ئه‌ڤرۆ نيوز:
خشتێ نوو يێ موچان، دێ ل هه‌يڤا 11 يا ئه‌ڤ ساله، ئانكو هه‌يڤا چوويى كار پێ هێته كرن، كو كێمترين مووچه 170 هزار دينارن و سه‌رموچێ سالانه پله 10 تا پله 8 ب تنێ دێ سێ هزار دينار بن.
ئه‌ڤرۆ نيوز:
پارتى ديموكراتى كوردستان ل دۆر سه‌رۆكێ په‌رله‌مانێ كوردستانێ داخوازيه‌كا نوو دكه‌ت و رادگه‌هينيت كو هه‌تا سه‌رۆكێ په‌رله‌مانى نه‌هێته گوهۆڕين چو روونشتنێن په‌رله‌مانى ناهێنه ئه‌نجام دان و گۆڕان ژى دبێژيت سه‌رۆكێ په‌رله‌مانى ناگۆڕن و بلا چ روونشتنێن په‌رله‌مانى نه‌هێنه ئه‌نجام دا.
دوهى رۆژا ئێكشه‌مبى 20ى كانوونا ئێكێ، مه‌كته‌با سياسى يا پارتى ديموكراتى كوردستان كۆمبوونا خوه يا ئاسايى ئه‌نجام دا و چه‌ندين بڕيارێن نوو دان.
ئاراس حه‌سۆ ميرخان ئه‌ندامێ سه‌ركرداتيا پارتى ديموكراتى كوردستان بۆ رووداو گۆت: “ب چو ره‌نگه‌كى نابيت بوسف محه‌مه‌د سه‌رۆكێ په‌رله‌مانى بيت و هندى ئه‌و سه‌رۆكێ په‌رله‌مانى بيت روونشتنێن په‌رله‌مانى ژى ناهێنه ئه‌نجام دان”.
شۆره‌ش حاجى ئه‌ندامێ جڤاتا نشتيمانيا گۆڕان ژى دبێژيت: “هه‌لويستێ گۆڕان يێ نه‌گۆڕه ل دۆر پارتى و هه‌كه پارتى وێ بڕيارێ بده‌ت، بلا چو كۆمبوونێن په‌رله‌مانى نه‌هێنه كرن و سه‌رۆكێ په‌رله‌مانى ناهێته گوهۆڕين”.
ئه‌ڤرۆ نيوز، بارزان مزوورى:
به‌رپرسێ لقا 14 يا پارتى ل مووسل راگه‌هاند كو ئه‌و چه‌كدارێن داعش يێن د هێرشا سه‌ر ميحورێ خازر يێ پێشمه‌رگه‌ى دا شكه‌ستن خوار و ڤه‌گه‌رياينه مووسل سێداره دان.
عسمه‌ت ره‌جه‌ت، به‌رپرسێ لقا 14 يا پارتى ديموكراتى كوردستان ل مووسل بۆ ئه‌ڤرۆ نيوز گۆت: “دوهى رۆژا ئێكشه‌مبى رێكه‌فتى 21ى كانوونا ئێكێ يا 2015ێ ل ده‌ڤه‌را بابولتۆپ ل مووسل چه‌كدارێن داعش ئه‌و چه‌كدارێن خوه يێن بيانى يێن ژ هێرشا ل سه‌ر ميحوه‌رێ خازر ڤه‌گه‌ريايين سێداره دان”.
زێده‌تر گۆت: “ئه‌ڤ سێداره‌دانه ل سه‌ر بڕيارا واليێ مووسل يێ چه‌كدارێن داعش بوو و ژ به‌ر كو ئه‌و ژ به‌رسينگێ پێشمه‌رگه‌ى ره‌ڤى بوون، ل ناڤا وى بازارى ب دره‌نده‌ترين شێوه هاتنه ئه‌شكه‌نجه دان و پاشان ژى سێداره‌دان”.
ئاماژه ب وێ چه‌ندێ ژى كر كو ل دووڤ دا ژى 11 وه‌لاتيێن مووسل ژى سێداره دان ب تاوانا گۆتنێن ئاخفتنێن نه‌شيرين ب ئه‌ميرێ چه‌كدارێن داعش، ئه‌بۆ به‌كر به‌غدادى.
