NO IORG
نووترين نووچه
نوچێن گرنگ

ئەڤرۆ نيوز:
بەرپرسەکێ پارتی دیمۆکراتی کوردستان ل بەغدا ڕاگەھاند، ھەیامەکە ب رێیا نامان گەف ل کوردێن بەغدا دھێنە کرن و داخوازێ ژێ دکەن ژ بەغدا دەربکەڤن، ئەڤێ ئێکێ ژی ترس دودلی ل جەم کوردێن بەغدا دروست کریە.
ئیسماعیل سایەمیر کارگێڕی رێکخستنا لقێ پێنجێ پارتی دیمۆکراتی کوردستان ل بەغدا، بۆ مالپەڕێ فەرمیێ پارتی دیمۆکراتی کوردستان گۆت “ھەیامەکە کەسێن نەناسکری ل بەغدا ب نامێن موبایلێ گەف ل کوردێن بەغدا دھێنەکرن کو دەربکەڤن، ھەتا کو گەفێن کوشتنێ کرینە و گۆت “ھەتا نھا 25 کەسان سەرەدانا مە کریە و ئەم ھایدار کرینە کو گەفێن دەریخستنێ ل وان دھێنەکرن، لەورا نھا ترس کەفتیە د دلێ کوردێن بەغدا دا”.
(سایەمیر) گۆت ژی “نەھاتیە زانین کا ئەو کەسێن گەفان ل کوردێن بەغدا دکەن کینە، لێ دوھی 7/12/2015 ژمارەکا کەساتیێن عەشیرەتێن جودا جودا یێن کوردان سەرەدانا مەرجەعێن شیعەیان کریە و ژ وان گەفێن ل کوردان دھێنەکرن ھایدار کرینە، ئەوان ژی گۆتیێ ئەڤە ب ھیچ ئاوایەکی ناھێتە قەبوولکرن و رێکێ نادەینە ھیچ کەسەکی گەفان ل کوردان بکەت”.
بەرپرسەکێ پارتی دیمۆکراتی کوردستان ل بەغدا خویا ژی کر کو ھەتا نھا ژمارەکا زۆرا وەلاتیێن کورد ژ بەغدا رەڤینە و قەستا ھەرێما کوردستانێ کرینە، ب تایبەتی ھاتینە و پرانیا وان ل سەردەمێ مالکی قەستا ھەرێمێ کریە، چونکی وی دەمی گەفێن تۆلڤەکرنا خوین ب خوین ل کوردان دھاتنەکرن.

ئەڤرۆ نیوز:
د یاداشتەکێ دا ھژمارەکا زۆرا قوتابیێن زانکۆ و پەیمانگەھێن ھەرێما کوردستانێ داخوازێ ژ وەزارەتا خواندنا بلند و ڤەکۆلینێن زانستی دکەن کو پێداچوونێ د بڕیارا خوە دا یا دەربارەی عبۆرێ بکەت، بەرۆڤاژی ڤێ چەندێ دێ وان کارڤەدانێن توند ھەبن.
د یاداشتێ دا کو وێنەک بۆ رۆژناما ئەڤرۆ ھاتیە ھنارتن و تێدا ھاتیە ئاشکرا کرن کو مە چەندین یاداشت ل دۆر بڕیارێن وەزارەتا خواندنا بلند و ڤەکۆلینێن زانستی یا حوکمەتا ھەرێمێ دەربارەی عبۆرێ بۆ ھەر سێ سەرۆکاتیێن ھەرێما کوردستانێ پێشکێشکرینە، بەلێ ھەتا نوکە بەرسڤا وان یاداشتان نەھاتیە دان، ژ بەر ڤێ چەندێ ھەکە بەرسڤا مە نەھێتە دان ئارامگرتنا مە قوتابیان دێ ب دووماھی ھێت.
د ھەمان یاداشت دا نوونەرێن پێنج ھزار قوتابیێن ھەموو زانکۆیێن ھەرێما کوردستانێ ئاشکرا کریە کو ئەو دخوازن ھەر سێ سەرۆکاتیێن ھەرێما کوردستانێ رەوشا وان بەرچاڤ وەرگرن و مافێ پێنج ھزار قوتابیان بۆ ئیمزایەکا وەزیری نەھێتە بەرزەکرن.
بەری نوکە وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ بڕیار دابوو دو وانە ببنە عبۆر لێ ھەردو وانە د ئێک سال دا نەبن، ھەمبەر ڤێ بریارێ قوتابی نەرازیبوونا خوە دیار دکەن و دخوازن دو وانە پێکڤە ببنە عبۆر د سالەکێ دا، نە ھەر سالەکێ وانەک ببیتە عبۆر.

