکێ بۆ پەرلەمانێ کوردستانێ پێشنیار بکەین”.
نيشاندان