ئه‌ڤرۆ نيوز:
ئارى هه‌رسين ئه‌ندامێ فراكسيۆنا پارتى ل په‌رله‌مانێ كوردستانێ دلته‌نگيا خوه ده‌رباره‌ى راگه‌هاندنا دووماهيێ يا كۆمبوونا جڤاتا نشتيمانيا بزاڤا گۆڕان ده‌ربڕى و داخواز ژى ژێ كر كو زوو بچنه ناڤ رێزێن ئێكه‌تى نشتيمانى كوردستان.
ئه‌وى ئه‌ندامێ فراكسيۆنا پارتى ديموكراتى كوردستان ل په‌رله‌مانێ كوردستانێ د ئه‌كاونتێ تايبه‌ت خوه، ل تۆڕا جڤاكيا فه‌يسبۆكى به‌لاڤكريه: “جڤاتا نشتيمانيا گۆڕان كۆمبوونا ئاسابى يا خوه گێرا”.
زێده‌تر د وى پۆستى دا هاتيه: “مخابن جاره‌كا دى به‌حس ل شه‌رعيه‌ت نه‌بوونا داموده‌زگه‌هێن ئيدارى يێن هه‌رێما كوردستانێ دكه‌ت كو هه‌موو لايه‌نێن سياسى يێن كوردستانى ب نه‌شه‌رعى دزانن ژبلى حزبا گۆڕان”.
هه‌رسين روو ل ئه‌ندامێن بزاڤا گۆڕان كريه و دبێژيت: “مخابن بۆ ڤى هه‌لويستى، ل گه‌ل رێزێن من بۆ گه‌له‌ك ژ ئه‌ندام و لايه‌نگرێن گۆڕان، هيڤيدارم زوو بچنه ناڤ رێزێن ئێكه‌تيێ و چو نه‌بيت وى ده‌مى مرۆڤ دشێت سه‌ره‌ده‌ريێ ل گه‌ل سياسه‌ته‌كا رووهن بكه‌ت، د نوكه دا هه‌ر ئێك ژ ئێكه‌تى و كۆمه‌ل و ئێكگرتوو و پارتى دێ حوكمه‌تێ پێكئينن وه‌كو حوكمه‌ته‌كا زۆرينه”.
ئه‌ڤرۆ نيوز:
ئه‌ندامه‌كێ سه‌ركراداتيا پارتى ديموكراتى كوردستان راگه‌هاند كو سه‌رۆك بارزانى د كۆمبوونا سه‌ركرداتيا پارتى ديموكراتى كوردستان دا داخواز كر كو ل گه‌ل حزبێن دى ئاليه‌ته‌كێ ببينن دا كو كار ل سه‌ر ريفراندۆمێ بكه‌ين.
دوهى رۆژا ئێكشه‌مبى رێكه‌فتى 20ى كانوونا ئێكێ يا 2015ێ سه‌ركرداتيا پارتى ديموكراتى كوردستان ب سه‌رۆكاتيا مه‌سعود بارزانى سه‌رۆكێ پارتى ديموكراتى كوردستان كۆمبوونا خوه يا ئاسايى ئه‌نجام دا.
ئاراس حه‌سۆ ميرخان، ئه‌ندامێ سه‌ركرداتيا پارتى ديموكراتى كوردستان بۆ رۆژناما رووداو راگه‌هاند: پارتى كار دكه‌ت بۆ وێ چه‌ندێ كێشێن هه‌رێما كوردستانێ مه‌زنتر نه‌بن، وه‌سان بڕياره ل ڤان نێزيكان هه‌ردو مه‌كته‌بێن سياسى يێن پارتى و ئێكه‌تى دێ كۆمبوونه‌كا گرنگ ئه‌نجام ده‌ن.
ئاشكه‌را ژى كر كو بارزانى د كۆمبوونا سه‌ركرداتيێ دا، داخواز كر كو ل گه‌ل حزبێن دى ئاليه‌ته‌كێ ببينن بۆ وێ چه‌ندێ كار ل سه‌ر ريفراندۆمێ بهێته كرن بۆ سه‌ربه‌خۆيا كوردستانێ.