ئەڤرۆ نيوز:

ل گەل ھاتنا ھژمارەکا تانک و تۆپ و 900 سەربازێن ھێزا لەشکرێ تورکی بۆ دەوروبەرێن باژێرێ مووسل، ھەردو سەرۆکاتیێن کۆمارا عیراقێ و حکومەتا عیراقێ دلگرانیا خوە ھەمبەری پێنگاڤا وەلاتێ تورکیا دیارکرن، ب پێنگاڤەکا نە دجھێ خوەدا و جھێ نەرازیبوونا خوە ھژمارتن.
لێ پەردا نھێنیا ھاتنا لەشکری و ھێزێن تورکی ژ ئالیێ پارێزگەھێ بەرێ یێ مووسل و سەرکردێ ھێزا حەشدا نیشتیمانی ئەسیل نوجێفی ڤە ھاتە لادان، ھەروەسا بەحسێ شەرێ رزگارکرنا باژێرێ مووسلێ کر و دووپاتکر، کو (دەستپێکرنا وی شەری ل بھارا بھێت نابۆریت).
ئەسیل نوجێفی راگەھاند، ھاتنا لەشکرێ تورکی بۆ مەشقکرنا لەشکرێ عیراقێ ل دوڤ داخوازیا سەرۆکێ جڤاتا وەزیرێن عیراقێ حەیدەر عەبادی ھاتینە، ھەروەسا خوەیاکر، ئەم بخێرھاتنا ھەر ھێزەکا سونی دکەین چو ژ وەلاتێ تورکیا یان وەلاتێن عەرەبی بیت، بۆ ھندێ پشکداریا ھێزێن ھەڤپەیمانێن نێڤدەولەتی بۆ شەرێ رزگارکرنا مووسلێ بکەن، ھەڤدەم ئەم ژی ھێزێن ئیرانی قەبوول ناکەین، ھەروەسا ھەر ھێزەکا بێھنا تائیفەگەری ژێ بھێت بلا نێزیکی مووسلێ نەبیت، و شەرێ رزگارکرنا مووسلێ نەیێ دوورە.
سەبارەت سەرەدانا سەرۆکێ ھەرێما کوردستانێ مەسعود بارزانی بۆ وەلاتێن کەنداڤی نۆجیفی گۆت: بەحسێ شەرێ مووسلێ ھاتیە کرن و ددەمێ 20 رۆژێن بھێت دا پێشڤەچوونێن مەزن و نوو دێ پەیدابن.
پارێزگەھێ بەرێ یێ مووسل خوەیاکر، ل دەستپێکا سالا 2016 روودانێن گرنگ سەبارەت شەرێ مووسلێ دێ ھێنە رۆژەڤێ، کو پەیوەندی ب گوھۆرینێن مەزن د سیاسەتا نێڤدەولی دا ھەنە بتایبەتی ویلایەتێن ئێکگرتیا ئەمریکی و دەولەتێن ئەوروپی ل دۆر مووسل، ھەروەسا سەبارەت چارەنڤیسێ عیراقێ دیارکر، سەرۆک بارزانی دێ رۆلەکێ کاریگەر و مەزن د پاشەرۆژا نێزیک دا ھەبیت، لەروا یا گرنگە بۆ دەولەتێن کەنداڤی و سعودیێ گەنگەشێ ل سەر چارەنڤیسێ باژێرێن باکورێ عیراقێ ل گەل سەرۆک بارزانی بکەن.
ھندەک ژێدەرێن دەنگۆباسان گۆتن، بارزانی 8 ملیار دۆلار ژ وەلاتێ سعودیێ بۆ ھندێ پلانا شەرێ مووسلێ پێ بھێتە برێڤەبرن، بەلێ سەرۆکێ ھەرێما کوردستانێ مەسعود بارزانی ئەو دەنگۆباس رەتکرن و گۆت: مە ئێک سەنت ژی ژ وەلاتێ سعودیێ وەرنەگرتیە، بەلێ بەحسێ شەرێ رزگارکرنا مووسلێ ئێک ژوان کێشان بوویە یێن ل گەل سعودیێ ھاتینە گەنگەشەکرن.

ئه‌ڤرو نیوز ، نه‌وزاد زاده‌ هلورى:
ماموستایه‌ك ب رێیا ئه‌ڤرو نیوز دخوازیت كو نامه‌یه‌كا ڤه‌كرى بۆ وه‌زیرێ په‌روه‌ردێ فرێبكه‌ت و تێدا دخوازیت كو پێدڤى یه‌ وه‌كو ئه‌ركه‌ك هه‌رماموستایه‌ك سالانه‌ ڤه‌كولینه‌كا زانستى لگوره‌ى بسپووریا خوه‌ درۆست بكه‌ت.
محه‌مه‌د سالح پێندرویى ئه‌و ماموستایه‌ كو ب رێیا ئه‌ڤرۆ نیوز نامه‌یا خوه‌ به‌لاڤكریه‌ و دنامه‌یا خودا دبێژیت: ( ئێك ژ ئاریشه‌یێن پرانیا ماموستایان د هه‌موو قوناغێن خواندنێ دا دزڤریت بۆ لاوازیا ئاستێ زانستى و پێشه‌یێ وان ژبه‌ركو پشكه‌كا زور یا ماموستایان سالانه‌ چۆ زانیاریێن نوو نائێخنه‌ سه‌ر تێنڤیسا زانیاریێن خوه‌ و زانستێن جودا جودا ناخوونن و د روژه‌ڤه‌كا روتینى دا كارێ خوه‌ دكه‌ن )
ئه‌وى ماموستایى زێده‌تر دنامه‌یا خودا گوتیه‌ : (دڤى واریدا داخوازێ ژ جه‌نابێ وه‌زیرى دكه‌م كو كه‌سێ ئێكێ یه‌ د ئاست وه‌زاره‌تا په‌روه‌ردێ دخوازم كو ئه‌و ب رێیا میكانزمه‌كێ بزاڤێ بكه‌ت سالانه‌ هه‌موو ماموستایان نه‌چار بكه‌ت كو ڤه‌كولینه‌كێ د بسپووریا خودا ل گوره‌ى میتود و بنه‌مایێن زانستى درۆستبكه‌ت و ئێدى ب پشتا خوه‌ ب ئێك تشتێ بتنێ نه‌گرێده‌ن )

ل دوماهیێ گۆت : ( بۆ گه‌هشتنا ڤێ مه‌ره‌مێ ژى وه‌زاره‌تا په‌روه‌ردێ دكاریت پیڤه‌رێ پاداشت و سزا بۆ ماموستایان ل به‌رچاڤ وه‌ربگریت و ئه‌ڤ یه‌ك دێ بیته‌ سه‌ده‌م كو جاره‌ك دن جووره‌ بسپوریه‌ك بكه‌ڤیته‌ د ئاستێ زانستیێ ماموستایان و ئاستێ زانستیێ قوتابیان و پروسه‌یا په‌روه‌ردێ ژى جاره‌ك دن دێ بلند بیته‌ڤه‌ )
محه‌مه‌د سالح پێندروى كو دهێـه‌ نیاسین ب ( جگه‌ر سووز ) ل سالا 1987 ژ دایك بوویه‌ و ده‌رچۆویێ خانه‌یا ماموستایانه‌ ل هه‌ولێرێ و هه‌تا نها 40 پرتوكێن تایبه‌ت لسه‌ر په‌روه‌ردێ و بلندكرنا ئاستێ قوتابیان چاپ و به‌لاڤكرینه‌ و نها ماموستایه‌ك ژ ئێك ژ قوتابخانه‌یێن سه‌ر ب پارێزگه‌ها هه‌ولێرێ و خه‌لكێ ده‌ڤه‌را بارزانه‌.