ئەڤرۆ نیوز:
پەیڤدارێ ئێکەتیا وەبەرھێنەرێن کوردستانێ راگەھاند، ژ بەر تێکچوونا ئابووریا ھەرێما کوردستانێ د ڤان دو سالێن بۆری دا، نێزیکی 700 وەبەرھێنەرێن ھەرێما کوردستانێ دەست ژ کارێ خوە بەرداینە و ئیفلاس بووینە و گۆت: رەوشا نھا ھەرێم تێدا دبۆریت بوویە ئەگەر کو ھەڤبەندیێن بازرگانی ب رێژا 70% ل کێمیێ بدەن و نێزیکی 700 ھزار کەسان ژی ل کەرتێ تایبەت ماینە بێکار. ھەروەسا دیار کر کو ل ھەرێما کوردستانێ نێزیکی 100 ھزار خێزانان ل بن ھێلا ھەژاریێ دا دژین و نیڤا وان ژی فەرمانبەرێن حوکمەتا ھەرێما کوردستانێ نە.
مەلا یاسین مەحموود، پەیڤدارێ ئێکەتیا وەبەرھێنەرێن کوردستانێ د دیدارەکێ دا بۆ ئەڤرۆ دیار کر، بەر تێکچوونا ئابووریا ھەرێما کوردستانێ د ڤان دو سالێن بۆری دا کارتێکرنەکا گەلەک مەزن ل سەر ھەرێما کوردستانێ کر و کەرتێ وەبەرھێنانێ ژی بەر ب شکەستنەکا مەزن بر و بوو ئەگەر کو د دەمێ دیارکری دا نێزیکی 700 وەبەرھێنەرێن ھەرێما کوردستانێ بێ پارە بمینن و ھەتا دەمەکێ نەدیار دەست ژ کارێ خوە بەردەن و گۆت: ئەڤ رەوشە بوو ئەگەر ژی کو نێزیکی 700 ھزار کەسان ل کەرتێ تایبەت بێکار بمینن و نەشێن چو کارێن دی بکەن.
ناڤبری ئاماژە دا وێ چەندێ، ل سالا 2010 داھاتێ تاکە کەسی ل ھەرێما کوردستانێ بۆ ھەر خێزانەکێ ژ پێنچ ھزار دۆلاران تێپەراند بوو، بەلێ نھا داھاتێ سالانە یێ خێزانێ ژ ھزار دۆلاران تێناپەریت و ئەڤە ژی بوویە ئەگەر نھا نێزیکی 10% ژ خەلکێ ھەرێما کوردستانێ ل بن ھێلا ھەژاریێ دا بژین و گۆت: ژ سەرجەمێ میلۆن خێزانان ل ھەرێما کوردستانێ، نێزیکی 100 ھزار خێزانان ل بن ھێلا ھەژاریێ دا دژین و ئەو ژی نیڤا وان فەرمانبەرێن حوکمەتێ نە.
مەلا یاسین زێدەتر دبێژیت: ل سالا 2013 ھەڤبەندیێن بازرگانی ل ھەرێما کوردستانێ چوو بوو د سەر 10 ملیار دۆلاران دا، بەلێ ژ بەر تێکچوونا رەوشا ئابووری 70% ژ ھەڤبەندیێن بازرگانی کێمبووینە و نھا ژ سێ ملیار دۆلاران نابۆریت و گۆت: د ماوێ ڤان دو سالان دا 80% ژ کارگەھێن ھەرێما کوردستانێ ھاتینە راگرتن و نەشێن چو بەرھەمی دابین بکەن و کارتێکرنەکا مەزن ل گەنجان ژی کریە، چونکو رێژەکا مەزن یا گەنجان بێکار ھێلاینە.
ئه‌ڤرۆ نيوز:
رێڤەبەرێ بەلاڤکرنا کارەبێ ل پارێزگەھا دھۆکێ بۆ رۆژناما ئەڤرۆ دیارکر کو د یازدە ھەیڤێن بۆری دا (1253) زێدەگاڤی ل سەر کارەبێ ھاتینە کرن و کارەب ژێ ھاتینە بڕین و ب کوژمێ شێست و حەفت ملیۆن دیناران ھاتینە سزاکرن و گۆت “ئەو زێدەگاڤی جۆراوجۆرن”.
سەفەر تەیب رێڤەبەرێ بەلاڤکرنا کارەبێ ل پارێزگەھا دھۆکێ گۆت ژی “تیمێن مە بەردەوام دگەرن و رۆژانە مال مال دچن و ئەو کەسێ زێدەگاڤی ل سەر تۆرا کارەبێ کری ئەم وێ زێدەگاڤیێ رادکەین و کارەب ژێ دھێتە بڕین و بۆ ماوێ دو سالا بھایێ کارەبێ ژێ وەردگرین”.
دەربارەی قەرزێن کارەبێ رێڤەبەرێ بەلاڤکرنا کارەبێ ل پارێزگەھا دھۆکێ خویا کر کو ھندەک کەس دھێن دەینێ خوە دەن و ھندەک ژی دھێن پارێ وان بۆ دکەنە (قست) و گۆت “خوزی قەیرانا دارایی ب دووماھیی ھاتبا داپتر مە شیا با خزمەتا خەلکی بکەین و شانازیێ ب خەلکێ دھۆکێ دبەین ب ھەموو تشتا و حەز دکەین ھەموو دەمان قوربانیێ بدەت پێخەمەت وەلاتەکێ ئازاد ھەبیت”.
دووماھیێ ئەندازیار سەفەر تەیب گۆت “وەرزێ زڤستانێ وەرزەکێ نەخۆشە و ھندی خەلک بشێن ئابووریێ د کارەبێ دا بکەن باشە و دیسان دبیتە ئەگەر کو مە کارەب ھەبیت و قەیرانا دارایی کارتێکرن ل سەر ھەموو رێڤەبەریا کریە”.
ئەڤرۆ نیوز، سالار دۆسکی:
بەرپرسەکێ بزاڤا دیموکراتی یا ئاشووری ل دھۆکێ ئاشکراکر کو ب تنێ بۆ پاراستنا مافێن کێم نەتەوا ل عیراقێ، پێدڤی یە ھەرێم بۆ بھێنە چێکرن یان ببنە پارێزگەهـ.
فەریدی یەعقوب بەرپرسێ بزڤا دیموکراتی یا ئاشووری ل دھۆکێ بۆ ئەڤرۆ نیۆز گۆت: بۆ پاراستنا خەلکێ ئاشووری ل دەشتا مووسل و دەڤەرێ پێدڤی یە ھەرێمەکا سەربەخۆ بۆ پێکھاتێن دەڤەرێ بھێتە دروستکرن یان ببنە پارێزگەە، چونکە گەلەک یا بزحمەتە عیراقا بەرێ بزڤریت و پێکڤە ژیان ئێدی نەما.
ھێشتا گۆت: بەردەوام خێزانێن ئاشووری یێ ژ عیراقێ دەر دکەڤن و بەر ب دەرڤە دچن و ئەڤە وێ چەندێ دیار دکەت کو باوەری نەمایە ئەڤان جھان بژین.
گۆتژی: دبینم ئەڤە پشتی وێ چەندێ دێ ھێـتەکرن کو مووسل و ھەموو دەڤەر ژ دەستێ داعش بھێنە رزگارکرن و پاقژکرن.
ئەڤرۆ نیوز، سالار دۆسکی:
سەرۆکێ لژنا پیشەسازی وسامانێن سرۆشتی ل جڤاتا پارێزگەھا دھۆکێ ئاشکراکر کو نوکە ژێدەرێ سەرەکی یێ پانزینێ بۆ ھەرێمێ و پارێزگەھێ ھەر ژێدەرێ نافخوەیە و ئێدی مەترسی ل سەر چێبوونا قەیرانێن پانزینێ نینە.
عەبدوسەمەد تێلی زێدەتر بۆ مالپەرێ ئەڤرۆ نیۆز گۆت: ژبەر تێکچوونا کاودانێن ئێمناھیێ ل باکورێ کوردستانێ و راگرتنا ھاتن و چوونێ ئەوان باژێران خەلکێ مە ھەست ب مەترسیێ دکەت، لێ بلا نەترسن پانزینا مە یا نافخویە و ژ دەرڤە ناھێت و ھندەک ژ ئیرانێ دھێت زێدەباری مە گەلەک یەدەک ھەیە، ب چو رەنگان قەیران پەیدا نابیت.
عەبدوسەمەد ھێشتا گۆت: مە رۆژانە پێدڤی ب نێزیکی ملیۆنەک 200 لترێن پانزینێ یە، لێ نوکە چونکە یا بەرفرەە و بازرگان ژی دھینن، رێڤەبەریا گازێ دیار دکەت کو گەلەک پانزینخانە ناھێنە بەھرا خوە چونکە ل پانزیخانا پانزین ھەیە.
ھێشتا گۆت: نوکە سەردەری ل گەل 95 پانزیخانا ل دھۆکێ دھێتەکرن و رۆژانە پشکنین ل پانزیخان دھێتەکرن ل سەر کوالێتیا پانزینێ.
نيشاندان