mn

141

ئه‌ڤرۆ نیوز:
جێگرێ سه‌رۆك وه‌زیرێن عیراقێ راگه‌هاند كو به‌رده‌وامیا قه‌یرانێن د ناڤبه‌را ئه‌نقه‌ره‌ و موسكو دێ زیانێن 9 ملیار دولاران ب توركیا گه‌هینیت.
محه‌مه‌د شیمشیك جێگرێ سه‌رۆك وه‌زیرێن توركیا راگه‌هاند” ئه‌گه‌ر بهێت ب تمامى په‌یوه‌ندیێن مه‌ ل گه‌ل موسكو ژ ئالیێ ئابوورى ڤه‌ به‌ره‌ڤ ئالوزبوونێ بچن، دێ زیانه‌كا مه‌زن ب ئابووریا توركیا كه‌ڤیت، ب تایبه‌ت پشتى سه‌پاندنا هنده‌ك كوتوبه‌ندێن ئابوورى دژى ئه‌نقه‌ره‌ و قه‌بارێ زیانا ندێ گه‌هته‌ 9 ملیار دولاران.
ئاژانسێن توركیا به‌لاڤكرینه‌ كو نوكه‌ گه‌له‌ك ژ كه‌رتێن توركیا ل دووڤ بازاره‌كێ پێگوهۆر دگه‌رن، بۆ وێ یه‌كێ بشێن قه‌ره‌بوویا وێ زیانێ بكه‌ن، كو ژ ئه‌گه‌رێ سزایێ رووسیا به‌ر ب وان كه‌فتى.

ئه‌ڤرۆ نیوز: ڤه‌ده‌ر ره‌شاڤایی:
وه‌زیرێ ده‌رڤه‌یێ ئه‌لمانیا شتاینمایه‌رد سه‌ره‌دانه‌كێ دا ژ به‌غدا گه‌هشته‌ فرۆكخانا هه‌ولێرێ ل هه‌رێما كوردستانێ، كو دبیته‌ سێیه‌م سه‌ره‌دانا وی بۆ هه‌رێمێ و ژ ئالیێ نێچیرڤان بارزانی سه‌رۆك وه‌زیرێن هه‌رێما كوردستانێ ڤه‌ هاته‌ پێشوازیكرن.
شتاینمایه‌ر دێ لگه‌ل سه‌رۆك بارزانی كۆم بیت، و دێ سه‌ره‌دانا هێزێن پێشمه‌رگه‌ یێن ژ ئالیێ شیره‌تكارێن ئه‌لمانیا ڤه‌ دهێنه‌ مه‌شقدان كه‌تن.

ئه‌ڤرۆ نیوز: ڤه‌ده‌ر ره‌شاڤایی:
د به‌یاننامه‌كێ دا پارتا ده‌عوه‌ ره‌تكر كو سكرتێرێ گشتیێ وێ پارتێ نوری مالكی چ رێككه‌فتن دگه‌ل توركیا بۆ رێدانێ ب له‌شكه‌رێ توركیا بۆ ناڤ ئاخا ئیراقێ ئیمزاكربیت.
ئه‌ڤ یه‌كه‌ هات وه‌ك به‌رسڤه‌ك بۆ ئه‌ندامێ لژنا په‌یوه‌ندیێن ده‌رڤه‌ ل په‌رله‌مانێ ئیراقێ میسال ئه‌لوسی كۆ گۆت بوو: حكومه‌تا نوری مالكی ب مه‌ره‌ما كێمكرنا رۆلێ كوردان ل ناوچێن ناكوكی لسه‌ر و رێگرتنا كوردان ژ گرتنا وان ده‌ڤه‌ران رێكه‌فتنه‌كا ئێمناهیێ لگه‌ل توركیا بۆ هنارتنا هێزێن خوه‌ بۆ ناڤ ئاخا ئیراقێ ئیمزاكربوو.”
هه‌روه‌سا د به‌یاننامێ دا پارتا ده‌عوه‌ ئه‌سیل نوجێفی ب راده‌ستكرنا مووسل بۆ داعش تومه‌تباركرییه‌.

ئه‌ڤرۆ، قائید میرۆ:

ل میحوه‌رێ رۆژئاڤایێ كه‌ركووكێ تیرۆرستێن داعش دخواست دڕبه‌كێ ل هێزا پێشمه‌رگه‌ی بده‌ن، به‌لێ پیلانا داعش هاته‌ هاته‌ ژناڤبرن و چه‌ندین چه‌كدار ژی هاتنه‌ كوشتن.
دكتۆر كه‌مال كه‌ركووكی، به‌رپرسێ میحوه‌رێ رۆژئاڤایێ كه‌ركووكێ بۆ ئه‌ڤرۆ نیۆز راگه‌هاند” نیڤرۆیا ئه‌ڤرۆ هیزه‌كا گروپا تیرۆرستیا داعش ل نێزیك گوندێ بۆتمه‌ یێ میحوه‌رێ رۆژئاڤایێ كه‌ركووكێ كه‌فتنه‌ لڤینان بۆ لێدانا هێزێن پێشمه‌رگه‌ی، به‌لێ پیلانا وان هه‌ر زوو ژلایێ هێزێن پێشمه‌رگه‌و هه‌ڤپه‌یمانان هاته‌ ژناڤبرن.
كه‌ركووكی دیاركر، پشتی ده‌ستنیشانكرنا جهێ خرڤه‌بوونا چه‌كدارێن داعش ژۆرا عه‌مه‌لیاتا میحوه‌ری دگه‌ل هه‌ڤپه‌یمانان دڕبێن كوژه‌ك ل چه‌كدارێن داعش دان و د ئه‌نجامدا زیانێن مه‌زنێن گیانی گه‌هشتن تیرۆرستان و پیلانا وان ژی هاته‌ پیچكرن.

991

ئه‌ڤرۆ نیوز:
ژ ئه‌گه‌رێ داخستنا ئه‌سمانێ هه‌رێما كوردستانێ ل هه‌مبه‌ر فرینا فرۆكان، هێلا ئه‌سمانیا توركیا ئه‌ڤرۆ و سوبه‌ گه‌شتێن خوه‌ بۆ هه‌ولێر و سلێمانیێ راگرتن.
هێلا ئه‌سمانیا توركیا ب رێیا مالپه‌رێ خوه‌ یێ فه‌رمى ئاگه‌هداریه‌ك به‌لاڤكریه‌ و ب فونته‌كێ مه‌زن نڤیسى یه‌” ئاگه‌هداریه‌ك بۆ گه‌شتیارێن هه‌ولێر و سلێمانیێ”
هێلا ئه‌سمانیا توركیا ب رێیا مالپه‌رێ خوه‌ یێ فه‌رمى دیسا دیاركریه‌ كو بو وان كه‌سێن دخوازان پتر پێزانینان وه‌رگرن، بلا په‌یوه‌ندى ب ژمارا ته‌له‌فونا ٤٤٤٠٨٤٩یان سه‌ره‌دانا مالپه‌رێ هێلا ئه‌سمانیا توركیا بده‌ن ب ڤى ناڤ و نیشانێ www.thy.com.

ئه‌ڤرۆ نیۆز، قائید میرۆ
ژ ئه‌گه‌رێ راگرتنا گه‌شتێن فڕۆكخانێن هه‌رێمێ، حه‌فتێ په‌رله‌مانتارێن عێراقێ نه‌شێن پشكداری د كۆمبوونا سبه‌هى یا په‌رله‌مانێ عێراقێ دا بكه‌ن.
دكتۆر ئه‌رده‌لان نوره‌دین، په‌رله‌مانتارێ كورد ل به‌غدا ب ئه‌ڤرۆ نیۆز راگه‌هاند” بڕیاره‌ سوبه‌ سێشه‌مبیێ په‌رله‌مانێ عێراقێ ده‌ست ب كۆمبوونێن خوه‌ بكه‌ت، به‌لێ ژبه‌ر راگرتنا گه‌شتێن فڕۆكخانێن هه‌رێمێ ئه‌م نه‌شێین پشكداریێ دكۆمبوونا په‌رله‌مانی دا بكه‌ین.
دكتۆر ئه‌رده‌لانی گۆتژی” بڕیاربوو نێزیكی 70 په‌رله‌مانتارێن كورد ئه‌ڤ شه‌ڤه‌ ب رێیا فڕۆكخانا هه‌ولێرێ بگه‌هینه‌ به‌غدا، به‌لێ گه‌شت هاتینه‌ راگرتن و نه‌شێین بچینه‌ به‌غدا و پشكداری كۆمبوونا سبه‌هی یا په‌رله‌مانی دا بكه‌ین، لێ هێشتا دیارنینه‌ دێ كۆمبوون ژبه‌ر نه‌چوونامه‌ هێته‌ راگرتن یانژی نه‌.

website security
WP Facebook Auto Publish Powered By : XYZScripts.com